Scripture Library

Padma Purana · Chapter 2.103

2.103.1

'kuñjala uvāca-
aśokasundarī jātā sarvayoṣidvarā tadā/
reme sunandane puṇye sarvakāmaguṇānvite

2.103.2

surūpābhiḥ sukanyābhirdevānāṃ cāruhāsinī /
sarvānbhogānprabhuñjānā gītanṛtyavicakṣaṇā

2.103.3

vipracitteḥ suto huṇḍo raudrastīvraśca sarvadā /
svecchācāro mahākāmī nandanaṃ praviveśa ha

2.103.4

aśokasundarīṃ dṛṣṭvā sarvālaṅkārasaṃyutām /
tasyāstu darśanāddaityo viddhaḥ kāmasya mārgaṇaiḥ

2.103.5

tāmuvāca mahākāyaḥ kā tvaṃ kasyāsi vā śubhe /
kasmāttvaṃ kāraṇāccātra āgatāsi vanottamam

2.103.6

'aśokasundaryuvāca-
śivasyāpi supuṇyasya sutāhaṃ śṛṇu sāmpratam /
svasāhaṃ kārtikeyasya jananī gotrajāpi me

2.103.7

bālabhāvena samprāptā līlayā nandanaṃ vanam /
bhavānkohi kimarthaṃ tu māmevaṃ paripṛcchati

2.103.8

huṇḍa uvāca-
vipracitteḥ sutaścāhaṃ guṇalakṣaṇasaṃyutaḥ/
huṇḍeti nāmnā vikhyāto balavīryamadoddhataḥ

2.103.9

daityānāmapyahaṃ śreṣṭho matsamo nāsti rākṣasaḥ /
deveṣu martyalokeṣu tapasā yaśasā kule

2.103.10

anyeṣu nāgalokeṣu dhanabhogairvarānane /
darśanātte viśālākṣi hataḥ kandarpamārgaṇaiḥ

2.103.11

śaraṇaṃ te hyahaṃ prāptaḥ prasādasumukhī bhava /
bhava svavallabhā bhāryā mama prāṇasamā priyā

2.103.12

aśokasundaryuvāca-
śrūyatāmabhidhāsyāmi sarvasaṃbaṃdhakāraṇam/
bhavitavyā sujātasya loke strī puruṣasya hi

2.103.13

bhavitavyastathā bhartā striyā yaḥ sadṛśo guṇaiḥ /
saṃsāre lokamārgoyaṃ śṛṇu huṇḍa yathāvidhi

2.103.14

astyeva kāraṇaṃ cātra yathā tena bhavāmyaham /
subhāryā daityarājendra śṛṇuṣva yatamānasaḥ

2.103.15

vṛkṣarājādahaṃ jātā yadā kāle mahāmate /
śambhorbhāvaṃ susaṅgṛhya pārvatyā kalpitā hyaham

2.103.16

devasyānumate devyā sṛṣṭo bhartā mamaiva hi /
somavaṃśe mahāprājñaḥ sa dharmātmā bhaviṣyati

2.103.17

jiṣṇurjiṣṇusamo vīrye tejasā pāvakopamaḥ/
sarvajñaḥ satyasandhaśca tyāge vaiśravaṇopamaḥ

2.103.18

yajvā dānapatiḥ sopi rūpeṇa manmathopamaḥ /
nahuṣonāma dharmātmā guṇaśīla mahānidhiḥ

2.103.19

devyā devena me dattaḥkhyātobhartābhaviṣyati /
tasmātsarvaguṇopetaṃ putramāpsyāmi sundaram

2.103.20

indropendra samaṃ loke yayātiṃ janavallabham/
lapsyāmyahaṃ raṇe dhīraṃ tasmācchambhoḥ prasādataḥ

2.103.21

ahaṃ pativratā vīra parabhāryā viśeṣataḥ/
atastvaṃ sarvathā huṇḍa tyaja bhrāntimitovraja

2.103.22

prahasyaiva vaco brūte aśokasundarīṃ prati/
'huṇḍa uvāca-
naiva yuktaṃ tvayā proktaṃ devyā devena caiva hi

2.103.23

nahuṣonāma dharmātmā somavaṃśe bhaviṣyati/
bhavatī vayasā śreṣṭhā kaniṣṭho na sa yujyate

