Scripture Library

Padma Purana · Chapter 2.105

2.105.1

kuñjala uvāca-
gatā sā nandanavanaṃ sakhībhiḥ saha krīḍitum/
tatrākarṇya mahadvākyamapriyaṃ tu tadā pituḥ

2.105.2

cāraṇānāṃ susiddhānāṃ bhāṣatāṃ harṣaṇena tu/
āyorgehe mahāvīryo viṣṇutulyaparākramaḥ

2.105.3

bhaviṣyati sutaśreṣṭho huṇḍasyāṃtaṃ kariṣyati /
evaṃvidhaṃ mahadvākyamapriyaṃ duḥkhadāyakam

2.105.4

samākarṇya samāyātā pituragre niveditam /
samāsena tayā tasya purato duḥkhadāyakam

2.105.5

pituragre jagādātha pitā śrutvā sa vismitaḥ /
śāpamaśokasuṃdaryāḥ sasmāra ca purākṛtam

2.105.6

etasyārthe tapastepe seyaṃ cāśokasuṃdarī /
garbhasya nāśanāyaiva iṃdumatyāḥ sa dānavaḥ

2.105.7

vicakre udyamaṃ duṣṭaḥ kālākṛṣṭo durātmavān /
chidrānveṣī tato bhūtvā iṃdumatyāstu nityaśaḥ

2.105.8

yadā paśyati tāṃ rājñīṃ rūpaudāryaguṇānvitām /
divyatejaḥ samāyuktāṃ rakṣitāṃ viṣṇutejasā

2.105.9

divyena tejasā yuktāṃ sūryabiṃbopamāṃ tu tām /
tasyāḥ pārśve mahābhāga rakṣaṇārthaṃ sthitaḥ sadā

2.105.10

dūrātsa dānavo duṣṭastasyāśca bahudarśayan /
nānāvidyāṃ mahogrāṃ ca bhīṣikāṃ suvibhīṣikām

2.105.11

garbhasya tejasā yuktā rakṣitā viṣṇutejasā /
bhayaṃ na jāyate tasyā manasyeva kadāpunaḥ

2.105.12

viphalo dānavo jāta udyamaśca nirarthakaḥ /
manīpsitaṃ naiva jātaṃ huṃḍasyāpi durātmanaḥ

2.105.13

evaṃ varṣaśataṃ pūrṇaṃ paśyamānasya tasya ca /
prasūtā sā hi putraṃ ca svarbhānostanayā tadā

2.105.14

rātrāveva sutaśreṣṭha tasyāḥ putro vyajāyata /
tejasātīva bhātyeṣa yathā sūryo nabhastale

2.105.15

sūta uvāca-
atha dāsī mahāduṣṭā kācitsūtigṛhāgatā /
aśaucācārasaṃyuktā mahāmaṃgalavādinī

2.105.16

tasyāḥ sarvaṃ samājñāya sa huṃḍo dānavādhamaḥ /
dāsyā aṃgaṃ praviśyaiva praviṣṭaścāyumandire

2.105.17

mahājane prasupte ca nidrayātīvamohite /
taṃ putraṃ devagarbhābhamapahṛtya bahirgataḥ

2.105.18

kāṃcanākhyapure prāptaḥ svakīye dānavādhamaḥ /
samāhūya priyāṃ bhāryāṃ vipulāṃ vākyamabravīt

2.105.19

vadhasvainaṃ mahāpāpaṃ bālarūpaṃ ripuṃ mama /
paścātsūdasya vai haste bhojanārthaṃ pradīyatām

2.105.20

nānābhedairvibhedaiśca pācayasva hi nirghṛṇam /
sūdahastānmahābhāge paścādbhokṣye na saṃśayaḥ

2.105.21

vākyamākarṇya tadbharturvipulā vismitābhavat /
kasmānnirghṛṇatāṃ yāti bharttā mama suniṣṭhuraḥ

2.105.22

sarvalakṣaṇasaṃpannaṃ devagarbhopamaṃ sutam /
kasya kasmātprabhakṣyeta kṣamāhīnaḥ sunirghṛṇaḥ

