Natya Shastra · Chapter 9

iti bhāratīye nāṭyaśāśtre upāṅgavidhānaṃ nāma aṣṭamo 'dhyāyaḥ
atha navamo 'dhyāyaḥ
evametacchironetrabhrunāsoṣṭhakapolajam /
karma lakṣaṇasaṃyaktamupāṅgānāṃ mayoditam

hastorapārśvajaṭharakaṭījaṅghorupādataḥ /
lakṣaṇaṃ sampravakṣyāmi viniyogaṃ ca tattvataḥ

hastādīnāṃ pravakṣyāmi karma nāṭyaprayojakam
yathā yenābhineyaṃ ca tanme nigadataḥ śṛṇu

patākastripatākaśca tathā vai kartarīmukhaḥ /
ardhacandro hyarālaśca śukatuṇḍastathaiva ca

muṣṭiśca śikharākhyaśca kapitthaḥ khaṭakāmukhaḥ /
sūcyāsyaḥ padmakośaśca tathā vai sarpaśīrṣakaḥ

mṛgaśīrṣaḥ paro jñeyo hastābhinayayoktṛbhiḥ /
kāṅgulako 'lapadmaśca caturo bhramarastatha

haṃsāsyo haṃsapakṣaśca sandaṃśo mukulastathā /
ūrṇanābhastāmracūḍacaturviṃśatirīritāḥ

asaṃyutāḥ saṃyutāśca gadato me nibodhata /
añjaliśca kapotaśca karkaṭaḥ svastikastathā

khaṭakāvardhamānaśca hyutsaṃgo niṣadhastathā /
dolaḥ puṣpapuṭaścaiva tathā makara eva ca

gajadanto 'vahitthaśca vardhamānastathaiva ca /
ete tu saṃyutā hastā mayā proktāstrayodaśa

nṛttahastānataścordhva gadato me nibodhata /
caturasrau tathodvṛttau tathā talamukhau smṛtau

svastikau viprakīrṇau cāpyarālakhaṭakāmukhau /
āviddhavakrau sūcyāsyau recitāvardharecitau

uttānāvañcitau vāpi pallavau ca tathā karau /
nitambau cāpi vijñeyau keśabandhau tathaiva ca

samproktau karihastau ca latākhyau ca tathaiva ca /
pakṣavañcitakau caiva pakṣapradyotakau tathā

jñeyo garuḍapakṣau ca haṃsapakṣau tathaiva ca /
ūrdhvamaṇḍalinau caiva pārśvamaṇḍalinau tathā

uromaṇḍalinau caiva uraḥpārśvārdhamaṇḍalau /
muṣṭikasvastikau cāpi nalinīpadmakośakau

alapadmāvulbanau ca lalitau valitau tathā /
saptaṣaṣṭikarā hyete nāmato 'bhihitā mayā

yathā lakṣaṇameteṣāṃ karmāṇi ca nibodhata /
prasāritāḥ samāḥ sarvā yasyāṅgulyo bhavanti hi /
kuñcitaśca tathāṅguṣṭhaḥ sa patāka iti smṛtaḥ

eṣa prahārapāte pratāpana nodane praharṣe ca /
garve 'pyahamiti tajjñailalāṭadeśotthitaḥ kāryaḥ

eṣo 'gnivarṣadhārānirūpaṇe puṣpavṛṣṭipatane ca /
saṃyutakaraṇaḥ kāryaḥ praviralacalitāṅgulirhastaḥ

svastikavicyutikaraṇāt pallavapuṣpopahāraśaṣpāṇi /
viracitamurvīsaṃsthaṃ yad dravya tacca nirddeśyam

svastikavicyutikaraṇāt punarevādhomukhena kartavyam /
saṃvṛtavivṛtaṃ pālyaṃ channaṃ nibiḍaṃ ca gopyaṃ ca

asyaiva cāṅgulībhiradhomukhaprasthitotthitacalābhiḥ /
vāyūrmivegavelākṣobhaścaughaśca kartavyaḥ

utsāhanaṃ bahu tathā mahājanaprāṃśupuṣkaraprahatam /
pakṣotkṣepābhinayaṃ recakakaraṇena cābhinayet

parighṛṣṭatalasthena tu dhautaṃ mṛditaṃ pramṛṣṭapiṣṭe ca /
punareva śailadhāraṇamudghāṭanameva cābhinayet

evameṣa prayoktavyaḥ strīpuṃsābhinaye karaḥ /
patākābhyāṃ tu hastābhyāmabhineyaḥ prayoktṛbhiḥ

daśākhyaśca śatākhyaśca sahasrākhyastathaiva ca /
ataḥ paraṃ pravakṣyāmi tripatākasya lakṣaṇam

patāke tu yadā vakrā'nāmikā tvaṅgulirbhavet /
tripatākaḥ sa vijñeyaḥ karma cāsya nibodhata

āvāhanamavataraṇaṃ visarjanaṃ vāraṇaṃ praveśaśca /
unnāmanaṃ praṇāmo nidarśanaṃ vividhavacanaṃ ca

maṅgalyadravyāṇāṃ sparśaḥ śiraso 'tha sanniveśaśca /
uṣṇīṣamukuṭadhāraṇaṃ nāsāsyaśrotrasaṃvaraṇam

asyaiva cāṅgulībhyāmadhomukhaprasthitotthitacalābhyām /
laghupavanasrotobhujagabhramarādikān kuryāt

aśrupramārjane tilakaviracanaṃ rocanayālambhakaṃ ca
tripatākānāmikayā sparśanamalakasya kāryañca

svastikau tripatākau tu gurūṇāṃ pādavandane /
vicyutau calitāvasthau kāryāvudvāhadarśane

parasparāgrasaṃśliṣṭau kartavyau nṛpadarśane /
tiryak svastikasmbaddhau syātāṃ tau grahadarśane

tapasvidarśane kāryāvūrdhvau cāpi parāṅmukhau /
parasparābhimukhau ca kartavyau varadarśane

uttānādhomukhau kāryāvagre vaktrasya saṃsthitau /
vaḍavānalasaṅgrāmamakarāṇāṃ ca darśane

