Padma Purana · Chapter 2.68

yayātiruvāca-
adharmasya phalaṃ sūta śrutaṃ sarvaṃ mayā vibho /
dharmasyāpi phalaṃ brūhi śrotuṃ kautūhalaṃ mama

mātaliruvāca-
atha pāpairime yāṃti yamalokaṃ caturvidhāḥ /
saṃtrāsajananaṃ ghoraṃ vivaśāḥ sarvadehinaḥ

garbhasthairjāyamānaiśca bālaistaruṇamadhyamaiḥ /
puṃstrīnapuṃsakairvṛddhairyātavyaṃ jaṃtubhistataḥ

śubhāśubhaphalaṃ tatra dehināṃ pravicāryate /
citraguptādibhiḥ sarvairmadhyasthaiḥ sarvadarśibhiḥ

na tetra prāṇinaḥ saṃti ye na yāṃti yamakṣayam /
avaśyaṃ hi kṛtaṃ karma bhoktavyaṃ tadvicāritam

ye tatra śubhakarmāṇaḥ saumyacittādayānvitāḥ /
te narā yāṃti saumyena pathā yamaniketanam

yaḥ pradadyācca viprāṇāmupānatkāṣṭhapāduke /
sa vimānena mahatā sukhaṃ yāti yamālayam

chatradānena gacchaṃti pathā sābhreṇa dehinaḥ /
divyavastraparīdhānā yāṃti vastrapradāyinaḥ

śibikāyāḥ pradānena vimānena sukhaṃ vrajet /
sukhāsanapradānena sukhaṃ yāṃti yamālayam

ārāmakartā chāyāsu śītalāsu sukhaṃ vrajet /
yāṃti puṣpakayānena puṣpārāmapradāyinaḥ

devāyatanakartā ca yatīnāmāśramasya ca /
anāthamaṃḍapānāṃ ca krīḍanyāti gṛhottamaiḥ

devāgniguruviprāṇāṃ mātāpitrośca pūjakaḥ

vipreṣu dīneṣu guṇānviteṣu yacchraddhayā svalpamapi pradattam /
tatsarvakāmānsamupaiti loke śrāddhe ca dānaṃ pravadaṃti saṃtaḥ

śraddhādānena vijñeyamapi vālāgramātrakam /
yatpātrādi catuṣṭayaṃ śraddhā teṣu sadā mama

śraddhīyate sadā tasmācchraddhāyāstatphalaṃ bhavet /
guṇānviteṣu dīneṣu yacchatyāvasathānyapi

sa prayāti sarvakāmaṃ sthānaṃ paitāmahaṃ nṛpa /
śraddhayāyena viprāya dattaṃ kākiṇimātrakam

sasyāddivyatithirbhūpa devānāṃ kīrtivardhanaḥ /
tasmācchraddhānvitairdeyaṃ tatphalaṃ bhavati dhruvam

iti śrīpadmapurāṇe bhūmikhaṃḍe venopākhyāne pitṛtīrthavarṇane yayāticaritre'ṣṭaṣaṣṭitamo'dhyāyaḥ