Padma Purana · Chapter 2.102

kuñjala uvāca-
sarvaṃ vatsa pravakṣyāmi yattvayoktaṃ mamādhunā/
ubhayordevanaṃ yattu yasmājjātaṃ dvijottama

ekadā tu mahādevī pārvatī pramadottamā/
krīḍamānā mahātmānamīśvaraṃ vākyamabravīt

mamorasi mahādeva jātaṃ mahatsu dohadam/
darśayasva mamāgre tvaṃ kānanaṃ kānanottamam

śrīmahādevauvāca-★
evamastu mahādevi nandanaṃ devasaṅkulam /
darśayiṣyāmi te puṇyaṃ dvijasiddhaniṣevitam

evamābhāṣya tāṃ devīṃ tayā saha gaṇaistataḥ /
sa gantumutsuko devo nandanaṃ vanameva tu

sarvagaṃ sundaraṃ divyapṛṣṭhamābharaṇairyutam/
ghaṃṭāmālābhisaṃyuktaṃ kiṅkiṇījālamālinam

cāmaraiḥ paṭṭasūtraiśca muktāmālāsuśobhitam/
haṃsacaṃdrapratīkāśaṃ vṛṣabhaṃ cārulakṣaṇam

samārūḍho mahādevo gaṇakoṭisamāvṛtaḥ/
nandibhṛṅgimahākālaskandacaṇḍamanoharāḥ

vīrabhadro gaṇeśaśca puṣpadanto maṇīśvaraḥ /
atibalaḥsubalo nāma meghanādo ghaṭāvahaḥ

ghaṇṭākarṇaśca kālindaḥ pulindo vīrabāhukaḥ/
keśarī kiṃkaro nāma caṇḍahāsaḥ prajāpatiḥ

ete cānye ca bahavaḥ sanakādyāstapobalāḥ/
gaṇaiśca koṭisaṃkhyātaiḥ saśivaḥ parivāritaḥ

nandanaṃ vanamevāpi sevitaṃ devakinnaraiḥ/
praviveśa mahādevo gaṇairdevyāsamanvitaḥ

darśayāmāsa deveśo girijāyai suśobhanam /
nānāpādapasampannaṃ bahupuṣpasamākulam

divyaṃ rambhāvanākīrṇaṃ puṣpavadbhistu campakaiḥ /
mallikābhiḥ supuṣpābhirmālatījālasaṃkulam

nityaṃ puṣpitaśākhābhiḥ pāṭalānāṃ vanottamaiḥ/
rājamānaṃ mahāvṛkṣaiścaṃdanaiścārugaṃdhibhiḥ

devadāruvanairjuṣṭaṃ tuṃgavṛkṣaiḥ samākulam/
saralairnālikeraiśca tadvatpūgīphaladrumaiḥ

kharjūrapanasairdivyaiḥ phalabhārāvanāmitaiḥ/
parimalodgārasaṃyuktairguruvṛkṣasamākulam

agnitejaḥ samābhāsaiḥ saptaparṇaiḥ suśobhitam /
rājavṛkṣaiḥ kadaṃbaiśca puṣpaśobhānvitaṃ sadā

jaṃbūniṃbamahāvṛkṣairmātuligaiḥ samākulam /
nāraṃgaiḥ siṃdhuvāraiśca priyālaiḥ śālatiṃdukaiḥ

uduṃbaraiḥ kapitthaiśca jaṃbūpādapaśobhitam /
lakucaiḥ puṣpasaugaṃdhaiḥ sphuṭanāgaiḥ samākulam

cūtaiśca phalarājādyairnīlaiścaiva ghanopamaiḥ /
nīlaiḥ śālavanairdivyairjālānāṃ tu vanaistataḥ

tamālaistu viśālaiśca sevitaṃ tapanopamaiḥ /
śobhitaṃ naṃdanaṃ puṇyaṃ śivena paridarśitam

śobhitaṃ ca drumaiścānyaiḥ sarvairnīlavanopamaiḥ /
sarvakāmaphalopetaiḥ kalyāṇaphaladāyakaiḥ

kalpadrumairmahāpuṇyaiḥ śobhitaṃ naṃdanaṃ vanam /
nānāpakṣininādaiśca saṃkulaṃ madhurasvaraiḥ

kokilānāṃ rutaiḥ puṇyairudghuṣṭaṃ madhukāribhiḥ /
makaraṃdavilubdhānāṃ pakṣiṇāṃ rutanāditam

nānavṛkṣaiḥ samākīrṇaṃ nānāmṛgagaṇāyutam /
vṛkṣebhyo vividhaiḥ puṣpaissaugaṃdhaiḥ patitairbhuvi

sā ca bhū rājate putra pūjite vasugaṃdhibhiḥ /
tatra vāpyo mahāpuṇyāḥ padmasaugaṃdhanirmalāḥ

