Padma Purana · Chapter 1.39

bhīṣma uvāca/
kathitaṃ vāmanasyaiva māhātmyaṃ vistareṇa vai/
punastasyaiva māhātmyamanyadviṣṇorato vada

padmaṃ kathamabhūddeva nābhau yenābhavajjagat/
kathaṃ ca vaiṣṇavī sṛṣṭiḥ padmamadhye'bhavatpurā

kathaṃ pādme mahākalpe'bhavatpadmamayaṃ jagat/
jalārṇavagatasyeha nābhau jātaṃ jalānugaṃ

prabhāvaṃ padmanābhasya svapataḥ sāgarāṃbhasi/
puṣkare tu kathaṃ jātā devā ṝṣigaṇāḥ purā

etadākhyāhi nikhilaṃ yogaṃ yogavidāṃ pate/
kathaṃ nirmitavāṃstatra caitaṃ lokaṃ sanātanam

kathamekārṇave śūnye naṣṭe sthāvarajaṃgame/
bhūgolake pradagdhe tu praṇaṣṭoragarākṣase

naṣṭānalānilākāśe naṣṭadharme mahītale/
kevale gahvarībhūte mahābhūtaviparyaye

kiṃ nu viśvapatiḥ sākṣānmahātejā mahādyutiḥ/
āste yathādhyānaniṣṭho vidhimāsthāya yogavit

śṛṇvataḥ parayā bhaktyā brahmannetadaśeṣataḥ/
vaktumarhasi dharmajña yaśo nārāyaṇātmakam

śraddhinaḥ sūpaviṣṭasya bhagavanvaktumarhasi/
pulastya uvāca/
nārāyaṇasya yaśasaḥ śravaṇe yā tava spṛhā

sadvaṃśānvayapūtasya nyāyyaṃ kurukulodvaha/
śṛṇuṣvādipurāṇeṣu devebhyaśca yathā śruti

brāhmaṇānāṃ ca vadatāṃ śrutvā vai sumahātmanām/
yathā ca tapasā dṛṣṭvā bṛhaspati samadyutiḥ

parāśarasutaḥ śrīmāngururdvaipāyano'bravīt/
tatte'haṃ kathayiṣyāmi yathābhakti yathāśruti

yadvijñātaṃ mayā samyagṛṣimārgeṇa sattama/
kaḥ samutsahate jñātuṃ paraṃ nārāyaṇātmakam

viśvāvitāraṃ brahmāyaṃ na vedayati tatvataḥ/
tatkarmaviśvadevā na tadrahasyaṃ maharṣiṣu

sa ijyassarvayajñānāṃ sa tattvaṃ tattvadarśinām/
adhyātmamadhyātmavidāṃ narakaṃ ca vikarmiṇām

adhidaivaṃ ca taddaivamadhidaivatasaṃjñitam/
adhibhūtaṃ ca tadbhūtaṃ paraṃ ca paramārthinām

sa yajño vedanirdiṣṭastattapaḥ kavayo viduḥ/
yaḥ karttā kārako buddhiryataḥ kṣetrajña eva ca

praṇavaḥ puruṣaḥ śāstā ekaśceti vibhāvyate/
prāṇaḥ paṃcavidhaścaiva dhruvamakṣarameva ca

kālaḥ pākaśca yajñaśca yaṣṭā cādhītameva ca/
ucyate vividhairbhāvaiḥ sa evāyaṃ tu tatparam

sa eva bhagavānsarvaṃ karoti na karoti ca/
sosminkārayate sarvaṃ sthānināṃ ca kṛtiḥ kṛtā

yajāmahe tamevādyaṃ sa evotthānanirvṛtaḥ/
yo vaktā yacca vaktavyaṃ yaścāhaṃ tadbravīmi te