2.105.23

ityevaṃ ciṃtayāmāsa kāruṇyena samanvitā /
punaḥ papraccha bhartāraṃ kasmādbhakṣyasi bālakam

2.105.24

kasmādbhavasi saṃkruddho atīva nirapatrapaḥ /
sarvaṃ me kāraṇaṃ brūhi tattvena danujeśvara

2.105.25

ātmadoṣaṃ ca vṛttāṃtaṃ samāsena niveditam /
śāpamaśokasuṃdaryā huṃḍenāpi durātmanā

2.105.26

tayā jñātaṃ tu tatsarvaṃ kāraṇaṃ dānavasya vai /
vadhyo'yaṃ bālakaḥ satyaṃ no vā bharttā mariṣyati

2.105.27

ityevaṃ pravicāryaiva vipulā krodhamūrcchitā /
mekalāṃ tu samāhūya sairaṃdhrīṃ vākyamabravīt

2.105.28

jahyenaṃ bālakaṃ duṣṭaṃ mekale'dya mahānase /
sūdahaste pradehi tvaṃ huṇḍabhojanahetave

2.105.29

mekalā bālakaṃ gṛhya sūdamāhūya cābravīt /
rājādeśaṃ kuruṣvādya pacasvainaṃ hi bālakam

2.105.30

evamākarṇitaṃ tena sūdenāpi mahātmanā /
ādāya bālakaṃ hastācchastramudyamya codyataḥ

2.105.31

eṣa vai devadevasya dattātreyasya tejasā /
rakṣitastvāyuputraśca sa jahāsa punaḥ punaḥ

2.105.32

hasaṃtaṃ taṃ samālokya sa sūdaḥ kṛpayānvitaḥ /
sairaṃdhrī ca kṛpāyuktā sūdaṃ taṃ pratyabhāṣata

2.105.33

naiṣa vadhyastvayā sūda śiśureva mahāmate /
divyalakṣaṇasaṃpannaḥ kasya jātaḥ susatkule

2.105.34

sūda uvāca-
satyamuktaṃ tvayā bhadre vākyaṃ vai kṛpayānvitam /
rājalakṣaṇasaṃpanno rūpavānkasya bālakaḥ

2.105.35

kasmādbhokṣyati duṣṭātmā huṃḍo'yaṃ dānavādhamaḥ /
yena vai rakṣito vaṃśaḥ pūrvameva sukarmaṇā

2.105.36

āpatsvapi sa jīveta durgeṣu nānyathā bhavet /
siṃdhuvegena nītastu vahnimadhye gato'thavā

2.105.37

jīvatenātra saṃdeho yaśca karmasahāyavān /
tasmāddhi kriyate karma dharmapuṇyasamanvitam

2.105.38

āyuṣmaṃto narāstena pravadaṃti sukhaṃ tataḥ /
tārakaṃ pālakaṃ karma rakṣate jāgrate hi tat

2.105.39

muktidaṃ jāyate nityaṃ maitrasthānapradāyakam /
dānapuṇyānvitaṃ karma priyavākyasamanvitam

2.105.40

upakārayutaṃ yaśca karoti śubhakṛttadā /
tameva rakṣate karma sarvadaiva na saṃśayaḥ

2.105.41

anyayoniṃ prayāti sma preritaḥ svena karmaṇā /
kiṃ karoti pitā mātā anye svajanabāndhavāḥ

2.105.42

karmaṇā nihato yastu na syustasya ca rakṣaṇe /
sūta uvāca-
yenaiva karmaṇā caiva rakṣitaścāyunaṃdanaḥ

2.105.43

tasmātkṛpānvito jātaḥ sūdaḥ karmavaśānugaḥ /
sairaṃdhrī ca tathā jātā preritā tasya karmaṇā

2.105.44

dvābhyāmeva sutaścāyo rakṣitaścārulakṣaṇaḥ /
rātrāveva praṇīto'sau tasmādgehānmahāśrame