abhinayāstvanenaiava vānaraplavanormayaḥ /
pavanaśca striyaścaiva nāṭye nāṭyavicakṣaṇaiḥ

saṃmukhaprasṛtāṅguṣṭhaḥ kāryo bālendudarśane /
parāṅgmukhastu kartavyo yāne nṛṇāṃ prayoktṛbhiḥ

tripatāke yadā haste bhavet pṛṣṭhāvalokanī
tarjanī madhyamāyāśca tadāsau kartarīmukhaḥ

pathi caraṇaracanarañjanaraṅgaṇakaraṇānyadhomukhenaiva /
ūrdhvamukhena tu kuryāt daṣṭaṃ śṛṅgaṃ ca lekhyaṃ ca

patanamaraṇavyatikramaparivṛttavitarkita tatha nyastam /
bhinnavalitena kuryāt kartaryāsyāṅgulimukhena

saṃyutakaraṇo va syādasaṃyuto vā prayujyate tajjñaiḥ /
rurucamaramahiṣasuragajavṛṣagopuraśailaśikhareṣu

yasyāṅgulyastu vinatāḥ sahāṅguṣṭhena cāpavat /
so 'rdhacandro hi vijñeyaḥ karaḥ karmāsya vakṣyate

etena bālataravaḥ śaśilekhāmbukalaśavalayāni /
nirghāṭanamāyastaṃ madhyaupamyaṃ ca pīnaṃ ca

raśanājaghanakaṭīnāmānanatalapatrakuṇḍalādīnām /
kartavyo nārīṇāmabhinayayogo 'rdhacandreṇa

ādyā dhanurnatā kāryā kuñcitāṅguṣṭhakastathā /
śeṣā bhinnordhvavalitā hyarāle 'ṅgulayaḥ kare

etena sattvaśauṇḍīryavīryadhṛtikāntidivyagāmbhīyram /
āśīrvādāśca tathā bhāvā hitasaṃjñakāḥ kāryāḥ

etena punaḥ strīṇāṃ keśānāṃ saṃgrahotkarṣau /
sarvāṅgikaṃ tathaiva ca nirvarṇanamātmanaḥ kāryam

kautukavivāhayogaṃ pradakṣiṇenaiva saṃprayogaṃ ca /
aṅgulyagrasvastikayogān parimaṇḍalenaiva

prādkṣiṇya parimaṇḍalaṃ ca kuryān mahājanaṃ caiva /
yacca mahītalaracitaṃ dravyaṃ taccābhineyaṃ syāt

āhvāne ca nivāraṇanirmāṇe cāpyanekavacane ca /
svedasyā cāpanayane gandhāghrāṇe śubhaḥ śubhe caiṣa

tripatākahastajāni tu pūrvaṃ yānyabhihitāni karmāṇi /
tāni tvarālayogāt strībhiḥ samyak prayojyāni

arālasya yadā vakrā'nāmikātvaṅgulirbhavet /
śukatuṇḍastu sa karaḥ karma cāsya nibodhata

etena tvabhineyaṃ nāhaṃ na tvaṃ na kṛtyamiti cārye /
āvāhane visarge dhigiti vacane ca sāvajñam

aṅgulyo yasya hastasya talamadhyegrasaṃsthitāḥ /
tāsāmupari cāṅguṣṭhaḥ saḥ muṣṭiriti saṃjñitaḥ

eṣa prahāre vyāyāme nirgame pīḍane tathā /
saṃvāhane 'siyaṣṭīnāṃ kuntadaṇḍagrahe tathā

asyaiva tu yadā muṣṭerūrdhvoṅguṣṭhaḥ prayujyate /
hastaḥ sa śikharo nāma tadā jñeyaḥ prayoktṛbhiḥ

raśmikuśāṅkuśadhanuṣāṃ tomaraśaktipramokṣaṇe caiva /
adharoṣṭhapādarañjanamalakasyotkṣepaṇaṃ caiva

asyaiva śikharākhyasya hyaṅguṣṭhakanipīḍitā /
yadā pradeśinī vakrā sa kapitthastadā smṛtaḥ

asicāpacakratomarakuntagadāśaktivajrabāṇāni /
śastrāṇyabhineyāni tu kāryaṃ satyaṃ ca pathyaṃ ca

utkṣiptavakrā tu yadānāmikā sakanīyasī /
asyaiva tu kapitthasya tadāso khaṭakāmukhaḥ

hotraṃ havyaṃ chatraṃ pragrahaparikarṣaṇaṃ vyajanakañca /
ādarśadhāraṇaṃ khaṇḍanaṃ tathā peṣaṇaṃ caiva

āyatadaṇḍagrahaṇaṃ muktāprālambasaṃgrahaṃ caiva /
sragdāmapuṣpamālā vastrāntālambanaṃ caiva

manmathaśarāvakarṣṇapuṣpavacayapratodakāryāṇi /
aṅkuśarajvākarṣaṇastrīdarśanameva kāryaṃ ca

khaṭakākhye yadā haste tarjanī samprasāritā /
hastaḥ sūcīmukho nāma tadā jñeyaḥ prayoktṛbhiḥ

asya vividhān yogān vakṣyāmi samāsataḥ pradeśinyāḥ /
ūrdhvanatalolakampitavijṛṃbhitodvāhitacalāyāḥ

cakraṃ taḍitpatākāmañjaryaḥ karṇacūlikāścaiva /
kuṭilagatayaśca sarve nirdeśyāḥ sādhuvādāśca

bāloragabalyavadhūpadīpavallīlatāśikhaṇḍāśca /
paripatanavakramaṇḍalamabhineyānyūrdhvalolitayā

vadanāmyāse kuñcitavijṛmbhitā vākyarūpaṇe kāryā /
bhūyaścordhvaviracitā tārāghoṇaikadaṇḍayaṣṭiṣu ca /
vinatāḥ ca punaḥ kāryā daṃṣṭriṣu ca tathāsyayogena

punarapi maṇḍalagatayā sarvagrahaṇaṃ tathaiva lokasya /
praṇatontee ca kārye hyādye dīrghe ca divase ca

