Padma Purana · Chapter 1.45

bhīṣma uvāca-/
idānīṃ śrotumicchāmi hiraṇyakaśiporvadham/
narasiṃhasya māhātmyaṃ tathā pāpavināśanam

pulastya uvāca-/
purā kṛtayuge rājanhiraṇyakaśipuḥ prabhuḥ/
daityānāmādipuruṣaścakāra sumahattapaḥ

daśavarṣasahasrāṇi daśavarṣaśatāni ca/
jalavāsī samabhavatsnānamaunadhṛtavrataḥ

vṛtaḥ śamadamābhyāṃ ca brahmacaryeṇa caiva hi/
brahmā prīto'bhavattasya tapasā niyamena ca

tataḥ svayaṃbhūrbhagavānsvayamāgatya tatra hi/
vimānenārkavarṇena haṃsayuktena bhāsvatā

ādityairvasubhiḥ sādhyairmarudbhirdaivataissaha/
rudrairviśvasahāyaiśca yakṣarākṣasapannagaiḥ

digbhiścaiva vidigbhiśca nadībhiḥ sāgaraistathā/
nakṣatraiśca muhūrtaiśca khacaraiśca mahāgrahaiḥ

devairbrahmarṣibhiḥ sārddhaṃ siddhaiḥ saptarṣibhistathā/
rājarṣibhiḥ puṇyakṛdbhirgaṃdharvāpsarasāṃgaṇaiḥ

carācaraguruḥ śrīmānvṛtaḥ sarvairdivaukasaiḥ/
brahmā brahmavidāṃ śreṣṭho daityaṃ vacanamabravīt

prītosmi tava bhaktasya tapasā'nena suvrata/
varaṃ varaya bhadraṃ te yatheṣṭaṃ kāmamāpnuhi

hiraṇyakaśipuruvāca-/
na devāsuragaṃdharvā na yakṣoragarākṣasāḥ/
na mānuṣāḥ piśācāśca hanyurmāṃ devasattama

ṛṣayo mānavāḥ śāpairna śapeyuḥ pitāmaha/
yadi me bhagavānprīto vara eṣa vṛto mayā

na śastreṇa na cāstreṇa giriṇā pādapena vā/
na śuṣkeṇa na cārdreṇa na syāccānyena me vadhaḥ

bhaveyamahamevārkaḥ somo vāyurhutāśanaḥ/
salilaṃ cāṃtarikṣaṃ ca nakṣatrāṇi diśo daśa

ahaṃ krodhaśca kāmaśca varuṇo vāsavo yamaḥ/
dhanadaśca dhanādhyakṣo yakṣaḥ kiṃpuruṣādhipaḥ

brahmovāca -/
eṣa divyo varastāta mayā dattastavādbhutaḥ/
sarvakāmaprado vatsa prāpsyasi tvaṃ na saṃśayaḥ

evamuktvā sa bhagavānjagāmākāśameva hi/
vairājaṃ brahmasadanaṃ brahmarṣigaṇasevitam

tato devāśca gaṃdharvā ṛṣibhiḥ saha cāraṇāḥ/
varapradānaṃ śrutvaivaṃ pitāmahamupasthitāḥ

devā ūcuḥ-/
varapradānādbhagavanvadhiṣyati sa no'suraḥ/
tatprasādaśca bhagavanvadhopyasya viciṃtyatām

bhagavānsarvabhūtānāmādikarttā svayaṃprabhuḥ/
sraṣṭā ca havyakavyānāmavyaktaprakṛtiḥ paraḥ

sarvalokahitaṃ vākyaṃ śrutvā devaḥ prajāpatiḥ/
āśvāsayāmāsa tadā suśītairvacanāṃbubhiḥ

avaśyaṃ tridaśānena prāptavyaṃ tapasaḥ phalaṃ/
tapaso'nte'sya bhagavānvadhaṃ viṣṇuḥ kariṣyati

tacchrutvā vibudhā vākyaṃ sarve paṃkajajānanāt/
svāni sthānāni divyāni viprajagmurmudānvitāḥ

labdhamātre vare sotha prajāssarvā abādhata/
hiraṇyakaśipurdaityo varadānena garvitaḥ

