Padma Purana · Chapter 2.55

viṣṇuruvāca-
bhāvaṃ viditvā surarāṭca tasyāḥ provāca kāmaṃ purataḥ sthitaṃ saḥ /
na cāsti śakyā smara te jayāya satyātmakadhyāna sudaṃśitā satī

dharmākhya cāpaṃ svakare gṛhītvā jñānābhidhānaṃ varameva bāṇam /
yoddhuṃ raṇe saṃprati saṃsthitā satī vīro yathā darpitavīryabhāvaḥ

jigīṣayeyaṃ puruṣārthameva tvamātmanaḥ kuruṣe pauruṣaṃ tu /
tvāmadya jetuṃ samare samarthā yadbhāvyamevaṃ tadihaiva ciṃtyam

dagdhosi pūrvaṃ tvamihaiva śaṃbhunā mahātmanā tena samaṃ virodham /
kṛtvā phalaṃ tasya vikarmaṇaśca jātosyanaṃgaḥ smara satyameva

yathā tvayā karma kṛtaṃ purā smara phalaṃ tu prāptaṃ tu tathaiva tīvram /
sukutsitāṃ yonimavāpsyasi dhruvaṃ sādhvyānayā sārdhamihaiva kathyase

ye jñānavaṃtaḥ puruṣā jagattraye vairaṃ prakurvanti mahātmabhiḥ samam /
bhuṃjanti te duṣkṛtamevatatphalaṃ duḥkhānvitaṃ rūpavināśanaṃ ca

vyāghuṣya āvāṃ tu vrajāva kāma enāṃ parityajya satīṃ prayujya /
satyāḥ prasaṃgena purā mayā tu labdhaṃ phalaṃ pāpamayaṃ tvasahyam

tvameva jānāsi caritrametacchaptosmi tenāpi ca gautamena /
jātaśca meṣavṛṣaṇaḥ sadā hyahaṃ bhavāngato māṃ tu vihāya tatra

tejaḥ prabhāvo hyatulaḥ satīnāṃ dhātā samarthaḥ sahituṃ na sūryaḥ /
sukutsitaṃ rūpamidaṃ tu rakṣetpurānusūyā muninā hi śaptam

nirudhya sūryaṃ parivegavaṃtamudyaṃtamevaṃ prabhayā sudīptam /
bhartuśca mṛtyuṃ paribādhamānaṃ māṃḍavyaśāpasya ca kauṃḍinasya

atreḥ priyā satyapativratā tayā svaputratāṃ devatrayaṃ hi nītam /
na kiṃ purā manmatha te śrutaṃ sadā saṃskārayuktāḥ prabhavaṃti satyaḥ

sāvitrīnāmnī dyumatsenaputrī nītaṃ priyaṃ sā punarānināya /
yamādihaivāśvapateḥ suputraṃ satī tvamevaṃ parisaṃśrutaṃ ca

agneḥ śikhāṃ kaḥ parisaṃspṛśedvai tareddhikaḥ sāgarameva mūḍhaḥ /
gale tu baddhāsu śilāṃ bhujābhyāṃ ko vā satīṃ vaśyati vītarāgām

ukte tu vākye bahunītiyukte iṃdreṇa kāmasya suśikṣaṇārtham /
ākarṇya vākyaṃ makaradhvajastu uvāca deveṃdramathainameva

kāma uvāca-
tavātideśādahamāgato vai dhairyaṃ suhṛttvaṃ puruṣārthameva /
tyaktvā tadarthaṃ paribhāṣase māṃ niḥsatvarūpaṃ bahubhītiyuktam

vyābuddhi yāsyāmi yadā sureśasyāllokamadhye mama kīrtināśaḥ /
ūḍhiṃkaromānavihīna eva sarve vadiṣyaṃtyanayā jitaṃ mām

ye vai jitā devagaṇāśca dānavāḥ pūrvaṃ munīṃdrāstapasaḥ prayuktāḥ /
hāsyaṃ kariṣyaṃti mamāpi sadyo nāryā jito manmatha eṣa bhīmaḥ

tasmātprayāsyāmi tvayaiva sārdhamasyā balaṃ mānamataḥ sureśa /
tejaśca dhairyaṃ pariṇāśayiṣye kasmādbhavānatra bibheti śakra

saṃbodhya caivaṃ sa surādhināthaṃ cāpaṃ gṛhītaṃ saśaraṃ supuṣpam /
uvāca krīḍāṃ purataḥ sthitāṃ tāṃ vidhāya māyāṃ bhavatī prayātu

vaiśyasya bhāryāṃ sukalāṃ supuṇyāṃ satyesthitāṃ dharmavidāṃ guṇajñām /
ito hi gatvā kuru kāryamuktaṃ sāhāyyarūpaṃ ca priye sakhe śṛṇu

krīḍāṃ samābhāṣya tato manobhavastvaṃte sthitāṃ prītimathāhvayatpunaḥ /
kāryaṃ bhavatyā mamakāryamuttamame tāṃ susnehaiḥ paribhāvayatvam

iṃdraṃ hi dṛṣṭvā sukalā yathā bhavetsnehānugā cāruvilocaneyam /
taistaiḥ prabhāvairguṇavākyayuktairnayasva vaśyaṃ ca priye sakhe śṛṇu

bho bhoḥ sakhe sādhaya gaccha śīghraṃ māyāmayaṃ naṃdanarūpayuktam /
puṣpopayuktaṃ ca phalapradhānaṃ ghuṣṭaṃ rutaiḥ kokilaṣaṭpadānām

āhūya vīraṃ makaraṃdameva rasāyanaṃ svāduguṇairupetam /
sahānilādyairnijakarmayuktaiḥ saṃpreṣayitvā punareva kāmam

evaṃ samādiśya mahatsasainyaṃ trailokyasaṃmohakaraṃ tu kāmaḥ /
cakre prayāṇaṃ surarājasārdhaṃ saṃmohanāyaiva mahāsatīṃ tām

iti śrīpadmapurāṇe bhūmikhaṃḍe venopākhyāne sukalācaritre
paṃcapaṃcāśattamo'dhyāyaḥ