[śravaṇābhyāse vakrā vijṛmbhaṇā vākyarūpaṇāvasare] /
meti vadeti ca yojyā prasāritotkampitottānā

kāryā prakampita rovadarśana svedarūpaṇe caiva /
kuntalakuṇḍalāṅgadagaṇḍāśraye 'bhinaya

garve 'hamiti lalāṭe ripudarśane tathaiva ca krodhe /
ko 'sāviti nirdeśe 'tha karṇakaṇḍunayane caiva

saṃyuktā saṃyoge kāryā viśleṣitā viyoge ca /
kalahe svastikayupatāṃ parasparotpīḍitā bandhe

dvābhyāṃ tu vātmapārśve dakṣiṇato ninaniśāvasānāni /
abhimukhaparāṅmukhābhyāṃ viśliṣṭābhyāṃ prayuñjīta

punarapi ca bhramitāgrarūpā śilāvartayantraśaileṣu /
pariveṣaṇe tathaiva hi kāryā cādhomukhī nityam

śliṣṭā lalāṭapaṭṭeṣvadhomukhī śambhurūpaṇe karyā /
śakasyāpyuttānā tajjñaistiryaksthitā kāryā

dvābhyāṃ sandarśayennityaṃ sampūrṇa candramaṇḍalam /
śliṣṭā lalāṭe śakrasya kāryā hyuttānasaṃśrayā

parimaṇḍalaṃ bhramitatayā maṇḍalamādarśayecca candrasya /
haranayane ca lalāṭe śakrasya'pyuguttānā

yasyāṅgulyastu vitatāḥ sahāṅguṣṭhena kuñcitāḥ /
ūrdhvā hyasaṃgatāgrāśca sa bhavet padmakośakaḥ

bilvakapitthaphalānāṃ grahaṇe kucadarśanaśca nārīṇām /
grahaṇe hyāmiṣalābhe bhavanti tāḥ kuñcitāgrāstu

bahujātibījapūrakamāmiṣakhaṇḍaṃ ca nirdeśyam /
devārcanabaliharaṇe samudgake sāgrapiṇḍadāne ca /
kāryaḥ puṣpaprakaraśca padmakośena hastena

maṇibandhanaviśliṣṭābhyāṃ praviralacalitāṅgulikarābhyām /
kāryo vivartitābhyāṃ vikasitakamalotpalāvinayaḥ

aṅgulyaḥ saṃhatāḥ sarvāḥ sahāṅguṣṭhena yasya ca /
tathā nimnatalaścaiva sa tu sarpaśirāḥ karaḥ

eṣaḥ salilapradāne bhujagatau toyasecane caiva /
āsphoṭane ca yojyaḥ karikumbhāsphālanādyeṣu

adhomukhīnāṃ sarvāsāmaṅgulīnāṃ samāgamaḥ /
kaniṣṭhāṅguṣṭhakāvūrdhvo sa bhavet mṛgaśīrṣakaḥ

iha sāmpratamastyadya śakteścollāsane 'kṣapāte ca /
svedāpamārjaneṣu ca kuṭṭamite pracalitastu bhavet

tretāgnisaṃsthitā madhyā tarjanyāṅguṣṭhakā yadā /
kāṅgulo 'nāmikā vakrā yadāścordhvā kanīyasī

etena taruṇaphalāni nānāvidhāni ca laghūni /
kāryāni roṣajāni strīvacānyaṅgulikṣepaiḥ

marakatavaidūryādeḥ pradarśanaṃ sumanasāṃ ca kartavyam /
grāhyaṃ marālapadamiti tajjñaireva prayogeṣu

āvartitāḥ karatale yasyāṅgulyo bhavanti hi /
pārśvāgatavikīrṇāśca sa bhavedalapallavaḥ

pratiṣedhakṛte yojyaḥ kasya tvannāsti śūnyavacaneṣu /
punarātmopanyāsaḥ strīṇāmetena kartavyaḥ

tisraḥ prasāritā yatra tathā cordhvā kanīyasī /
tāsāṃ madhye sthitoṅguṣṭhaḥ sa karaścaturasmṛtaḥ

nayavinayaniyamasunituṇabālāturasatyakaitavārtheṣu /
vākye yukte pathye satye praśame ca viniyojyaḥ

ekena dvābhyāṃ vā kiñcinmaṇḍalakṛtena hastena /
vikṛtavicāritacaritaṃ vitarkitaṃ lajjitaṃ caiva

nayanaupamyaṃ padmadalarūpaṇaṃ hariṇakarṇanirdeśaḥ /
saṃyutakaraṇenaiva tu careṇaitāni kurvīta

līlā ratī ruci ca smṛtibuddhivibhāvanāḥ kṣamāṃ puṣṭiṃ ca /
sañjñāmātraṃ praṇayaṃ vicāraṇaṃ saṅgataṃ śaucam

cāturyaṃ mādhuryaṃ dākṣiṇyaṃ mārdavaṃ sukhaṃ śīlam /
praśnaṃ vārtāyuktiṃ veṣaṃ mṛduśādvalaṃ stokam

vibhavāvibhau surataṃ guṇāguṇau yauvanaṃ gṛhān dārān /
nānāvarṇāśca tathā catureṇaivaṃ prayuñjīta

sitamūrdhvena tu kuryāt raktaṃ pītaṃ ca maṇḍalakṛtena /
parimuditena tu nīlaṃ varṇāścatureṇa hastena

madhyamāṅguṣṭhasandaṃśo vakrā caiva pradeśinī /
ūrdhvamanye prakīrṇe ca dvyaṅgulyau bhramare kare

padmotpalakumudānāmanyeṣāṃ caiva dīrghavṛntānām /
puṣpāṇāṃ grahaṇavidhiḥ kartavyaḥ karṇapuraśca

vicyutaśca saśabdaśca kāryo nirbhatsanādiṣu /
bālālāpe ca śīghre ca tāle viśvāsane tathā

tarjanīmadhyamāṅguṣṭhāstretāgnisthā nirantarāḥ /
bhaveyurhaṃsavaktrasya śeṣe dve samprasārite

