Padma Purana · Chapter 1.46

śrī bhīṣma uvāca-/
narasiṃhasya māhātmyaṃ vistareṇa tvayeritaṃ/
tathā bhavasya māhātmyaṃ bhairavasyābhidhīyatām

pulastya uvāca/
tasyāpi devadevasya śṛṇu tvaṃ karma cottamaṃ/
āsīddaityoṃdhako nāma bhinnāṃjanacayopamaḥ

tapasā mahatā yukto hyavadhyastridivaukasām/
sa kadācinmahādevaṃ pārvatyā sahitaṃ vibhuṃ

krīḍamānaṃ tadā dṛṣṭvā hartuṃ devīṃ pracakrame/
etāṃ devīṃ harāmyadya viyoge mṛtyumeṣyati

tataḥ sthirā bhavitrī me bhāryaiṣā lokasuṃdarī/
bibauṣṭhaṃ cāruvadanaṃ cārukāṃtataraṃ mukhaṃ

yadyeṣā na bhavedbhāryā jīvite kiṃ prayojanam/
etāṃ matimathāsthāya maṃtribhiḥ saha maṃtrya ca

cakre yogaṃ sasainyasya senāpatimabhāṣata/
ānayasva rathaṃ mahyaṃ jaitraṃ devanipātanam

jayiṣye tridaśānsarvānviṣṇurudrapurogamān/
hariṣye parvatasutāṃ tayā me'pahṛtaṃ manaḥ

maṃtriṇā tasya cākhyātaḥ kanakasya vadhassuraiḥ/
parabhāryānuraktasya kṛto devaiḥ savāsavaiḥ

tataḥ kopaparītātmā hanmi devānsaśaṃkarān/
taṃ hatvā dānavaṃ śakro bhayādaṃdhāsurasya ca

jagāma śaraṇānveṣī kailāsaṃ śaṃkarālayaṃ/
dṛṣṭvā praṇamya deveśaṃ caṃdrārddhakṛtaśekharaṃ

bhīto vijñāpayāmāsa dhṛtasāhasralocanaḥ/
abhayaṃ dehi me deva dānavādaṃdhakādahaṃ

bibhemi tasya putrodya mayā yudhi nipātitaḥ/
tadyāvanna sa jānāti hataṃ putraṃ mahāsuraḥ

tāvattatrastha evāśu hanyatāṃ madbhayāvahaḥ/
strīlaulyāddānavaḥ krūraḥ parabhāryāpahārakaḥ

sarvathā ghātanīyaste bhavatā surasattama/
śakrasyaivaṃ vacaḥ śrutvā śaraṇyaḥ śaṃkarastadā

dadāvabhayamevāsau mā bhairiti śatakratoḥ/
dattābhayotha kailāsādājagāma kuśasthalīm

vṛto bhūtagaṇairīśo vadhārthamaṃdhakasya tu/
kṛtvā rūpaṃ mahākāyaṃ viśvarūpaṃ subhairavaṃ

sarpairjvaladbhirdhāvadbhirbhīmaṃ bhīmabhujaṃgavat/
jaṭāsaṭābhirākāśaṃ phaṇiratnaśikhārciṣā

dahannatīvatejobhiḥ kālāgniriva saṃkṣaye/
mukhairdaṃṣṭrāṃkurāṃkaiśca dvitīyendukalojjvalaiḥ

pātālodararūpābhairbhairavārāvanādibhiḥ/
bhujairanekasāhasrairbahuśastrakṛtagrahaḥ

bahvābharaṇabhūṣāḍhyai raṇe ghoraninādibhiḥ/
siṃhacarmaparīdhānaṃ vyāghratvaguttarīyakaṃ

gajājinakṛtāṭopaṃ patadbhṛṃgaravākulaṃ/
īdṛgrūpaṃ vidhāyeśo danudaityabhayāvahaṃ

avātaranmahīṃ bhīmo danūnāṃ kṣayakārakaḥ/
aṃdhāsuropi danujaḥ putraṃ śrutvā hataṃ yudhi

krodhena tamasāviṣṭo raṇatūryāṇyacodayat/
saṃhatyāvahitaḥ prāpto yatra te tridaśāḥ sthitāḥ

mahatyā senayā sārddhaṃ rathavāraṇayuktayā/
te devā dānavānvīkṣya mahāhavakṛtādarān

vyapayātatanutrāṇāḥ śaṃbhuṃ śaraṇamanvayuḥ/
mā bhairiti ca tāndevo devānuktvā trilocanaḥ

gṛhītvā śūlamātiṣṭhaddaṃṣṭrāravadharo ruṣā/
aṃdhakenātha ruṣṭena śatakoṭiśarairgaṇāḥ

nihatāścāpi devānāṃ bahūnāmekatākṛtāṃ/
sasphuliṃgārciṣo vahnermuṃcamānaḥ pinākadhṛk

