Natya Shastra · Chapter 28

iti bhāratīye nāṭyaśāstre siddhivyañjako nāma saptaviṃśo 'dhyāyaḥ
atha aṣṭāviṃśo 'dhyāyaḥ
ātodyavidhimidānīṃ vakṣyāmaḥ
tataṃ caivāvanaddhaṃ ca ghanaṃ suṣirameva ca /
caturvidhaṃ tu vijñeyamātodyaṃ lakṣaṇānvitam

tataṃ tantrīkṛtaṃ jñeyamavanaddhaṃ tu pauṣkaram /
ghanaṃ tālastu vijñeyaḥ suṣiro vaṃśa ucyate

prayogastrividho hyeṣāṃ vijñeyo nāṭakāśrayaḥ /
tataṃ caivāvanaddhaṃ ca tathā nāṭyakṛto 'paraḥ

tataḥ kutapavinyāso gāyanaḥ saparigrahaḥ /
vaipañciko vaiṇikaśca vaṃśavādastathaiva ca

mārdaṅgikaḥ pāṇavikastathā dārduriko budhaiḥ /
avanaddhavidhāveṣa kutapaḥ samudāhṛtaḥ

uttamādhamamadhyābhistathā prakṛtibhiryutaḥ /
kutapo nāṭyayoge tu nānādeśasamāśrayaḥ

evaṃ gānaṃ ca vādyaṃ ca nāṭyaṃ ca vividhāśrayam /
alātacakrapratimaṃ kartavyaṃ nāṭyayoktṛbhiḥ

yattu tantrīkṛtaṃ proktaṃ nānātodyasamāśrayam /
gāndharvamiti tajjñeyaṃ svaratālapadātmakam

atyarthamiṣṭaṃ devānāṃ tathā prītikaraṃ punaḥ /
gandharvāṇāṃ ca yasmāddhi tasmādgandharvamucyate

asya yonirbhavedgānaṃ vīṇā vaṃśastathaiva ca /
eteṣāṃ caiva vakṣyāmi vidhiṃ svarasamutthitam

gāndharvaṃ trividhaṃ vidyātsvaratālapadātmakam /
trividhasyāpi vakṣyāmi lakṣaṇaṃ karma caiva hi

dvyadhiṣṭhānāḥ svarā vaiṇāḥ śārīrāśca prakīrtitāḥ /
eteṣāṃ saṃpravakṣyāmi vidhānaṃ lakṣaṇānvitam

svarā grāmau mūrcchanāśca tānāḥ sthānāni vṛttayaḥ /
śuṣkaṃ sādhāraṇe varṇā hyalaṅkārāśca dhātavaḥ

śrutayo yatayaścaiva nityaṃ svaragatātmakāḥ /
dāravyāṃ samavāyastu vīṇāyāṃ samudāhṛtaḥ

svarā grāmāvalaṅkārā varṇāḥ sthānāni jātayaḥ /
sādhāraṇe ca śarīryāṃ vīṇāyāmeṣa saṃgrahaḥ

vyañjanāni svarā varṇāḥ sandhayo 'tha vibhaktayaḥ /
nāmākhyātopasargāśca nipātāstaddhitāḥ kṛtaḥ

chandovidhiralaṅkārā jñeyaḥ padagato vidhiḥ /
nibaddhaṃ cānibaddhaṃ ca dvividhaṃ tatpadaṃ smṛtam

dhruvastvāvāpaniṣkāmau vikṣepo 'tha praveśanam /
śamyā tālaḥ sannipātaḥ parivartaḥ savastukaḥ

mātrā prakaraṇāṅgāni vivārī yatayo layāḥ /
gītayo 'vayavā mārgāḥ pādamārgāḥ sapāṇayaḥ

ityekaviṃśatividhaṃ jñeyaṃ tālagataṃ budhaiḥ /
gāndharvasaṃgraho hyeṣa vistaraṃ tu nibodhata

tatra svarāḥ:
ṣaḍjaśca ṛṣabhaścaiva gāndhāro madhyamastathā /
pañcamo dhaivataścaiva saptamo 'tha niṣādavān

caturvidhatvameteṣāṃ vijñeyaṃ gānayoktṛbhiḥ /
vādī caivātha saṃvādī vivādī cānuvādyapi

saṃvādo madhyamagrāme pañcamasyarṣabhasya ca /
ṣaḍjagrāme tu ṣaḍjasya saṃvādaḥ pañcamasya ca

