Padma Purana · Chapter 1.49

ekonapañcāśo'dhyāyaḥ /
nārada uvāca-
kenācāreṇa viprasya brahmatejo vivardhate/
kenācāreṇa tasyaiva brāhmaṃ tejo vinaśyati

brahmovāca-/
śayanīyātsamutthāya rātryaṃśe dvijasattamaḥ/
devāṃścaiva smarennityaṃ tathā puṇyavato dhruvam

goviṃdaṃ mādhavaṃ kṛṣṇaṃ hariṃ dāmodaraṃ tathā/
nārāyaṇaṃ jagannāthaṃ vāsudevamajaṃ vibhum

sarasvatīṃ mahālakṣmīṃ sāvitrīṃ vedamātaram/
brahmāṇaṃ bhāskaraṃ candraṃ dikpālāṃśca grahāṃstathā

śaṅkaraṃ ca śivaṃ śaṃbhumīśvaraṃ ca maheśvaram/
gaṇeśaṃ ca tathā skandaṃ gaurīṃ bhāgīrathīṃ śivām

puṇyaśloko nalo rājā puṇyaśloko janārdanaḥ/
puṇyaślokā ca vaidehī puṇyaśloko yudhiṣṭhiraḥ

aśvatthāmā balirvyāso hanūmāṃśca vibhīṣaṇaḥ/
kṛpaḥ paraśurāmaśca saptaite cīrajīvinaḥ

etānyastu smarennityaṃ prātarutthāya mānavaḥ/
brahmahatyādibhiḥ pāpairmucyate nātra saṃśayaḥ

sakṛduccarite tāta sarvayajñaphalaṃ labhet/
gavāṃ śatasahasrāṇāṃ dānasya phalamaśnute

tataścāpi śucau deśe malamūtraṃ parityajet/
dakṣiṇābhimukho rātrau divā kuryādudaṅmukhaḥ

parato daṃtakāṣṭhaṃ ca tṛṇairuduṃbarādibhiḥ/
ataḥ paraṃ ca saṃdhyāyāṃ saṃyataśca dvijo bhavet

pūrvāhṇe raktavarṇāṃ tu madhyāhne śuklavarṇikām/
sāyaṃ sarasvatīṃ kṛṣṇāṃ dvijo dhyāyedyathāvidhi

tataḥ samācaretsnānaṃ yathājñānena yatnataḥ/
aṃgaṃ prakṣālayitvā tu mṛdbhiḥ saṃlepayettataḥ

śirodeśe lalāṭe ca nāsikāyāṃ hṛdi bhruvoḥ/
bāhvoḥ pārśve tathā nābhau jānvoraṅghridvaye tathā

ekā liṃge gude tisrastathā vāmakare daśa/
ubhayoḥ sapta dātavyā mṛdaḥ śuddhimabhīpsatā

aśvakrāṃte rathakrāṃte viṣṇukrāṃte vasuṃdhare/
mṛttike hara me pāpaṃ yanmayā pūrvasaṃcitam

anenaiva tu maṃtreṇa mṛttikāṃ yastanau kṣipet/
sarvapāpakṣayastasya śucirbhavati mānavaḥ

tatastu vedapūrveṇa snānaṃ kuryādvicakṣaṇaḥ/
nade nadyāṃ tathā kūpe puṣkariṇyāṃ taṭākake

jalarāśau ca vapre ca ghaṭasnānaṃ tathottaram/
kārayedvidhivanmartyaḥ sarvapāpakṣayāya ca

prātaḥsnānaṃ mahāpuṇyaṃ sarvapāpapraṇāśanam/
yaḥ kuryātsatataṃ vipro viṣṇuloke mahīyate

prātaḥ saṃdhyāsamīpe ca yāvaddaṃḍacatuṣṭayam/
tāvatpānīyamamṛtaṃ pitṝṇāmupatiṣṭhate

parato ghaṭikāyugmaṃ yāvadyāmaikamāhnikam/
madhutulyaṃ jalaṃ tasminpitṝṇāṃ prītivardhanam