śaraiḥ samāvṛtaṃ cakre aṃdhakaṃ rathagaṃ tataḥ/
danunātho rathasthotha śithilaḥ śithilāyudhaḥ

nimaṃtrya dānavānsarvānsa yoddhumupacakrame/
bahudhā tadbalaṃ bhagnaṃ vividhāyudhayodhibhiḥ

yudhi vīrairhataṃ devaiḥ sthāṇunā sakhyamāśritaiḥ/
dānavaścāṃdhakaḥ sainyaṃ bhinnaṃ dṛṣṭvā kṛtaṃ suraiḥ

ātmānaṃ ca maheśena niruddhaṃ bāṇakoṭibhiḥ/
vihvalībhūtadehosau dhairyamālaṃbya kevalam

pinākaṃ caiva rudrasya gṛhya rudramatāḍayat/
pinākasyābhighātena rudro bhūmimathāgamat

bhūmau nipātite deve calitaṃ bhuvanatrayaṃ/
tatyajuḥ sāgarā velāṃ parvatāḥ śikharāṇi ca

nakṣatrāṇi viyogīni jagmurmuktānyanekaśaḥ/
patite bhuvi deveśe aṃdhako gadayā punaḥ

jaghāna ruṣito nāgaṃ hatvā taṃ pātayadbhuvi/
śivaṃ tyaktvā nāgarājaḥ prapalāyyānyato gataḥ

muhūrttāccetanāṃ labdhvā utthitaḥ parameśvaraḥ/
gṛhītvā paraśuṃ divyaṃ dānavaṃ naiva paśyati

kṛtvā tu tāmasīṃ māyāṃ māyāśataviśāradaḥ/
tayā vimohite deve kva nu vai dānavo gataḥ

śaṃbhorbhayamatho prāpya kiṃ nu pāpaḥ kariṣyati/
tamasā chāditā yāvaddevā vyākulatāṃ gatāḥ

saṃbhrāṃtamānasānīkāstadocuḥ kāryagauravāt/
etasminnaṃtare sūryastejorūpo vyavasthitaḥ

uttasthau nararūpeṇa kurvanvitimirā diśaḥ/
naṣṭe tamasi hṛṣṭāṅge khadyote prakaṭe sthite

devā mudamavāpuste spaṣṭānanavilocanāḥ/
uddīptāstu surāḥ sarve gaṇāḥ skaṃdapurogamāḥ

stuvaṃti vividhaistotraiḥ nararūpaṃ divākaram/
anaupamyaṃ jagadvyāpi brahmaviṣṇuśivātparam

snigdhavidrumasacchāyaṃ siṃdūrāruṇasaprabham/
prabhāsaṃtaṃ tadā dṛṣṭvā paṃcāṃgāliṃgitāvaniḥ

punaḥ praṇāmapravaṇaṃ praṇidhānapuraḥsaram/
ālokya snigdhayā dṛṣṭyā devadevaṃ trilocanaḥ

uvāca snigdhagaṃbhīra vācā devaṃ śanairharaḥ/
pūrayanniva tejobhirbhagavānbhuvanatrayam

daityamāyābhipannānāṃ darśanākulacetasām/
prāṇināmidamevaikamavisaṃvādi daivatam

ayameva ca saṃsārasāgarātsakalādapi/
sattvānuttārayandevaḥ karṇadhārāya te prabhuḥ

yajaṃto jaṃtavo bhaktyā yaṃ devaṃ vividhāḥ sadā/
niḥśreyasāya kalpaṃte taṃ nato bhāskaraṃ vibhum

yastūdayādriśikhare makuṭāyamānalīlāgabhastibhiralaṃ kusumaprakāśaiḥ/
vyāpya svadīdhitigaṇaiḥ pradiśo diśaśca dedīpyate sa savitā vibhavāya loke

brahmeṃdrarudramarudacyutavahnipātho nātha prayoganipuṇaiśca ṛṣīṃdrasaṃghaiḥ/
śreyorthibhiḥ pratidinaṃ divasāṃgarāgairdivyāṃgarāgaparilipta samastadaihaiḥ

pūjyaṃ vapustava sadā pralaye hi vedairgīrbhirvicitrapadamaṃḍalamaṃḍitābhiḥ/
ye tvāṃ stuvaṃti parasadmani sadmahīnā nityaṃ prasāritakarā bhuvi te bhavaṃti

ye dadrukuṣṭhapiṭikādibhirarditāṃgāḥ śīrṇatvacaḥ kunakhinaścyutakeśanāśāḥ/
deveśa tepi tavapādanatā bhavaṃti sadyo dviraṣṭaśaradākṛtayo manuṣyāḥ

sāmeti sāmagagaṇā hi makhārthakaṃ tvāmadhvaryavastvṛgiti bahvṛcamukhyapūgāḥ/
tvāmevamāryamiti kāryavidodhigaṃtuṃ nāgāśca veti pitaropyatha sarvagaṃdham