śrūyate yacca vai śrāvyaṃ yaccānyatparijalpitam/
yā kathāyāśca śrutayo yo dharmī dharmatatparaḥ

viśvaṃ viśvapatiryaśca sa tu nārāyaṇaḥ smṛtaḥ/
yatsatyaṃ yadanṛtamādimadhyabhūtaṃ yaccāṃtyaṃ niravadhikaṃ ca yadbhaviṣyam

yatkiṃciccaramacaraṃ yadasti cānyatsarvaṃ tatpuruṣavaraḥ pradhānabhūtaḥ/
catvāryyāhuḥ sahasrāṇi varṣāṇāṃ tatkṛtaṃ yugam

tasya tāvacchatī saṃdhyā dviguṇā kurunaṃdana/
yatra dharmaścatuṣpādastvadharmaḥ pādavigrahaḥ

svadharmaniratāḥ śāṃtā jāyaṃte yatra mānavāḥ/
viprā sthitā dharmaparā rājavṛttisthitā nṛpāḥ

kṛṣyāmabhiratā vaiśyāḥ śūdrā śuḥśrūṣavastathā/
tadā satyaṃ ca satvaṃ ca dharmaścaiva vivardhate

sadbhirācarito dharmo yena lokaḥ pravarttate/
etatkṛtayuge vṛttaṃ sarveṣāmeva pārthiva

prāṇināṃ dharmasaṃjñānāṃ narāṇāṃ nīcajanmanām/
trīṇivarṣasahasrāṇi tretāyugamihocyate

tasya tāvacchatī saṃdhyā dviguṇā parikīrtitā/
dvābhyāmadharmaḥ pādābhyāṃ tribhirdharmo vyavasthitaḥ

yatra satyaṃ ca satvaṃ ca kriyā dharmo vidhīyate/
tretāyāṃ vikṛtiṃ yāṃti varṇā lobhena saṃyutāḥ

cāturvarṇyasya vai kṛtyaṃ kṣāṃtirdaurbalyameva ca/
eṣā tretāyugagatirvicitrā devanirmitā

dvāparaṃ dvisahasraṃ tu varṣāṇāṃ kurunandana/
tasya tāvacchatī sandhyā dviguṇaṃ yugamucyate

tatrāpyatīvārthaparāḥ prāṇino rajasā hatāḥ/
śaṭhā naiṣkṛtikāḥ kṣudrā jāyante kurunandana

dvābhyāṃ dharmaḥ sthitaḥ padbhyāmadharmastribhirutthitaḥ/
viparyayaśatairdharmaḥ kṣayameti kalau yuge

brahmaṇyabhāvaścyavate tathāstikyaṃ vivarjyate/
vratopavāsāstyajyaṃte kalau vai yugaparyaye

tadā varṣasahasraṃ tu varṣāṇāṃ dve śate tathā/
yatrādharmaścatuṣpādo dharmaḥ pādaparigrahaḥ

kāminastāpasāḥ kṣudrā jāyaṃte yatra mānavāḥ/
na cāvasāyikaḥ kaścinna sādhurna ca satyavāk

nāstikā brāhmaṇā bhaktā jñāyaṃte tatra mānavāḥ/
ahaṃkāragṛhītāśca prakṣīṇasnehabaṃdhanāḥ

viprāḥ śūdrasamācārāssaṃti sarve kalau yuge/
āśramāṇāṃ viparyāsaḥ kalau saṃprati vartate

varṇānāṃ caiva saṃdeho yugāṃte kurunaṃdana/
eṣā dvādaśasāhasrī yugākhyā pūrvanirmitā

sahasrayugaparyaṃtaṃ tadaharbrāhmamucyate/
tato ha nigate tasminsarveṣāmeva jīvinām