tatastu sārddhayāmaikaṃ jalaṃ kṣīramayaṃ smṛtam/
kṣīramiśraṃ jalaṃ tāvadyāvaddaṇḍacatuṣṭayam

ataḥ paraṃ ca pānīyaṃ yāvaddhi praharatrayam/
tatparaṃ lohitaṃ proktaṃ yāvadastaṃgato raviḥ

caturthaprahare snāne rātrau vā tarpayetpitṝn/
tattoyaṃ rakṣasāmeva grahaṇena vinā smṛtam

pānīyaṃ sarvasirddhythaṃ puraiva nirmitaṃ mayā/
rakṣārthaṃ tasya toyasya yakṣāścaiva dhuraṃdharāḥ

na prāpnuvaṃti pitaro ye ca lokāṃtaraṃ gatāḥ/
duṣprāpyaṃ salilaṃ teṣāmṛte svānmartyavāsinaḥ

tasmācchiṣyaiśca putraiśca pautradauhitrakādibhiḥ/
baṃdhuvargaistathā cānyaistarpaṇīyaṃ pitṛvrataiḥ

nārada uvāca-/
jalasya daivataṃ brūhi tarpaṇasya vidhiṃ mayi/
yathā jānāmi deveśa tatvato vaktumarhasi

brahmovāca-/
jalasya devatā viṣṇuḥsa rvalokeṣu gīyate/
jalapūto bhavedyastu viṣṇustacchaṃkaro bhavet

jalaṃ gaṃḍūṣamātraṃ tu pītvā pūto bhavennaraḥ/
viśeṣātkuśasaṃsargātpīyūṣādadhikaṃ jalam

sarvadevālayo darbho mayāyaṃ nirmitaḥ purā/
[https://vedastudy.yolasite.com/kusha1.php kuśamūle] bhavedbrahmā kuśamadhye tu keśavaḥ

kuśāgre śaṃkaraṃ viddhi kuśa ete pratiṣṭhitāḥ/
kuśahastaḥ sadā medhyaḥ stotraṃ maṃtraṃ paṭhedyadi

sarvaṃ śataguṇaṃ proktaṃ tīrthe sāhasramucyate/
kuśāḥ kāśāstathā dūrvā yavapatrāṇi vrīhayaḥ

balvajāḥ puṃḍarīkāśca kuśāssapta prakīrtitāḥ/
ānupūrvyeṇa medhyāḥ syuḥ kuśā loke pratiṣṭhitāḥ

vinā maṃtreṇa yatsnānaṃ sarvaṃ tanniṣphalaṃ bhavet/
amṛtātsvādutāmeti saṃsparśācca tilasya ca

tasmācca tarpayennityaṃ pitṝṃstilajalairbudhaḥ/
daśabhiśca tilaistāvatpitṝṇāṃ prītiruttamā

agnistaṃbhabhayāddevā na cecchantyativistaram/
snātvā yastarpayennityaṃ tilamiśrodakaiḥ pitṝn

nīlapaṃḍavimokṣeṇa tvamāvāsyā tilodakaiḥ/
varṣāsu dīpadānena pitṝṇāmanṛṇo bhavet

vatsaraikamamāyāṃ tu tarpayedyastilaiḥ pitṛn/
vināyakatvamāpnoti sarvadevaiḥ prapūjyate

yugādyāsu ca sarvāsu yastilaistarpayetpitṝn/
uktaṃ yadvāpyamāyāṃ tu tasmācchataguṇādhikam

ayane viṣuve caiva rākāmāyāṃ tathaiva ca/
tarpayitvā pitṛvyūhaṃ svargaloke mahīyate

tathā manvaṃtarākhyāyāmanyasyāṃ puṇyasaṃsthitau/
grahaṇe caṃdrasūryasya puṇyatīrthe gayādiṣu

tarpayitvā pitṝnyāti mādhavasya niketanam/
tasmātpuṇyāhakaṃ prāpya tarpayetpitṛsaṃcayam

tarpaṇaṃ devatānāṃ ca pūrvaṃ kṛtvā samāhitaḥ/
adhikārī bhavetpaścātpitṝṇāṃ tarpaṇe budhaḥ