2.103.24

kaniṣṭhā strī praśastā tu puruṣo na praśasyate /
kadā sa puruṣo bhadre tava bhartā bhaviṣyati

2.103.25

tāruṇyaṃ yauvanaṃ cāpi nāśamevaṃ prayāsyati/
yauvanasya balenāpi rūpavatyaḥ sadā striyaḥ

2.103.26

puruṣāṇāṃ vallabhatvaṃ prayānti varavarṇini /
tāruṇyaṃ hi mahāmūlaṃ yuvatīnāṃ varānane

2.103.27

tasyā dhāreṇa bhuṃjaṃti bhogānkāmānmanonugān /
kadā sobhyeṣyate bhadre āyoḥ putraḥ śṛṇuṣva me

2.103.28

yauvanaṃ vartate'dyaiva vṛthā caiva bhaviṣyati/
garbhatvaṃ ca śiśutvaṃ ca kaumāraṃ ca niśāmaya

2.103.29

kadāsau yauvanopetastava yogyo bhaviṣyati /
yauvanasya prabhāvena pibasva madhumādhavīm

2.103.30

mayā saha viśālākṣi ramasva tvaṃ sukhena vai/
huṇḍasya vacanaṃ śrutvā śivasya tanayā punaḥ

2.103.31

uvāca dānavendraṃ taṃ sādhvasena samanvitā/
aṣṭāviñśatike prāpte dvāparākhye yuge tadā

2.103.32

śeṣāvatāro dharmātmā vasudevasuto balaḥ/
revatasya sutāṃ divyāṃ bhāryāṃ sa ca kariṣyati

2.103.33

sāpi jātā mahābhāga kṛtākhye hi yugottame /
yugatrayapramāṇena sā hi jyeṣṭhā balādapi

2.103.34

balasya sā priyā jātā revatī prāṇasammitā/
bhaviṣyadvāpare prāpta iha sā tu bhaviṣyati

2.103.35

māyāvatī purā jātā gandharvatanayā varā /
apahṛtya niyamyaiva śambaro dānavottamaḥ

2.103.36

tasyā bhartā samākhyāto mādhavasya suto balī/
pradyumno nāma vīreśo yādaveśvaranandanaḥ

2.103.37

tasminyuge bhaviṣyeta bhāvyaṃ dṛṣṭaṃ purātanaiḥ/
vyāsādibhirmahābhāgairjñānavadbhirmahātmabhiḥ

2.103.38

evaṃ hi dṛśyate daitya vākyaṃ devyā tadoditam/
māṃ prati hi jagaddhātryā putryā himavatastadā

2.103.39

tvaṃ tu lobhena kāmena lubdho vadasi duṣkṛtam /
kilbiṣeṇa samājuṣṭaṃ vedaśāstravivarjitam

2.103.40

yadyasyadiṣṭamevāsti śubhaṃ vāpyaśubhaṃ dṛḍham /
pūrvakarmānusāreṇa tattasya parijāyate

2.103.41

devānāṃ brāhmaṇānāṃ ca vadane yatsubhāṣitam/
niḥsaredyadi satyaṃ tadanyathā naiva jāyate

2.103.42

madbhāgyādevamājñātaṃ nahuṣasyāpi tasya ca/
samāyogaṃ vicāryaivaṃ devyā proktaṃ śivena ca

2.103.43

evaṃ jñātvā śamaṃ gaccha tyaja bhrāntiṃ manaḥsthitām/
naiva śakto bhavāndaitya me manaścālituṃ dhruvam

2.103.44

pativratā dṛḍhā citte sa ko me cālituṃ kṣamaḥ/
mahāśāpena dhakṣyāmi ito gaccha mahāsura

2.103.45

evamākarṇya tadvākyaṃ huṇḍo vai dānavo balī /
manasā cintayāmāsa kathaṃ bhāryā bhavediyam

2.103.46

vicintya huṇḍo māyāvī antardhānaṃ samāgataḥ /
tato niṣkramya vegena tasmātsthānādvihāya tām/
anyasmindivase prāpte māyāṃ kṛtvā tamomayīm

2.103.47

divyaṃ māyāmayaṃ rūpaṃ kṛtvā nāryāstu dānavaḥ /
māyayā kanyakā rūpo babhūva mama nandana