śarīranirvṛtiṃ dṛṣṭvā kālaḥ saṃhārabuddhimān/
devatānāṃ ca sarveṣāṃ brāhmaṇānāṃ mahīpate

daityānāṃ dānavānāṃ ca yakṣarākṣasapakṣiṇām/
gaṃdharvāṇāmapsarasāṃ bhujaṃgānāṃ ca pārthiva

parvatānāṃ nadīnāṃ ca paśūnāṃ caiva sattama/
tiryagyonigatānāṃ ca krimīṇāṃ daṃśināṃ tathā

sarvabhūtapatiḥ paṃca bhūtvā bhūtāni bhūtakṛt/
jagatsaṃharaṇārthāya kurute vaiśasaṃ mahat

bhūtvā sūryaścakṣuṣī ādadāno bhūtvā vāyuḥ prāṇināṃ prāṇijātam/
bhūtvā vahnirnirdahansarvalokānbhūtvā megho bhūya ugro'bhyavarṣat

bhūtvā nārāyaṇo yogī sarvamūrti vibhāvasuḥ/
gabhastibhiḥ pradīptābhiḥ saṃśoṣayati sāgarān

tataḥ pītvārṇavānsarvānnadīkūpāṃśca sarvataḥ/
parvatānāṃ ca salilaṃ sarvamādāya yogavit

bhūtvā caiva sa hastārcirmahīṃ bhitvā rasātale/
ramate jalamādāya pibanrasamanuttamaṃ

mūrttāmūrtte tadanyacca yadasti prāṇiṣu dhruvaṃ/
tatsarvamaraviṃdākṣa ādatte puruṣottamaḥ

vāyuśca balavānbhūtvā vidhunvāno'khilaṃ jagat/
prāṇāpānaṃ samāsādya vāyunā kramate hariḥ

tato devagaṇānāṃ ca sarveṣāṃ caiva dehinām/
paṃceṃdriyaguṇāssarve bhūtānyeva ca yāni ca

ghreyaṃ ghrāṇaṃ śarīraṃ ca pṛthivīsaṃśritā guṇāḥ/
lokayātrā bhagavatā muhūrtena vināśitā

jihvārasaśca snehaśca saṃśritāḥ salile guṇāḥ/
rūpaṃ cakṣurvibhāgaśca netra jyotiḥ śritā guṇāḥ

sparśaḥ prāṇaśca ceṣṭā ca pavanaṃ saṃśritā guṇāḥ/
śabdaḥ śrotre ca śravaṇaṃ gaganaṃ saṃśritā guṇāḥ

mano buddhiśca cittaṃ ca kṣetrajñaṃ ceti saṃśritāḥ/
pareṇa parameṣṭhī ca hṛṣīkeśamupāśritāḥ

tato bhagavatastasya raśmibhiḥ parivāritāḥ/
vāyunā parinunnāśca bhūmiśākhāmupāśritāḥ

teṣāṃ saṃharaṇodbhūtaḥ pāvakaḥ śatadhā jvalan/
pradahannakhilaṃ viśvaṃ vṛttaḥ saṃvarttako'nalaḥ

saparvatadrumāngulmānlatāvallīstṛṇāni ca/
vimānāni ca divyāni purāṇi vividhāni ca

yāni cāśrayaṇīyāni sarvāṇyapyadahadbhṛśam/
bhasmīkṛtya tu tānsarvāṃllokānllokagurorguruḥ

sa bhūtiṃ dhārayāmāsa yugāṃte lokasaṃbhavām/
sahasravṛṣṭiḥ śatadhā bhūtvā kṛṣṇo mahāghanaḥ

divyatoyena haviṣā tarpayāmāsa medinīṃ/
tataḥ kṣīranikāśena svādunā paramāṃbhasā

śiśireṇa ca puṇyena mahīnirvāṇamāgamat/
tena toyena saṃpṛktā payassādharmyato dharā

ekārṇāvajalībhūtā sarvasatvavivarjitā/
mahāsatvānyapi vibhuṃ praviṣṭānyamitaujasaṃ