māyeti copaniṣadarkaṣaḍeva devā martyāstathā vayamiveha upāsate'mī/
gaṃdharvakinnaragaṇāḥ sahacāraṇaistu rūpaṃ tathā ca bhagavanpratipadyase tvam

yenārcayaṃti satataṃ bhavatorcyamarcisterciṣpratāpitadigaṃbaravittahīnāḥ/
kṣutkṣāmakaṃṭhajaṭharāghaṭakharpareṇa bhikṣāmaṭaṃti paraveśmasuterthahīnāḥ

utphullakokanadakośaviśālanetramīṣadvilāsalulitāñcitapiṃgatāram/
kāmaṃ praśastatarasuṃdarahāraramyamuttuṃgapīvarapayodharabhārakhinnaṃ

raṃbhopamoru pṛthupīnanitaṃbabiṃbānaddhakvaṇanmaṇiraṇadraśanākalāpaṃ/
bṛṃdaṃ lalāṭataṭakoṭipaṭāṃtalaṃbi hemāṃcalāṃcitamukhaṃ kulapālikānām

kāṃtaṃ gṛheṣu kalagadgadabhāṣitānāṃ jhaṃkāranūpuraraveṇavirāvitānām/
teṣāṃ kṛśānukaramindusamānakāṃtaṃ yairarcitosi bhagavanbhavamocanastvaṃ

brahmā tvameva harirasyanilo'nalosi rudroṃ'takosi varuṇo'syamarādhiposi/
somosi vāyurasi bhūrasi ceśvarosi yajñosi vittapatirasyaparājitosi

te saptasaptisuravāharaṇena muktā bhūmāvatheti tarasorutaraṃtarītāḥ/
vyomaitadaṃtarahitaṃ parito hi gatvā gacchaṃti na śramadaṃ himanāgapīme

dhyānaikayoganiratāśca samādhibhāvātdhyātvā padaṃ tava turīyamanaṃtamūrte/
muktāmayāstanubhṛto na bhiyābhiyuktāstadbrahmaśāśvatamaciṃtyamanādyanaṃtaṃ

janmādirogarahitaṃ paramaṃ purāṇamīśaṃ jarāmaraṇaśokabhayātiriktam/
sthūlānubhāvanagaṇāgaṇitaṃ viśuddhaṃ vedāṃtavādibhiralaṃ parimanyate yat

tvāmagnipuṃjavapuṣaṃ tapasāṃ nivāsaṃ yātā divaṃ sucirakālamupāsyabhaktāḥ/
bhāno surāsurasamūhaśironighṛṣṭa pādāraviṃdayugalāmalacārumūrtte

bhūteśabhūtavaradā sakṛdavyayātmanvyomāṭṭahāsasavitarbhuvanaikadīpa/
ṛksāmamaṃtrayajuṣāmadhivāsa nāma sṛṣṭisthitipralayakāraṇalokapāla

dīnasya deva kṛpaṇasya bhavebhave me magnasya cārudavicāra manorathāni/
śaśvadyatīśvara śaśī karakaṃkaghorotpāto jarāmaraṇaśokarugāṃtarasya

yaḥ prātaḥ sāyamidaṃ madhyāhne vā paṭhecca dīptāṃśoḥ/
sālokyaṃ yāti raveḥ prāpnoti dharmārthakāmāṃśca

nityaṃ tasmācca sūryācca manasobhihitaṃ ca yat/
namaste devadeveśa bhaktānāmabhayaṃkara

subrahmaṇya namaste tu sarvadevanamaskṛta/
tigmāṃśo vai namastubhyaṃ jagataścakṣuṣe namaḥ

prabhākara namastestu bhāno jaya jagatpate/
anena danumukhyena pīḍitohaṃ jagatpate

kiṃ karomi kathaṃ cainaṃ ghātayāmi divākara/
sūrya uvāca-/
jaya śūlena pāpiṣṭhaṃ māyāśataviśāradam

jayaṃ prāpnuhi deveśa hatvā śūlena cāṃdhakam/
gṛhya śūlaṃ tato dūramākṣipya hara tejasā

tatondhakastriśūlenātāḍayatpāpakarmakṛt/
tasminyuddhe tathā rudro hyandhakenābhipīḍitaḥ

mumoca bāṇamutyugraṃ nāmnā pāśupataṃ hi yat/
pinākamānamya dorbhyāṃ pinākī śaṃkaraḥ svayam

rudrabāṇavinirbhedādrudhirādandhakasya tu/
aṃdhakāśca samutpannāśśataśotha sahasraśaḥ

teṣāṃ vidāryamāṇānāṃ rudhirādapare punaḥ/
babhūvuraṃdhakā ghorā yairvyāptamakhilaṃ jagat

taṃ tu māyāvinaṃ dṛṣṭvā devadevastadāṃdhakam/
pānārthamaṃdhakasyāsraṃ sasṛje mātṛkāstadā

māheśvarīṃ tathā brāhmīṃ śaurīṃ vā bāḍavīṃ tathā/
sauparṇīmatha vāyavyāṃ śaṃkhinīṃ taittirīṃ tathā

saurīṃ saumyāṃ śivadūtīṃ cāmuṃḍāmatha vāruṇīṃ/
vārāhīṃ nārasiṃhīṃ ca vaiṣṇavīṃ ca vibhāvarīṃ