āśrameṣu mahābhāgānmunīnvai śaṃsitavratān/
satyadharmaparāndāntāndharṣayāmāsa dānavaḥ

devāṃstribhuvanasthāṃśca parājitya mahāsuraḥ/
trailokyaṃ vaśamānīya svarge vasati dānavaḥ

yadā varamadotsiktaścoditaḥ kāladharmiṇā/
yajñiyānakaroddaityānayajñīyāṃśca daivatān

tathā daityāśca sādhyāśca viśve ca vasavastathā/
rudrā devagaṇā yakṣā devadvijamaharṣayaḥ

śaraṇyaṃ śaraṇaṃ viṣṇumupatasthurmahābalam/
devadevaṃ yajñamayaṃ vāsudevaṃ sanātanam

devā ūcuḥ-/
nārāyaṇa mahābhāga devāstvāṃ śaraṇaṃ gatāḥ/
trāyasva jahi daityeṃdraṃ hiraṇyakaśipuṃ prabho

tvaṃ hi naḥ paramodātā tvaṃ hi naḥ paramo guruḥ/
tvaṃ hi naḥ paramo devo brahmādīnāṃ surottamaḥ

viṣṇuruvāca-/
bhayaṃ tyajaddhvamamarā abhayaṃ vo dadāmyaham/
tathaiva tridivaṃ devāḥ pratipadyata māciram

enaṃ hi sagaṇaṃ daityaṃ varadānena garvitam/
avadhyamamareṃdrāṇāṃ dānaveṃdraṃ nihanmyaham

evamuktvā tu bhagavānviśvapo viṣṇuravyayaḥ/
hiraṇyakaśipusthānaṃ jagāma harirīśvaraḥ

tejasā bhāskārākāraḥ śaśīkāṃtyeva cāparaḥ/
narasya kṛtvārdhatanuṃ siṃhasyārddhatanuṃ tathā

nārasiṃhena vapuṣā pāṇiṃ saṃgṛhya pāṇinā/
tato dadarśa vistīrṇāṃ divyāṃ ramyāṃ manoramām

sarvakāmayutāṃ śubhrāṃ hiraṇyakaśipoḥ sabhām/
vistīrṇāṃ yojanaśataṃ śatamadhyarddhamāyatām

vaihāyasīṃ kāmagamāṃ paṃcayojanamucchritām/
jarāśokakṣamāpetāṃ niṣprakampyāṃ śivāṃ sukhām

veśmāsanavatīṃ ramyāṃ jvalaṃtīmiva tejasā/
aṃtaḥsalilasaṃyuktāṃ vihitāṃ viśvakarmaṇā

divyavarṇamayairvṛkṣaiḥ phalapuṣpapradairyutām/
nīlapītāsitaśyāmaiḥ śvetairlohitakairapi

avadātaistathā gulmai raktamaṃjaridhāribhiḥ/
sitābhraghanasaṃkāśāṃ plavaṃtīṃ ca dadarśa saḥ

raśmimatī svabhāvena divyagaṃdhamanoramā/
susukhā na ca duḥkhā sā na śītā na ca gharmadā

na kṣutpipāse glāniṃ vā prāpyatāṃ prāpnuvaṃti te/
nānarūpairupakṛtā sucitraiśca subhāsvaraiḥ

aticaṃdrātisūryāti śikhikānti svayaṃprabhā/
dīpyate nākapṛṣṭhasthā bhāsayaṃtī vibhāsurā

sarve cakāśire tasyāṃ muditāścaiva mānuṣāḥ/
rasavacca prabhūtaṃ ca bhakṣyabhojyānnamuttamaṃ

puṇyagaṃdhāsrajaścāpi nityakālaphalā drumāḥ/
uṣṇe śītāni toyāni śīte coṣṇāni saṃti vai

puṣpitāgrānmahāśākhānpravālāṃkuradhāriṇaḥ/
latāvitānasaṃchannānkalpānaikṣiṣṭha sa prabhuḥ

gaṃdhavaṃti ca puṣpāṇi rasavaṃti phalāni ca/
tāni śītāni coṣṇāni tatratatra sarāṃsi ca

apaśyadbhūpatīrthāni sabhāyāṃ tasya sa prabhuḥ/
nalinaiḥ puṃḍarīkaiśca śatapatraiḥ sugaṃdhibhiḥ

