Padma Purana · Chapter 1.6

bhīṣma uvāca/
devānāṃ dānavānāṃ ca gaṃdharvoragarakṣasām/
utpattiṃ vistareṇemāṃ guro brūhi yathāvidhi

pulastya uvāca/
saṃkalpāddarśanātsparśātpūrveṣāṃ sṛṣṭirucyate/
dakṣātprācetasādūrdhvaṃ sṛṣṭirmaithunasaṃbhavā

yathā sasarja caivāsau tathaiva śṛṇu kaurava/
yadā tu sṛjatastasya devarṣigaṇapannagān

na vṛddhimagamallokastadā maithunayogataḥ/
dakṣaḥ putrasahasrāṇi tadāsiknyāmajījanat

tāṃstu dṛṣṭvā mahābhāgānsisṛkṣūnvividhāḥ prajāḥ/
nāradaḥ prāha haryaśvāndakṣaputrānsamāgatān

bhuvaḥ pramāṇaṃ sarvaṃ tu jñātvorddhamadha eva vā/
tataḥ sṛṣṭiṃ viśeṣeṇa kurudhvamṛṣisattamāḥ

te tu tadvacanaṃ śrutvā prayātāḥ sarvatodiśam/
adyāpi na nivarttaṃte samudrādiva siṃdhavaḥ

haryaśveṣu praṇaṣṭeṣu punardakṣaḥ prajāpatiḥ/
vīriṇyāmeva putrāṇāṃ sahasramasṛjatprabhuḥ

śabalāśvā nāma te ca sametāḥ sṛṣṭikarmaṇi/
nāradonugatānprāha punastānpūrvavanmuniḥ

bhuvaḥ pramāṇaṃ sarvaṃ tu jñātvā bhrātṝnatho punaḥ/
āgatya ca punaḥ sṛṣṭiṃ kariṣyatha viśeṣataḥ

tepi tenaiva mārgeṇa jagmurbhrātranugāstadā/
tataḥ prabhṛti na bhrātuḥ kanīyānmārgamicchati

anveṣṭā duḥkhamāpnoti tena tatparivarjayet/
tatasteṣvapi naṣṭeṣu(yu) ṣaṣṭiṃ kanyāḥ prajāpatiḥ

vīriṇyāṃ janayāmāsa dakṣaḥ prācetasastadā/
prādātsa daśa dharmāya kaśyapāya trayodaśa

viṃśatisapta somāya catasroriṣṭanemine/
dve caiva bhṛguputrāya dve kṛśāśvāya dhīmate

dve caivāṃgirase prādāttāsāṃ nāmāni vistarāt/
śṛṇu tvaṃ devamātṝṇāṃ prajāvistāramāditaḥ

aruṃdhatī vasurjāmirlambā bhānurmarutvatī/
saṃkalpā ca muhūrtā ca sādhyā viśvā ca bhāminī

dharmapatnyaḥ samākhyātāstāsāṃ putrānnibodha me/
viśvedevāstu viśvāyāḥ sādhyā sādhyānajījanat

marutvatyāṃ marutvaṃto vasostu vasavastathā/
bhānostu bhānavo jātā mūhūrttāyā muhūrtajāḥ

laṃbāyāṃ ghoṣanāmāno nāgavīthī tu jāmijā/
pṛthivītalasaṃbhūtamaruṃdhatyāmajāyata

saṃkalpāyāstu saṃkalpā vasu sṛṣṭiṃ nidhāraya/
jyotiṣmataṃśca ye devā vyāpakāḥ sarvatodiśam

vasavaste samākhyātāsteṣāṃ nāmāni me śṛṇu/
āpo dhruvaśca somaśca dharaścaivānilonalaḥ

pratyūṣaśca prabhāsaśca vasavoṣṭau prakīrtitāḥ/
āpasya putrāścatvāraḥ śrāṃto vaitaṇḍa eva ca

api śāṃto munirvabhruryajñarakṣādhikāriṇaḥ/
dhruvasya kālaḥ putrastu varcāḥ somādajāyata

draviṇo havyavāhaśca dhara putrāvimau smṛtau/
kalpāṃtasthastataḥ prāṇo ramaṇaḥ śiśiropi ca

manoharo dhavaścātha śivo vātha hareḥ sutāḥ/
śivo manojavaṃ putramavijñātagatipradam

avāpa cānalaḥ putrānagniprāyaguṇāṃstataḥ/
tatra śākho viśākhaśca nigameṣu svayaṃbhuvaḥ