śatānaṃdāṃ bhagānaṃdāṃ picchilāṃ bhagamālinīṃ/
bālāmatibalāṃ raktāṃ surabhīṃ mukhamaṃḍitām

mātṛnaṃdāṃ sunaṃdāṃ ca biḍānīṃ śakunīṃ tathā/
revatīṃ ca mahāpuṇyāṃ tathaiva śikhipaṭṭikāṃ

śūlena ca tato daityaṃ bibheda tripurāṃtakaḥ/
nirgataṃ rudhiraṃ tasmātpapustā mātarastadā

nīrakto hi tadā daityaśśuṣkatāṃ prāpa bhūpate/
śūle protastadā daityo divyavarṣasahasrakam

mahābalena rudreṇa vidhṛtopi mṛto nahi/
stutastena tadā śaṃbhurbhaktyā daityena suvrata

namostu śaṃbho bhavanāśaheto namostu te deva varaprasīda/
tvaṃ bhū jalāgnīranabhorkasomayajvāṣṭamūrtirbhavabhāvanolam

tvāṃ vai bāṇo bahuvādyena toṣya prāptaścaiśyaṃ sve pure tatsvarakṣyam/
rakṣodhīśo bāhubhistolyaśailaṃ yuṣmatkrāṃtakliṣṭarūpo hyanauṣīt

prāptopyaiśyaṃ sarvarakṣogaṇānāṃ putraṃ cāpi prorjitaṃ śakrabaṃdham/
bhavabhayahara hara parama udāra mama sukhakaraṇa nikhila surasāra

jitamarudabhimatavitaraṇapāra tava padakamalamihāraṇasāra/
taveśa pādapaṃkajaṃ karoti yo naro hṛdi sadeśatasya vāṃchitaṃ dadāsi bhaktibhāvitaḥ

munīśvarāḥ purā haraṃ bhavaṃtamevamādarātprapūjya liṃgarūpiṇaṃ samāpitā manorathān/
bhavodbhavaikarūpiṇaṃ prapaṃcapaṃcakākṛtiṃ viciṃtyavṛkṣakoṭarastha eṣa jīvajīvanaṃ

bhavedbhavāṅghriciṃtanāptasarvakāmaīśvara tvadīya kiṃkarānvite pade pade samāgataḥ/
mūḍhohaṃ nābhijānāmi tvāṃ stotuṃ bhaktavatsala

sadīśvareṇa manasāpyanukaṃpyo raṇaṃ gataḥ/
iti stuto maheśastu bhaktyā daityena sādaraṃ

gaṇeśatāṃ dadau tasmai nāma bhṛṃgīriṭīti ca/
eṣa te mahimā bhūpa harasya bhavahāriṇaḥ

kathito vighnavighnākhyastatparāṇāṃ sukhāvahaḥ/
bhīṣma uvāca/
manuṣyasyāpi devatvaṃ sukhaṃ rājyaṃ dhanaṃ yaśaḥ

jayaṃ bhogyaṃ tathārogyamāyurvidyāṃ śriyaṃ sutaṃ/
baṃdhuvarga śivaṃ sarvaṃ brūhi me viprasattama

pulastya uvāca/
ebhirguṇairyutaḥ śrīmānsadaivabrāhmaṇo bhuvi/
trailokye tu sadā medhyo vipradevo yugeyuge

pūjayitvā dvijāndevāḥ svargaṃ bhuṃjaṃti cākṣayaṃ/
dharāmavaṃti rājāno lokāvittaṃ sukhaṃ śivaṃ

loke vipra samo nāsti devānāmapi daivataṃ/
sa ca dharmamayaḥ sākṣādbhuvi muktiprado bhṛśaṃ

lokānāṃ sa guruḥ pūjyastīrthabhūto'nagho janaḥ/
sarvadevālayaḥ satvo nirmito brahmaṇā purā

imamarthaṃ purā pṛṣṭo nāradena pitāmahaḥ/
kasmiṃstu pūjite brahmanprasādī mādhavo bhavet

brahmovāca -/
yasya viprāḥ prasīdaṃti tasya viṣṇuḥ prasīdati/
tasmādbrāhmaṇa śuśrūṣuḥ paraṃ brahmādhigacchati

viṣṇurbrāhmaṇadeheṣu sadā vasati nānyathā/
tasmādbrāhmaṇapūjāyāṃ viṣṇustuṣyati tatkṣaṇāt

viprānyaḥ pūjayennityaṃ dānamānārcanādibhiḥ/
kṛtaṃ kratuśataṃ tena vidhyuktaṃ priyadakṣiṇam