naṣṭārkapavanākāśe sūkṣme jagati saṃvṛte/
saṃśoṣamātmanā kṛtvā samudrāṇāṃ ca dehinaḥ

dagdhvā saṃkocya ca tathā svapityekaḥ sanātanaḥ/
paurāṇaṃ rūpamāsthāya svapityamitavikramaḥ

ekārṇavajaleyāyī yogī yogamupāsitaḥ/
anekāni sahasrāṇi yugānyekārṇavāṃbhasi

na caiva kaścidavyaktaṃ vyakto veditumarhati/
kaścaiṣa puruṣo nāma kiṃ yogaḥ kaśca yogavān

na pṛṣṭhe naivamabhito naiva pārśve na cāgrataḥ/
kaścidvijñāyate tasya dṛśyate devasattamaḥ

nabhaḥ kṣitiṃ pavanamapaḥ prakāśanaṃ prajāpatiṃ bhuvanadharaṃ sureśvaram/
pitāmahaṃ śrutinilayaṃ muniṃ prabhuṃ samāpayañchayanamarocayatprabhuḥ

evamekārṇavībhūte śete loke mahādyutiḥ/
pracchādya salilenorvīṃ haṃso nārāyaṇāya te

mahato rajaso madhye mahārṇavasamasya vai/
vārijākṣo mahābāhurakṣayaṃ brahma yadviduḥ

ātmarūpasarūpeṇa tamasā saṃvṛtaḥ prabhuḥ/
manaḥ sātvikamādāya yatra tatsatvamāhitaṃ

yathātathyaṃ paraṃ jñānaṃ bhūtāya brahmaṇe tataḥ/
rahasyaṃ ca tathoddiṣṭaṃ yathopaniṣadāṃ smṛtam

puruṣo yajña ityetatparamaṃ parikīrtitam/
yaścānyaḥ puruṣākhyaḥ syātsa eva puruṣottamaḥ

ye ca yajñakarā viprā ye ṝtvija iti smṛtāḥ/
asmādeva purā bhūtā vaktrebhyaḥ śrūyate tathā

brahmāṇaṃ prathamaṃ vaktrādudgātāraṃ ca sāmagaṃ/
hotāraṃ ca tathāddhvaryuṃ bāhubhyāmasṛjatprabhuḥ

brahmāṇaṃ brāhmāṇācchaṃsi stotārau caiva sarvaśaḥ/
meḍhrācca maitrāvaruṇaṃ pratiṣṭhātārameva ca

udarātpratihartāraṃ potāraṃ caiva pārthiva/
pāṇibhyāmatha cāgnīdhramunnetāraṃ ca yājuṣam

acchāvākamathorubhyāṃ subrahmaṇyaṃ ca sāmagam/
evamevaṃ sa bhagavānṣoḍaśaitānjagatpatiḥ

svayaṃbhūḥ sarvayajñānāmṛtvijo'sṛjaduttamān/
tadā caiṣa mahāyogī puruṣo yajñasaṃjñitaḥ

vedāścaiva tathā sarve sahāṃgopaniṣatkriyāḥ/
svapityekārṇave caiva yadāścaryamabhūtpurā

śrūyatāṃ tu tadā vipro mārkaṃḍeyaḥ kutūhalāt/
gīrṇo bhagavatā tena kukṣāvāsīnmahāmuniḥ

bahuvarṣasahasrāyustasyaiva varatejasaḥ/
aṭaṃstīrthaprasaṃgena pṛthivītīrthagocaraḥ