2.105.45

vaśiṣṭhasyāśrame puṇye sairaṃdhryā puṇyakarmaṇā /
śubhe parṇakuṭīdvāre tasminneva mahāśrame

2.105.46

gatā sā svagṛhaṃ paścānnikṣipya bālakottamam /
eṇaṃ nipātya sūdena pācitaṃ māṃsameva hi

2.105.47

bhojayitvā sudaityeṃdro huṃḍo hṛṣṭobhavattadā /
śāpamaśokasuṃdaryā moghaṃ mene tadāsuraḥ

2.105.48

harṣeṇa mahatāviṣṭaḥ sa huṃḍo dānaveśvaraḥ /
kuṃjala uvāca-
prabhāte vimale jāte vaśiṣṭho munisattamaḥ

2.105.49

bahirgato hi dharmātmā kuṭīdvārātprapaśyati /
saṃpūrṇaṃ bālakaṃ dṛṣṭvā divyalakṣaṇasaṃyutam

2.105.50

saṃpūrṇeṃdupratīkāśaṃ suṃdaraṃ cārulocanam /
vaśiṣṭha uvāca-
paśyaṃtu munayaḥ sarve yūyamāgatya bālakam

2.105.51

kasya kena samānītaṃ rātrau dvārāṃgaṇe mama /
devagaṃdharvagarbhābhaṃ rājalakṣaṇasaṃyutam

2.105.52

kaṃdarpakoṭisaṃkāśaṃ paśyaṃtu munayo'malam /
mahākautukasaṃyuktā hṛṣṭā dvijavarāstataḥ

2.105.53

samapaśyansutaṃ te tu āyoścaiva mahātmanaḥ /
vaśiṣṭhaḥ sa tu dharmātmā jñānenālokya bālakam

2.105.54

āyuputraṃ samājñātaṃ caritreṇa samanvitam /
vṛttāṃtaṃ tasya duṣṭasya huṇḍasyāpi durātmanaḥ

2.105.55

kṛpayā brahmaputrastu samutthāya subālakam /
karābhyāmatha gṛhṇāti yāvaddvijo varottamaḥ

2.105.56

tāvatpuṣpasuvṛṣṭiṃ ca cakrurdevāḥ sutopari /
lalitaṃ susvaraṃ gītaṃ jagurgaṃdharvakinnarāḥ

2.105.57

ṛṣayo vedamaṃtraistu stuvaṃti nṛpanaṃdanam /
vaśiṣṭhastaṃ samālokya varaṃ vai dattavāṃstadā

2.105.58

nahuṣetyeva te nāma khyātaṃ loke bhaviṣyati /
huṣito naiva tenāpi bālabhāvairnarādhipa

2.105.59

tasmānnahuṣa te nāma devapūjyo bhaviṣyasi/
jātakarmādikaṃ karma tasya cakre dvijottamaḥ

2.105.60

vratadānaṃ visargaṃ ca guruśiṣyādilakṣaṇam/
vedaṃ cādhītya saṃpūrṇaṃ ṣaḍaṃgaṃ sapadakramam

2.105.61

sarvāṇyeva ca śāstrāṇi adhītya dvijasattamāt/
vaśiṣṭhācca dhanurvedaṃ sarahasyaṃ mahāmatiḥ

2.105.62

śastrāṇyastrāṇi divyāni grāhamokṣayutāni ca/
jñānaśāstrādikaṃ nyāya rājanītiguṇādikān

2.105.63

vaśiṣṭhādāyuputraśca śiṣyarūpeṇa bhaktimān/
evaṃ sa sarvaniṣpanno nāhuṣaścātisuṃdaraḥ

2.105.64

vaśiṣṭhasya prasādācca cāpabāṇadharobhavat

2.105.105

iti śrīpadmapurāṇe bhūmikhaṃḍe venopākhyāne gurutīrthamāhātmye cyavanacaritre paṃcottaraśatatamo'dhyāyaḥ

Original text: padmapurāṇam · Sanskrit Wikisource contributors · Sanskrit Wikisource · CC BY-SA 4.0