raktaiḥ kuvalayaiścaiva kalhārairutpalaistathā/
nānāścaryasamopetaiḥ puṣpairanyaiśca supriyaiḥ

kāraṃḍavaiścakravākaiḥ sārasaiḥ kurarairapi/
vimalasphaṭikābhāni pāṃḍuracchadanairdvijaiḥ

bahuhaṃsopagītāni sārasānāṃ rutāni ca/
gaṃdhayuktā latāstatra puṣpamaṃjaridhāriṇīḥ

dṛṣṭavānbhagavānhṛṣṭaḥ khadirānvetasārjunān/
cūtānimbānāgavṛkṣāḥ kadaṃbā bakulā dhavāḥ

priyaṃgavaḥ pāṭalākhyāḥ śālmalyassa haridravāḥ/
śālāstālāstamālāśca caṃpakāśca manoramāḥ

tathaivānye vyarājaṃta sabhāyāṃ puṣpitā drumāḥ/
elāka kubhakaṃkola lavalī karṇapūrakāḥ

madhukāḥ kovidārāśca bahutālasamucchrayāḥ/
aṃjanāśokaparṇāsā bahavaścitrakā drumāḥ

varuṇāśca palāśāścā panasāssaha caṃdanaiḥ/
nīlāssumanasaścaiva nīpāścāśvatthatiṃdukāḥ

pārijātāśca taravo mallikā bhadradāravaḥ/
aṭarūṣāḥ pīlūkāśca tathā caivailavālukāḥ

maṃdārakāḥ kuravakā punnāgāḥ kuṭajāstathā/
raktāḥ kuravakāścaiva nīlāścāgarubhiḥ saha

kiṃśukāścaiva bhavyāśca dāḍimā bījapūrakāḥ/
kāleyakā dukūlāśca hiṃgavastailavarttikāḥ

kharjūrā nālikerāśca harītaka madhūkakāḥ/
saptaparṇāśca bilvāśca sayāvāśca śarāvatāḥ

asanāśca tamālāśca nānāgulmasamāvṛtāḥ/
latāśca vividhākārāḥ puṣpapatraphalopagāḥ

ete cānye ca bahavastatra kānanajā drumāḥ/
nānāpuṣpaphalopetā vyarājaṃta samaṃtataḥ

cakorāḥ śatapatrāśca mattakokilaśārikāḥ/
puṣpitānpuṣpitāgrāṃśca saṃpataṃti mahādrumān

raktapītāruṇāstatra pādapāgragatāḥ khagāḥ/
parasparamavaikṣaṃta prahṛṣṭā jīvajīvikāḥ

tasyāṃ sabhāyāṃ daityeṃdro hiraṇyakaśipustadā/
āsīna āsane citre daśanalve pramāṇataḥ

divākaranibhe divye divyāstaraṇasaṃstṛte/
hiraṇyakaśipurdaitya āste jvalitakuṃḍalaḥ

upacerurmahādaityā hiraṇyakaśipuṃ tadā/
divyatālāni gītāni jagurgaṃdharvasattamāḥ

viśvācī sahajanyā ca pramloceti ca pūjitā/
divyātha saurabheyī ca samīcī puṃjikasthalā

miśrakeśī ca raṃbhā ca citrabhā śrutivibhramā/
cārunetrā ghṛtācī ca menakā corvaśī tathā

etāssahasraśaścānyā nṛtyagītaviśāradāḥ/
upātiṣṭhaṃta rājānaṃ hiraṇyakaśipuṃ prabhum

upāsate diteḥ putrāḥ sarve labdhavarāstathā/
balirvirocanastatra narakaḥ pṛthivīsutaḥ

prahlādo vipracittiśca gaviṣṭhaśca mahāsuraḥ/
surahantā duḥkhakartā samanāssumatistathā

ghaṭodaro mahāpārśvaḥ krathanaḥ piṭharastathā/
viśvarūpasvarūpaśca viśvakāyo mahābalaḥ

daśagrīvaśca vālī ca meghavāsā mahāsuraḥ/
ghaṭābho viṭarūpaśca jvalanaśceṃdratāpanaḥ

daityadānavasaṃghāste sarve jvalitakuṃḍalāḥ/
sragviṇo varmiṇaḥ sarve sarve ca caritavratāḥ