apatyaṃ kṛttikānāṃ ca kārtikeyastataḥ smṛtaḥ/
pratyūṣasya ṛbhuḥ putro munirnāmātha devalaḥ

viśvakarmā prabhāsasya putraḥ śilpī prajāpatiḥ/
prāsādabhavanodyāna pratimā bhūṣaṇādiṣu

taṭākārāmakūpeṣu tridaśānāṃ ca varddhakiḥ/
ajaikapādahirbudhnyo virūpākṣotha raivataḥ

haraśca bahurūpaśca tryaṃbakaśca sureśvaraḥ/
sāvittraśca jayaṃtaśca pinākī cāparājitaḥ

ete rudrāssamākhyātā ekādaśa gaṇeśvarāḥ/
eteṣāṃ mānasānāṃ tu triśūlavaradhāriṇām

koṭyaścaturaśītistu tatputrāścākṣayā matāḥ/
dikṣu sarvāsu ye rakṣāṃ prakurvanti gaṇeśvarāḥ

ete vai putrapautrāśca surabhīgarbhasaṃbhavāḥ/
kaśyapasya pravakṣyāmi putrapautrādi patniṣu

aditirditirdanuścaiva ariṣṭā surasā tathā/
surabhirvinatā caiva tāmrā krodhavaśā irā

kadrū khasā munistadvattāsu putrānnibodha me/
tuṣitā nāma ye devāścākṣuṣasyāṃtare manoḥ

vaivasvateṃtare caiva ādityā dvādaśa smṛtāḥ/
indro dhātā bhagastvaṣṭā mittro'tha varuṇo'ryamā

vivasvānsavitā pūṣā aṃśumānviṣṇureva ca/
ete sahasrakiraṇā ādityā dādvaśa smṛtāḥ

mārīcātkaśyapājjātāḥ puttrāste'ditinaṃdanāḥ/
kṛśāśvasya ṛṣeḥ putrā devapraharaṇāḥ smṛtāḥ

ete devagaṇāstāta pratimanvaṃtareṣu ca/
utpadyaṃte vilīyaṃte kalpekalpe tathaiva ca

ditiḥ putradvayaṃ lebhe kaśyapāditi naḥ śrutam/
hiraṇyakaśipuṃ caiva hiraṇyākṣaṃ tathaiva ca

hiraṇyakaśipostadvajjātaṃ putracatuṣṭayam/
prahlādaścānuhlādaśca saṃhlādohlāda eva ca

prahlādaputrā āyuṣmānśibirbāṣkalireva ca/
virocanaścaturthastu sa baliṃ putramāptavān

baleḥ putraśataṃ tvāsīdbāṇajyeṣṭhaṃ tato nṛpa/
dhṛtarāṣṭrastathāsūryyo vivasvānaṃśutāpanaḥ

nikumbhanāmā gurvakṣaḥ kukṣirbhaumotha bhīṣaṇaḥ/
evamanye tu bahavo bāṇojyeṣṭho guṇādhikaḥ

bāṇassahasrabāhustu sarvāstraguṇasaṃyutaḥ/
tapasā toṣito yasya pure vasati śūladhṛt

mahākālatvamagamatsārthyaṃ yasya pinākinaḥ/
hiraṇyākṣasya putrobhūdaṃdhako nāmanāmataḥ

bhūtasaṃtāpanaścaiva mahānāgastathaiva ca/
etebhyaḥ putrapautrāṇāṃ koṭayaḥ saptasaptatiḥ

mahābalā mahākāyā nānārūpā mahaujasaḥ/
danuḥ putraśataṃ lebhe kaśyapādvaradarpitam

vipracittiḥ pradhānobhūdeṣāṃ madhye mahābalaḥ/
dviraṣṭamūrddhā śakunistathā śaṃkuśirodharaḥ

ayomukhaḥ śaṃbaraśca kapilo vāmanastathā/
marīcirmāgadhaścaiva harirgajaśirāstathā५०

nidrādharaśca ketuśca ketuvīryaḥ śatakratuḥ/
indramitragrahaścaiva vajranābhastathaiva ca

ekavastro mahābāhurvajrākṣastārakastathā/
asilomā pulomā ca vikurvāṇo mahāsuraḥ

svarbhānurvṛṣaparvā ca evamādyā danossutāḥ/
svarbhānoḥ suprabhā kanyā śacī caiva pulomajā

