Scripture Library

Padma Purana · Chapter 1.61

1.61.1.61

ekaṣaṣṭitamo'dhyāyaḥ

1.61.1

dvijāūcuḥ-
tulasīpuṣpamāhātmyaṃ śrutaṃ tvatto hareḥ śubham/
tasyā stotraṃ kṛtaṃ puṇyaṃ śrotumicchāmahe vayam

1.61.2

vyāsa uvāca-
purā skaṃdapurāṇe ca yanmayā kīrtitaṃ dvijāḥ/
kathayāmi purāṇaṃ ca purato mokṣahetave

1.61.3

śatānaṃda muneḥ śiṣyāḥ sarve te saṃśitavratāḥ/
praṇipatya guruṃ viprāḥ papracchuḥ puṇyato hitam

1.61.4

pūrvaṃ brahmamukhānnātha yacchrutaṃ tulasīstavam/
tadvayaṃ śrotumicchāmastvatto brahmavidāṃvara

1.61.5

śatānaṃda uvāca-
nāmoccāre kṛte tasyāḥ prīṇātyasuradarpahā/
pāpāni vilayaṃ yāṃti puṇyaṃ bhavati cākṣayam

1.61.6

sā kathaṃ tulasī lokaiḥ pūjyate vaṃdyate nahi/
darśanādeva yasyāstu dānaṃ koṭigavāṃ bhavet

1.61.7

dhanyāste mānavā loke yadgṛhe vidyate kalau/
sālagrāmaśilārthaṃ tu tulasī pratyahaṃ kṣitau

1.61.8

tulasīṃ ye vicinvaṃti dhanyāste karapallavāḥ/
keśavārthaṃ kalau ye ca ropayaṃtīha bhūtale

1.61.9

kiṃ kariṣyati saṃruṣṭo yamopi saha kiṃkaraiḥ/
tulasīdalena deveśaḥ pūjito yena duḥkhahā

1.61.10

tīrthayātrādigamanaiḥ phalaiḥ sidhyati kinnaraḥ/
snāne dāne tathā dhyāne prāśane keśavārcane

1.61.11

tulasī dahate pāpaṃ kīrtane ropaṇe kalau/
tulasyamṛtajanmāsi sadā tvaṃ keśavapriye

1.61.12

keśavārthaṃ cinomi tvāṃ varadā bhava śobhane/
tvadaṃgasaṃbhavairnityaṃ pūjayāmi yathāharim

1.61.13

tathā kuru pavitrāṃgi kalau malavināśini/
maṃtreṇānena yaḥ kuryādvicitya tulasīdalam

1.61.14

pūjanaṃ vāsudevasya lakṣakoṭiguṇaṃ bhavet/
prabhāvaṃ tava deveśi gāyaṃti surasattamāḥ

1.61.15

munayaḥ siddhagaṃdharvāḥ pātāle nāgarāṭsvayam/
na te prabhāvaṃ jānaṃti devatāḥ keśavādṛte

1.61.16

guṇānāṃ parimāṇaṃ tu kalpakoṭiśatairapi/
kṛṣṇānaṃdātsamudbhūtā kṣīrodamathanodyame

1.61.17

uttamāṃge purā yena tulasī viṣṇunā dhṛtā/
prāpyaitāni tvayā devi viṣṇoraṃgāni sarvaśaḥ

1.61.18

pavitratā tvayā prāptā tulasīṃ tvāṃ namāmyaham/
tvadaṃgasaṃbhavaiḥ patraiḥ pūjayāmi yathā harim

1.61.19

tathā kuruṣva me'vighnaṃ yato yāmi parāṃ gatim/
ropitā gomatītīre svayaṃ kṛṣṇena pālitā

1.61.20

jagaddhitāya tulasī gopīnāṃ hitahetave/
vṛṃdāvane vicaratā sevitā viṣṇunā svayam

1.61.21

gokulasya vivṛddhyarthaṃ kaṃsasya nidhanāya ca/
vasiṣṭhavacanātpūrvaṃ rāmeṇa sarayūtaṭe