sarve labdhavarāḥ śūrāssarve vihitamṛtyavaḥ/
ete cānye ca bahavo hiraṇyakaśipuṃ prabhum

upāsate mahātmānaṃ sarve divyaparicchadāḥ/
vimānairvividhākārairbhrājamānairivāgnibhiḥ

mahendravapuṣaḥ sarve vicitrāṃgadabāhavaḥ/
bhūṣitāṃgā diteḥ putrāstamupāsata sarvataḥ

aiśvaryaṃ daityasiṃhasya yathā tasya mahātmanaḥ/
na śrutaṃ naiva dṛṣṭaṃ ca kasyāpi bhuvanatraye

rajatakanakacitravedikāyāṃ parikṛtaratnavicitravīthikāyām/
sa dadarśa mṛgādhipaḥ sabhāyāṃ surucira jālagavākṣaśobhitāyām

kanakavalayahārabhūṣitāṃgaṃ dititanayaṃ sa mṛgādhipo dadarśa/
divasakarakaraprabhaṃ jvalaṃtaṃ ditijasahasraśatairniṣevyamāṇam

tato dṛṣṭvā mahābhāgaṃ kālacakramivāgatam/
nārasiṃhavapuśchannaṃ bhasmacchannamivānalam

hiraṇyakaśipoḥ putraḥ prahlādo nāma vīryavān/
divyena vapuṣā siṃhamapaśyaddevamāgatam

taṃ dṛṣṭvā rukmaśailābhamapūrvāṃ tanumāśritam/
vismitā dānavāḥ sarve hiraṇyakaśipuśca saḥ

prahlāda uvāca-/
mahārāja mahābāho daityānāmādisaṃbhava/
na śrutaṃ naiva me dṛṣṭaṃ nārasiṃhamidaṃ vapuḥ

avyaktaṃ paramaṃ divyaṃ kimidaṃ rūpamāgatam/
daityāṃtakaraṇaṃ ghoraṃ śaṃsatīva mano mama

asya devāḥ śarīrasthāḥ sāgarāḥ saritastathā/
himavānpāriyātraśca ye cānye kulaparvatāḥ

caṃdramāssahanakṣatrairādityā raśmibhiḥ saha/
dhanado varuṇaścaiva yamaḥ śakraḥ śacīpatiḥ

maruto devagaṃdharvā ṛṣayaśca tapodhanāḥ/
nāgā yakṣāḥ piśācāśca rākṣasā bhīmavikramāḥ

brahmā devāḥ paśupatirlalāṭasthā bhramaṃti hi/
sthāvarāṇi ca sarvāṇi jaṃgamāni tathaiva ca

bhavāṃśca sahitosmābhiḥ sarvairdaityagaṇairvṛtaḥ/
vimānaśatasaṃkīrṇā sarvā yā bhavataḥ sabhā

sarvaṃ tribhuvanaṃ rājanlokadharmaśca śāśvataḥ/
dṛśyate narasiṃhesmiṃstathedaṃ nikhilaṃ jagat

prajāpatiścātra manurmahātmā grahāśca yogāśca mahī nabhaśca/
utpātakālaśca dhṛtirmatiśca ratiśca satyaṃ ca tapo damaśca

sanatkumāraśca mahānubhāvo viśve ca devā ṝṣayaśca sarve/
krodhaśca kāmaśca tathaiva harṣo darpaśca mohaḥ pitaraśca sarve

prahlādasya vacaḥ śrutvā hiraṇyakaśipuḥ prabhuḥ/
uvāca dānavānsarvāngaṇāṃśca sagaṇādhipaḥ

mṛgeṃdro gṛhyatāmeṣa apūrvāṃ tanumāsthitaḥ/
yadi vā saṃśayaḥ kaścidvadhyatāṃ vanagocaraḥ

te dānavagaṇāssarve mṛgeṃdraṃ bhīmavikramam/
parikṣipaṃto muditāstrāsayāmāsurojasā

siṃhanādaṃ vimucyātha narasiṃho mahābalaḥ/
babhaṃja tāṃ sabhāṃ sarvāṃ vyāditāsya ivāṃtakaḥ

sabhāyāṃ bhajyamānāyāṃ hiraṇyakaśipuḥ svayam/
cikṣepāstrāṇi siṃhasya roṣavyākulalocanaḥ