upadānavī mayasyāsīttathā maṃdodarī kuhūḥ/
śarmiṣṭhā suṃdarī caiva caṃḍā ca vṛṣaparvaṇaḥ

pulomā kālakā caiva vaiśvanarasute ubhe/
bahvapatyo mahāsatvo mārīcasya parigrahaḥ

tayoḥ ṣaṣṭisahasrāṇi dānavānāṃ purābhavan/
paulomānkālakhaṃjāṃśca mārīcojanayatpurā

avadhyā ye narāṇāṃ vai hiraṇyapuravāsinaḥ/
caturmukhāllabdhavarā ye hatā vijayena tu

vipracittiḥ siṃhikāyāṃ nava putrānajījanat/
hiraṇyakaśiporyevai bhāgineyāstrayodaśa

kaṃsaḥ śaṃkhaśca rājendra nalo vātāpireva ca/
ilvalo namuciścaiva khasṛmaścāṃjanastathā

narakaḥ kālanābhaśca paramāṇustathaiva ca/
kalpavīryaśca vikhyāto danuvaṃśavivarddhanaḥ

saṃhlādasya tu daityasya nivātakavacāḥ kule/
avadhyāḥ sarvadevānāṃ gaṃdharvoragarākṣasām

ye hatā balamāśritya arjunena raṇājire/
ṣaṭkanyā janayāmāsa tāmrā mārīcavīryataḥ

śukīṃ śyenīṃ ca bhāsīṃ ca sugṛdhrīṃ gṛdhrikāṃ śucim/
śukī śukānulūkāṃśca janayāmāsa dharmataḥ

śyenī śyenāṃśca bhāsī ca kurarānapyajījanat/
gṛdhrī gṛdhrānsugṛdhrī ca pārāvatavihaṃgamān

haṃsa sārasa kāraṃḍa plavānśucirajījanat/
ete tāmrāsutāḥ proktā vinatāyā niśāmaya

garuḍaḥ patagaśreṣṭho'ruṇaśceśaḥ patatriṇām/
saudāminī tathā kanyā yeyaṃ nabhasi viśrutā

saṃpātiśca jaṭāyuśca aruṇasya sutāvubhau/
saṃpātiputro babhruśca śīghragaścātiviśrutaḥ

jaṭāyoḥ karṇikāraśca śatagāmī ca viśrutau/
teṣāmasaṃkhyamabhavatpakṣiṇāṃ putrapautrakam

surasāyāṃ sahasraṃ tu sarpāṇāmabhavatpurā/
sahasraśirasāṃ kadrūḥ sahasraṃ prāpa suvratā

pradhānāsteṣu vikhyātā ṣṣaḍviṃśatirarindama/
śeṣavāsukikarkoṭa śaṃkhairāvatakaṃbalāḥ

dhanaṃjaya mahānīla padmāśvatara takṣakāḥ/
elāpatra mahāpadma dhṛtarāṣṭra balāhakāḥ

śaṃkhapāla mahāśaṃkha puṣpadaṃṣṭraṃ śubhānanāḥ/
śaṃkharomā ca nahuṣo ramaṇaḥ paṇinastathā

kapilo durmukhaścāpi pataṃjalimukhāstathā/
eṣāmanaṃtamabhavatsarveṣāṃ putrapautrakam

prāyaśo yatpurādagdhaṃ janamejayamaṃdire/
rakṣogaṇaṃ krodhavaśā sunāmānamajījanat

daṃṣṭriṇāṃ niyutaṃ teṣāṃ bhīmasenādagātkṣayam/
daṃṣṭri gomāyu kākādīnmahiṣīrgovarāṅganāḥ

surabhirjanayāmāsa kaśyapātttritayaṃ purā/
munirmunīnāṃ ca gaṇaṃ gaṇamapsarasāṃ tathā

tathā kinnaragaṃdharvānariṣṭā janayadbahūn/
tṛṇavṛkṣalatā gulmamirā sarvamajījanatat

khasā tu yakṣarakṣāṃsi janayāmāsa koṭiśaḥ/
ete kaśyapadāyādāḥ śataśotha sahasraśaḥ

eṣa manvaṃtare bhīṣma sargaḥ svārociṣe smṛtaḥ/
tatastvekonapaṃcāśanmarutaḥ kaśyapādditiḥ/
janayāmāsa dharmajña sarvānamaravallabhān

iti śrīpādmapurāṇe prathame sṛṣṭikhaṇḍe ṣaṣṭhodhyāyaḥ