brāhmaṇasya mukhaṃ kṣetramanūṣaramakaṇṭakam/
vāpayetsarvabījāni sā kṛṣissārvakālikī

abhigamya tu yaddattaṃ yacca dānaṃ manoramaṃ/
vidyate sāgarasyāṃto dānasyāṃto na vidyate

manasāpi na hiṃsaṃti bhūdevamātatāyinaṃ/
manonukūlatāṃ yāṃti devairapi ca durlabhāṃ

gṛhe yasyāgato vidvānnairāśyaṃ nopagacchati/
sarvapāpakṣayastasya cākṣayaṃ svargamaśnute

kāle deśe ca pātre ca vipre yaccārpayedvasu/
taddhanaṃ cākṣayaṃ viddhi janmajanmani tiṣṭhati

na ca dāridryatāmeti nāturo na ca kātaraḥ/
manonukūlāṃ pramadāmarcayitvā dvijānlabhet

kṛtvā sāhasakarmāṇi dadyādviprāya parvasu/
taddānaṃ suguṇaṃ proktamabhayaṃ lābha eva ca

viprapādatalodghṛṣṭi kṣatī bhavati yaḥ karaḥ/
sa karaḥ śrīkaro nāma anyaḥ karmakaraḥ karaḥ

viprapādarajaḥ pūtāḥ pūtāstajjalabindubhiḥ/
vipadbhiśca sadā pāpairmuktā yāṃti triviṣṭapam

viprapādarajaḥ pūtāḥ śucayo gṛha catvarāḥ/
puṇyakṣetrasamāste syuḥ praśastā yajñakarmasu

ādau brahmamukhādvipraḥ samudbhūtaḥ purānaghaḥ/
vedāstatraiva saṃjātāḥ sṛṣṭisaṃsthiti hetavaḥ

tasmādvipramukhe vedāścārpitāḥ puruṣeṇa hi/
pūjārthaṃ sarvalokānāṃ sarvayajñārthato dhruvam

pitṛyajñe vivāhe ca vahnikāryeṣu śāṃtiṣu/
praśastā brāhmaṇā nityaṃ sarva svastyayaneṣu ca

devā bhuṃjaṃti havyāni balipretādayo'surāḥ/
pitaraścaiva kavyāni viprasyaiva mukhādrdhuvam

devebhyaśca pitṛbhyaśca yo dadyādyajñakarmasu/
dānaṃ homaṃ baliṃ caiva vinā vipreṇa niṣphalam

bhuṃjaṃti cāsurāstatra pretā daityāśca rākṣasāḥ/
tasmādbrāhmaṇamāhūya teṣu karmāṇi kārayet

kāle deśe ca pātre ca lakṣakoṭiguṇaṃ bhavet/
śraddhayā ca dvijaṃ dṛṣṭvā prakuryādabhivādanam

dīrghāyustasya vākyena ciraṃjīvī bhavennaraḥ/
anabhivādanādvipra dveṣādaśraddhayāpi ca

āyuḥ kṣīṇaṃ bhavetpuṃsāṃ bhūtināśaśca durgatiḥ/
āyurvṛddhiryaśovṛddhirvṛddhirvidyā dhanasya ca

pūjayitvā dvijānśreṣṭho bhavennāstyatra saṃśayaḥ/
na viprapādodakakardamāni na vedaśāstrapratighoṣitāni

svāhā svadhā svastivivarjitāni śmaśānatulyāni gṛhāṇi tāni/
nārada uvāca/
kaśca pūjyatamo vipro hyapūjyo vātha ko bhavet

viprasya lakṣaṇaṃ brūhi yāthātathyaṃ gurorapi/
brahmovāca-/
pūjyaḥ śrotriyako nityaṃ sadācārasamanvitaḥ

sadvṛttaḥ kaluṣairmuktastīrthabhūto jano'naghaḥ/
nārada uvāca-/
jātaḥ kaḥ śrotriyastāta satkule vāpyasatkule

sadasatkarmakartā vā kaḥ pūjyo bhuvi bāḍavaḥ/
brahmovāca-/
satśrotriyakule jāto hyakriyo naiva pūjitaḥ

asatkṣetrakule pūjyo vyāsa vaibhāṃḍakau yathā/
kṣatriyāṇāṃ kule jāto viśvāmitrosti matsamaḥ

veśyāputro vasiṣṭhaśca anye siddhā dvijādayaḥ/
tasmātsacchotriyādīnāṃ śṛṇu putraka lakṣaṇam

dharāyāṃ tīrthabhūtānāṃ sarvapāpaharāya ca/
janmanā brāhmaṇo jñeyaḥ saṃskārairdvija ucyate१२९ dvija/
vidyayā yāti vipratvaṃ tribhiḥ śrotriyalakṣaṇam vipra/
vidyāpūto maṃtrapūto vedapūtastathaiva ca

tīrthasnānādibhirmedhyo vipraḥ pūjyatamaḥ smṛtaḥ/
nārāyaṇe sadā bhaktaḥ śuddhāṃtaḥkaraṇastathā