śrāddhe bhojanakāle ca pāṇinaikena dāpayet/
ubhābhyāṃ tarpaṇe dadyādvidhireṣa sanātanaḥ

dakṣiṇābhimukho bhūtvā śucistu tarpayetpitṝn/
tṛpyatāmiti vākyena nāmagotreṇa vai punaḥ

akṛṣṇairyattilairmohāttarpayetpitṛsaṃcayam/
bhūmyāṃ dadāti yadapo dātā caiva jale sthitaḥ

vṛthā taddīyate dānaṃ nopatiṣṭhati kasyacit/
sthale sthitvā jale yastu prayacchedudakaṃ naraḥ

nopatiṣṭhetpitṝṇāṃ tu salilaṃ tannirarthakam/
ārdravāsā jale yastu kuryādudakatarpaṇam ५०

pitarastasya tṛpyaṃti sahadevaissadānagha/
rajakaiḥ kṣālitaṃ vastramaśuddhaṃ kavayo viduḥ

hastaprakṣālane caiva punarvastraṃ tu śudhyati/
śuṣkavāsāḥ śucau deśe sthāne yattarpayetpitṝn

tato daśaguṇenaiva tuṣyaṃti pitaro dhruvam/
snānaṃ saṃdhyāṃ ca pāṣāṇe khaḍge vā tāmrabhājane

tarpaṇaṃ kurute yastu pratyekaṃ ca śatādhikam/
raupyāṃgulīyaṃ tarjanyāṃ dhṛtvā yattarpayetpitṝn

sarvaṃ ca śatasāhasraguṇaṃ bhavati nānyathā/
tathaivānāmikāyāṃ tu dhṛtvā svarṇāṃgulīṃ budhaḥ

tarpayetpitṛsaṃdohaṃ lakṣakoṭiguṇaṃ bhavet/
aṃguṣṭhadeśinī madhye savyahastasya khaḍgakam

dhṛtvānāmikayā ratnamaṃjalerakṣayaṃphalaṃ/
snānārthamabhigacchaṃtaṃ devāḥ pitṛgaṇaiḥ saha

vāyubhūtānugacchaṃti tṛṣārtāḥ salilārthinaḥ/
nirāśāste nivartaṃte vastraniṣpīḍanena ca

tasmānna pīḍayedvastramakṛtvā pitṛtarpaṇam/
tisraḥkoṭyo'rdhakoṭī ca yāni lomāni mānuṣe

sravaṃti sarvatīrthāni tasmānna paripīḍayet/
devāḥ pibaṃti śirasi śmaśrutaḥ pitarastathā

cakṣuṣorapi gaṃdharvā adhastātsarvajaṃtavaḥ/
devāḥ pitṛgaṇāḥ sarve gaṃdharvā jaṃtavastathā

snānamātreṇa tuṣyaṃti snānātpāpaṃ na vidyate/
nityasnānaṃ ca yaḥ kuryātsa naraḥ puruṣottamaḥ

sarvapāpairvinirmukto nākalokemahīyate/
snānaṃ tarpaṇaparyaṃtaṃ devā maharṣayo viduḥ

ataḥ paraṃ ca devānāṃ pūjanaṃ kārayedbudhaḥ/
gaṇeśaṃ pūjayedyastu vighnastasya na jāyate