tisro dve ca catasraśca catasrastisra eva ca /
dve caivādya catasraśca ṣaḍjagrāme bhavedvidhiḥ

catuḥśrutirbhavet ṣaḍja ṛṣabhastriśrutiḥ smṛtaḥ /
dviśrutiścaiva gāndhāro madhyamaśca catuḥśrutiḥ

pañcamastadvadeva syāt triśrutirdhaivato mataḥ /
dviśrutiśca niṣādaḥ syāt ṣaḍjagrāme vidhirbhavet

atha mūrcchanāḥ dvaigrāmikyaścaturdaśa:
ādāvuttaramandrā syādrajanī cottarāyatā /
caturthī śuddhaṣaḍjā tu pañcamī matsarīkṛtā

aśvakrāntā tathā ṣaṣṭhī saptamī cābhirudgatā /
ṣaḍjagrāmāśritā hyetā vijñeyāḥ saptamūrcchanāḥ

ṣaḍje cottaramandrā syādṛṣabhe cābhirudgatā /
aśvakrāntā tu gāndhāre madhyame matsarīkṛtā

pañcame śuddhaṣaḍjā syāddhaivate cottarāyatā /
niṣāde rajanī ca syādityetāḥ ṣaḍjamūrcchanāḥ

atha madhyamagrāme:
sauvīrī hariṇāśvā ca syātkalopanatā tathā /
śuddhamadhyā tathā mārgī pauravī hṛṣyakā tathā /
madhyamagrāmajā hyetā vijñeyāḥ saptamūrcchanāḥ

api ca:
kramayuktāḥ svarāḥ sapta mūrcchanetyabhisaṃjñitāḥ /
ṣaṭpañcasvarakāstānāḥ ṣāḍavauḍuvitāśrayāḥ

sādhāraṇakṛtāścaiva kākalīsamalaṅkṛtāḥ /
antarasvarasaṃyuktā mūrcchanā grāmayordvayoḥ

yathā:
chāyāsu bhavati śītaṃ prasvedo bhavati cātapasthasya /
na ca nāgato vasanto na ca niḥśeṣaḥ śiśirakālaḥ

bhavataścātra:
antarasvarasaṃyogo nityamārohisaṃśrayaḥ /
kāryo hyalpo viśeṣeṇa nāvarohī kadācana

kriyamāṇo 'varohī syādalpo vā yadi vā bahuḥ /
jātirāgaṃ śrutiṃ caiva nayante tvantarasvarāḥ

iti
jātīridānīṃ vakṣyāmaḥ
svarasādhāraṇagatāstisro jñeyāstu jātayaḥ /
madhyamā pañcamī caiva ṣaḍjamadhyā tathaiva ca

āsāmaṃśāstu vijñeyāḥ ṣaḍjamadhyamapañcamāḥ /
yathā svaṃ durbalatarā vyaktā sā pañcamī tathā

jātayo 'ṣṭādaśetyevaṃ brahmaṇābhihitaṃ purā /
tāstvahaṃ vartayiṣyāmi grahāṃśādivibhāgataḥ

ṣāḍjī caivārṣabhī caiva dhaivatyatha niṣādinī /
ṣaḍjodīcyavatī caiva tathā vai ṣaḍjakaiśikī

ṣaḍjamadhyā tathā caiva ṣaḍjagrāmasamāśrayāḥ /
ata ūrdhvaṃ pravakṣyāmi madhyamagrāmasaṃśritāḥ

gāndhārī madhyamā caiva gāndhārodīcyavā tathā /
pañcamī raktagāndhārī tathā gāndhārapañcamī

madhyamodīcyavā caiva nandayanti tathaiva ca /
karmāravī ca vijñeyā tathāndhrī kaiśikī matā

svarasādhāraṇagatāstisro jñeyāstu jātayaḥ /
madhyamā ṣaḍjamadhyā ca pañcamī caiva sūribhiḥ

āsāmaṃśāstu vijñeyāḥ ṣaḍjamadhyamapañcamāḥ /
yathāsvaṃ durbalataraṃ vyatyāsāttvatra pañcamī

śuddhā vikṛtāścaiva hi samavāyājjātayastu jāyante /
punarevāśuddhakṛtā bhavantyathaikādaśānyāstu

tāsāṃ yannirvṛttāḥ svareṣvathāṃśeṣu jātiṣu ca jātiḥ /
tadvakṣyāmi yathāvatsaṃkