Padma Purana · Chapter 2.63

sukarmovāca-
tayoścāpi dvijaśreṣṭha mātāpitrośca snātayoḥ /
putrasyāpi hi sarvāṃge pataṃtyaṃbukaṇā yadā

sarvatīrthasamaṃ snānaṃ putrasyāpi sujāyate /
patitaṃ vikalaṃ vṛddhamaśaktaṃ sarvakarmasu

vyādhitaṃ kuṣṭhinaṃ tātaṃ mātaraṃ ca tathāvidhām /
upācarati yaḥ putrastasya puṇyaṃ vadāmyaham

viṣṇustasya prasannātmā jāyate nātra saṃśayaḥ /
prayāti vaiṣṇavaṃ lokaṃ yadaprāpyaṃ hi yogibhiḥ

pitarau vikalau dīnau vṛddhāvetau gurū sutaḥ /
mahāgadena saṃprāptau parityajati pāpadhīḥ

putro narakamāpnoti dāruṇaṃ kṛmisaṃkulam /
vṛddhābhyāṃ ca samāhūto gurūbhyāmiha sāṃpratam

na prayāti suto bhūtvā tasya pāpaṃ vadāmyaham /
viṣṭhāśī jāyate mūḍho grāmaghroṇī na saṃśayaḥ

yāvajjanmasahasraṃ tu punaḥ śvā cābhijāyate /
putragehesthitau vṛddhau mātā ca janakastathā

abhojayitvā tāvannaṃ svayamatti ca yaḥ sutaḥ /
mūtraṃ viṣṭhāṃ sa bhuṃjīta yāvajjanmasahasrakam

kṛṣṇasarpo bhavetpāpī yāvajjanmaśatadvayam /
mātaraṃpitaraṃ vṛddhamavajñāya pravarttate

grāhopi jāyate duṣṭo janmakoṭiśatairapi /
tāvetau kutsate putraḥ kaṭukairvacanairapi

sa ca pāpī bhavedvyāghraḥ paścādṛkṣaḥ prajāyate /
mātaraṃpitaraṃ putro yo na manyeta duṣṭadhīḥ

kuṃbhīpāke vasettāvadyāvadyugasahasrakam /
nāsti mātṛsamaṃ tīrthaṃ putrāṇāṃ ca pituḥ samam

tāraṇāya hitāyaiva ihaiva ca paratra ca /
tasmādahaṃ mahāprājña pitṛdevaṃ prapūjaye

mātṛdevaṃ sarvadeva yogayogī tathābhavam /
mātṛpitṛprasādena saṃjātaṃ jñānamuttamam

trilokīyaṃ samastā tu saṃyātā mama vaśyatām /
arvācīnagatiṃ jāne devasyāsya mahātmanaḥ

vāsudevasya tasyaiva parācīnāṃ mahāmate /
sarvaṃ jñānaṃ samudbhūtaṃ pitṛmātṛprasādataḥ

ko na pūjayate vidvānpitaraṃ mātaraṃ tathā /
sāṃgopāṃgairadhītaistaiḥ śrutiśāstrasamanvitaiḥ

vedairapi ca kiṃ viprā pitā yena na pūjitaḥ /
mātā na pūjitā yena tasya vedā nirarthakāḥ

yajñaiśca tapasā vipra kiṃ dānaiḥ kiṃ ca pūjanaiḥ /
prayāti tasya vaiphalyaṃ na mātā yena pūjitā

na pitā pūjito yena jīvamāno gṛhe sthitaḥ /
eṣa putrasya vai dharmastathā tīrthaṃ nareṣviha

eṣa putrasya vai mokṣastathā janmaphalaṃ śubham /
eṣa putrasya vai yajño dānameva na saṃśayaḥ

pitaraṃ pūjayennityaṃ bhaktyā bhāvena tatparaḥ /
tasya jātaṃ samastaṃ tadyaduktaṃ pūrvameva hi

dānasyāpi phalaṃ tena tīrthasyāpi na saṃśayaḥ /
yajñasyāpi phalaṃ prāptaṃ mātā yenāpyupāsitā

pitā yena subhaktyā ca nityamevāpyupāsitaḥ /
tasya sarvā susaṃsiddhā yajñādyāḥ puṇyadāḥ kriyāḥ

etadarthaṃ samājñātaṃ dharmaśāstraṃ śrutaṃ mayā /
pitṛbhaktiparo nityaṃ bhavetputro hi pippala

tuṣṭe pitari saṃprāptaṃ yadurājñā purā sukham /
ruṣṭe pitari ca prāptaṃ mahatpāpaṃ purā śṛṇu

ruruṇā pauraveṇāpi pitrā śaptena bhūtale /
evaṃ jñānaṃ mayā cāptaṃ dvāvetau yadupāsitau

etayośca prasādena prāptaṃ phalamanuttamam

iti śrīpadmapurāṇe bhūmikhaṃḍe venopākhyāne mātāpitṛtīrtha-māhātmye triṣaṣṭitamo'dhyāyaḥ