2.103.48

sā kanyāpi varārohā māyārūpāgamattataḥ/
hāsyalīlā samāyuktā yatrāste bhavanandinī

2.103.49

uvāca vākyaṃ snigdheva aśokasundarīṃ prati /
kāsi kasyāsi subhage tiṣṭhasi tvaṃ tapovane

2.103.50

kimarthaṃ kriyate bāle kāmaśoṣaṇakaṃ tapaḥ/
tanmamācakṣva subhage kinnimittaṃ suduṣkaram

2.103.51

tanniśamya śubhaṃ vākyaṃ dānavenāpi bhāṣitam /
māyārūpeṇa channena sābhilāṣeṇa satvaram

2.103.52

ātmasṛṣṭi suvṛttāntaṃ pravṛttaṃ tu yathā purā /
tapasaḥ kāraṇaṃ sarvaṃ samācaṣṭa suduḥkhitā

2.103.53

upaplavaṃ tu tasyāpi dānavasya durātmanaḥ/
māyārūpaṃ na jānāti sauhṛdātkathitaṃ tayā

2.103.54

"huṇḍa uvāca-
pativratāsi he devi sādhuvrataparāyaṇā/
sādhuśīlasamācārā sādhucārā mahāsatī

2.103.55

ahaṃ pativratā bhadre pativrataparāyaṇā/
tapaścarāmi subhage bharturarthe mahāsatī

2.103.56

mama bhartā hatastena huṃḍenāpi durātmanā/
tasya nāśāya vai ghoraṃ tapasyāmi mahattapaḥ

2.103.57

ehi me svāśrame puṇye gaṃgātīre vasāmyaham/
anyairmanoharairvākyairuktā pratyayakārakaiḥ

2.103.58

huṃḍena sakhibhāvena mohitā śivanaṃdinī/
samākṛṣṭā suvegena mahāmohena mohitā

2.103.59

ānītātmagṛhaṃ divyamanaupamyaṃ suśobhanam/
merostu śikhare putra vaiḍūryākhyaṃ purottamam

2.103.60

asti sarvaguṇopetaṃ kāṃcanākhyaṃ mahāśivam/
tuṃgaprāsādasaṃbādhaiḥ kalaśairdaṃḍacāmaraiḥ

2.103.61

nānavṛkṣasamopetairvanairnīlairghanopamaiḥ/
vāpīkūpataḍāgaiśca nadībhistu jalāśayaiḥ

2.103.62

śobhamānaṃ mahāratnaiḥ prākārairhemasaṃyataiḥ/
sarvakāmasamṛddhārthaṃ sampūrṇaṃ dānavasya hi

2.103.63

dadṛśe sā puraṃ ramyamaśokasundarī tadā/
kasya devasya saṃsthānaṃ kathayasva sakhe mama

2.103.64

sovāca dānavendrasya dṛṣṭapūrvasya vai tvayā/
tasya sthānaṃ mahābhāge so'haṃ dānavapuṅgavaḥ

2.103.65

mayā tvaṃ tu samānītā māyayā varavarṇini /
tāmābhāṣya gṛhaṃ nītā śātakaumbhaṃ suśobhanam

2.103.66

nānāveśmaiḥ samājuṣṭaṃ kailāsaśikharopamam/
niveśya suṃdarīṃ tatra dolāyāṃ kāmapīḍitaḥ

2.103.67

punaḥ svarūpī daityendraḥ kāmabāṇaprapīḍitaḥ/
karasampuṭamābadhya uvāca vacanaṃ tadā

2.103.68

yaṃ yaṃ tvaṃ vāñchase bhadre taṃ taṃ dadmi na saṃśayaḥ/
bhaja māṃ tvaṃ viśālākṣibhajantaṃ kāmapīḍitam

2.103.69

'śrīdevyuvāca-
naiva cālayituṃ śakto bhavānmāṃ dānaveśvaraḥ/
manasāpi na vai dhāryaṃ mama mohaṃ samāgatam

2.103.70

bhavādṛśairmahāpāpairdevairvā dānavādhamaiḥ/
duṣprāpyāhaṃ na saṃdeho mā vadasva punaḥ punaḥ