āśramāṇi ca puṇyāni devatāyatanāni ca/
deśādrāṣṭrāṇi citrāṇi purāṇi vividhāni ca

japahomaparāḥ śāṃtāstapobhiramalāḥ smṛtāḥ/
mārkaṃḍeyastatastasya śanairvaktrādvinirgataḥ

niṣkrāmantaṃ na cātmānaṃ jānīte devamāyayā/
niṣkramya tasya udarādekārṇavamatho jagat

sarvatastamasāchannaṃ mārkaṃḍeyonvavaikṣata/
tasyotpannaṃ bhayaṃ tīvraṃ vyatyayaṃ cātmajīvitam

devadarśanasaṃhṛṣṭo vismayaṃ paramaṃ gataḥ/
so'ciṃtayadamoghātmā mārkaṃḍeyotha śaṃkitaḥ

kiṃ nu syāccittasaṃmohaḥ kiṃ nu svapnonubhūyate/
vyaktamanyataro bhāva etayorbhavitā mama

na hi svapno hyayaṃ satyayuktaṃ yatsatyamarhati/
naṣṭacaṃdrārkapavano naṣṭaparvatabhūtalaḥ

katamaḥ syādayaṃ loka iti śokamupāgataḥ/
dadarśa cāpi puruṣaṃ svapaṃtaṃ parvatopamam

salile'dhamatho magnaṃ jīmūtamiva sāgare/
tapaṃtamiva tejobhirāmuktaśaśibhāskaram

gāṃbhīryātsāgaramiva bhāsamānammavaujasā/
devaṃ draṣṭumihāyātaḥ ko bhavāniti vismayāt

tathaiva ca muniḥ kukṣiṃ punareva praveśitaḥ/
saṃpraviṣṭaḥ punaḥ kukṣiṃ mārkaṃḍeyaḥ savismayam

tathaiva ca punarbhūyo vijānansvapnadarśanam/
sa tathaiva yathāpūrvaṃ pṛthivīmaṭate vanam

puṇyatīrthajalopetaṃ vividhānyāśramāṇi ca/
kratubhiryajamānāṃśca samāptagurudakṣiṇaiḥ

apaśyaddevakukṣisthānyajñasthānśataśo dvijān/
sadvṛttamāśritāḥ sarve varṇā brāhmaṇapūrvakāḥ

catvāra āśramāḥ samyagyathāpūrvaṃ vilokitā/
evaṃ varṣaśataṃ sāgraṃ mārkaṃḍeyena dhīmatā

caratā pṛthivī sarvā tatkukṣau hi samīkṣyate/
tataḥ kadācidatha vai punaḥ kukṣervinirgataḥ

suptaṃ nyagrodhaśākhāya āṃbālamekaṃ nirīkṣya ca/
tathaivaikārṇavajale nīhāreṇāvṛtāṃtare

avyaktakrīḍite loke sarvabhūtavivarjite/
sa munirvismayāviṣṭaḥ kautūhalasamanvitaḥ

bālamādityasaṃkāśaṃ na śaknotyabhivīkṣitum/
sopyaciṃtayadekāṃte sthitvā salilasannidhau

pūrvadṛṣṭamidaṃ mene śaṃkito devamāyayā/
agādhe salile śete mārkaṃḍeyaḥ savismayaḥ

pūrvavattamatho draṣṭumavrajattrastalocanaḥ/
sa tasmai bhagavānāha svāgato bāla bho iti

babhāṣe meghatulyena svareṇa puruṣottamaḥ/
mārkaṃḍeya na bhetavyamāgacchasva mamāṃtikam

mārkaṃḍeya uvāca/
ko nāmnā kīrtayati māṃ kurvanparibhavaṃ mama/
divyavarṣasahasrākhyaṃ dharṣayaṃścaiva me vayaḥ

na hyeṣa ca sadācāro deveṣvapi mamocitaḥ/
māṃ brahmāpi hi sasneho dīrghāyuriti bhāṣate

kastapoghoramāsādya mamādya tyaktajīvitaḥ/
mārkaṃḍeyeti māmuktvā mṛtyumīkṣitumarhasi

evaṃ prakṣubhitaḥ krodhānmārkaṃḍeyo mahāmuniḥ/
tadainaṃ bhagavānbhūyo babhāṣe madhusūdanaḥ