ślakṣṇālpaśithilalāghavanissārārthe mṛdutvayogeṣu /
kāryo 'bhinayaviśeṣaḥ kiñcitprasyanditāgreṇa

samāḥ prasāritāstisrastathā cordhvā kanīyasī /
aṅguṣṭhaḥ kuñcitaścaiva haṃsapakṣa iti smṛtaḥ

eṣa ca nivāpasalile dātavye gaṇḍasaṃśraye caiva /
kāryaḥ pratigrahācamanabhojanārtheṣu viprāṇām

āliṅgane mahāstambhadarśane romaharṣaṇe caiva /
sparśe 'nulepanārthe yojyaḥ saṃvāhane caiva

punareva ca nārīṇāṃ stanāntarasthena vibhramaviśeṣāḥ /
kāryā yathārasaṃ syurduḥkhe hanudhāraṇe caiva

tarjanyaṅguṣṭhasandaṃśastva hyarālasya yathā bhavet /
ābhugnatalamadhyasthaḥ sa sandaṃśa iti smṛtaḥ

sandaṃśastrividho jñeya hyagrajo mukhajastathā /
tathā pārśvagataścaiva rasabhāvopabṛṃhitaḥ

puṣpāpacayagrathane grahaṇe tṛṇaparṇakeśasūtrāṇām /
śalyāvayavagrahaṇāpakarṣaṇe cāgrasandaṃśaḥ

vṛntāt puṣpoddharaṇaṃ vartiśalākādipūraṇaṃ caiava /
dhigiti ca vacanaṃ roṣe mukhasandaṃśasya karmāṇi

yajñopavītadhāraṇavedhanaguṇasūkṣmabāṇalakṣyeṣu /
yoge dhyāne stoke saṃyuktakaraṇastu kartavyaḥ

peśalakutsāsūyādoṣavacane ca vāmahastena /
kiñcid vivartitakarāgraḥ prayujyate pārśvasandaṃśaḥ

ālekhyanetrarañjanavitarkavantapravālaracane ca /
niṣpīḍanaṃ tathālaktakasya kārya ca nārībhiḥ

samāgatāgrāḥ sahitā yasyāṅgulyo bhavanti hi /
ūrdhvā haṃsamukhasyeva sa bhavenmukulaḥ karaḥ

devārccanabalikaraṇe padmotpalakumudarūpaṇe caiva /
viṭacumbane ca kāryo vikutsite viprakīrṇaśca

bhojanahiraṇyagaṇanāmukhasaṃkocapradānaśīghreṣu /
mukulitakusumeṣu ca tathā tajjñaireṣa prayoktavyaḥ

padmakośasya hastasya hyaṅgulyaḥ kuñcitā yadā /
ūrṇanābhaḥ sa vijñeyaḥ keśacauryagrahādiṣu

śiraḥ kaṇḍūyane caiva kuṣṭhavyādhinirūpaṇe /
saṃhavyāghreṣvabhinayaḥ prastaragrahaṇe tathā

madhyamāṅguṣṭhasandaṃśo vakrā caiva pradeśinī /
śeṣe talasthe kartavye tāmracūlakare 'ṅgulī

vicyutaśca saśabdaśca kāryo nirbhatsanādiṣu /
tāle viśvasane caiva śīghrārthe saṃjñiteṣu ca

tathā kalāsu kāṣṭhāsu nimeṣe tu kṣaṇe tathā /
eśa eva karaḥ kāryo bālālāpanimantraṇe

athavā aṅgulyaḥ saṃhitā vakrā uparyuṅguṣṭhapīḍitāḥ /
prasāritā kanīṣṭhāca tāmracūḍaḥ karaḥ smṛtaḥ

śataṃ sahasraṃ lakṣaṃ ca kareṇaikena yojayet /
kṣipramuktāṅgulībhistu sphuliṅgān vipruṣastathā

asaṃyutāḥ karā hyete mayā proktā dvijottamāḥ /
ataśca saṃyutān hastān gadato me nibodhata

patākābhyāṃ tu hastābhyāṃ saṃśleṣādañjaliḥ smṛtaḥ /
devatānāṃ gurūṇāṃ ca mitrāṇāṃ cābhivādane

sthānānyasya punastrīṇi vakṣo vaktraṃ śirastathā /
devatānāṃ śiraḥsthastu gurūṇāmāsyasaṃsthitaḥ /
vakṣasthaścaiva mitrāṇāṃ strīṇāṃ tvaniyato bhavet

ubhābhyāmapi hastābhyāmanyo 'nyaṃ pārśvasaṃgrahāt /
hastaḥ kapotako nāma karma cāsya nibodhata

eṣa vinayābhyupagame praṇāmakaraṇe gurośca sambhāṣe /
śīte bhaye ca kāryo vakṣaḥsthaḥ kampitaḥ strībhiḥ

ayamevāṅguliparighṛṣyamāṇamuktastu khinnavākyeṣu /
etāvaditi ca kāryo nedānīṃ kṛtyamiti cārthe

aṅgulyo yasya hastasya hyanyonyāntaranissṛtāḥ /
sa karkaṭa iti jñeyaḥ karaḥ karma ca vakṣyate

eṣa madanāṅgamarde suptotthitavijṛmbhaṇe bṛhaddehe /
hanudhāraṇe ca yojyaḥ śaṅkhagrahaṇe 'rthatattvajñaiḥ

maṇibandhavinyastāvarālau strīprayojitau /
uttānau vāmapārśvasthau svastikaḥ parikīrtitaḥ

svastikavicyuitikaraṇād diśo ghanāḥ khaṃ vanaṃ samudrāśca /
ṛtavo mahī tathaughaṃ vistīrṇaṃ cābhineyaṃ syāt

khaṭakaḥ khaṭake nyastaḥ khaṭakāvardhamānakaḥ /
śṛṅgārārtheṣu yoktavyaḥ praṇāmakaraṇe tathā

anye
kumudītālavṛnteṣu kartavyaśchatradharaṇe

iti
arālau tu viparyastāvuttānau vardhamānakau /
utsaṅga iti vijñeyaḥ sparśasya grahaṇe karaḥ

saniṣpeṣakṛte caiva romāmarṣakṛte 'pi ca /
niṣpīḍitaḥ punaścaiva strīṇāmīrṣyākṛte bhavet

mukulaṃ tu yadā hastaṃ kapitthaḥ pariceṣṭayet /
sa mantavyastadā hasto niṣadhau nāma nāmataḥ

saṃgrahaparigrahau dhāraṇaṃ ca samayaśca satyavacanaṃ ca /
saṅkṣepaḥ saṃkṣiptaṃ nipīḍitenābhinetavyam