2.103.71

skandānujā sā tapasābhiyuktā jājvalyamānā mahatā ruṣā ca/
saṃhartukāmā pari dānavaṃ taṃ kālasya jihveva yathā sphurantī

2.103.72

punaruvāca sā devī tamevaṃ dānavādhamam /
ugraṃ karma kṛtaṃ pāpa cātmanāśanahetave

2.103.73

ātmavañśasya nāśāya svajanasyāsya vai tvayā/
dīptā svagṛhamānītā suśikhā kṛṣṇavartmanaḥ

2.103.74

yathā'śubhaḥ kūṭapakṣī sarvaśokaiḥ samudgataḥ/
gṛhaṃ tu viśate yasya tasya nāśaṃ prayacchati

2.103.75

svajanasya ca sarvasya sadhanasya kulasya ca/
sa dvijo nāśamiccheta viśatyeva yadā gṛham

2.103.76

tathā tehaṃ gṛhaṃ prāptā tava nāśaṃ samīhatī /
putrāṇāṃ dhanadhānyasya tava vaṃśasya sāmpratam

2.103.77

jīvaṃ kulaṃ dhanaṃ dhānyaṃ putrapautrādikaṃ tava/
sarvaṃ te nāśayitvāhaṃ yāsyāmi ca na saṃśayaḥ

2.103.78

yathā tvayāhamānītā carantī paramaṃ tapaḥ /
patikāmā pravāñcchantī nahuṣaṃ cāyunandanam

2.103.79

tathā tvāṃ mama bhartā ca nāśayiṣyati dānava /
mannimittaupāyo'yaṃ dṛṣṭo devena vai purā

2.103.80

satyeyaṃ laukikī gāthā yāṃ gāyanti vido janāḥ/
pratyakṣaṃ dṛśyate loke na vindanti kubuddhayaḥ

2.103.81

yena yatra prabhoktavyaṃ yasmādduḥkhasukhādikam/
sa eva bhuṃjate tatra tasmādeva na saṃśayaḥ

2.103.82

karmaṇosya phalaṃ bhuṅkṣva svakīyasya mahītale/
yāsyase nirayasthānaṃ paradārābhimarśanāt

2.103.83

sutīkṣṇaṃ hi sudhāraṃ tu sukhaḍgaṃ ca vighaṭṭati/
aṅgulyagreṇa kopāya tathā māṃ viddhi sāmpratam

2.103.84

siṃhasya sammukhaṃ gatvā kruddhasya garjitasya ca/
ko lunāti mukhātkeśānsāhasākārasaṃyutaḥ

2.103.85

satyācārāṃ damopetāṃ niyatāṃ tapasi sthitām/
nidhanaṃ cecchate yo vai sa vai māṃ bhoktumicchati

2.103.86

samaṇiṃ kṛṣṇasarpasya jīvamānasya sāmpratam /
gṛhītumicchate so hi yathā kālena preṣitaḥ

2.103.87

bhavāṃstu preṣito mūḍha kālena kālamohitaḥ /
tadā te īdṛśī jātā kumatiḥ kiṃ napaśyasi

2.103.88

ṛte tu āyuputreṇa samālokayate hi kaḥ/
anyo hi nidhanaṃ yāti mamarūpāvalokanāt

2.103.89

evamābhāṣayitvā taṃ gaṅgātīraṃ gatā satī /
saśokā duḥkhasaṃvignā niyatāni yamānvitā

2.103.90

pūrvamācaritaṃ ghoraṃ patikāmanayā tapaḥ/
tava nāśārthamicchaṃtī cariṣye dāruṇaṃ punaḥ

2.103.91

yadā tvāṃ nihataṃ duṣṭaṃ nahuṣeṇa mahātmanā/
niiiiiśitairvajrasaṅkāśairbāṇairāśīviṣopamaiḥ

2.103.92

raṇe nipatitaṃ pāpa muktakeśaṃ salohitam /
gatāsuṃ ca prapaśyāmi tadā yāsyāmyahaṃ patim

2.103.93

evaṃ suniyamaṃ kṛtvā gaṃgātīramanuttamam/
saṃsthitā huṃḍanāśāya niścalā śivanaṃdinī

2.103.94

vahneryathādīptimatī śikhojjvalā tejobhiyuktā pradahetsulokān/
krodhena dīptā vibudheśaputrī gaṅgātaṭe duścaramācarattapaḥ

