Scripture Library

Padma Purana · Chapter 1.31

1.31.1

bhīṣma uvāca/
bhagavanmahadāścaryaṃ bāṣkalerbaṃdhanaṃ hi yat/
kṛtaṃ trivikramaṃ rūpaṃ yadā saṃyamito bali

1.31.2

etanmayā śrutaṃ pūrvaṃ kathyamānaṃ dvijottamaiḥ/
pātāle vasatedyāpi vairocanasuto bali

1.31.3

nāgatīrthaṃ yathābhūtaṃ piśācānāṃ tu saṃbhavam/
śivadūtī kathaṃ cātra keneyaṃ maṃgalīkṛtā

1.31.4

aṃtarikṣe puṣkaraṃ tu kena nītaṃ mahāmune/
etadācakṣva me sarvaṃ yathā bāṣkalibaṃdhanam

1.31.5

bhūmiprakramaṇaṃ pūrvaṃ kṛtaṃ devena viṣṇunā/
dvitīye kāraṇaṃ kiṃ ca yena devaścakāra ha

1.31.6

tattvatastvaṃ hi tatsarvaṃ yathābhūtaṃ tathā vada/
pāpakṣayakaraṃ hyetacchrotavyaṃ bhūtimicchatā

1.31.7

pulastya uvāca/
praśnabhārastvayā rājankautukādeva kīrtitaḥ/
kathayāmi hi tatsarvaṃ yathābhūtaṃ nṛpottama

1.31.8

viṣṇoḥ padānuṣaṃgeṇa baṃdhanaṃ bāṣkaleriha/
śrutaṃ tadbhavatā sarvaṃ mayā te parikīrtitaṃ

1.31.9

bhūyopi viṣṇunā bhīṣma prāpte vaivasvateṃtare/
trailokyaṃ balinākrāṃtaṃ viṣṇunā prabhaviṣṇunā

1.31.10

gatvā tvekākinā yajñe tathā saṃyamito bali/
bhūyopi devadevena bhūmeḥ prakramaṇaṃ kṛtam

1.31.11

prādurbhāvo vāmanasya tathābhūto narādhipa/
punastrivikramo bhūtvā vāmano bhūdavāmanaḥ

1.31.12

utpattireṣā te sarvā kathitā kurunaṃdana/
nāgānāṃ tu yathā tīrthaṃ tacchṛṇuṣva mahāvrata

1.31.13

anaṃto vāsukiścaiva takṣakaśca mahābalaḥ/
karkoṭakaśca nāgeṃdraḥ padmaścānyaḥ sarīsṛpaḥ

1.31.14

mahāpadmastathā śaṃkhaḥ kulikaścāparājitaḥ/
ete kaśyapadāyādā etairāpūritaṃ jagat

1.31.15

eteṣāṃ tu prasūtyā tu idamāpūritaṃ jagat/
kuṭilābhīmakarmāṇastīkṣṇāsyāśca viṣolbaṇāḥ

1.31.16

daṣṭvā maṃdāṃścamanujānkuryurbhasmakṣaṇāttu te/
taddarśanādbhavennāśo manuṣyāṇāṃ narādhipa

1.31.17

ahanyahani jāyeta kṣayaḥ paramadāruṇaḥ/
ātmanastu kṣayaṃ dṛṣṭvā prajāssarvāssamaṃtataḥ

1.31.18

jagmuḥ śaraṇyaṃ śaraṇaṃ brahmāṇaṃ parameśvaraṃ/
imamevārthamuddiśya prajāḥ sarvā mahīpate

1.31.19

ūcuḥ kamalajaṃ dṛṣṭvā purāṇaṃ brahmasaṃjñakam/
prajā ūcuḥ/
devadeveśa lokānāṃ prasūte parameśvara

1.31.20

trāhi nastīkṣṇadaṃṣṭrāṇāṃ bhujagānāṃ mahātmanām/
dinedine bhayaṃ deva paśyāmaḥ kṛpaṇā bhṛśam

1.31.21

manuṣyapaśupakṣyādi tatsarvaṃ bhasmasādbhavet/
tvayā sṛṣṭiḥ kṛtā deva kṣīyate tu bhujaṃgamaiḥ

