Padma Purana · Chapter 1.73

vyāsa uvāca-
tato vṛtro mahātejā daityānāṃ pravaro yudhi/
diggajāḍhyaṃ gajārūḍhaḥ prādravadbalasūdanam

āgacchaṃtaṃ tato vṛtraṃ śaraiḥ kālānalaprabhaiḥ/
vivyādha sarvagātreṣu dviradastho mahāhave

tato vṛtrastu śīrṣaṃ ca jiṣṇoreva patatriṇā/
vivyādha sahasā tena sa cacāla mahābalaḥ

ātmānaṃ ca samāśvāsya dhanurudyamya vīryavān/
vavarṣa śaravarṣeṇa tasya daityasya vigrahe

śarāṃśchitvā bibhedāśu śarairāśīviṣopamaiḥ/
śatakratuṃ mahāvīryaḥ sarvadevādhipaṃ yudhi

tataḥ śarasahasraistu daityaṃ vivyādha devarāṭ/
parasparaṃ śarā yāṃti yathā saptāśva raśmayaḥ

evaṃ śarasahasraistu bibhidāte parasparam/
manojavasamāḥ śīghrā gāḍhāḥ śikhariṇo yathā

baḍavānalasaṃsparśāḥ khagā vajrārabhedakāḥ/
tayordhanuṣmatoryuddhe śarāstulyaguṇānvitāḥ

evaṃ krameṇa yuddhe ca ahorātramavartata/
maheṃdro dviradaṃ tasya śūlenaiva jaghāna ha

sa nipatya mahīpṛṣṭhe lāghavātsvarathaṃ yayau/
rathasthastasya devasya śaktyā cairāvaṇaṃ dṛḍham

bibheda lāghavenāśu vajreṇeva mahāgiriṃ/
śuśubhe kaṃpamānastu seṃdraḥ sa ca mahāgajaḥ

tataḥ śaktiṃ samādāya āvidhya maghavā'suram/
bibhedorasi daityasya sa papāta rathopari

kṣaṇātsaṃjñāṃ samālaṃbya sa vinadya patattriṇā/
bibheda samare śakraṃ sa tataḥ kaśmalaṃ gataḥ

iṃdraḥ saṃjñāṃ punaḥ prāpya jaghāna viśikhaiḥ śitaiḥ/
śatakoṭisamairbāṇairardito vyathayānvitaḥ

tato vṛtro mahāśūlaṃ prākṣipannirjareśvare/
śāṃbhavāstreṇa deveśo vaiṣṇavāstraṃ mumoca ha

ubhayoraṃbare cāstre vahnikūṭasamaprabhe/
anyonyaṃ jaghnatustatra sphuligāni vimuṃcatī

sparśane ca sphuliṃgānāmubhayoḥ senayorbhaṭāḥ/
na śaktāḥ saṃmukhe sthātuṃ śalabhā jvalane yathā

dagdhāḥ petuḥ pṛthivyāṃ ca diśassarvāḥ pradudruvuḥ/
devadānavayorvīrāḥ śūnyastatrābhavadraṇaḥ

astraṃ nirastakaṃ dṛṣṭvā sa daityaḥ krodhamūrcchitaḥ/
māyayā śailasaṃdohamastraṃ śakre mumoca ha

bāṇaughaiḥ śailasaṃghātaṃ praciccheda raṇe hariḥ/
aghoraṃ prāsṛjaddaityaḥ puruhūte mahābale

koṭikoṭisahasrāṇi jaṃtūnāṃ pravarāṇi ca/
siṃhaśārdūlabhallūka vṛka vyāghra mahāgajāḥ

daṃdaśūkādayaḥ satvāḥ pradhāvaṃti sureśvaraṃ/
kṣuraprairardhacaṃdraiśca bhallaiḥ śilīmukhaistathā

asaṃprāptānpraciccheda maghavā paravīrahā/
tato vṛtro mahābāhurdhanurudyamya vīryavān

bibheda śarasāhasrairvajrakalpaiḥ śatakratuṃ/
chitvā kṣurapraiśśakraśca dhanustasya cakarta ca

sūtaṃ cāśvānpṛthivyāṃ ca pātayāmāsa tatkṣaṇāt/
sakaṃṭakāṃgadāṃ bhīmāṃ saṃpūjyāsurasattamaḥ

jaghāna padminaḥ śīrṣe mohāddaṃtī kṣitiṃ yayau/
sagadaḥ sarvadeveśo dharaṇīṃ samupasthitaḥ

tatastayorgadāyuddhamavartata muhurmuhuḥ/
tayoḥ praharatoḥ śabdo gadāpātodbhavo dhruvaṃ

āvartaṃ parivartaṃ ca cakratustau punaḥ punaḥ/
adha ūrdhvaṃ prahāraṃ ca pārśvayoratibhīṣaṇaṃ

babhūvaivaṃ tayoryuddhaṃ lokālokabhayaṃkaraṃ/
dṛṣṭvā devagaṇāḥ siddhā dānavā vismayaṃ gatāḥ

yuddhyamānau tu tau vīrau mṛtyusaṃśayamāgatau/
devadānavavīrāśca draṣṭuṃ naiva tadīśire

īśabrahmādayaḥ khe tu sthitā draṣṭuṃ tadadbhutaṃ/
tayorhuṃkāraśabdena gadāpātasvanena ca

ūrdhvordhvamagamacchabdo hyaśaneścopajāyate/
bhagne gade dvayoreva karaḥ saṃpuṭitastayoḥ

evaṃ caivārdhayāmena tayorastre nipetatuḥ/
etasmiṃnnantare vīrau khaḍgacarmadharau tadā

pratiyoddhuṃ mahāghoramāhave saṃpraceratuḥ/
nistriṃśau vidyudulkābhau tayorgātre ca carmaṇī

dṛśyete sarvalokaiśca lāghavaṃ vismayaṃ gataiḥ/
cicchidāte tayoreva carmaṇī bahuvarṇake

bhīṣmakaṃ balayuddhaṃ ca tayorevaṃ pravartate/
maṃḍalaṃ cakradhanvaṃ ca lāghavaṃ ca pariplutaṃ

vṛtravāsavayoryuddhaṃ vṛtravāsavayoriva/
keśānvṛtrasya utplutya saṃpradhṛtyāsinā drutaṃ

śiraściccheda sahasā maghavā raṇamūrdhani/
jayaśabdastatastvāsīddevānāṃ ca samaṃtataḥ

protphullahṛdayā devā maghavaṃtamapūjayan/
devaduṃdubhayo nedurnanṛtuścāpsarogaṇāḥ

gītaṃ gāyaṃti gaṃdharvā munayaḥ stutipāṭhakāḥ/
bhītāḥ palāyitāḥ sarve daityāstyaktāyudhā diśaḥ

iti śrīpādmapurāṇe prathame sṛṣṭikhaṃḍe vṛtrāsuravadhonāma trisaptatitamo'dhyāyaḥ