પદ્મ પુરાણ · અધ્યાય 2.58

વિષ્ણુરુવાચ-
ક્રીડાપ્રયુક્તાસુ વનં પ્રવિષ્ટા વૈશ્યસ્ય ભાર્યા સુકલા સુતન્વી ।
દદર્શ સર્વં ગહનં મનોરમં તામેવ પપ્રચ્છ સખીં સતી સા

અરણ્યમેતત્પ્રવરં સુપુણ્યં દિવ્યં સખે કસ્ય મનોભિરામમ્ ।
સિદ્ધંસુકામૈઃ પ્રવરૈઃ સમસ્તૈઃ પપ્રચ્છ હર્ષાત્સુકલા સખીં તામ્

ક્રીડોવાચ-
એતદ્વનં દિવ્યગુણૈઃ પ્રયુક્તં સિદ્ધસ્વભાવૈઃ પરિભાવનેન ।
પુષ્પાકુલં કામફલોપયુક્તં વિપશ્ય સર્વં મકરધ્વજસ્ય

એવં વાક્યં તતઃ શ્રુત્વા હર્ષેણ મહતાન્વિતા ।
સમાલોક્ય મહદ્વૃત્તં કામસ્ય ચ દુરાત્મનઃ

વાયુના નીયમાનં તં સમાઘ્રાતિ ન સૌરભમ્ ।
વાતિ વાયુઃ સ્વભાવેન સૌરભેણ સમન્વિતઃ

તદ્બાણો વિશતેનાસાં યથા તથા સુલીલયા ।
સા ગંધં નૈવ ગૃહ્ણાતિ પુષ્પાણાં ચ વરાનના

ન ચાસ્વાદયતે સા તુ સુરસાન્સા મહાસતી ।
સ સખા કામદેવસ્ય રમમાણો વિનિર્જિતઃ

લજ્જિતઃ પરાઙ્મુખો ભૂત્વા ભૂં પપાત લવચ્છદૈઃ ।
ફલેભ્યો હિ સુપક્વેભ્યઃ પુષ્પમંજરિસંસ્કૃતઃ

લવરૂપોપતદ્ભૂમૌ રસસ્ત્વેષ તયા જિતઃ ।
મકરંદઃ સુદીનાત્મા ફલાદ્ભૂમિં તતઃ પુનઃ

ભક્ષ્યતે મક્ષિકાભિશ્ચ યથામૃતો રણે તથા ।
મક્ષિકાભક્ષ્યમાણસ્તુ પ્રવાહેન પ્રયાતિ સઃ

મંદંમંદં પ્રયાત્યેવ તં હસંતિ ચ પક્ષિણઃ ।
નાનારુતૈઃ પ્રચલંતિ સુખમાનંદનિર્ભરૈઃ

પ્રીત્યા શકુનયસ્તત્ર વનમધ્યનગસ્થિતાઃ ।
સુકલયા જિતો હ્યેષ નિમ્નં પંથાનમાશ્રિતઃ

પ્રીત્યા સમેતા રતિઃ કામભાર્યા ગત્વાબ્રવીત્સા સુકલાં વિહસ્ય ।
સ્વસ્ત્યસ્તુ તે સ્વાગતમેવ ભદ્રે રમસ્વ પ્રીત્યા નયનાભિરામમ્

તે રૂપમિષ્ટમમલમિંદ્રસ્યાપિ મહાત્મનઃ ।
યદેષ્ટં તે તદા બ્રૂહિ સમાનેષ્યે ન સંશયઃ

સૂત ઉવાચ-
વદંત્યૌ તે સ્ત્રિયૌ દૃષ્ટ્વા શ્રુત્વોવાચ સુભાષિતમ્ ।
રતિં પ્રતિગૃહીત્વા મે ગતો ભર્ત્તા મહામતિઃ

યત્ર મે તિષ્ઠતે ભર્ત્તા તત્રાહં પતિસંયુતા ।
તત્ર કામશ્ચ મે પ્રીતિરયં કાયો નિરાશ્રયઃ

દ્વે અપ્યુક્તં સમાકર્ણ્ય રતિપ્રીતી વિલજ્જિતે ।
વ્રીડમાને ગતે તે દ્વે યત્ર કામો મહાબલઃ

ઊચતુસ્તં મહાવીરમિંદ્રકાય સમાશ્રિતમ્ ।
ચાપમાકર્ષમાણં તં નેત્રલક્ષ્યં મહાબલમ્

દુર્જયેયં મહાપ્રાજ્ઞ ત્યજ પૌરુષમાત્મનઃ ।
પતિકામા મહાભાગા પતિવ્રતા સદૈવ સા

કામ ઉવાચ-
અનયા લોક્યતે રૂપમિંદ્રસ્યાસ્ય મહાત્મનઃ ।
યદિ દેવિ તદા ચાહં હનિષ્યામિ ન સંશયઃ

અથ વેષધરો દેવો મહારૂપઃ સુરાધિપઃ ।
સ તયાનુગતસ્તૂર્ણં પરયા લીલયા તદા

સર્વભોગસમાકીર્ણઃ સર્વાભરણશોભિતઃ ।
દિવ્યમાલ્યાંબરધરો દિવ્યગંધાનુલેપનઃ

તયા રત્યા સમાયાતો યત્રાસ્તે પતિદેવતા ।
પ્રત્યુવાચ મહાભાગાં સુકલાં સત્યચારિણીમ્

પૂર્વં દૂતી સમક્ષં તે પ્રીત્યા ચ પ્રહિતા મયા ।
કસ્માન્ન મન્યસે ભદ્રે ભજંતં ત્વામિહાગતમ્