1.31.22

etajjñātvā yaducitaṃ tatkuruṣva pitāmaha/
brahmovāca/
ahaṃ rakṣāṃ vidhāsyāmi bhavatīnāṃ na saṃśayaḥ

1.31.23

vrajadhvaṃ svaniketāni nīrujo gatasādhvasāḥ/
evamukte prajāḥ sarvā brahmaṇā'vyaktamūrtinā

1.31.24

ājagmuḥ paramaprītāḥ stutvā caiva svayaṃbhuvam/
prayātāsu prajāsvevaṃ tānāhūya bhujaṃgamān

1.31.25

śaśāpa paramakruddho vāsukipramukhāṃstadā/
brahmovāca/
ahanyahani bhūtāni bhakṣyaṃte vai durātmabhiḥ

1.31.26

naśyaṃti tūragairdaṣṭā manuṣyāḥ paśavastathā/
yasmānmatprabhavānnityaṃ kṣayaṃ nayatha mānuṣān

1.31.27

atonyasminbhave bhūyānmamakopātsudāruṇāt/
bhavatāṃ hi kṣayo ghoro bhāvi vaivasvateṃtare

1.31.28

tathānyaḥ somavaṃśīyo rājā vai janamejayaḥ/
dhakṣyate sarpasatreṇa pradīpte havyavāhane

1.31.29

mātṛṣvasuśca tanayāṃstārkṣyo vo bhakṣayiṣyati/
evaṃ vo bhavitā nāśaḥ sarveṣāṃ duṣṭacetasām

1.31.30

śaptvā kulasahasraṃ tu yāvadekaṃ kulaṃ sthitam/
evamukte tu vepaṃto brahmaṇā bhujagottamāḥ

1.31.31

nipatya pādayostasya idamūcurvacastadā/
bhagavankuṭilā jātirasmākaṃ bhūtabhāvana

1.31.32

viṣolbaṇatvaṃ krūratvaṃ daṃdaśūkatvameva ca/
saṃpāditaṃ tvayā deva idānīṃ śapase kathaṃ

1.31.33

brahmovāca/
yadi nāma mayā sṛṣṭā bhavaṃtaḥ kuṭilāśayāḥ/
tataḥ kiṃ bahunā nityaṃ bhakṣayadhvaṃ gatavyathāḥ

1.31.34

nāgā ūcuḥ/
maryādāṃ kuru deveśa sthānaṃ caiva pṛthakpṛthak/
manuṣyāṇāṃ tathāsmākaṃ samayaṃ deva kāraya

1.31.35

śāpo yo bhavatā datto manuṣyo janamejayaḥ/
nāśaṃ naḥ sarpasatreṇa ulbaṇaṃ ca kariṣyati

1.31.36

brahmovāca/
jaratkāruriti khyāto bhavitā brahmavittamaḥ/
jaratkanyā tasya deyā tasyāmutpatsyate sutaḥ

1.31.37

rakṣāṃ kartā sa vo vipro bhavatāṃ kulapāvanaḥ/
tathā karomi nāgānāṃ samayaṃ manujaiḥ saha

1.31.38

tadekamanasaḥ sarve śṛṇudhvaṃ mama śāsanam/
sutalaṃ vitalaṃ caiva tṛtīyaṃ ca talātalam

1.31.39

dattaṃ ca triprakāraṃ vo gṛhaṃ tatra gamiṣyatha/
tatra bhogānbahuvidhānbhuṃjānā mama śāsanāt

1.31.40

tiṣṭhadhvaṃ saptamaṃ yāvatkālaṃ taṃ tu punaḥpunaḥ/
tato vaivasvatasyādau kāśyapeyo bhaviṣyati

1.31.41

dāyādaḥ sarvadevānāṃ suparṇassarpabhakṣakaḥ/
tadā prasūtiḥ sarpāṇāṃ dagdhā vai citrabhānunā

1.31.42

bhavatāṃ caiva sarveṣāṃ bhaviṣyati na saṃśayaḥ/
ye ye krūrā bhogino durvinītāsteṣāmaṃto bhāvitā nānyathaitat

1.31.43

kālavyāptaṃ bhakṣayadhvaṃ ca satvaṃ tathāpakāre cakṛte manuṣyam/
maṃtrauṣadhairgāruḍaiścaiva taṃtrairbaṃdhairjuṣṭā mānavā ye bhavaṃti