jiteṃdriyo jitakrodhassamaḥ sarvajaneṣu ca/
gurudevātitherbhaktaḥ pitroḥ śuśrūṣaṇe rataḥ

paradāre mano yasya kadācinnaiva modate/
purāṇakathako nityaṃ dharmākhyānasya saṃtatiḥ

asyaiva darśanānnityamaśvamedhādijaṃ phalam/
saṃlāpe gatimetyasya bhāgīrathyā plavasya ca

vrataiśca vividhaiḥ pūto nityasnānadvijārcanaiḥ/
mitrāmitre dayāluḥ syātsamaḥ sarvajaneṣu ca

parasvaṃ na haredyastu tṛṇamapyaṭavīgatam/
kāmakrodhādinirmukta iṃdriyairajitaḥ pumān

paradārānna gṛhṇāti manasāpi gṛhāgatān/
nārada uvāca-/
gāyatryā lakṣaṇaṃ kiṃ vā pratyekākṣarajaṃ guṇam

kukṣicaraṇagotrāṇāṃ tasyā brūhi suniścayam/
brahmovāca-/
chaṃdo gāyatrī gāyatryāḥ savitā devatā dhruvam

śuklavarṇātvagnimukhā viśvāmitra ṛṣistathā/
brahmaṇaśśiraārūḍhā śikhā viṣṇu hṛdi sthitā

upanayane niyogaḥ syātsāṃkhyāyana sagotrajā/
trailokyacaraṇā jñeyā pṛthivīkukṣi saṃsthitā

caturviṃśatisthāne ca pādādau mastakāṃtake/
caturviṃśatyakṣaraṃ nyasya brahmalokaṃ sa viṃdati

pratyarṇadevatāṃ jñātvā viṣṇusāyujyamāpnuyāt/
aparaṃ ca pravakṣyāmi gāyatryā lakṣaṇaṃ dhruvaṃ

saptapaṃca tathā brahma yajuraṣṭādaśākṣaram/
jvalanādihakārāṃtaṃ jale sthitvā śataṃ japet

upapātakakoṭyā tu tathātipātakairapi/
brahmahatyādibhiḥ pāpairmuktā yāṃti mamālayaṃ

ॐagnervākpuṃsi yajurvedena juṣṭātsomaṃ piba svāhā/
viṣṇumaṃtraṃ mahāmaṃtraṃ tathā māheśvarasya ca

devīsūryagaṇeśānāṃ tathā kratubhujāṃ suta/
yasya kasya kule jāto guṇavāneva tairguṇaiḥ

sākṣādbrahmamayo vipraḥ pūjanīyaḥ prayatnataḥ/
dānaṃ dadyācca vidhivatsadā parvaṇi parvaṇi

akṣayaṃ labhate dātā janmakoṭiśatānprati/
svādhyāyanirato vipro yaḥ paṭhetpāṭhayetparān

dharmaṃ ca śrāvayelloke sadācāraṃ śrutiṃ smṛtiṃ/
purāṇasaṃhitāṃ nūnaṃ tathaiva dharmasaṃhitāṃ

śrāvayitvā tu lokeṣu śrāvayitvā dvijātiṣu/
urvyāṃ viṣṇusamaḥ sopi pūjanīyo naraiḥ suraiḥ

yadbalaṃ cākṣayaṃ tasya tīrthabhūtānaghasya ca/
samānamarcanaṃ kṛtvā naro yātyacyutālayaṃ

kadācitkriyate pāpaṃ vipraḥ pāpairna lipyate/
cāṃḍālasya gṛhe niṣṭhau bhāskarajvalanau yathā

yājanādhyāpanādyaunāttathaivāsatpratigrahāt/
viprāṇāṃ na bhaveddoṣo jvalanārkasamā dvijāḥ

tānpratigrahajāndoṣānprāṇāyāma vyavasthitāḥ/
nāśayaṃtīha pāpāni vāyurmeghamivāṃbare

gāyatrīṃ yo japennityaṃ prāṇāyāmasamanvitāṃ/
pratyakṣarāmarairyuktāṃ svāṅge vinyasya tāmapi

sarvapāpādvinirmukto janmakoṭikṛtādapi/
brahmaṇaḥ padavīṃ prāpya sa gacchetprakṛteḥ param

prāṇāyāmayutāṃ tasmādgāyatrīṃ japa nārada/
nārada uvāca-/
prāṇāyāmāḥ kathaṃ brahmanpratyekākṣaradevatāḥ

teṣāṃ nyāsaṃ tathāṃgeṣu vada tāta yathākramam/
brahmovāca-/
gudadeśetvapānasyāddhṛdi prāṇosti dehinaḥ

tasmādgudaṃ samākuṃcya prāṇena saha yojayet/
pūrakeṇa tadā putra kṛtvā kuṃbhakamuttamaṃ