2.103.95

"kuñjala uvāca-
evamuktā mahābhāga śivasya tanayā gatā /
gaṅgāṃbhasi tataḥ snātvā svapure kāñcanāhvaye

2.103.96

tapaścacāra tanvaṅgī huṇḍasya vadhahetave /
aśokasundarī bālā satyena ca samanvitā

2.103.97

huṇḍopi duḥkhitobhūtaḥ śāpadagdhena cetasā/
ciṃtayāmāsa santapta atīva vacanānalaiḥ

2.103.98

samāhūya amātyaṃ taṃ kampanākhyamathābravīt /
samācaṣṭa sa vṛttāntaṃ tasyāḥ śāpodbhavaṃ mahat

2.103.99

śaptosmyaśokasuṃdaryā śivasyāpi sukanyayā/
nahuṣasyāpi me bharttustvaṃ tu hastānmariṣyasi

2.103.100

naiva jātastvasau garbha āyorbhāryā ca gurviṇī/
yathā satyādvyalīkastu tasyāḥ śāpastathā kuru

2.103.101

kampana uvāca-
apahṛtya priyāṃ tasya āyoścāpi samānaya /
anenāpi prakāreṇa tava śatrurna jāyate

2.103.102

no vā prapātayasva tvaṃ garbhaṃ tasyāḥ prabhīṣaṇaiḥ /
anenāpi prakāreṇa tava śatrurna jāyate

2.103.103

janmakālaṃ pratīkṣasva nahuṣasya durātmanaḥ /
apahṛtya samānīya jahi tvaṃ pāpacetanam

2.103.104

evaṃ samaṃtrya tenāpi kaṃpanena sa dānavaḥ /
abhūtsa udyamopeto nahuṣasya praṇāśane

2.103.105

'viṣṇuruvāca-
elaputro mahābhāga āyurnāma kṣitīśvaraḥ/
sārvabhaumaḥ sa dharmātmā satyavrataparāyaṇaḥ

2.103.106

indropendrasamo rājā tapasā yaśasā balaiḥ/
dānayajñaiḥ supuṇyaiśca satyena niyamena ca

2.103.107

ekacchatreṇa vai rājyaṃ cakre bhūpatisattamaḥ/
pṛthivyāṃ sarvadharmajñaḥ somavaṃśasya bhūṣaṇam

2.103.108

putraṃ na viṃdate rājā tena duḥkhī vyajāyata/
ciṃtayāmāsa dharmātmā kathaṃ me jāyate sutaḥ

2.103.109

iti cintāṃ samāpede āyuśca pṛthivīpatiḥ/
putrārthaṃ paramaṃ yatnamakarotsusamāhitaḥ

2.103.110

atriputro mahātmā vai dattātreyo mahāmuniḥ/
krīḍamānaḥ striyā sārddhaṃ madirāruṇalocanaḥ

2.103.111

vāruṇyā matta dharmātmā strīvṛndaiśca samāvṛtaḥ/
aṅke yuvatimādhāya sarvayoṣidvarāṃ śubhām

2.103.112

gāyate nṛtyate vipraḥ surāṃ ca pibate bhṛśam/
vinā yajñopavītena mahāyogīśvarottamaḥ

2.103.113

puṣpamālābhirdivyābhirmuktāhāraparicchadaiḥ /
caṃdanāgurudigdhāṃgo rājamāno munīśvaraḥ

2.103.114

tasyāśramaṃ nṛpo gatvā taṃ dṛṣṭvā dvijasattamam /
praṇāmamakaronmūrdhnā daṇḍavatsusamāhitaḥ

2.103.115

atriputraḥ sa dharmātmā samālokya nṛpottamam/
āgataṃ purato bhaktyā atha dhyānaṃ samāsthitaḥ

2.103.116

evaṃ varṣaśataṃ prāptaṃ tasya bhūpasya sattama/
niścalaṃ śāntimāpannaṃ mānasaṃ bhaktitatparam

2.103.117

samāhūya uvācedaṃ kimarthaṃ kliśyase nṛpa/
brahmācāreṇa hīnosmi brahmatvaṃ nāsti me kadā

2.103.118

surāmāṃsapralubdho'smi striyāsaktaḥ sadaiva hi /
varadāne na me śaktiranyaṃ śuśrūṣa brāhmaṇam