1.31.44

tebhyo bhītairvartitavyaṃ na cānyaccitte kāryaṃ cānyathā vo vināśaḥ/
itīrite brahmaṇā vai bhujaṃgā jagmuḥ sthānaṃ sutalākhyaṃ hi sarve

1.31.45

tasthurbhogānbhuṃjamānāśca sarve rasātale līlayā saṃsthitāste/
evaṃ śāpaṃ tute labdhvāprasādaṃ ca caturmukhāt

1.31.46

tasthuḥ pātālanilaye muditenāṃtarātmanā/
tataḥ kālāṃta rebhūte punarevaṃ vyaciṃtayan

1.31.47

bhavitā bharato rājā pāṃḍaveyo mahāyaśāḥ/
asmākaṃ tu kṣayakaro daivayogena kenacit

1.31.48

kathaṃ tribhuvane nāthaḥ sarveṣāṃ ca pitāmahaḥ/
sṛṣṭikartā jagadvaṃdyaḥ śāpamasmāsu dattavān

1.31.49

devaṃ viraṃcinaṃ tyaktvā gatiranyā na vidyate/
vairāje bhavanaśreṣṭhe tatra devaḥ sa tiṣṭhati

1.31.1.31.50

sa devaḥ puṣkarastho vai yajñaṃ yajati sāṃpratam/
gatvā prasādayāmastaṃ varaṃ tuṣṭaḥ pradāsyati

1.31.51

evaṃ viciṃtya te sarve nāgā gatvā ca puṣkaram/
yajñaparvatamāsādya śailabhittimupāśritāḥ

1.31.52

dṛṣṭvā nāgāṃstathā śrāntānvāridhārāśca śītalāḥ/
udaṅmukhā vai niṣkrāṃtāssarveṣāṃ tu sukhapradāḥ

1.31.53

nāgatīrthaṃ tato jātaṃ pṛthivyāṃ bharatarṣabha/
nāgakuṃḍaṃ ca vai kecitsaritaṃ cāpare'bruvan

1.31.54

puṇyaṃ tatsarvatīrthānāṃ sarpāṇāṃ viṣanāśanam/
majjanti tatra ye martyā adhiśrāvaṇa paṃcami

1.31.55

na teṣāṃ tu kule sarpāḥ pīḍāṃ kurvanti karhicit/
śrāddhaṃ pitṝṇāṃ ye tatra kariṣyaṃti narā bhuvi

1.31.56

brahmā teṣāṃ paraṃ sthānaṃ dāsyate nātra saṃśayaḥ/
nāgānāṃ tu bhayaṃ jñātvā brahmā lokapitāmahaḥ

1.31.57

pūrvoktaṃ tu punarvākyaṃ nāgānaśrāvayattadā/
paṃcamī sā tithirdhanyā sarvapāpaharā śubhā

1.31.58

yato'syāmeva sutithau nāgānāṃ kāryamuddhṛtam/
etasyāṃ sarvato yastu kaṭvamlaṃ parivarjayet

1.31.59

kṣīreṇa snāpayennāgāṃstasya te yāṃti mitratām/
bhīṣma uvāca/
śivadūtī yathā jātā yena caiva niveśitā

1.31.60

tanme sarvaṃ yathātattvaṃ bhavānśaṃsiturmahati/
pulastya uvāca/
śivā nīlagiriṃ prāptā tapase dhṛtamānasā

1.31.61

raudrī jaṭodbhavā śaktistasyāḥ śṛṇu nṛpa vratam/
tapaḥ kṛtvā ciraṃ kālaṃ grasiṣyāmyakhilaṃ jagat

1.31.62

evamuddiśya paṃcāgniṃ sādhayāmāsa bhāminī/
tasyāḥ kālāṃtare devyāstapaṃtyāstapa uttamam

1.31.63

rururnāmamahātejā brahmadattavaro'suraḥ/
samudramadhye ratnākhyaṃ puramasti mahādhanam

1.31.64

tatrātiṣṭhatsa daityeṃdrassarvadevabhayaṃkaraḥ/
aneka śatasāhasra koṭikoṭiśatottamaiḥ

1.31.65

asurairarcitaḥ śrīmāndvitīyo namuciryathā/
kālena mahatā so'tha lokapālapuraṃ yayau