śikharastu yadā hasto mṛgaśīrṣeṇa pīḍitaḥ /
niṣadho nāma vijñeyaḥ sa bhayārte vidhīyate

gṛhītvā vāmahastena karpurābhyantare bhujam /
dakṣiṇaṃ cāpi vāmasya karpurābhyantare nyaset

sa cāpi dakṣiṇo hastaḥ samyaṅ muṣṭīkṛto bhavet /
ityeṣa niṣadho hastaḥ karma cāsya nibodhata

etena dhairyamadagarvasauṣṭhavautsukyavikramāṭopāḥ /
abhimānāvaṣṭambhaḥ stambhasthairyādaya kāryāḥ

jñeyo vai niṣadho nāma haṃsapakṣau parāṅgamukhau /
jālavātāyanādīnāṃ prayoktavyo 'bhighaṭṭane

aṃsau praśithilau muktau patākau tu pralambitau /
yadā bhavetāṃ karaṇe sa dola iti saṃjñitaḥ

saṃbhramaviṣādamūrcchitamadābhighāte tathaiva cā'vege /
vyādhiplute ca śastrakṣate ca kāryo 'bhinayogaḥ

yastu sarpaśirāḥ proktastasyāṅgulinirantaraḥ /
dvitīyaḥ pārśvasaṃśliṣṭaḥ sa tu puṣpapuṭaḥ smṛtaḥ

dhānyaphalapuṣpasadṛśānyanena nānāvidhāni yuktāni /
grāhyāṇyupaneyāni ca toyānayanāpanayane ca

patākau tu yadā hastāvūrrdhāṅguṣṭhāvadhomukhau /
uparyupari vinyastau tadā sa makaraḥ karaḥ

siṃhavyāladvipipradarśanaṃ nakramakaramatsyānām /
ye cānye kravyādā hyabhineyāste 'rthayogena

kūrparāṃsocitau hastau yadāstāṃ sarpaśīrṣakau /
gajadantaḥ sa vijñeyaḥ karma cāsya nibodhata

eva ca vadhuvarāṇamudvāhe cātibhārayoge ca /
staṃbhagrahaṇe ca tathā śailaśilotpāṭane caiva

śukatuṇḍau karau kṛtvā vakṣasyabhimukhāñcitau /
śanairadhomukhāviddhau so 'vahittha iti smṛtaḥ

daurbalye niḥśvasite gātrāṇāṃ darśane tanutve ca /
utkaṇṭhite ca tajjñairabhinayayogastu kartavyaḥ

mukulastu yadā hastaḥ kapitthapariveṣṭitaḥ /
vardhamānaḥ sa vijñeyaḥ karma cāsya nibodhata

saṃgrahaparigrahau dhāraṇaṃ ca samayaśca satyavacaṃ ca /
saṃkṣepatastu saṃkṣiptaṃ nipīḍitenābhinetavyam

jñeyo vai vardhamānastu haṃsapakṣo parāṅgamukhau /
jālavātāyanādīnāṃ prayoktavyo vighāṭane

uktā hyete dvividhā hyasaṃyutāḥ saṃyutāśca saṃkṣepāt /
abhinayakarāstu ye tviha te 'nyatrāpyarthataḥ sādhyāḥ

ākṛtyā ceṣṭayā cihnairjātyā vijñāya tatpunaḥ /
svayaṃ vitarkya kartavyaṃ hastābhinayanaṃ budhaiḥ

nāsti kaścidahastastu nāṭye 'rtho 'bhinayaṃ prati /
yasya yad dṛśyate rūpaṃ bahuśastanmayoṣitam

anye cāpyarthasaṃyuktā laukikā ye karāstviha /
chandataste niyoktavyā rasabhāvaviceṣṭitaiḥ

deśaṃ kālaṃ prayogaṃ cāpyarthayuktimavekṣya ca /
hastā hyete prayoktavyāḥ nṛṇāṃ strīṇāṃ viśeṣataḥ

sarveṣāmeva hastānāṃ yāni karmāṇi santi hi /
tānyahaṃ saṃpravakṣyāmi rasabhāvakṛtāni tu

utkarṣaṇaṃ vikarṣaṇaṃ tathā caivāpakarṣaṇam /
parigraho nigrahaścāhvānaṃ nodanameva ca

saṃśleṣaśca viyogaśca rakṣaṇaṃ mokṣaṇaṃ tathā /
vikṣepadhūnane caiva visargastarjanaṃ tathā

chedanaṃ bhedanaṃ caiva sphoṭanaṃ moṭanaṃ tathā /
tāḍanaṃ ceti vijñeyaṃ tajjñaiḥ karma karān prati

uttānaḥ pārśvagaścaiva tathā'dhomukha eva ca /
hastapracārastrividho nāṭyatattvasamāśrayaḥ

sarve hastapracārāśca prayogeṣu yathāvidhiḥ
netrabhrūmukharāgaiśca kartavyā vyañjiatā budhaiḥ

karaṇaṃ karma sthānaṃ pracāyuktiṃ kriyāṃ ca saṃprekṣya /
hastābhinayatajjñaiḥ kāryo lokopacāreṇa

uttāmānāṃ karāḥ kāryā lalāṭakṣetracāriṇaḥ /
vakṣaḥsthāścaiva madhyānāmadhamāmadhogatā

jyeṣṭhe svalpapracārāḥ syurmadhye madhyavicāriṇaḥ /
adhameṣu prakīrṇāśca hastāḥ kāryā prayoktṛbhiḥ