prāṇāyāmatrayaṃ kṛtvā gāyatrīṃ saṃjapedidvajaḥ/
anenaiva japedyastu mahāpātakasaṃcayaḥ

sakṛduccāritenaiva kṣayaṃ yātyupapātakaṃ/
prativarṇasvaraṃ jñātvā vinyasyedyaḥ kalevare

sa jano brahmatāmeti phalaṃ vaktuṃ na śaknumaḥ/
pratyakṣarasya yaddaivaṃ śṛṇu putra vadāmyahaṃ

yajjaptvā ca punarmātustanaṃ na pibati dvijaḥ/
āgneyaṃ prathamaṃ jñeyaṃ vāyavyaṃ tu dvitīyakam

tṛtīyaṃ sūryadaivatyaṃ caturthaṃ vaiyataṃ tathā/
paṃcamaṃ yamadaivatyaṃ vāruṇaṃ ṣaṣṭhamucyate

saptamaṃ bārhaspatyaṃ tu pārjanyaṃ cāṣṭamaṃ viduḥ/
aindraṃ ca navamaṃ jñeyaṃ gāṃdharvaṃ daśamaṃ tathā

pauṣṇamekādaśaṃ viddhi maitraṃ dvādaśakaṃ smṛtaṃ/
tvāṣṭraṃ trayodaśaṃ jñeyaṃ vāsavaṃ tu caturdaśaṃ

mārutaṃ paṃcadaśakaṃ saumyaṃ ṣoḍaśakaṃ smṛtaṃ/
āṃgirasaṃ saptadaśaṃ vaiśvadevamataḥ paraṃ

āśvinaṃ caikonaviṃśaṃ prājāpatyaṃ tu viṃśakaṃ/
sarvadevamayaṃ jñeyamekaviṃśakamakṣaraṃ

raudraṃ dvāviṃśakaṃ jñeyaṃ brāhmaṃ jñeyamataḥ paraṃ/
vaiṣṇavaṃ tu caturviṃśametā akṣaradevatāḥ

japakāle tu saṃciṃtya tāsu sāyujyatāṃ vrajet/
jñātvā tu devatāstasya vāṅmayaṃ viditaṃ bhavet

sarvapāpavinirmukto brahmaṇaḥ padavīṃ vrajet/
gāyatrīṃ vinyasetpūrvaṃ śarīre cātmano budhaḥ

caturviṃśati sthāneṣu āpādamastakeṣu ca/
tatkāraṃ vinyasedyogī padāṃguṣṭhe vicakṣaṇaḥ

sakāraṃ gulphadeśe tu vikāraṃ jaṃghayornyaset/
tukāraṃ jānumadhye ca vakāraṃ corudeśataḥ

rekāraṃ guhyadeśe tu ṇikāraṃ vṛṣaṇe nyaset/
yaṃkāraṃ kaṭideśe tu bhakāraṃ nābhimaṇḍale

gokāraṃ jaṭhare nyasya dekāraṃ stanayornyaset/
vakāraṃ hṛdaye nyasya syakāraṃ karadeśataḥ

dhīkāraṃ vadane nyasya makāraṃ tāluke nyaset/
hikāraṃ nāsikāgre ca dhikāraṃ cakṣuṣornyaset

yokāraṃ tu bhruvormadhye yokāraṃ ca lalāṭake/
naḥkāraṃ tu mukhe pūrve prakāraṃ dakṣiṇe mukhe

cokāraṃ paścime nyasya dakāraṃ cottare nyaset/
yātkāraṃ mūrdhni vinyasya sarvavyāpī vyavasthitaḥ

etānvinyasya dharmātmā brahmaviṣṇuśivātmakaḥ/
mahāyogī mahājñānī paraṃ nirvāṇakaṃ vrajet

saṃdhyākāle punarnyāsaṃ śṛṇu tvaṃ tadyathārthataḥ/
ॐbhūriti hṛdaye nyasya ॐbhuvaśśirasi nyaset

ॐsvaḥ śikhāyai tatsaviturvareṇyamiti kalevare/
ॐbhargo devasya dhīmahīti netrayoḥ

ॐdhiyo yo naḥ pracodayāditi karayornyaset/
ॐāpo jyotī rasomṛtaṃ brahma bhūrbhuvaḥsvarom/
ityudakasparśamātreṇa pāpātpūto vrajeddhariṃ

ॐbhūḥ ॐbhuvaḥ ॐsvaḥ ॐmahaḥ ॐjanaḥ ॐtapaḥ ॐsatyam/
ॐtatsaviturvareṇyaṃ bhargo devasya dhīmahi dhiyo yo naḥ pracodayāt/
ॐāpo jyotī rasomṛtaṃ brahma bhūrbhuvaḥsvarom/
iti savyāhṛti sapraṇavāṃ dvādaśa ॐkārāṃ saṃdhyākāle kuṃbhakena vāratrayaṃ japtvā/
sūryopasthāne sāvitrīṃ caturviṃśatyakṣarāṃ japtvā/
mahāvidyādhiko bhavati brahmatvaṃ labhate