1.31.66

jigīṣuḥ sainyasaṃvīto devairvairamarocayat/
uttiṣṭhatastasya mahāsurasya samudratoyaṃ vavṛdheti vegāt

1.31.67

aneka nāga graha mīnajuṣṭamāplāvayatparvatasānudeśān/
aṃtaḥsthitānekasurārisaṃghaṃ vicitravarmāyudhacitraśobham

1.31.68

bhīmaṃ balaṃ calitaṃ cāruyodhaṃ viniryayau siṃdhujalādviśālam/
tatra dvipā daityabhaṭhābhyupetāḥ sayānaghaṃṭāśca samṛddhiyuktāḥ

1.31.69

viniryayuḥ svākṛtibhirjhaṣāṇāṃ samatvamuccaiḥ khalu darśayaṃtaḥ/
aśvāstathā kāṃcanasūtranaddhā rohītamatsyā iva te jalāṃte

1.31.70

vyavasthitāstaiḥ samameva tūrṇaṃ viniryayurlakṣaśaḥ koṭiśaśca/
tathā ravisyaṃdanatulyavegāḥ sacakradaṃḍākṣataveṇuyuktāḥ

1.31.71

rathāśca yaṃtroparipīḍitāṃgāścalatpatākāḥ svanitaṃ vicakruḥ/
tathaiva yodhāḥ sthagitāstarībhistitīrṣavaste pravarāstrapāṇayaḥ

1.31.72

raṇeraṇe labdhajayāḥ prahāriṇo virejuruccairasurānugā bhṛśaṃ/
deveṣu vai raṇe teṣu vidruteṣu viśeṣataḥ

1.31.73

asurāssarvadevānāmanvadhāvaṃstatastataḥ/
tato devagaṇāḥ sarve dravaṃto bhayavihvalāḥ

1.31.74

nīlaṃ girivaraṃ jagmuryatra devī svayaṃ sthitā/
raudrī taponvitā dhanyā śāṃbhavī śaktiruttamā

1.31.75

saṃhārakāriṇī devī kālarātrīti yāṃ viduḥ/
sā tu dṛṣṭvā tadā devānbhayatrastānvicetasaḥ

1.31.76

papraccha vismayāddevī protphullāṃbujalocanā/
pṛṣṭhato vo na paśyāmi bhayaṃ kiṃcidupāgatam

1.31.77

kathaṃ tu vidrutā devāḥ sarve śakrapuraḥsarāḥ/
devā ūcuḥ/
ayamāyāti daityeṃdro rururbhīmaparākramaḥ

1.31.78

caturaṃgeṇa sainyena mahatā parivāritaḥ/
tasmāddīnā vayaṃ devīṃ bhavatīṃ śaraṇaṃ gatāḥ

1.31.79

devānāmiti vai śrutvā vākyamuccairjahāsa sā/
tasyāṃ hasaṃtyāṃ niścerurvarāṃgyo vadanāttataḥ

1.31.80

pāśāṃkuśadharāḥ sarvāḥ pīnonnatapayodharāḥ/
sarvāśśūladharā bhīmāḥ sarvā daṃṣṭrāṅkuśānanāḥ

1.31.81

ābaddhamakuṭāḥ sarvāḥ saṃdaṣṭadaśanacchadāḥ/
phūtkārarāvairaśivaistrāsayaṃtyaścarācaram

1.31.82

kāścicchuklāmbaradharāḥ kāściccitrāmbarāstathā/
sunīlavasanāḥ kāścidraktapānātilālasāḥ

1.31.83

nānārūpairmukhaistāstu nānāveṣavapurdharāḥ/
tābhirevaṃ vṛtā devī devānāmabhayaṃkarī

1.31.84

mā bhaiṣṭa devā bhadraṃ vo yāvadvadati dānavaḥ/
caturaṃgabalopeto rurustāvatsamāgataḥ

1.31.85

taṃ nīlaparvatavaraṃ devānāṃ mārgamārgaṇaḥ/
devānāmagrataḥ sainyaṃ dṛṣṭvā devī samākulam

1.31.86

tiṣṭhatiṣṭheti jalpaṃto daityāste samupāgatāḥ/
tataḥ pravavṛte yuddhaṃ tāsāṃ teṣāṃ mahābhayam