toyaistāḥ pūritāḥ putra haṃsakāraṃḍasevitāḥ/
taḍāgaiḥ sāgaraprakhyaistoyasaugaṃdhapūjitaiḥ

naṃdanaṃ bhāti sarvatra gaṇairapsarasāṃ mahat/
vimānaiḥ kalaśaiḥ śubhrairhemadaṃḍaiḥ suśobhanaiḥ

naṃdano vanarājastu prāsādaistu sudhānvitaiḥ/
yatra tatra prabhātyeva kinnarāṇāṃ mahāgaṇaiḥ

gaṃdharvairapsarobhiśca surūpābhirdvijottama /
devatānāṃ vinodaiśca munivṛṃdaiḥ suyogibhiḥ

sarvatra śuśubhe puṇyasaṃsthānaṃ naṃdanasya ca

evaṃ samālokya mahānubhāvo bhavaḥ sudevyāsahito mahātmā/
śrīnaṃdanaṃ puṇyavatāṃ nivāsaṃ sukhākaraṃ śāṃtiguṇopapannam

ādityatejaḥ samatejasāṃ gaṇaiḥ prabhāti vai raśmibhirjātarūpaḥ/
puṣpaiḥ phalaiḥ kāmaguṇopapannaḥ kalpadrumo naṃdanakānanepi

evaṃvidhaṃ pādaparājameva saṃvīkṣya devī ca śivaṃ babhāṣe/
asyābhidhānaṃ kathayasva nātha sarvasya puṇyasya nagasya puṇyam

tejasvināṃ sūryavaraḥ samaṃtātsa deva devīṃ ca śivo babhāṣe /
śiva uvāca-
asya pratiṣṭhā mahatī śubhākhyā deveṣu mukhyo madhusūdanaśca

nadīṣu mukhyā suranimnagāpi visṛṣṭikarttāpi yathaiva dhātā /
sukhāvahānāṃ ca yathā sucaṃdro bhūteṣu mukhyā ca yathaiva pṛthvī

nageṃdrarājo hi yathā nagānāṃ jalāśayeṣveva yathā samudraḥ /
mahauṣadhīnāmiva devi cānnaṃ mahīdharāṇāṃ himavānyathaiva

vidyāsu madhye ca yathātmavidyā lokeṣu sarveṣu yathā nareṃdraḥ/
tathaiva mukhyastarurāja eṣa sarvātithirdevapateḥ priyoyam

śrīpārvatyuvāca-
guṇānnu śaṃbho mama kīrttayasva vṛkṣādhipasyāsya śubhānsupuṇyān /
ākarṇya devo vacanaṃ babhāṣe devyāstu sarvaṃ sutarorhi tasya

yaṃ yaṃ kalpayaṃti supuṇyadevā devopamā devavarāśca kāṃte /
taṃ taṃ hi tebhyaḥ pradadāti vṛkṣaḥ kalpadrumo nāma variṣṭha eṣaḥ

asmācca sarve prabhavaṃti puṇyā duḥprāpyamatraiva tapodhikāste/
jīvādhikaṃ ratnamayaṃ sudivyaṃ devāstu bhuṃjaṃti mahāpradhānāḥ

śuśrāva devī vacanaṃ śivasya āścaryabhūtaṃ manasā viciṃtya /
tasyānumatyā parikalpitaṃ ca strīratnamekaṃ suguṇaṃ surūpam

sarvāṃgarūpāṃ saguṇāṃ surūpāṃ tasmātsuvṛkṣādgirijā pralebhe/
viśvasya mohāya yathopaviṣṭā sāhāyyarūpā makaradhvajasya

krīḍānidhānaṃ sukhasiddhirūpaṃ sarvopapannā kamalāyatākṣī /
padmānanā padmakarā supadmā cāmīkarasyāpi yathā sumūrtiḥ

prabhāsu tadvadvimalā sutejā līlā sutejāśca sukuṃcitāste /
pralaṃbakeśāḥ parisūkṣmabaddhāḥ puṣpaiḥ sugaṃdhaiḥ parilepitāśca

prabaddhakuṃtā dṛḍhakeśabaṃdhairvibhāti sā rūpavareṇa bālā/
sīmaṃtamārge ca muktāphalānāṃ mālā vibhātyeva yathā tarūṇām

sīmaṃtamūle tilakaṃ sudevyā yathodito daityaguruḥ satejāḥ /
bhāleṣu padme mṛganābhipadma samutthatejaḥ prakarairvibhāti

sīmaṃtamūle tilakasya tejaḥ prakāśayedrūpaśriyaṃ suloke /
keśeṣu muktāphalake ca bhāle tasyāḥ suśobhāṃ vikaroti nityam