ārogyārthaṃ ca sūryaṃ ca dharmamokṣāya mādhavam/
śivaṃ ca kṛtyakāmārthaṃ sarvakāmāya caṃḍikām

devāṃstu pūjayitvā tu vaiśvadevabaliṃ caret/
vahnikāryaṃ tataḥ kṛtvā yajñaṃ brāhmaṇatarpaṇam

devānāṃ sarvasatvānāṃ punastriviṣṭapaṃ vrajet/
gatāgataṃ sthiraṃ kṛtvā kāmānmokṣaṃ sukhaṃ divam

tasmātsarvaprayatnena nityaṃ karmāṇi kārayet/
nārada uvāca-/
kimarthaṃ ca jalaṃ tāta devāḥ pitṛgaṇaiḥ saha

na prāpnuvaṃti sarvajña labhaṃte mānavā yathā/
brahmovāca/
purā sṛṣṭaṃ mayā toyaṃ sarvadevamayāmṛtam

tasyaiva rakṣaṇārthaṃ ca rakṣā yakṣā dhanurdharāḥ/
ghnaṃti te pitaraṃ devamasmadvākyānna mānuṣam

paśavaḥ pakṣiṇaḥ kīṭā martyaloke vyavasthitāḥ/
martyajātāśca devā ye tathaiva mānuṣā dhruvam

tarpayitvā guruṃ nityaṃ suraloke pratiṣṭhitāḥ/
asnāyī ca malaṃ bhuṃkte ajapī pūyaśoṇitam

akṛtvā tarpaṇaṃ nityaṃ pitṛhā copajāyate/
brahmahatyāsamaṃ pāpaṃ devānāmapyapūjane

sandhyākṛtyamakṛtvā ca sūryaṃ haṃti ca pāpakṛt/
nārada uvāca-/
brāhmaṇasya sadācārakramaṃ brūhi ca karmaṇām

itareṣāṃ ca varṇānāṃ pravṛttamakhilaṃ vada/
brahmovāca-/
ācārāllabhate cāyurācārāllabhate sukham

ācārātsvargaṃ mokṣaṃ ca ācāro haṃtyalakṣaṇam/
anācāro hi puruṣo loke bhavati niṃditaḥ

duḥkhabhāgī ca satataṃ vyādhitolpāyureva ca/
narake niyataṃ vāso hyanācārānnarasya ca

ācārācca paraṃ lokamācāraṃ śṛṇu tattvataḥ/
gomayena gṛhe nityaṃ prakuryādupalepanam

prakṣālayettataḥ pīṭhaṃ kāṣṭhaṃ pātraṃ śilātalam/
bhasmanā kāṃsyapātraṃ tu tāmramamlenaśuddhyati

śilāpātraṃ tu tailena phālaṃgo vālakena tu/
svarṇaraupyādipātraṃ tu jalamātreṇa śudhyati

agninā lohapātraṃ tu pākaprakṣālanena tu/
khananāddāhanāccaiva upalepana dhāvanāt

parjanyavarṣaṇāccaiva bhūramedhyā viśudhyati/
taijassānāṃ maṇīnāṃ ca sarvasyāśmamayasya ca

bhasmabhirmṛttikābhiśca śuddhiruktā mayā purā/
śayyā bhāryā śiśurvastramupavītaṃ kamaṃḍaluḥ

ātmanaḥ kathitāśśuddhā na pareṣāṃ kadācana/
na bhuṃjītaikavastreṇa na snāyādekavāsasā

na dhārayetparasyaivaṃ snānavastraṃ kadācana/
saṃskāraṃ keśadaṃtānāṃ prātareva samācaret

gurūṇāṃ ca namaskāraṃ nityameva samācaret/
hastapāde mukhe caiva paṃcārdro bhojanaṃ caret

paṃcārdrakastu bhuṃjānaḥ śataṃ varṣāṇi jīvati/
devatānāṃ gurorājñāṃ snātakācāryayorapi

nākrāmetkāmataśchāyāṃ viprasya dīkṣitasya ca/
gogaṇaṃ devataṃ vipraṃ ghṛtaṃ madhu catuṣpatham

pradakṣiṇaṃ prakurvīta prakhyātāṃśca vanaspatīn/
goviprāvagniviprau ca viprau dvau daṃpatī tathā

tayormadhye na gaccheta svargasthopi pateddhruvam/
ucchiṣṭo na spṛśedagniṃ brāhmaṇaṃ daivataṃ gurum