1.31.87

nārācairbhinnadehānāṃ daityānāṃ bhuvi sarpatāṃ/
roṣāddaṃḍaprabhagnānāṃ sarpāṇāmiva sarpatām

1.31.88

śaktinirbhinnahṛdayā gadāsaṃcūrṇitorasaḥ/
kuṭhārairbhinnaśiraso musalairbhinnamastakāḥ

1.31.89

viddhodarāstriśūlāgraiśchinnagrīvā varāsibhiḥ/
kṣatāśvarathamātaṃgapādātāḥ peturāhave

1.31.90

raṇabhūmiṃ samāsādya daityāḥ sarve ruruṃ vinā/
tato balaṃ hataṃ dṛṣṭvā rururmāyāṃ tadādade

1.31.91

tayā saṃmohitā devyo devāścāpi raṇājire/
tāmasyā māyayā devyā sarvamandhaṃtamobhavat

1.31.92

tato devī mahāśakyā taṃ daityaṃ samatāḍayat/
tayā tu tāḍitasyājau daityasya pragataṃ tamaḥ

1.31.93

māyāyāmatha naṣṭāyāṃ tāmasyāṃ dānavo ruruḥ/
pātālamāviśattūrṇaṃ tatrāpi parameśvarī

1.31.94

devībhiḥ sahitā kruddhā puratobhimukhī sthitā/
rurostu dānaveṃdrasya bhītasyāgre gatasya ca

1.31.95

nakhāgreṇa śiraśchitvā carma cādāya vegitā/
niṣpapātātha pātālātpuṣkaraṃ ca punargirim

1.31.96

kanyā sainyena mahatā bahurūpeṇa bhāsvatā/
devaistuvismitairdṛṣṭā carmamuṃḍadharā ruroḥ

1.31.97

svakīye tapasaḥ sthāne niviṣṭā parameśvarī/
tato devyo mahābhāgāḥ parivārya vyavasthitāḥ

1.31.98

yācayāmāsuravyagrāstāṃ tu devīṃ bubhukṣitāḥ/
bubhukṣitā vayaṃ devi dehi no bhojanaṃ varam

1.31.99

evamuktvā tato devī dadhyau tāsāṃ tu bhojanam/
nādhyagacchattadā tāsāṃ bhojanaṃ cintitammahat

1.31.1.31.100

tadā dadhyau mahādevaṃ rudraṃ paśupatiṃ vibhum/
sopi dhyānātsamuttasthau paramātmā trilocanaḥ

1.31.101

uvāca rudrastāṃ devīṃ kiṃ te kāryaṃ vivakṣitam/
brūhi devi mahāmāye yatte manasi vartate

1.31.102

śivadūtyuvāca/
chāgamadhye tu vai deva chāgarūpeṇa vartase/
etāstvāṃ bhakṣayiṣyanti bhakṣyamīpsitamādarāt

1.31.103

bhakṣārthamāsāṃ deveśa kiṃciddātumihārhasi/
śūlīkurvaṃti māmetā bhakṣārthinyo mahābalāḥ

1.31.104

anyathā māmapi balādbhakṣayeyurbubhukṣitāḥ/
evaṃ māṃ tu samālakṣya bhakṣyaṃ kalpaya satvaram

1.31.105

rudra uvāca/
śivadūti bravīmyekaṃ pravṛttaṃ yadyugāṃtare/
gaṃgādvāre dakṣayajño gaṇairvidhvaṃsito mama

1.31.106

tatra yajño mṛgo bhūtvā pradudrāva suvegavān/
mayā bāṇena nirviddho rudhireṇa prasecitaḥ

1.31.107

ajagaṃdhastadā bhūto nāma devaistu me kṛtam/
ajagaṃdhastvameveti dāsye cānyattu bhojanam

1.31.108

etāsāṃ śṛṇu me devi bhakṣyamekaṃ mayocitam/
kathyamānaṃ varārohe kālarātri mahāprabhe

1.31.109

yā strī sagarbhā deveśi anyastrīparidhānakam/
paridhatte spṛśedvāpi puruṣasya viśeṣataḥ

1.31.110

sabhāgostu varārohe kāsāṃcitpṛthivītale/
apyekavarṣaṃ bālaṃ tu gṛhītvā tatra vai balāt