ṣaṭkukṣilakṣaṇāṃ putra gāyatrīṃ śṛṇu yatnataḥ/
yāṃ jñātvā tu paraṃ brahmasthānaṃ gacchati vai dvijaḥ

ॐtatsaviturvareṇiyaṃ bhargo devasya dhīmahi dhiyo yo naḥ pracodayāt

atha gāyatrī paṃcaśīrṣalakṣaṇam/
ॐbhūḥ ॐbhuvaḥ ॐsvaḥ ॐmahaḥ ॐjanaḥ ॐtapaḥ ॐsatyam/
ॐtatsaviturvareṇyaṃ bhargo devasya dhīmahi dhiyo yo naḥ pracodayāt

savyāhṛtiṃ tu gāyatrīṃ punarnyāsaṃ tu kārayet/
sarvapāpavinirmukto viṣṇusāyujyatāṃ vrajet

ॐbhūḥ pādābhyām ॐbhuvaḥ jānubhyām ॐsvaḥ kaṭyām ॐmahaḥ nābhau ॐjanaḥ hṛdaye nyaset ॐtapaḥ karayoḥ ॐsatyaṃ lalāṭe/
ॐtatsaviturvareṇiyaṃ bhargo devasya dhīmahi dhiyo yo naḥ pracodayāt/
iti śikhāyām

evaṃ vipro na jānāti sa eva brāhmaṇādhamaḥ/
na tasya kṣīyate pāpmā bhavedbhūripratigrahaḥ

imāṃ yo vetti gāyatrīṃ sarvabījasamanvitām/
sa vetti caturo vedānyogajñānaṃ japatrayam

ya enāṃ naiva jānāti sa śūdrātparataḥ smṛtaḥ/
tasyāpūtasya viprasya na deyaṃ pitṛpārvaṇam

na snānaphaladaḥ kaścitsarvaṃ ca niṣphalaṃ bhavet/
vidyā vittaṃ tathā janma dvijatvaṃ kāraṇaṃ yataḥ

niṣphalaṃ sakalaṃ tasya medhyaṃ puṣpaṃ yathā'śucau/
caturvedāśca gāyatrī purā vai tulitā mayā

caturvedātparā gurvī gāyatrī mokṣadā smṛtā/
daśabhirjanmajanitaṃ śatena ca purā kṛtam

triyugaṃ tu sahasreṇa gāyatrī haṃti kilbiṣam/
gāyatrīmakṣamālāyāṃ sāyaṃ prātaśca yo japet

caturṇāmapi vedānāṃ phalaṃ prāpnotyasaṃśayam/
trisaṃdhyaṃ yo japennityaṃ gāyatrīṃ hāyanaṃ dvijaḥ

tasya pāpaṃ kṣayaṃ yāti janmakoṭisamudbhavam/
gāyatryuccāramātreṇa pāpakūṭātpunāti ca

svargāpavargamāpnoti japtvā nityaṃ dvijottamaḥ/
vāsudevasya maṃtrāṇi japedyastu dinedine

praṇamecca hareḥ pādau sa gacchedapavargitām/
vāsudevasya stotrāṇi mukhe cāpi kathottamā

paṃkasya lavamātraṃ tu tasya dehe na tiṣṭhati/
vedaśāstrāvagāhena trisrotaḥ snānajaṃ phalam

dharmapāṭhakṛtāṃ loke yajñakoṭiphalaṃ labhet/
evaṃ vipraguṇānvaktuṃ na śaknomi dvijottama

viśvarūpaśca ko dehī samūrto harireva ca/
yasya śāpādvināśaḥ syādāyurvidyā yaśo dhanam

varadānātsamāyāṃti sarvāḥ saṃpattayastathā/
viṣṇurbrahmaṇyatāmeti sadā vipra prasādataḥ

namo brahmaṇyadevāya gobrāhmaṇahitāya ca/
jagaddhitāya kṛṣṇāya goviṃdāya namo namaḥ

maṃtreṇaivaṃ hariṃ yastu pūjayetsatataṃ naraḥ/
prasādī ca haristasya viṣṇusāyujyatāṃ vrajet

ya idaṃ śṛṇuyātpuṇyamākhyānaṃ dharmavigraham/
tasya pāpaṃ kṣayaṃ yāti janmajanmakṛtaṃ ca yat

yaḥ paṭhetpāṭhayedvāpi upadeṣṭā janasya ca/
na tasya punarāvṛttiḥ svargamakṣayamaśnute

dhanaṃ dhānyaṃ labhedatra rājyabhogānarogitām/
satsutaṃ ca śubhāṃ kīrtiṃ devavadramate divi

iti śrīpādmapurāṇe prathame sṛṣṭikhaṃḍe brāhmaṇasaṃskāronāma ṣaṭcatvāriṃśattamo'dhyāyaḥ