svaśīrṣaṃ puṣpavṛkṣaṃ ca yajñavṛkṣamadhārmikam/
trīṇi tejāṃsi nocchiṣṭa udīkṣeta kadācana

sūryācaṃdramasāvevaṃ nakṣatrāṇi ca sarvaśaḥ/
nekṣedvipraṃ guruṃ devaṃ rājānaṃ yatināṃ varam

yoginaṃ devakarmāṇaṃ dharmāṇāṃ kathakaṃ dvijam/
nadīnāṃ ca pratīre ca patyuśca saritāṃ tathā

yajñavṛkṣasya mūle ca udyāne puṣpavāṭake/
śarīrasya malatyāgaṃ na kuryājjīvane tathā

viprasyāyatane goṣṭhe ramye rājapatheṣu ca/
na kṣauraṃ kārayeddhīraḥ kujasyāhni kadācana

malaṃ na dhārayeddaṃte nakhaṃ na vadane kṣipet/
tailābhyaṃgaṃ na kurvīta vāsare ravibhaumayoḥ

svagātrāsanayorvādyaṃ gurorekāsanādanam/
na harecchrotriyasvaṃ ca devasyāpi gurorapi

rājñastapasvināṃ caiva paṃgoraṃdhasya yoṣitaḥ/
paṃthā deyo brāhmaṇāya gobhyo rājabhya eva ca

rogiṇe bhārataptāya gurviṇyai durbalāya ca/
vivādaṃ na ca kurvīta nṛpa vipra cikitsakaiḥ

brāhmaṇaṃ gurupatnīṃ ca dūrataḥ parivarjayet/
patitaṃ kuṣṭhasaṃyuktaṃ cāṃḍālaṃ ca gavāśinam १००

nirdhūtaṃ jñānahīnaṃ ca dūrataḥ parivarjayet/
striyaṃ duṣṭāṃ ca durvṛttāmapavāda pradāyinīm

kukarmakāriṇīṃ duṣṭāṃ sadaiva kalahapriyām/
pramattāmadhikāṃgīñca nirlajjāṃ bāhyacāriṇīm

vyayaśīlāmanācārāṃ dūrataḥ parivarjayet/
malināṃ nābhivaṃdeta gurupatnīṃ kadācana

na spṛśettāṃ ca medhāvī spṛṣṭvā snānena śuddhyati/
sa tayā saha keliṃ ca varjayecca sadaiva hi

śṛṇuyācca vaco nūnaṃ na paśyecca guroḥ striyam/
vadhūṃ putrasya bhrātuśca svaputrīṃ yuvatīṃ dhruvam

anyāṃ ca gurupatnīṃ ca nekṣetsparśaṃ na kārayet/
tābhiḥ saha kathālāpaṃ tathā bhrūbhaṃgadarśanam

kalahaṃ nistrapāṃ vāṇīṃ sadaiva parivarjayet/
na dadyācca sadā pādaṃ tuṣāṃgārāsthibhasmasu

kārpāsāsthiṣu nirmālye citikāṣṭhe citau gurau/
śuṣkaṃ mīnaṃ na bhakṣeta pūtigaṃdhimamedhyakam

vighasaṃ cānyaducchiṣṭaṃ pākārthaṃ ca parasya ca/
na sthātavyaṃ na gaṃtavyaṃ kṣaṇamapyasatā saha

na tiṣṭhecca kṣaṇaṃ dhīro dīpacchāye kalidrume/
aspṛśyaissaha cālāpaṃ patitaiḥ kupitaiḥ saha

na kuryātkṣaṇamātraṃ tu kṛtvā gacchecca rauravam/
kaniṣṭhaṃ nābhivaṃdeta pitṛvyaṃ mātulaṃ tathā

utthāya cāsanaṃ dadyātkṛtāṃjalyagrataḥ sthitaḥ/
tailābhyaktaṃ tathocchiṣṭamārdravastraṃ ca rogiṇam