sarvāstrāṇāmatha śreṣṭhaṃ daṃḍamastraṃ sudāruṇam/
kālacakraṃ tathā ghoraṃ viṣṇucakraṃ tathāparaṃ

paitāmahaṃ mahātyugraṃ trailokyanirmitaṃ mahat/
vicitrāmaśaniṃ caiva śuṣkādraṃ cāśanidvayam

raudraṃ tathograśūlaṃ ca kaṃkālaṃ musalaṃ tathā/
astraṃ brahmaśiraścaiva brāhmamastraṃ tathaiva ca

nārāyaṇāstramaiṃdraṃ ca āgneyaṃ śaiśiraṃ tathā/
vāyavyaṃ mathanaṃ caiva kapālamatha kiṃkaram

tathā pratihatāṃ śaktiṃ krauṃcamastraṃ tathaiva ca/
mohanaṃ śoṣaṇaṃ caiva saṃtāpanavilāpane

kaṃpanaṃ śātanaṃ caiva mahāstraṃ caiva rodhanam/
kālamudgaramakṣobhyaṃ tāpanaṃ ca mahābalam

saṃvartanaṃ mohanaṃ ca tathā māyādharaṃ varam/
gāndharvamastraṃ dayitamasiratnaṃ ca naṃdakam

prasvāpanaṃ pramathanaṃ vāruṇaṃ cāstramuttamam/
astraṃ pāśupataṃ caiva yasyā pratihatā gatiḥ

etānyastrāṇi divyāni hiraṇyakaśipustadā/
asṛjannarasiṃhasya dīptasyāgnerivāhutim

astraiḥ prajvalitaiḥ siṃhamāvṛṇodasurottamaḥ/
vivasvāngharmasamaye himavaṃtamivāṃśubhiḥ

sa hyamarṣānilodbhūto daityānāṃ sainyasāgaraḥ/
kṣaṇenāplāvayatsarvaṃ mainākamiva sāgaraḥ

prāsaiḥ pāśaiśca khaḍgaiśca gadābhirmusalaistathā/
vajrairaśanibhiścaiva bahuśākhairmahādrumaiḥ

mudgaraiḥ kūṭapāśaiśca śilolūkhalaparvataiḥ/
śataghnībhiśca dīptābhirdaṃḍairapi sudāruṇaiḥ

te dānavāḥ pāśagṛhītahastā maheṃdratulyāśanitulya vegāḥ/
samaṃtatobhyudyatabāhukāyāḥ sthitāḥ saśīrṣā iva nāgapotāḥ

suvarṇamālākulabhūṣitāṃgāḥ sutīkṣṇadaṃṣṭrākulavaktragartāḥ/
sphuratprabhāste ca saśṛṃgadehāścīnāṃśukā bhāṃti yathaiva haṃsāḥ

sosṛjaddānavo māyāmagniṃ vāyuṃ samīritam/
tamiṃdrastoyadaiḥ sārdhaṃ sahasrākṣo mahādyutiḥ

mahatā toyavarṣeṇa śamayamāsa pāvakam/
tasyāṃ pratihatāyāṃ tu māyāyāṃ yudhi dānavaḥ

asṛjadghorasaṃkāśaṃ tamastīvraṃ samaṃtataḥ/
tamasā saṃvṛte loke daityeṣvāttāyudheṣu ca

svatejasā parivṛto divākara ivodgataḥ/
triśikhāṃ bhrukuṭīmasya dadṛśurdānavā raṇe

lalāṭasthāṃ trikūṭasthāṃ gaṃgāṃ tripathagāmiva/
tataḥ sarvāsu māyāsu hatāsu ditinaṃdanāḥ

hiraṇyakaśipuṃ daityā viṣaṇṇāśśaraṇaṃ yayuḥ/
tataḥ prajvalitaḥ krodhātpradahanniva tejasā

tasminkruddhe tu daityeṃdre tamobhūtamabhūjjagat/
āvahaḥ pravahaścaiva vivahotha samīraṇaḥ

parāvahassaṃvahaśca udvahaśca mahābalaḥ/
tathā parivahaḥ śrīmānutpātabhayaśaṃsinaḥ

ityevaṃ kṣubhitāḥ sapta maruto gaganecarāḥ/
ye grahāssarvalokasya kṣaye prādurbhavaṃti hi

te sarve gagane hṛṣṭāvyacaraṃśca yathāsukham/
ayogataścāpyacaradyogaṃ niśi niśācaraḥ

sagrahaḥ saha nakṣatraistārāpatirariṃdama/
vivarṇatāṃ ca bhagavāngato divi divākaraḥ

kṛṣṇaḥ kabaṃdhaśca tadā lakṣyate sumahāndivi/
asṛjaccāsitāṃ sūryo dhūmavattāṃ vibhāvasuḥ

gaganasthaśca bhagavānabhīkṣṇaṃ pariviṣyate/
saptadhūmanibhā ghorāḥ sūryādi visamutthitāḥ

somasya gaganasthasya grahāstiṣṭhaṃti śṛṃṅgagāḥ/
vāme ca dakṣiṇe caiva sthitau śukrabṛhaspatī

śanaiścaro lohitāṃgo lohitāṃgasamadyutiḥ/
samaṃ samadhirohaṃta sarve vai gaganecarāḥ

śṛṃgāṇi śanakairghorā yugāṃtā varttana grahāḥ/
caṃdramāśca sanakṣatro grahaiḥ saha tamonudaḥ

carācaravināśāya rohiṇīṃ nābhyanaṃdata/
gṛhīto rāhuṇā candra ulkābhirabhihanyate

ulkāḥ prajvalitāścaṃdre vyacaraṃta yathāsukham/
devānāmadhipo devaḥ sopyavarṣata śoṇitam

apatadgaganādulkā vidyudrūpā mahāsvanā/
akāle ca drumāssarve puṣpyaṃti ca phalaṃti ca

latāśca saphalāḥ sarvā yā āhurdaityanāśikāḥ/
phale phalānyajāyaṃta puṣpe puṣpaṃ tathaiva ca

unmīlaṃti nimīlaṃti hasaṃti prarudaṃti ca/
vikrośaṃti ca gaṃbhīraṃ dhūmāyaṃte jvalaṃti ca

pratimāssarvadevānāṃ kathayaṃtyo mahadbhayam/
āraṇyaiḥ saha saṃsṛṣṭā grāmyāśca mṛgapakṣiṇaḥ

cukruśurbhairavaṃ tatra mṛgayuddha upasthite/
nadyaśca pratikūlāni vahaṃti kaluṣodakāḥ

na prākāśaṃta ca diśo raktareṇusamākulāḥ/
vānaspatyā na pūjyaṃte pūjanārhāḥ kathaṃcana

vāyuvegena hanyaṃte bhajyaṃte praṇamaṃti ca/
tathā ca sarvabhūtānāṃ chāyā na parivarttate

apareṇa gate sūrye salokānāṃ yugakṣaye/
tadā hiraṇyakaśipordaityasyopariveśmanaḥ

bhāṃḍāgārāyudhāgāre niviṣṭamabhavanmadhu/
asurāṇāṃ vināśāya surāṇāṃ vijayāya ca

dṛśyaṃte vividhotpātā ghorāghoranidarśanāḥ/
ete cānye ca bahavo ghorarūpāḥ samutthitāḥ

daityeṃdrasya vināśāya dṛśyaṃte raṇaśaṃsinaḥ/
medinyāṃ kaṃpamānāyāṃ daityeṃdreṇa mahātmanaḥ

mahīdharā nāgagaṇā nipeturamitaujasaḥ/
viṣajvālākulairvaktrairvimuṃcaṃto hutāśanam

catuḥśīrṣāḥ paṃcaśīrṣāḥ saptaśīrṣāśca pannagāḥ/
vāsukistakṣakaścaiva karkoṭakadhanaṃjayau

elāmukhaḥ kāliyaśca mahāpadmaśca vīryavān/
sahasraśīrṣaśśuddhāṃgo hematāladhvajaḥ prabhuḥ