lakṣaṇavyañjitā hastāḥ kāryāstūttamamadhyamaiḥ /
lokakriyāsvabhāvena nīcairapyarthasaṃśrayāḥ

athavānyādṛśaṃ prāpya prayogaṃ kālameva ca /
viparītāśrayā hastāḥ prayoktavyā budhairna vā

viṣaṇṇe mūrcchite bhīte jugupsāśokapīḍite /
glāne svapne vihaste ca niśceṣṭe tandrite jaḍe

vyādhigraste jarārte ca bhayārte śītaviplute /
matte pramatte conmatte cintāyāṃ tapasi sthite

himavarṣahate baddhe variṇāplavasaṃśrite /
svapnāyite ca saṃbhrānte natasaṃsphoṭane tathā

na hastābhinayaḥ kāryaḥ kāryaḥ sattvasya saṃgrahaḥ /
tathā kākuviśeṣaśca nānābhavarasānvitaḥ

yatra vyagrāvubhau hastau tattad dṛṣṭivilokanaiḥ /
vācakābhinayaṃ kuryādvirāmairthadarśakaiḥ

uttānaḥ pārśvagaścaiva tathā'dhomukha eva ca /
pracārastrividho 'ṅgānāṃ nāṭyanṛttasamāśrayaḥ

uttāno vartulastryaśraḥ sthito 'dhomukha eva ca /
pañca prakārā hastasya nāṭyanṛttasamāśrayāḥ

evaṃ jñeyāḥ karā hyete nābhinayasaṃśritāḥ /
ata ūrdhvaṃ pravakṣyāmi hastān nṛttasamāśrayān

vakṣaso 'ṣṭāṅgulasthau tu prāṅmukhau khaṭakāmukhau /
samānakūrparāṃsau tu caturasrau prakīrtitau

haṃsapakṣakṛtau hastau vyāvṛtau tālavṛntavat /
udvṛttāviti vijñeyāvathavā tālavṛntakau

caturastrasthitau hastau haṃsapakṣakṛtau tathā /
tiryaksthitau cābhimukhau jñeyau tālamukhāviti

tāveva maṇibandhānte svastikākṛtisaṃsthitau /
svastikāviti vikhyātau vicyutau viprakīrṇakau

alapallavasaṃsthānāvurdhvāsyau padmakośakau /
arālakhaṭakākhyau cāpyarālakhaṭakāmukhau

tathai maṇibandhānte hyarālau vicyutāvubhau /
jñeyau prayoktṛbhirnityamarāla khaṭakāviti

bhujāṃsakūrparāgraistu kuṭilāvartitau karau /
parāṅgamukhatalāviddhau jñeyāvāviddhavakrakau

hastau tu sarpaśirasau madhyamāṅguṣṭhakau yadā /
tiryakprasāritāsyau ca tadā sūcīmukhau smṛtau

sarpaśīrṣau yadā hastau bhavetāṃ svastikasthitau /
madhyaprasāritāṅguṣṭhau jñeyau sūcīmukhau tadā

recitau cāpi vijñeyau haṃsapakṣau drutabhramau /
prasāritottānatalau recitāviti saṃjñitau

caturasro bhavedvāmaḥ savyahastaśca recitaḥ /
vijñeyau nṛttatattvajñairdharecitasaṃjñakau

añcitau kūrparāṃsau tu tripatākau karau kṛtau /
kiñcittiryaggatāvetau smṛtāvuttanavañcitau

maṇibandhamuktau tu patākau pallavau smṛtau /
bāhuśīrṣādviniṣkrāntau nitambāviti kīrtitau

keśadeśādviniṣkrāntau paripārśvotthitau yadā /
vijñeyo keśabandhau tu karavācāryasammatau

tiryakprasāritau caiva pārśvasaṃsthau tathaiva ca /
latākhyau ca karau jñeyau nṛttābhinayanaṃ prati

samunnato latāhastaḥ pārśvātpārśva vilolitaḥ /
tripatāko 'paraḥ karṇe karihastaḥ prakīrtitaḥ

kaṭiśīrṣaniviṣṭāgrau tripatākau yadā karau /
pakṣavañcitakau hastau tadā jñeyau prayoktṛbhiḥ

tāveva tu parāvṛttau pakṣapradyotakau smṛtau /
adhomukhatalāviddhau jñeyau garuḍapakṣakau

haṃsapakṣakṛtau hastau vyāvṛttaparivartitau /
tathā prasāritabhujau daṇḍapakṣāviti smṛtau

ūrdhvamaṇḍalinau hastāvūrdhvadeśavivartanāt /
tāveva pārśvavinyastau pārśvamaṇḍalinau smṛtau

udveṣṭitau bhavedekau dvitīyaścāpaveṣṭitaḥ /
bhramitāvurasaḥ sthāne hyuromaṇḍalinau smṛtau

alapallavakārālāvurodvabhramaṇakramāt /
pārśvāvartaśca vijñeyāvuraḥ pārśvārdhamaṇḍalau

hastau tu maṇībandhānte kuñcitāvañcitau yadā /
khaṭakākhyau tu tau syātāṃ muṣṭikasvastikau tadā

padmakośau yadā hastau vyāvṛttaparivartitau /
nalinīpadmakośau tu tadā jñeyau prayoktṛbhiḥ

karāvudveṣṭitāgrau tu pravidhāyālapallavau /
ūrdhvaprasaritāviddhau kartavyāvulbaṇāviti

pallavau ca śirodeśe saṃprāptau lalitau smṛtau /
karpūrasvastikagatau latākhyau valitāviti

karaṇe tu prayoktavyo nṛttahasto viśeṣataḥ /
tathārthābhinaye caiva patākāyāḥ prayoktṛbhiḥ

saṃkaro 'pi bhavetteṣāṃ prayogo 'rthavaśātpunaḥ /
prādhānyena punaḥ saṃjñā nāṭye nṛtte kareṣviha

viyutāḥ saṃyutāścaiva nṛttahastāḥ prakīrtitāḥ /
ataḥ paraṃ pravakṣyāmi karān karaṇasaṃśrayān

sarveṣāmeva hastānāṃ nāṭyahastanideśibhiḥ /
vidhātavyā prayatnena karaṇaṃ tu caturvidham

apaveṣṭitamekaṃ syāt udveṣṭitamathāparam /
vyāvartitaṃ tṛtīyaṃ tu caturthaṃ parivartitam