1.61.22

rākṣasānāṃ vadhārthāya ropitā tvaṃ jagatpriye/
ropitā tapaso vṛddhyai tulasīṃ tvāṃ namāmyaham

1.61.23

viyoge vāsudevasya dhyātvā tvāṃ janakātmajā/
aśokavanamadhye tu priyeṇa saha saṃgatā

1.61.24

śaṅkarārthaṃ purā devi pārvatyā tvaṃ himālaye/
ropitā tapaso vṛddhyai tulasīṃ tvāṃ namāmyaham

1.61.25

sarvābhirdevapatnībhiḥ kinnaraiścāpi naṃdane/
duḥsvapnanāśanārthāya sevitā tvaṃ namostu te

1.61.26

dharmāraṇye gayāyāṃ ca sevitā pitṛbhiḥ svayam/
sevitā tulasī puṇyā ātmano hitamicchatā

1.61.27

ropitā rāmacaṃdreṇa sevitā lakṣmaṇena ca/
pālitā sītayā bhaktyā tulasī daṃḍake vane

1.61.28

trailokyavyāpinī gaṃgā yathā śāstreṣu gīyate/
tathaiva tulasī devī dṛśyate sacarācare

1.61.29

ṛśyamūke ca vasatā kapirājena sevitā/
tulasī vālināśāya tārāsaṃgama hetave

1.61.30

praṇamya tulasīdevīṃ sāgarotkramaṇaṃ kṛtam/
kṛtakāryaḥ prahṛṣṭaśca hanūmānpunarāgataḥ

1.61.31

tulasīgrahaṇaṃ kṛtvā vimukto yāti pātakaiḥ/
athavā muniśārdūla brahmahatyāṃ vyapohati

1.61.32

tulasīpatragalitaṃ yastoyaṃ śirasā vahet/
gaṃgāsnānamavāpnoti daśadhenuphalapradam

1.61.33

prasīda devi deveśi prasīda harivallabhe/
kṣīrodamathanodbhūte tulasi tvāṃ namāmyaham

1.61.34

dvādaśyāṃ jāgare rātrau yaḥ paṭhettulasīstavam/
dvātriṃśadaparādhāṃśca kṣamate tasya keśavaḥ

1.61.35

yatpāpaṃ yauvane bālye kaumāre vārddhake kṛtam/
tatsarvaṃ vilayaṃ yāti tulasīstava pāṭhataḥ

1.61.36

prītimāyāti deveśastuṣṭo lakṣmīṃ prayacchati/
kurute śatrunāśaṃ ca sukhaṃ vidyāṃ prayacchati

1.61.37

tulasīnāmamātreṇa devā yacchaṃti vāṃchitam/
garhyāṇamapi deveśo muktiṃ yacchati dehinām

1.61.38

tulasī stavasaṃtuṣṭā sukhaṃ vṛddhiṃ dadāti ca/
udgataṃ helayā viddhi pāpaṃ yamapathe sthitam

1.61.39

yasmingṛhe ca likhito vidyate tulasīstavaḥ/
nāśubhaṃ vidyate tasya śubhamāpnoti niścitam

1.61.40

sarvaṃ ca maṃgalaṃ tasya nāsti kiṃcidamaṃgalam/
subhikṣaṃ sarvadā tasya dhanaṃ dhānyaṃ ca puṣkalam

1.61.41

niścalā keśave bhaktirna viyogaśca vaiṣṇavaiḥ/
jīvati vyādhinirmukto nādharme jāyate matiḥ

1.61.42

dvādaśyāṃ jāgare rātrau yaḥ paṭhettulasīstavam/
tīrthakoṭisahasraistu yatphalaṃ lakṣakoṭibhiḥ

1.61.43

tatphalaṃ samavāpnoti paṭhitvā tulasīstavam

1.61.61

iti śrīpādmapurāṇe prathame sṛṣṭikhaṃḍe tulasīstavamāhātmyaṃ nāmaikaṣaṣṭitamo'dhyāyaḥ

Original text: padmapurāṇam · Sanskrit Wikisource contributors · Sanskrit Wikisource · CC BY-SA 4.0