1.31.111

bhuktvā tiṣṭhaṃtu suprītā api varṣaśatānbahūn/
anyāḥ sūtigṛhe cchidraṃ gṛhṇīyustu hyapūjitāḥ

1.31.112

nivasiṣyaṃti deveśi tathā vai jātahārikāḥ/
gṛhe kṣetre taṭāke ca vāpyudyāneṣu caiva hi

1.31.113

atyeṣu ca rudaṃtyo yā striyastiṣṭhaṃti nityaśaḥ/
tāsāṃ śarīragāścānyāḥ kāścittṛptimavāpnuyuḥ

1.31.114

śivadūtya uvāca/
kutsitaṃ bhavatā dattaṃ prajānāṃ paripīḍanam/
na ca tvaṃ budhyase dātuṃ śaṃkararasya viśeṣataḥ

1.31.115

trapākaraṃ yadbhavati prajānāṃ paripīḍakam/
na tu tadyujyate dātuṃ tāsāṃ bhakṣyaṃ tu śaṃkara

1.31.116

rudra uvāca/
avaṃtyāṃ tu yadā skaṃdo mayā pūrvaṃ tu bhadritaḥ/
cūḍākarmaṇi vṛtte tu kumārasya tadā śubhe

1.31.117

āgatya mātaro bhakṣyamapūrvaṃ tu pracakrire/
devalokāddevagaṇā mātṝṇāṃ bhoktumāgatāḥ

1.31.118

tāsāṃ gṛhe yadā pūrvaṃ brahmādyāssurasattamāḥ/
gaṃdharvāpsarasaścaiva yakṣāssarve ca guhyakāḥ

1.31.119

mervādayaḥ śikhariṇo gaṃgādyāḥ saritastathā/
sarve nāgā gajāssiddhāḥ pakṣiṇo'surasūdanāḥ

1.31.120

ḍākinyaḥ saha vetālairvṛtāḥ sarvairgrahaistadā/
kimuktenāmunā devi yatsṛṣṭaṃ brahmaṇā tviha

1.31.121

tatsarvaṃ bhojanaṃ dattaṃ svecchānnaṃ ca nabhogataṃ/
śivadūtyuvāca/
āsāṃ kṛtaṃ dehi bhojyaṃ durlabhaṃ yattriviṣṭape

1.31.122

snehāktaṃ saguḍaṃ hṛdyaṃ supakvaṃ parikalpitam/
kvacinnānyena yadbhuktamapūrvaṃ parameśvara

1.31.123

evamuktastadā sopi devadevo maheśvaraḥ/
bhakṣyārthaṃ tāstadā prāha pārvatyāścaiva sannidhau

1.31.124

mayā vai sādhitaṃ cānnaṃ prakārairbahubhiḥ kṛtaṃ/
tatsarvaṃ ca vyayaṃ yātaṃ na cānyadiha dṛśyate

1.31.125

bhavatīṣvāgatāsvadya kiṃ mayā deyamucyatām/
apūrvaṃ bhavatīnāṃ yanmayā deyaṃ viśeṣataḥ

1.31.126

asvāditaṃ na cānyena bhakṣyārthe ca dadāmyaham/
adhobhāge ca me nābhervartulau phalasannibhau

1.31.127

bhakṣayadhvaṃ hi sahitā laṃbau me vṛṣaṇāvimau/
anena cāpi bhojyena parā tṛptirbhaviṣyati

1.31.128

mahāprasādaṃ tā labdhvā devyassarvāstadā śivam/
praṇipatya sthitāśśarva idaṃ vacanamabravīt

1.31.129

kariṣyaṃti śubhācārānvinā hāsyena ye narāḥ/
teṣāṃ dhanaṃ paśuḥ putrā dārāścaiva gṛhādikam

1.31.130

bhaviṣyati mayā dattaṃ yaccānyanmanasi sthitam/
hāsyena dīrghadaśanā daridrāśca bhavaṃti te

1.31.131

tasmānna niṃdā hāsyaṃ ca kartavyaṃ hi vijānatā/
bhavatyo mātaraḥ khyātā hyasminloke bhaviṣyatha

1.31.132

upahāre narā ye tu kariṣyaṃti ca kaumudīm/
caṇakānpūrikāścaiva vṛṣaṇaiḥ saha pūpakān