śeṣonaṃto mahānāgo hyaprakaṃpyaśca kaṃpitāḥ/
dīpyaṃteṃtarjalasthāni pṛthivīvivarāṇi vai

saptadaityeṃdrakopena kaṃpitāni samaṃtataḥ/
nānātejodharāścāpi pātālatalacāriṇaḥ

pātāle sahasā kṣubdhe duṣprakaṃpyāḥ prakaṃpitāḥ/
hiraṇyakaśipurdaityastadā saṃspṛṣṭavānmahīm

saṃdaṣṭauṣṭhapuṭaḥ kruddho varāha iva pūrvajaḥ/
gaṃgā bhāgīrathī caiva kauśikī sarayūrapi

yamunā cātha kāverī kṛṣṇaveṇī ca nimnagā/
tuṃgabhadrā mahāvegā nadī godāvarī tathā

carmaṇvatī ca siṃdhuśca tathā nadanadīpatiḥ/
melakaprabhavaścaiva śoṇo maṇinibhodakaḥ

narmadā ca śubhasrotāstathā vetravatī nadī/
gomatī gokulākīrṇā tathā pūrvā sarasvatī

mahākālamahīcaiva tamasā puṣpavāhinī/
jaṃbūdvīpaṃ ratnavacca sarvaratnopaśobhitam

suvarṇapuṭakaṃ caiva suvarṇākaramaṃḍitam/
mahānadaśca lauhityaśśailaḥ kāṃcanaśobhitaḥ

pattanaṃ kośakārāṇāṃ kaśaṃ ca rajatākaram/
magadhāśca mahāgrāmāḥ puṇḍrā ugrāstathaiva ca

srughnā mallā videhāśca mālavāḥ kāśi kosalāḥ/
bhavanaṃ vainateyasya daityeṃdreṇābhikaṃpitam

kailāsaśikharākāraṃ yatkṛtaṃ viśvakarmaṇā/
ratnatoyo mahābhīmo lauhityo nāma sāgaraḥ

udayaśca mahāśaila ucchritaḥ śatayojanam/
savarṇavedikaḥ śrīmānmeghapaṃktiniṣevitaḥ

bhrājamānorkasadṛśairjātarūpamayairdrumaiḥ/
sālaistālaistamālaiśca karṇikāraiśca puṣpitaiḥ

ayomukhaśca vikhyātaḥ sarvato dhātumaṃḍitaḥ/
tamālavanagaṃdhaśca parvato malayaḥ śubhaḥ

surāṣṭrāśca sabāhlīkāśśūdrābhīrāstathaiva ca/
bhojāḥ pāṃḍyāśca vaṃgāśca kaliṃgāstāmraliptakāḥ

tathaiva pauṃḍrāḥ śubhrāśca vāmacūḍāssakeralāḥ/
kṣobhitāstena daityena devāścāpsarasāṃ gaṇāḥ

agastyabhavanaṃ caiva yadagastyakṛtaṃ purā/
siddhacāraṇasaṃghaiśca viprakīrṇaṃ manoharam

vicitranānāvihagaṃ sapuṣpitamahādrumam/
jātarūpamayaiḥ śṛṃgairapsarogaṇasevitam

giriḥ puṣpitakaścaiva lakṣmīvānpriyadarśanaḥ/
utthitaḥ sāgaraṃ bhitvā viśrāmaścaṃdrasūryayoḥ

rarāja sa mahāśṛṃgairgaganaṃ vilikhanniva/
caṃdrasūryāṃśusaṃkāśaiḥ sāgarāṃbusamāvṛtaiḥ

vidyuttvānparvataḥ śrīmānāyataḥ śatayojanam/
vidyutāṃ yatra saṃpātā nipātyaṃte nagottame

ṛṣabhaḥ parvataścaiva śrīmānṛṣabhasaṃsthitaḥ/
kuṃjaraḥ parvataḥ śrīmānagastyasya gṛhaṃ śubham

vimalākhyā ca durddharṣā sarpāṇāṃ mālatī purī/
tathā bhogavatī cāpi daityeṃdreṇābhikaṃpitā

mahāsenagiriścaiva pāriyātraśca parvataḥ/
cakravāṃśca giriśreṣṭho vārāhaścaiva parvataḥ

prāgjyotiṣapuraṃ cāpi jātarūpamayaṃ śubham/
yasminnuvāsa duṣṭātmā narako nāma dānavaḥ

meghaśca parvataśreṣṭho meghagaṃbhīranissvanaḥ/
ṣaṣṭistatra sahasrāṇi parvatānāṃ viśāṃpate