સુકલોવાચ-
રક્ષાયુક્તાસ્મિ ભદ્રં તે ભર્તુઃ પુત્રૈર્મહાત્મભિઃ ।
એકાકિનીસહાયૈશ્ચ નૈવ કસ્ય ભયં મમ

શૂરૈશ્ચ પુરુષાકારૈઃ સર્વત્ર પરિરક્ષિતા ।
નાતિ પ્રસ્તાવયે વક્તું વ્યગ્રા કર્મણિ તસ્ય ચ

યાવત્પ્રસ્યંદતે નેત્રં તાવત્કાલં મહામતે ।
ભવાન્ન લજ્જતે કસ્માદ્રમમાણો મયા સહ

ભવાન્કો હિ સમાયાતો નિર્ભયો મરણાદપિ ।
ઇંદ્ર ઉવાચ-
ત્વામેવં હિ પ્રપશ્યામિ વનમધ્યે સમાગતામ્

સમાખ્યાતાસ્ત્વયા શૂરા ભર્તુશ્ચ તનયાઃ પુનઃ ।
કથં પશ્યામ્યહં તાવદ્દર્શયસ્વ મમાગ્રતઃ

સુકલોવાચ-
સનિજસકલવર્ગસ્યાધિપત્યે નિવેશ્ય ધૃતિમતિગતિબુદ્ધ્ય્ખ્યૈસ્તુ સંન્યસ્ય સત્યમ્ ।
અચલસકલધર્મો નિત્યયુક્તો મહાત્મા મદનસબલધર્માત્મા સદામાં જુગોપ

મામેવં પરિરક્ષતે દમગુણૈઃ શૌચૈસ્તુ ધર્મઃ સદા સત્યં પશ્ય સમાગતં મમ પુરઃ શાંતિક્ષમાભ્યાંયુતમ્ ।
બોધશ્ચાતિમહાબલઃ પૃથુયશા યો માં ન મુંચેત્કદા બદ્ધાહં દૃઢબંધનૈઃ સ્વગુણજૈઃ સાંનિધ્યમેવં ગતઃ

રક્ષાયુક્તાઃ કૃતાઃ સર્વે સત્યાદ્યા મમ સાંપ્રતમ્ ।
ધર્મલાભાદિકાઃ સર્વે દમબુદ્ધિપરાક્રમાઃ

મામેવં હિ પ્રરક્ષંતિ કિં માં પ્રાર્થયસે બલાત્ ।
કો ભવાન્નિર્ભયો ભૂત્વા દૂત્યા સાર્ધં સમાગતઃ

સત્યં ધર્મસ્તથા પુણ્યં જ્ઞાનાદ્યાઃ પ્રબલાસ્તથા ।
મમ ભર્તુઃ સહાયાશ્ચ તે માં રક્ષંતિ વેશ્મનિ

અહં રક્ષાયુતા નિત્યં દમશાંતિપરાયણા ।
ન માં જેતું સમર્થશ્ચ અપિ સાક્ષાચ્છચીપતિઃ

યદિ વા મન્મથો વાપિ સમાગચ્છતિ વીર્યવાન્ ।
દંશિતાહં સદા સત્યં સત્યકેનૈવ નાન્યથા

નિરર્થકાસ્તસ્ય બાણા ભવિષ્યંતિ ન સંશયઃ ।
ત્વામેવં હિ હનિષ્યંતિ ધર્માદયો મહાભટાઃ

દૂરં ગચ્છ પલાયત્વમત્ર મા તિષ્ઠ સાંપ્રતમ્ ।
વાર્યમાણો યદા તિષ્ઠેર્ભસ્મીભૂતો ભવિષ્યસિ

ભર્ત્રા વિના નિરીક્ષેત મમ રૂપં યદા ભવાન્ ।
યથા દારુ દહેદગ્નિસ્તથા ધક્ષ્યામિ નાન્યથા

એવં શ્રુત્વા સહસ્રાક્ષો મન્મથસ્યાપિ સમ્મુખમ્ ।
પશ્ય પૌરુષમેતસ્યા યુધ્યસ્વ નિજપૌરુષૈઃ

યથાગતાસ્તથા સર્વે મહાશાપભયાતુરાઃ ।
સ્વંસ્વં સ્થાનં મહારાજ ઇંદ્રાદ્યાઃ પ્રયયુસ્તદા

ગતેષુ તેષુ સર્વેષુ સુકલા સા પતિવ્રતા ।
સ્વગૃહં પુણ્યસંયુક્તા પતિધ્યાનેન ચાગતા

સ્વગૃહં પુણ્યસંયુક્તં સર્વતીર્થમયં તદા ।
સર્વયજ્ઞમયં રાજન્સંપ્રાપ્તા પતિદેવતા

ઇતિ શ્રીપદ્મપુરાણે ભૂમિખંડે વેનોપાખ્યાને સુકલાચરિત્રેષ્ટપંચાશત્તમોઽધ્યાયઃ