śrībhagavānuvāca/
ahaṃ te janako vatsa hṛṣīkeśaḥ pitā guruḥ/
āyuḥ pradātā paurāṇaḥ kiṃ māṃ tvaṃ nopasarpasi

māṃ putrakāmaḥ prathamaṃ tvatpitāṃgiraso muniḥ/
pūrvamārādhayāmāsa tapastīvraṃ samāśritaḥ

taṃ dṛṣṭvā ghoratapasaṃ tridaśottamatejasam/
dattavāṃstvāmahaṃ putraṃ maharṣimamitaujasam

kassamutsahate cānyo yogibhūtātmagātmakam/
draṣṭumekārṇavagataṃ krīḍaṃtaṃ yogamāyayā

tataḥ prahṛṣṭahṛdayo vismayotphullalocanaḥ/
mūrdhni baddhāṃjalipuṭo mārkaṃḍeyo māhātapāḥ

nāmagotre tu saṃprocya dīrghāyurlokapūjitaḥ/
tasmai bhagavate bhaktyā namaskāramathākarot

mārkaṃḍeya uvāca/
icchāmi tattvato jñātumimāṃ māyāṃ tavānagha/
yadekārṇavamadhyasthaḥ śeṣe tvaṃ bālarūpavān

kiṃ saṃjñaścaiva bhagavānloke vijñāyase prabho/
tarkayehaṃ mahātmānaṃ ko hyanyaḥ sthātumarhasi

śrībhagavānuvāca/
ahaṃ nārāyaṇo brahmansarvabhūtavināśanaḥ/
ahaṃ sahasraśīrṣāsyaḥ sahasrapadasaṃyutaḥ

ādityavarṇaḥ puruṣo mukhe brahmamayo hyaham/
ahamagnirhavyavahaḥ saptasaptibhiranvitaḥ

ahamiṃdrapadaḥ śakra ṝtūnāṃ parivatsaraḥ/
ahaṃ yogiṣu sāṃkhyākhyo yugāṃtāvarta eva ca

ahaṃ sarvāṇi satvāni daivatānyakhilāni ca/
bhujagānāmahaṃ śeṣastārkṣyo'haṃ sarvapakṣiṇām

kṛtāṃtaḥ sarvabhūtānāṃ vijñeyaḥ kālasaṃjñitaḥ/
ahaṃ dharmastapaścāhaṃ sarvāśramanivāsinām

ahaṃ dayā parodharmaḥ kṣīrodohaṃ mahārṇavaḥ/
yatsatyaṃ tatparaṃ tveka ahameva prajāpatiḥ

ahaṃ sāṃkhyamahaṃ yogo hyahaṃ tatparamaṃ padam/
ahamijyā kriyā cāhamahaṃ vidyādhipaḥ smṛtaḥ

ahaṃ jyotirahaṃ vāyurahaṃ bhūmirahaṃ jalam/
ākāśohaṃ samudrāśca nakṣatrāṇi diśo daśa

ahaṃ varṣamahaṃ somaḥ parjanyohamahaṃ raviḥ/
ahaṃ purāṇaṃ paramaṃ tathaivāhaṃ parāyaṇam

bhaviṣye cāpi sarvatra bhaviṣyatsarvasaṃgrahaḥ/
yatkiṃcitpaśyase vipra yacchṛṇoṣi ca kiṃcana

yaccānubhavase loke tatsarvaṃ māmanusmara/
viśvaṃ sṛṣṭaṃ mayā pūrvaṃ sṛjedyāpi ca paśya mām

yuge yuge ca rakṣāmi mārkaṃḍeyākhilaṃ jagat/
tadetatkathitaṃ sarvaṃ mārkaṃḍeyāvadhāraya