taruṇādityasaṃkāśo meruścaiva mahāngiriḥ/
yakṣarākṣasagaṃdharvairnityaṃ sevitakaṃdaraḥ

hemagarbho mahāsenastathā meghasakho giriḥ/
kailāsaścaiva śaileṃdro dānaveṃdreṇa kaṃpitaḥ

hemapuṣkarasañchannaṃ tena vaikhānasaṃ saraḥ/
kaṃpitaṃ mānasaṃ caiva haṃsakāraṃḍavākulam

triśṛṃgaḥ parvataśreṣṭhaḥ kumārī ca saridvarā/
tuṣāracayasaṃcchanno maṃdaraścāpi parvataḥ

uśīrabījaśca girirbhadraprasthastathādrirāṭ/
prajāpatigiriścaiva tathā puṣkaraparvataḥ

devābhaḥ parvataścaiva tathā vai vālukāgiriḥ/
krauṃcaḥ saptarṣiśailaśca dhūmravarṇaśca parvataḥ

ete cānye ca girayo deśā janapadāstathā/
nadyaḥ sasāgarāḥ sarvāḥ dānavenābhikaṃpitāḥ

kapilaśca mahīputro vyāghravāṃśca prakaṃpitaḥ/
khecarāśca niśāputrāḥ pātālatalavāsinaḥ

gaṇastathāparo raudro meghanāmāṃkuśāyudhaḥ/
ūrddhvago bhīmavegaśca sarva etebhikaṃpitāḥ

gadī śūlī karālaśca hiraṇyakaśipustathā/
jīmūtaghananirghoṣo jīmūta iva vegavān

devārirditijo dṛpto nṛsiṃhaṃ samupādravat/
sa tu tena tatastīkṣṇairmṛgeṃdreṇa mahānakhaiḥ

tadoṃkārasahāyena vidārya nihato yudhi/
mahī ca kālaśca śaśīnabhaśca grahāssa sūryāśca diśaśca sarvāḥ

nadyaśca śailāśca mahārṇavāśca gatāḥ prasādaṃ ditiputranāśāt/
tataḥ pramuditā devā ṛṣayaśca tapodhanāḥ

tuṣṭuvurnāmabhirdivyairādidevaṃ sanātanam/
yattvayā vidhṛtaṃ deva nārasiṃhamidaṃ vapuḥ

etadevārcayiṣyaṃti parāparavido janāḥ/
brahmovāca-/
bhavānbrahmā ca rudraśca maheṃdro devasattamaḥ

bhavānkarttā vikarttā ca lokānāṃ prabhavo'vyayaḥ/
parāṃ ca siddhiṃ ca paraṃ ca satvaṃ paraṃ rahasyaṃ paramaṃ haviśca

paraṃ ca dharmaṃ paramaṃ yaśaśca tvāmāhuragryaṃ paramaṃ purāṇam/
paraṃ ca satyaṃ paramaṃ tapaśca paraṃ pavitraṃ paramaṃ ca mārgaṃ

paraṃ ca yajñaṃ paramaṃ ca hotraṃ tvāmāhuragyraṃ paramaṃ purāṇam/
paraṃ śarīraṃ paramaṃ ca brahma paraṃ ca yogaṃ paramāṃ ca vāṇīm

paraṃ rahasyaṃ paramāṃ gatiṃ ca tvāmāhuragyraṃ paramaṃ purāṇam/
evamuktvā tu bhagavānsarvalokapitāmahaḥ

stutvā nārāyaṇaṃ devaṃ brahmalokaṃ gataḥ prabhuḥ/
tato nadatsu tūryeṣu nṛtyaṃtīṣvapsaraḥsu ca

kṣīrodasyottaraṃ kūlaṃ jagāma harirīśvaraḥ/
nārasiṃhaṃ vapurdevaḥ sthāpayitvā sudīptimān

paurāṇaṃ rūpamāsthāya prayayau garaḍadhvajaḥ/
aṣṭacakreṇa yānena bhūtiyuktena bhāsvatā

avyaktaprakṛtirdevaḥ svasthānaṃ gatavānprabhuḥ

iti śrīpādmapurāṇe prathame sṛṣṭikhaṃḍe narasiṃhaprādurbhāvo nāma paṃcacatvāriṃśattamo'dhyāyaḥ