āveṣṭyante yadaṅgulyastarjanādyā yathākramam /
abhyantareṇa karaṇaṃ tadāveṣṭitamucyate

udveṣṭyante yadaṅgulyaḥ tarjanyādyā bahirmukham /
kramaśaḥ karaṇaṃ viprāstadudveṣṭitamucyate

āvartyante kaniṣṭhādyā hyaṅgulyo 'bhyantareṇa tu /
yathā krameṇa karaṇaṃ tad vyāvartitamucyate

udvartyante kaniṣṭhādyā bāhyataḥ kramaśo yadā /
aṅgulyaḥ karaṇaṃ viprāstaduktaṃ parivartitam

nṛtte 'bhinayayoge vā pāṇibhirvartanāśraye /
mukhabhrunetrayuktāni karaṇāni prayojayet

tiryaktathordhvasaṃstho hyadhomukhaścāñcito 'paviddhastu /
maṇḍalagatistathā svastikaśca pṛṣṭhānusāri ca

udveṣṭitaḥ prasārita ityete vai smṛtāḥ prakārāstu /
bāhvoriti karaṇagatā vijñeyā nityaṃ nṛttaprayoktṛbhiḥ

hastānāṃ karaṇavidhirmayā samāsena nigadito viprāḥ /
ata ūrdhvaṃ vyākhyāsye hṛdayodarapārśvakarmāṇi

ābhugnamatha nirbhugnaṃ tathā caiva prakampitam /
udvāhitaṃ samaṃ caiva uraḥ pañcavidhaṃ smṛtam

nimnamunnatapṛṣṭhaṃ ca vyābhugnāṃsaṃ ślathaṃ kvacit
ābhugnaṃ taduro jñeyaṃ karma cāsya nibodhata

saṃbhramaviṣādamūrcchāśokabhayavyādhihṛdayaśalyeṣu /
kāryaṃ śītasparśe varṣe lājānvite 'rthavaśāt

stabdhaṃ ca nimnapṛṣṭhaṃ ca nirbhugnāṃsaṃ samunnatam /
uro nirbhugnametaddhi karma cāsya nibodhata

stambhe mānagrahaṇe vismayadṛṣṭe ca satyavacane ca /
ahamiti ca darpavacane garvotseke tu kartavyam

[dīrghaniśvasite caiva jṛmbhaṇe moṭane tathā /
bibboke ca punaḥ strīṇāṃ tadvijñeyaṃ prayoktṛbhiḥ ]

ūrdhvotkṣepairuro yatra nirantarakṛtaiḥ kṛtam /
prakampitaṃ tu vijñeyamuro nāṭyaprayoktṛbhiḥ

hasitaruditādisaṃbhramabhayaśramavyādhipīḍitārtheṣu /
nānābhāvopagataṃ kāryamuro nāṭyayogeṣu

hasitaruditeṣu kārye śrame bhaye śvasakāśayoścaiva /
hikkāduḥkhe ca tathā nāṭyajñairarthayogena

udvāhitamūrdhvagatamuro jñeyaṃ prayoktṛbhiḥ /
dīrghocchvasanatā loke jṛmbhanādiṣu cekṣyate

sarvaiḥ sasauṣṭhavairañgaiścaturasrakṛtaiḥ kṛtam /
uraḥ saman. tu vijñeyaṃ svasthaṃ sauṣṭhavasaṃyutam

etaduktaṃ maya samyagarasastu vikalpanam /
ata ūrdhvaṃ pravakṣyāmi pārśvayoriha lakṣaṇam

nataṃ samunnataṃ caiva prasāritavivartito /
tathāpasṛtamevaṃ tu pārśvayoḥ karma pañcadhā

kaṭirbhavettu vyābhugnā pārśvamābhugnameva ca /
tathaivāpasṛtāṃsaṃ ca kiñcitpārśvanataṃ smṛtam

tasyaiva cāparaṃ pārśvaṃ viparītaṃ tu yuktitaḥ /
kaṭīpārśvabhujāṃsaiścābhyunnatairutaṃ bhavet

āyāmanādubhayataḥ pāśvayoḥ syāt prasāritam /
parivartātrikasyāpi vivartitamiheṣyate

vivartitāpanayanād bhavedapasṛtaṃ punaḥ /
pārśvalakṣaṇamityuktaṃ viniyogaṃ nibodhata

upasarpe nataṃ kāryamunnataṃ cāpasarpaṇe /
prasāritaṃ praharṣādau parivṛtte vivartitam

vinivṛtte tvapasṛtaṃ pārśvamarthavaśādbhavet /
etāni pārśvakarmāṇi jaṭharasya nibodhata

kṣāmaṃ khalvaṃ ca pūrṇaṃ ca samproktamudaraṃ tridhā /
tanu kṣāmaṃ nataṃ khalvaṃ pūrṇamādhmātamucyate

kṣāmaṃ hāsye 'tha rudite niḥśvāse jṛmbhane bhavet /
vyādhite tapasi śrānte kṣudhārte khalvamiṣyate

pūrṇamucchvasite sthūle vyādhitātyaśanādiṣu /
ityetadudaraṃ proktaṃ kaṭyāḥ karma nibodhata

anye tu
kṣāmaṃ khalvaṃ samaṃ pūrṇamudaraṃ syāccaturvidham /
chinā caiva nivṛttā ca recitā kampitā tathā /
udvāhitā caiva kaṭī nāṭye nṛtte ca pañcadhā

kaṭī madhyasya valanātcchinā saṃparikīrtitā /
parāṅgmukhasyābhimukhī nivṛttā syānnivartitā

sarvato bhramaṇāccāpi vijñeyā recitā kaṭī /
tiryaggatāgatā kṣiptā kaṭī jñeyā prakampitā

nitambapārśvodvahanāt śaneirudvāhitā kaṭī /
kaṭīkarma mayā proktaṃ viniyogaṃ nibodhata

