Padma Purana · Chapter 1.74

vyāsa uvāca-
caturbhisturagairjuṣṭaṃ rathaṃ sūryasamaprabhaṃ/
traipuriḥ saṃrurohāthābravīdvākyaṃ gaṇādhipaṃ

pitā me nihataḥ pitrā tava yasmādgaṇādhipa/
tasmāttvāmadya viśikhairnayāmi yamasādanaṃ

tatastamabravīddevo gaṇeśastripurātmajaṃ/
tava tātena duṣṭena surāṇāmahitaṃ purā

kṛtaṃ karmamahatpāpaṃ śrutaṃ no janakena hi/
pāpakarmarataṃ duṣṭaṃ jñātvā jñānabalena ca

avadhīttaṃ śaraikena pitaraṃ te balena ca/
paṃkātpratārito mohātpreṣito yamamaṃdiraṃ

tvāṃ cāhaṃ tatpathaṃ daitya preṣayāmi kṣaṇādiha/
uktavaṃtaṃ mahāprājñaṃ surāṇāṃ ca gaṇādhipaṃ

vivyādha daśabhistīkṣṇaiḥ kālānalasamaprabhaiḥ/
tataḥ śarasahasraistu daityaṃ vivyādha sāhasāt

yamadaṃḍasamairbāṇaiḥ kṣurapraiśca śilīmukhaiḥ/
kaṃkapatrairmahātīkṣṇairvajrānalasamaprabhaiḥ

vicakarta śarāṃścāsya laṃbodaraḥ surārcitaḥ/
punarvivyādha viśikhaiḥ sahasābhi duropamaiḥ

śarairarditasarvāṃgo mūrcchitastvapatadbhuvi/
tato bhadraśca saubhadro bhīṣaṇo nirjarāṃtakaḥ

svāṃ svāṃ gadāṃ samādāya dudruvustaṃ vināyakam/
yugapatte gadāpātairnijaghnurgaṇanāyakam

lāghavāttu vṛthā kṛtvā gadāsteṣāṃ mahābalaḥ/
bhadrakasya tu śīrṣe cāhanatparaśunā tadā

saubhadrasyottamāṃgaṃ ca asināgre nipātitam/
bhīṣaṇasya kuṭhāreṇa khaḍgena nirjarāṃtakam

pātayitvā ca herambo mahāgirisamāṃstadā/
caturo gaṇamukhyāṃśca anyāṃścāpātayaddviṣaḥ

tataḥ saṃjñāṃ samālabhya traipuriścāsurottamaḥ/
samāruhya rathaṃ svaṃ ca jaghāna surasattamam

viśikhairardhacaṃdraiśca kṣuraprairbhallakaistathā/
tāṃstu ciccheda dharmātmā punarvivyādha taṃ śaraiḥ

caturbhiḥ saiṃdhavāṃścaiva śaraikena ca sārathim/
śaraiḥ saṃpātayāmāsa dharaṇyāṃ gaṇanāyakān

lāghavāttu rathaṃ cānyaṃ gatvā tripuranaṃdanaḥ/
viśikhairvajrasaṃkāśaiḥ saṃbibheda gaṇādhipam

rudhireṇāvasiktāṃgo ruṣā ghora yamaprabhaḥ/
lalāṭe ca tribhirbāṇaissaptabhiśca stanāṃtare

caturbhirnābhideśe ca paṃcabhirmuṣṭimastake/
saṃbibheda mahākrodho balinaṃ śaṃbhunaṃdanaḥ

