પદ્મ પુરાણ · અધ્યાય 2.68

યયાતિરુવાચ-
અધર્મસ્ય ફલં સૂત શ્રુતં સર્વં મયા વિભો ।
ધર્મસ્યાપિ ફલં બ્રૂહિ શ્રોતું કૌતૂહલં મમ

માતલિરુવાચ-
અથ પાપૈરિમે યાંતિ યમલોકં ચતુર્વિધાઃ ।
સંત્રાસજનનં ઘોરં વિવશાઃ સર્વદેહિનઃ

ગર્ભસ્થૈર્જાયમાનૈશ્ચ બાલૈસ્તરુણમધ્યમૈઃ ।
પુંસ્ત્રીનપુંસકૈર્વૃદ્ધૈર્યાતવ્યં જંતુભિસ્તતઃ

શુભાશુભફલં તત્ર દેહિનાં પ્રવિચાર્યતે ।
ચિત્રગુપ્તાદિભિઃ સર્વૈર્મધ્યસ્થૈઃ સર્વદર્શિભિઃ

ન તેત્ર પ્રાણિનઃ સંતિ યે ન યાંતિ યમક્ષયમ્ ।
અવશ્યં હિ કૃતં કર્મ ભોક્તવ્યં તદ્વિચારિતમ્

યે તત્ર શુભકર્માણઃ સૌમ્યચિત્તાદયાન્વિતાઃ ।
તે નરા યાંતિ સૌમ્યેન પથા યમનિકેતનમ્

યઃ પ્રદદ્યાચ્ચ વિપ્રાણામુપાનત્કાષ્ઠપાદુકે ।
સ વિમાનેન મહતા સુખં યાતિ યમાલયમ્

છત્રદાનેન ગચ્છંતિ પથા સાભ્રેણ દેહિનઃ ।
દિવ્યવસ્ત્રપરીધાના યાંતિ વસ્ત્રપ્રદાયિનઃ

શિબિકાયાઃ પ્રદાનેન વિમાનેન સુખં વ્રજેત્ ।
સુખાસનપ્રદાનેન સુખં યાંતિ યમાલયમ્

આરામકર્તા છાયાસુ શીતલાસુ સુખં વ્રજેત્ ।
યાંતિ પુષ્પકયાનેન પુષ્પારામપ્રદાયિનઃ

દેવાયતનકર્તા ચ યતીનામાશ્રમસ્ય ચ ।
અનાથમંડપાનાં ચ ક્રીડન્યાતિ ગૃહોત્તમૈઃ

દેવાગ્નિગુરુવિપ્રાણાં માતાપિત્રોશ્ચ પૂજકઃ

વિપ્રેષુ દીનેષુ ગુણાન્વિતેષુ યચ્છ્રદ્ધયા સ્વલ્પમપિ પ્રદત્તમ્ ।
તત્સર્વકામાન્સમુપૈતિ લોકે શ્રાદ્ધે ચ દાનં પ્રવદંતિ સંતઃ

શ્રદ્ધાદાનેન વિજ્ઞેયમપિ વાલાગ્રમાત્રકમ્ ।
યત્પાત્રાદિ ચતુષ્ટયં શ્રદ્ધા તેષુ સદા મમ

શ્રદ્ધીયતે સદા તસ્માચ્છ્રદ્ધાયાસ્તત્ફલં ભવેત્ ।
ગુણાન્વિતેષુ દીનેષુ યચ્છત્યાવસથાન્યપિ

સ પ્રયાતિ સર્વકામં સ્થાનં પૈતામહં નૃપ ।
શ્રદ્ધયાયેન વિપ્રાય દત્તં કાકિણિમાત્રકમ્

સસ્યાદ્દિવ્યતિથિર્ભૂપ દેવાનાં કીર્તિવર્ધનઃ ।
તસ્માચ્છ્રદ્ધાન્વિતૈર્દેયં તત્ફલં ભવતિ ધ્રુવમ્

ઇતિ શ્રીપદ્મપુરાણે ભૂમિખંડે વેનોપાખ્યાને પિતૃતીર્થવર્ણને યયાતિચરિત્રેઽષ્ટષષ્ટિતમોઽધ્યાયઃ