śuśrūṣurapi dharmeṣu kukṣau carasukhaṃ mama/
mama brahmā śarīrastho devāśca ṝṣibhiḥ saha

vyaktamavyaktayogaṃ māmavagaccha muradviṣam/
ahamekākṣaro maṃtrastryakṣaraśca pitāmahaḥ

parastrivargaoṃkāraḥ paramātmapradarśanaḥ/
evamādipurāṇaṃ ca vadatemāṃ mahāmate

vaktraṃ yāto bhagavato mārkaṃḍeyo mahāmuniḥ/
tato bhagavataḥ kukṣiṃ praviṣṭo munisattamaḥ

tasyāsammukhamekānte śuśrūṣurhaṃsamavyayam/
yadakṣayaṃ vividhamupāśritaṃ tu tanmahārṇave vyapagatacaṃdrabhāskare

śanaiścaranprabhuratha haṃsasaṃjñitaḥ sṛjanjagadviharati kālaparyaye/
atha caivaṃ śucirbhūtvā varayāmāsa vai tapaḥ

chādayitvātmano dehaṃ payasāṃbujasaṃbhavaḥ/
tato mahātmātibalo martyalokavisarjane

mahatāṃ caiva bhūtānāṃ viśvo viśvamaciṃtayat/
tasya ciṃtayamānasya niyate saṃsthiterṇave

nirākāśe toyamaye sūkṣme jagati saṃkṣaye/
īśaḥ saṃkṣobhayāmāsa sorṇavaṃ salilaṃ gataḥ

athāṃtarādapāṃ sūkṣmamatha cchidramabhūtpurā/
śabdaṃ prati tato bhūto mārutaśchidrasaṃbhavaḥ

saṃlabdhvāṃtarasaṃkṣobhaṃ vyavardhata samīraṇaḥ/
nabhasvatā balavatā vegādvikṣobhitorṇavaḥ

tasyārṇavasya kṣubdhasya tasminnaṃbhasi mathyataḥ/
kṛṣṇavartmā samabhavatprabhurvaiśvānaro mahān

tataḥ saṃśoṣayāmāsa pāvakaḥ salilaṃ bahu/
samastajaladhiśchidramabhavadvisṛtaṃ nabhaḥ

ātmatejobhavāḥ puṇyā āpomṛtarasopamāḥ/
ākāśaṃ chidrasaṃbhūtaṃ vāyurākāśasaṃbhavaḥ

atha saṃgharṣasambhūtaṃ pāvakaṃ cāsya saṃbhavam/
dṛṣṭvā pitāmaho devo mahābhūtavibhāvanaḥ

dṛṣṭvā bhūtāni bhagavānlokasṛṣṭyarthamuttamam/
brahmaṇo janmasahitaṃ bahurūpo hyaciṃtayat

caturyugānāṃ saṃkhyātaṃ sahasraṃ yugaparyaye/
yatpṛthivyāṃ dvijeṃdrāṇāṃ tapasā bhāvitātmanām

bahujanmaviśuddhātmā brahmaṇo harirucyate/
jñānaṃ dṛṣṭvā tu viśvātmā yogināṃ yāti yogyatām

taṃ yogavaṃtaṃ vijñāya saṃpūrṇaiśvaryamuttamam/
pade brahmaṇi viśvasya nyayojayata yogavit

tatastasminmahātoye maheśo hariracyutaḥ/
jalakrīḍāṃ ca vidhivatsa cakre sarvalokakṛt

padmaṃ nābhyudbhavaṃ caikaṃ samutpāditavāṃstataḥ/
sahastravarṇaṃ virajaṃ bhāskarābhaṃ hiraṇmayam

hutāśanajvalitaśikhojjavalaprabhaṃ samutthitaṃ śaradamalārkatejasam/
virājate kamalamudāravarcasaṃ mahātmanastanuruha cāruśaivalam

iti śrīpādmapurāṇe prathame sṛṣṭikhaṃḍe padmaprādurbhāvonāmaikonacatvāriṃśo'dhyāyaḥ