śarairarditasarvāṃgaḥ sa daityo raṇamūrdhani/
kaśmalaṃ paramaṃ gatvā saṃpapāta rathopari

tataḥ sūtena dhīreṇa apanīto raṇājirāt/
vimukhaṃ nāhanacchūro vināyakaḥ surārcitaḥ

cirātsaṃjñāṃ samālabhya yaṃtāraṃ cābravīdvacaḥ/
gaccha sūta raṇe bhīruṃ vināyakaṃ harātmajam

tato yaṃtābravīdvākyaṃ satyaṃ pathyaṃ ca komalam/
harātmajaśarānsoḍhuṃ kassamartho raṇājire

tasmānmohagatastvaṃ ca mayānītaḥ prabhāsuta/
etajjñātvā tvidānīṃ bho yadyuktaṃ tadvidhīyatām

etasminnaṃtare rājñā preritaḥ kavisattamaḥ/
auṣadhādiprayogeṇa gajaḥ saṃjñāmabodhayat

akārayacchataguṇa prāṇaṃ ca jayamādiśat/
prāgjalaṃ maṃtritaṃ datvā rurodhāsyāṅgakavraṇān

sa gajo daśanaireva sphoṭayāmāsa vai girim/
evaṃ śatasahasrāṇi sainyāni sainyapālakān

pātayāmāsa samitau gajaḥ paramadurjayaḥ/
sa daityastasya pṛṣṭhasthaḥ śaraiḥ kālānalaprabhaiḥ

hatvā tvapātayaccorvyāṃ mukhyamukhyānsurādhipān/
śaraistasya tadā devā yamadaṃḍasamaprabhaiḥ

nipataṃti mahāvīryā rudhiraughapariplutāḥ/
yasminyasmiṃśca mārge tu sa daityaḥ sagajo gataḥ

tatra tatra cakārāśu bhīṣaṇaṃ saṃcitaṃ śaraiḥ/
gajena pātitāḥ kecidgajāroheṇa cāpare

vegena bhramaṇenaiva surāḥ kecitpratāpitāḥ/
evaṃ suragaṇādhyakṣāḥ śastrāstrairvividhaiśca tam

sagajaṃ yuddhanirbhītā nijaghnurbahubhiḥ śaraiḥ/
tathāpi tadgajaṃ yoddhuṃ na śaktāste mahābalāḥ

kṣipraṃ tāṃstu gajo daṃtaistraipuro'pātayaccharaiḥ/
na gatā ye dharaṇyāṃ ca devā jarjaravigrahāḥ

śaraṇyaṃ gaṇapaṃ jagmurbhītāste vedanāturāḥ/
devānāṃ kadanaṃ dṛṣṭvā gaṇādhīśaḥ pratāpavān

sa gajaṃ tāḍayāmāsa vajrānalasamaiḥ śaraiḥ/
sa gajo vegasaṃruddhaḥ śareṇa ca samutthitaḥ

athotau dvau śaraireva bibhidāte parasparam/
ubhau tau nardamānau ca anyonyaṃ jayamaicchatām

śoṇitairliptasarvāṃgau vīramukhyau surāsurau/
athākhuṃ sa gajo matto bibheda daśanaiḥ svakaiḥ

ākhunābhidruto nāgo ghorayuddhaṃ tayoḥ param/
adhordhvaṃ saṃvibhāge ca caturbhiryuddhamadbhutam

saśabdaṃ tumulaṃ yuddhaṃ sarvalokabhayaṃkaram/
daśanairdaśanaireva śaraireva śarottamaiḥ

tadghoramabhavadyuddhaṃ devadānavasaṃgare/
ākhuko bhedayāṃcakre mahānāṃgaṃ mahābalam

parśunā pṛṣṭhavaṃśāgre sthitvā tenāhanatpunaḥ/
daityasya daśanadvāre hṛdiskaṃdhetha lāghavāt

sagajaḥ sa papātorvyāṃ gatāsurlohitaṃ vaman/
śaśaṃsurmunayo devāssādhusādhviti cābruvat

atrānyestrairamoghaiśca daityānājaghnurāhave/
yāvattu senayornaiva jayayuddhaṃ samāpayet

iti śrīpādmapurāṇe prathame sṛṣṭikhaṃḍe traipurivimardonāma catussaptatitamo'dhyāyaḥ