chinnā vyāyāmasambhrāntavyāvṛttaprekṣaṇādiṣu /
nivṛttā vartane caiva recitā bhramaṇādiṣu

kubjavāmananīcānāṃ gatau kāryā prakampitā /
sthūleṣūdvāhiotā yojyā strīṇāṃ līlāgateṣu ca

kampanaṃ valanaṃ caiva stambhanodvartane tathā /
nivartanaṃ ca pañcaitānyūrukarmāṇi kārayet

namanonnamanātpārṣṇermuhuḥ syādūrukampanam /
gacchedabhyantaraṃ jānu yatra tadvalanaṃ smṛtam

stambhanaṃ cāpi vijñeyamapaviddhakriyātmakam /
valitāviddhakaraṇādūrvorudvartanaṃ smṛtam

pārṣṇirabhyantaraṃ gacchedyatra tattu nivartanam /
gatiṣvadhamapātraṇāṃ bhaye cāpi hi kampanam

valanaṃ caiva hi kartavyaṃ strīṇāṃ svairaparikrame /
sādhvase ca viṣāde ca stambhanaṃ tu prayojayet

vyāyāme tāṇḍave caiva kāryamudvartanaṃ budhaiḥ /
nivartanaṃ tu kartavyaṃ sambhrādiparibhrame

yathādarśanamanyacca lokād grāhyaṃ prayoktṛbhiḥ /
ityūrvrorlakṣaṇaṃ proktaṃ jaṅghāyāstu nibodhata

āvartitaṃ nataṃ kṣiptamudvāhitamathāpi ca /
parivṛttaṃ tathā caiva jaṅghākarmāṇi pañcadhā

vāmo dakṣiṇapārśvena dakṣiṇaścāpi vāmataḥ /
pādo yatra vrajedviprāḥ tadāvartitamucyate

jaṅghāsvastikayogena kramādāvartitaṃ nayet /
jānunaḥ kuñcanāccaiva nataṃ jñeyaṃ prayoktṛbhiḥ /
vikṣepāccaiva jaṅghāyāḥ kṣiptamityabhidhīyate

[nataṃ syājjānunamanāt kṣiptaṃ vikṣepaṇād bahi] /
udvāhitaṃ ca vijñeyamūrdhvamūdvāhanādapi /
pratīpanayanaṃ yattu parivṛttaṃ taducyate

āvartitaṃ prayoktavyaṃ vidūṣakaparikrame /
nataṃ cāpi hi kartavyaṃ sthānāsanagatādiṣu

kṣiptaṃ vyāyāmayogeṣu tāṇḍave ca prayujyate /
tathā codvāhitaṃ kuryādāviddhagamanādiṣu

tāṇḍaveṣu prayoktavyaṃ parivṛttaṃ prayoktṛbhiḥ /
ityetajjaṅghayoḥ karma pādayostu nibodhata

udghaṭṭitaḥ samaścaiva tathāgratalasañcaraḥ /
añcitaḥ kuñcitaścaiva pādaḥ pañcavidha smṛtaḥ

sthitvā pādatalāgreṇa pārṣṇirbhūmau nipātyate /
yasya pādasya karaṇe bhavedudghaṭṭitastu saḥ

ayamudveṣṭitakaraṇe tvanukaraṇārthaṃ prayogamāsādya /
drutamadhyamapracāraḥ sakṛdasakṛdā prayoktavyaḥ

svabhāvaracite bhūmau samasthāne ca yo bhavet /
samaḥ pādaḥ sa vijñeyaḥ svabhāvābhinayāśrayaḥ

sthirasvabhāvābhinaye nānākaraṇasaṃśraye /
calitaśca punaḥ kāryo vidhijñaiḥ pādarecite

samasyaiva yadā pārṣṇiḥ pādasyābhyantare bhavet /
bahiḥ pārśvasthito 'ṅguṣṭhastryaśrapādastu sa smṛtaḥ

tyaktvā (kṛtvā?) samapadaṃ sthānamaśvakrānte tathaiva ca /
syādviklavādiṣvartheṣu tryaśraḥ pādo yathāvidhiḥ

asyaiva samapādasya pārṣṇirabhyantare bhavet /
tryaśrapādaḥ sa vijñeyaḥ sthānakādiṣu saṃśrayaḥ

utkṣiptā tu bhavetpārṣṇiḥ prasṛtoṅguṣṭhakastathā /
aṅgulyaścāñcitāḥ sarvā pāde 'gratalasañcaraḥ

todananikuṭṭane sthitaniśumbhane bhūmitāḍane bhramaṇe /
vikṣepavividharecakapārṣṇikṛtāgamanametena

pārṣṇiryasyāñcitā bhūmau pādamagratalaṃ tathā /
aṅgulyaścāñcitāḥ sarvāḥ sa pādastvañcitaḥ smṛtaḥ

pādāgratalasañcāre vartitodvartite tathā /
eva pādāhate kāryo nānābhramarakeṣu ca

utkṣiptā yasya pārṣṇī syādaṅgulyaḥ kuṅcitāstathā /
tathā kuñcitamadhyaśca sa pādaṃ kuñcitaḥ smṛtaḥ

udattagamane caiva vartitodvartite tathā /
utkṣiptā tu bhavetpārṣṇiraṅguṣṭhāgreṇa saṃsthitaḥ

vāmaścaiva svabhāvasthaḥ sūcīpādaḥ prakīrtitaḥ /
nṛtte nūpurakaraṇe prayogastasya kīrtyate

atikrāntakrame caiva pādametaṃ prayojayet /
pādajaṅghorukaraṇaṃ karma kārya prayoktṛbhiḥ

pādasya karaṇaṃ sarva jaṅghorukṛtamiṣyate /
yathā pādaḥ pravarteta tathaivoruḥ pravartate

anayoḥ samānakaraṇāt pādacārī prayojayet /
ityetadaṅgajaṃ proktaṃ lakṣaṇaṃ karma caiva hi

ataḥ paraṃ pravakṣyāmi cārīvyāyāmalakṣaṇam