1.31.133

baṃdhubhiḥ svajanaiścaiva teṣāṃ vaṃśo na chidyate/
aputro labhate putraṃ dhanārthī labhate dhanam

1.31.134

rūpavānsubhago bhogī sarvaśāstraviśāradaḥ/
haṃsayuktena yānena brahma loke mahīyate

1.31.135

śivadūti mayāpyevaṃ tāsāṃ dattaṃ ca bhakṣaṇam/
trapākaraṃ kiṃ bhavatyā uktohaṃ tanniśāmaya

1.31.136

jayasva devi cāmuṃḍe jaya bhūtāpahāriṇi/
jaya sarvagate devi kālarātri namostu te

1.31.137

viśvamūrtiyute śuddhe virūpākṣi trilocane/
bhīmarūpe śive vidye mahāmāye mahodare

1.31.138

manojaye manodurge bhīmākṣi kṣubhitakṣaye/
mahāmāri vicitrāṃgi gītanṛtyapriye śubhe

1.31.139

vikarāli mahākāli kālike pāpahāriṇi/
pāśahaste daṃḍahaste bhīmahaste bhayānake

1.31.140

cāmuṃḍe jvalamānāsye tīkṣṇadaṃṣṭre mahābale/
śivayānapriye devi pretāsanagate śive

1.31.141

bhīmākṣi bhīṣaṇe devi sarvabhūtabhayaṃkari/
karāli vikarāle ca mahākāli karālini

1.31.142

kālikarālavikrāṃte kālarātri namostu te/
sarvaśastrabhṛte devi namo devanamaskṛte

1.31.143

evaṃ stutā śivadūtī rudreṇa parameṣṭhinā/
tutoṣa paramā devī vākyaṃ caivamuvāca ha

1.31.144

varaṃ vṛṇīṣva deveśa yatte manasi vartate/
rudra uvāca/
stotreṇānena ye devi stoṣyaṃti ttvāṃ varānane

1.31.145

teṣāṃ tvaṃ varadā devi bhava sarvagatā satī/
imaṃ parvatamāruhya yaḥ pūjayati bhaktitaḥ

1.31.146

sa putrapautrapaśumānsamṛddhimupagacchatu/
yaścaivaṃ śṛṇuyādbhaktyā stavaṃ devi samudbhavaṃ

1.31.147

sarvapāpavinirmuktaḥ paraṃ nirvāṇamṛcchatu/
bhraṣṭarājyo yadā rājā navamyāṃ niyataḥ śuciḥ

1.31.148

aṣṭamyāṃ ca caturdaśyāṃ sopavāso narottama/
saṃvatsareṇa labhatāṃ rājyaṃ niṣkaṃṭakaṃ punaḥ

1.31.149

eṣā jñānānvitā śaktiḥ śivadūtīti cocyate/
ya evaṃ śṛṇuyānnityaṃ bhaktyā paramayā nṛpa

1.31.1.31.150

sarvapāpavinirmuktaḥ paraṃ nirvāṇamāpnuyāt/
yaścainaṃ paṭhate bhaktyā snātvā vai puṣkare jale

1.31.151

sarvametatphalaṃ prāpya brahmaloke mahīyate/
yatraitallikhitaṃ gehe sadā tiṣṭhati pārthiva

1.31.152

na tatrāgnibhayaṃ ghoraṃ sarvacorādisaṃbhavaṃ/
yaścedaṃ pūjayedbhaktyā pustakepi sthitaṃ budhāḥ

1.31.153

tena ceṣṭaṃ bhavetsarvaṃ trailokyaṃ sacarācaraṃ/
jāyaṃte bahavaḥ putrā dhanaṃ dhānyaṃ varastriyaḥ

1.31.154

ratnānyaśvā gajā bhṛtyāsteṣāmāśu bhavaṃti ca/
yatredaṃ likhyate gehe tatrāpyevaṃ dhruvaṃ bhavet

1.31.31

iti śrīpādmapurāṇe prathame sṛṣṭikhaṃḍe śivadūtīcaritaṃ nāma ekatriṃśo'dhyāyaḥ

Original text: padmapurāṇam · Sanskrit Wikisource contributors · Sanskrit Wikisource · CC BY-SA 4.0