yathā sucaṃdraḥ paribhāti bhāsā sā ramyaceṣṭeva vibhāti tadvat/
saṃpūrṇacaṃdropi yathā vibhāti jyotsnāvitānena himāṃśujālaḥ

tasyāstu vaktraṃ paribhāti tadvacchobhākaraṃ viśvaviśāradaṃ ca/
himāṃśurevāpi kalaṃkayuktaḥ saṃkṣīyate nityakalāvihīnaḥ

saṃpūrṇamastyeva sadaiva hṛṣṭaṃ tasyāstu vaktraṃ pariniṣkalaṃkam /
gaṃdhaṃ vikāśaṃ kamale svakīyaṃ tataḥ samālokya sukhaṃ na lebhe

padmānanā sarvaguṇopapannā madīyabhāvaiḥparinirmiteyam/
gaṃdhaṃ svakīyaṃ tu vipaśya padmaṃ tasyā mukhādvāti jagatsamīraḥ

lajjābhiyuktaḥ sahasā babhūva jalaṃ samāśritya sadaiva tiṣṭhati /
katimatiniyatabuddhyāsau dhiyo vadaṃti sumadananṛpateḥ kośaṃ samudra kalābhiḥ

suvaradaśanaratnairhāsyalīlābhiyuktā aruṇaadharabiṃbaṃśobhamānastu āsyaḥ

subhrūḥ sunāsikā tasyāḥ sukarṇau ratnabhūṣitau /
hemakāṃtisamopetau kapolau dīptisaṃyutau

rekhātrayaṃ praśobheta grīvāyāṃ parisaṃsthitam /
saubhāgyaśīlaśṛṃgāraistisro rekhā ihaiva hi

sustanau kaṭhinau pīnau vartulākārasannibhau /
tasyāḥ kaṃdarpakalaśāvabhiṣekāya kalpitau

aṃsāvatīva śobhete susamau mānasānvitau/
subhujau vartulau ślakṣṇau suvarṇau lakṣaṇānvitau

susamau karapadmau tu padmavarṇau suśītalau /
divyalakṣaṇasaṃpannau padmasvastikasaṃyutau

saralāḥ padmasaṃyuktā aṃgulyastu nakhānvitāḥ/
nakhāni ca sutīkṣṇāni jalabiṃdunibhāni ca

padmagarbhapratīkāśo varṇastadaṃgasaṃbhavaḥ /
padmagaṃdhā ca sarvāṃge padmeva bhāti bhāminī

sarvalakṣaṇasaṃpannā nagakanyā suśobhanā/
raktotpalanibhau pādau suślakṣṇau cātiśobhanau

ratnajyotiḥ samākārā nakhāḥ pādāgrasaṃbhavāḥ/
yathoddiṣṭaṃ ca śāstreṣu tathā cāṃgeṣu dṛśyate

sarvābharaṇaśobhāṃgī hārakaṃkaṇanūpurā/
mekhalākaṭisūtreṇa kāṃcīnādena rājate

nīlena paṭṭavastreṇa parāṃ śobhāṃ gatā śubhā /
kaṃcukenāpi divyena suraktena guṇānvitā

pārvatī kalpitādbhāvādguṇaṃ prāptā mahodayam/
kalpadrumānmudaṃ lebhe śaṃkaraṃ vākyamabravīt

yathoktaṃ tu tvayā deva tathā dṛṣṭo mayā drumaḥ /
yādṛśaṃ kalpyate bhāvastādṛśaṃ paridṛśyate

sūta uvāca-
atha sā cārusarvāṃgī tayoḥ pārśvaṃ sametya ca /
pādāṃbujaṃ nanāmātha sā bhaktyā bhavayostadā

uvāca vacanaṃ snigdhaṃ hṛdyaṃ hāri ca sā tadā/
kasmātsṛṣṭā tvayā nātha mātarvada svakāraṇam

śrīdevyuvāca-
vṛkṣasya kautukādbhāvānmayā vai pratyayaḥ kṛtaḥ /
sadyaḥ prāptaṃ phalaṃ bhadre bhavatī rūpasaṃpadā

aśokasuṃdarī nāmnā loke khyātiṃ prayāsyasi /
sarvasaubhāgyasaṃpannā mama putrī na saṃśayaḥ

somavaṃśeṣu vikhyāto yathā devaḥ puraṃdaraḥ /
nahuṣonāma rājeṃdrastava nātho bhaviṣyati

evaṃ datvā varaṃ tasyai jagāma girijā girim /
kailāsaṃ śaṃkareṇāpi mudā paramayā yutā

†********************†
iti śrīpadmapurāṇe bhūmikhaṇḍe venopākhyāne gurutīrthamāhātmye cyavanacaritre dvyadhikaśatatamo'dhyāyaḥ