2.103.119

"āyuruvāca-
bhavādṛśo mahābhāga nāsti brāhmaṇasattamaḥ/
sarvakāmapradātā vai trailokye parameśvaraḥ

2.103.120

atrivaṃśe mahābhāga goviṃdaḥ parameśvaraḥ/
brāhmaṇasya svarūpeṇa bhavānvai garuḍadhvajaḥ

2.103.121

namo'stu devadeveśa namo'stu parameśvara/
tvāmahaṃ śaraṇaṃ prāptaḥ śaraṇāgatavatsala

2.103.122

uddharasva hṛṣīkeśa māyāṃ kṛtvā pratiṣṭhasi /
viśvasthānāṃ prajānāṃ tu vidvāṃsaṃviśvanāyakam

2.103.123

jānāmyahaṃ jagannāthaṃ bhavantaṃ madhusūdanam/
māmeva rakṣa govinda viśvarūpa namostu te

2.103.124

"kuñjala uvāca-
gate bahutithe kāle dattātreyo nṛpottamam/
uvāca mattarūpeṇa kuruṣva vacanaṃ mama

2.103.125

kapāle me surāṃ dehi pācitaṃ māṃsabhojanam/
evamākarṇya tadvākyaṃ sa cāyuḥ pṛthivīpatiḥ

2.103.126

utsukastu kapālena surāmāhṛtya vegavān/
palaṃ supācitaṃ caiva cchittvā hastena satvaram

2.103.127

nṛpendraḥ pradadau cāpi dattātreyāya sattama/
atha prasannacetāḥ sa saṃjāto munipuṅgavaḥ

2.103.128

dṛṣṭvā bhaktiṃ prabhāvaṃ ca guruśuśrūṣaṇaṃ param/
samuvāca nṛpendraṃ tamāyuṃ praṇatamānasam

2.103.129

varaṃ varaya bhadraṃ te durlabhaṃ bhuvi bhūpate/
sarvameva pradāsyāmi yaṃyamicchasi sāmpratam

2.103.130

"rājovāca-
bhavāndātā varaṃ satyaṃ kṛpayā munisattama/
putraṃ dehi guṇopetaṃ sarvajñaṃ guṇasaṃyutam

2.103.131

devavīryaṃ sutejaṃ ca ajeyaṃ devadānavaiḥ/
kṣatriyai rākṣasairghorairdānavaiḥ kinnaraistathā

2.103.132

devabrāhmaṇasambhaktaḥ prajāpālo viśeṣataḥ/
yajvā dānapatiḥ śūraḥ śaraṇāgatavatsalaḥ

2.103.133

dātā bhoktā mahātmā ca vedaśāstreṣu paṇḍitaḥ/
dhanurvedeṣu nipuṇaḥ śāstreṣu ca parāyaṇaḥ

2.103.134

anāhatamatirdhīraḥ saṃgrāmeṣvaparājitaḥ/
evaṃ guṇaḥ surūpaśca yasmādvañśaḥ prasūyate

2.103.135

dehi putraṃ mahābhāga mamavaṃśapradhārakam/
yadi cāpi varo deyastvayā me kṛpayā vibho

2.103.136

"dattātreya uvāca-
evamastu mahābhāga tava putro bhaviṣyati/
gṛhe vaṃśakaraḥ puṇyaḥ sarvajīvadayākaraḥ

2.103.137

ebhirguṇaistu saṃyukto vaiṣṇavāṃśena saṃyutaḥ /
rājā ca sārvabhaumaśca indratulyo nareśvaraḥ

2.103.138

evaṃ khalu varaṃ datvā dadau phalamanuttamam/
bhūpamāha mahāyogī subhāryāyai pradīyatām

2.103.139

evamuktvā visṛjyaiva tamāyuṃ praṇataṃ puraḥ/
āśīrbhirabhinandyaiva antarddhānamadhīyata

2.103.103

iti śrīpadmapurāṇe bhūmikhaṇḍe venopākhyāne gurutīrthamāhātmye cyavanacaritre tryadhikaśatatamo'dhyāyaḥ

Original text: padmapurāṇam · Sanskrit Wikisource contributors · Sanskrit Wikisource · CC BY-SA 4.0