Niruttara Tantra · Chapter p14

ṣaṣṭhaḥ paṭala:
środevyuvāca -
rajanī-pūjanādeva drutaṃ siddhiṃ kathaṃ bhavet ?
tattvaṃ kathaya me sarvaṃ yadyahaṃ tava vallabhā //
śrīśiva uvāca-
śṛṇu devi ! pravakṣyāmi loka-saṃśaya-bhedakam /
yasya vijñāna-mātreṇa jīvanmuktiḥ prajāyate //
ajñāna-timirācchannā āvayoḥ smṛti-varjitāḥ /
unmajjanti nimajjanti saṃsāra-jaladhau janāḥ //
sarvā nāryastvamevāsi sarve'haṃ puruṣāḥ priye !
etad-vijñāna-mātreṇa jāyate siddhi-bhājanāḥ //
śrīdevyuvāca -
sarvajña ! jagatāṃ nātha ! sarva-loka-hite rata !
kenaitat druta-siddhiḥ syāt tanme brūhi kuleśvara //
śrīśiva uvāca -
capalāsi varārohe ! hema-gaurāṅgi pārvati !
saṃsāra-bhedakaṃ jñānaṃ kathaṃ te kathayāmyaham //
śrīdevyuvāca -
capalāhaṃ sāvahitā mahādeva ! bhavāmyaham /
saṃsāra-bhedakaṃ tattvaṃ kathayasva kṛpāṃ kuru //
saṃsāra-bhedakaṃ jñānaṃ na prakāśyaṃ kadācana /
prakāśyate yadā yasmin sa hi matsadṛśo bhavet //
bhītyā vākarṣitā prītyā dhanādvā hīnajā tathā /
cārvaṅgī sasmitā prītā yauvanāhita-vigrahā //
vīkṣyamāṇā tanu-kṣīṇe prokṣaṇasya ca tatparā /
ānīya vīrabhāvena suprītā cārghya-dānataḥ //
vistīrṇamāsanaṃ dattvā bhavatyā dhyānatatparaḥ /
svayaṃ matsadṛśo bhūtvā niḥspṛho vigata spṛhaḥ //
bindu-mātreṇa madana-sadmani nidhāya cakram /
vaśa-kārī girīndra-jātā ājñā karasya rajanīmathavā //
niśīthe tu baliṃ datvā nirukta-vidhinā tataḥ /
āvayoḥ prīti-janakaṃ dhyātvā tatpara-karmaṇā //
na kāryaḥ karma-sandeho ghṛṇā-lajjā-vivarjitaḥ /
bhavatyā bhāvamāpannaḥ prakṛti-sasmita-pradaḥ //
uttarādeva phalaṃ tasmin puṃsi tadbhāvamāgate /
manojā sā tu vijñāne krameṇa paritoṣitā //
kiṃ dātāsi varaṃ tvaṃ me madhu-tāmbūla-tarpite /
sthira-dhīrnirīkṣyamāṇe tava cakraṃ rati-vigrahaṃ vīraḥ //
ayutamathavā sahasraṃ śatamaṣṭādhikaṃ japenmanum /
sa tu kārtikeya-vikramo mattasya mama bhāvaṃ prayāti //
viprāste mama parvaṇi nityaṃ yogīndro bhāvanā-nipuṇaḥ /
kurute gurūpaviṣṭaṃ bhuvi bharava-bhāvamarhati //
kathayāmi varārohe ! śṛṇu tattvaṃ parātparam /
kathitaṃ naiva kasmaicit yadi saṃsāramicchati /
strī-puṃsoḥ saṅgame saukhyaṃ jāyate tatparaṃ padam /
tadāvayośca vinyastaṃ yābhyāṃ tābhyāṃ kṛtaṃ nahi //
bhājanaḥ sarva-vidyānāṃ brāhmaṇaḥ kāminī-gaṇe /
vīrāṇāṃ jāyate śreṣṭho bhuvi bhuvi ivāspadaṃ //
āvayormanasā prītiṃ yaḥ kuryād vijitendriyaḥ /
yo'sau kālīṃ bhajed bhaktyā sa eva hi na cānyathā //
yaḥ karoti saparyāṃ te devi ! sadguru-mārgataḥ /
sandeho naiva kartavyo yadi saṃsiddhimicchati //
manorūpā hi saṃsiddhirjāyate nātra saṃśayaḥ /
kulāgāre labhet siddhi devānāmapi durlabhām //
vartamāne pūjane tu yadi sandeha-bhājanaḥ /
labhate naiva saṃsiddhirjanma-koṭi-sahasrakaḥ //
iti kathitaṃ paraṃ yat sahasā siddhi-vidhāyakaṃ maheśi !
jagadati-dūraṃ viśeṣataste mṛgaśāvākṣi ! vidhehi dakṣiṇām //
śrīdevyuvāca -
preyasī tava deveśa ! girīndrasya ca nandinī /
dakṣiṇā kīdṛśī nātha! vada tāṃ ca vadāmyahaṃ //
evamākarṇya deveśaḥ sasmito lola-locanaḥ /
svaṃ paśyan girijāṃ vīkṣya śrṛṇu devi ! varānane //
aruṇamaruṇa-talpaṃ tu prānta-deśe nidhāya/
pṛthula-kuca-yugalaṃ koḍe prauḍhamāliṅganaṃ yat //
sva-rasa-vadanebhyaḥ karmaṇā yena vakṣaḥ/
sutanvāliṅgitā dakṣiṇā-bheda-siddhau //
/// iti niruttara-tantre śiva-pārvatī-samvāde ṣaṣṭhaḥ paṭalaḥ //