pārāvāragatodvignaṃ vahaṃtaṃ nābhivādayet/
yajñasyāṃtargataṃ naṣṭaṃ krīḍaṃtaṃ strījanaiḥ saha

bālakrīḍāgataṃ cāpi puṣpayuktaṃ kuśairyutam/
śiraḥ prāvṛtya karṇau vā apsu muktaśikhopi vā

akṛtvā pādayoḥ pūjāṃ nācāmeddakṣiṇāmukhaḥ/
upavītavihīnaśca nagnako muktakacchakaḥ

ekavastrapidhānaśca ācāṃto naiva śudhyati/
madhyamābhirmukhaṃ pūrvaṃ tisṛbhiḥ samupaspṛśet

aṃguṣṭhadeśinībhyāṃ ca nāsāṃ ca tadanaṃtaram/
aṃguṣṭhānāmikābhyāṃ ca cakṣuṣī samupaspṛśet

kaniṣṭhāṃguṣṭhataśśrotre nābhimaṃguṣṭhakena tu/
talena hṛdayaṃ nyasya sarvābhirmastakopari

bāhūcāgreṇa saṃspṛśya tataḥ śuddho bhavennaraḥ/
anenācamanaṃ kṛtvā mānavaḥ prayato bhavet

sarvapāpairvinirmuktaḥ svargaṃ cākṣayamaśnute/
prāṇastripuṭaśṛṃgyā ca vyānopānaśca mudrayā

samānastu samastābhirudānastarjanīṃ vinā/
nāgaḥ kūrmaśca kṛkaro devadatto dhanaṃjayaḥ

upaprīṇaṃtu te prītā yebhyo bhūmau pradīyate/
śayanaṃ cārdrapādena śuṣkapādena bhojanam

nāṃdhakāre ca śayanaṃ bhojanaṃ naiva kārayet/
paścime dakṣiṇe caiva na kuryāddaṃtadhāvanam

uttare paścime caiva na svapeddhi kadācana/
svapnādāyuḥ kṣayaṃ yāti brahmahā puruṣo bhavet

na kurvīta tataḥ svapnaṃ śastaṃ ca pūrvadakṣiṇam/
āyuṣyaṃ prāṅmukho bhuṃkte'yaśasyaṃ dakṣiṇāmukhaḥ

śriyaṃ pratyaṅmukho bhuṃkte yaśo bhuṅkta udaṅmukhaḥ/
prācyāṃ naro labhedāyuryāmyāṃ pretatvamaśnute

vāruṇe ca bhavedrogī āyurvittaṃ tathottare/
devānāmekabhuktaṃ tu dvibhuktaṃ syānnarasya ca

tribhuktaṃ pretadaityasya caturthaṃ kauṇapasya tu/
nirāmiṣaṃ havirdevā matsyamāṃsādi mānuṣāḥ

pūtiparyuṣitaṃ duṣṭamanye bhuṃjaṃtyanāvṛtāḥ/
svargasthitānāmiha jīvaloke catvāri teṣāṃ hṛdaye ca saṃti

dānaṃ praśastaṃ madhurā ca vāṇī devārcanaṃ brāhmaṇatarpaṇaṃ ca/
kārpaṇyavṛttisvajaneṣu niṃdā kucelatā nīcajaneṣu bhaktiḥ

atīva roṣaḥ kaṭukā ca vāṇī narasya cihnaṃ narakāgatasya/
navanītopamā vāṇī karuṇā komalaṃ manaḥ

dharmabījaprasūtānāmetatpratyakṣa lakṣaṇam/
dayādaridrahṛdayaṃ vacaḥ krakaca karkaśam

pāpabījaprasūtānāmetatpratyakṣa lakṣaṇam/
śrāvayecchṛṇuyādvāpi sadācārādikaṃ naraḥ

ācārādeḥ phalaṃ labdhvā pāpātpūto'cyuto divi

iti śrīpādmapurāṇe prathame sṛṣṭikhaṃḍe sadācāravarṇanaṃnāmaikonapañcāśo'dhyāyaḥ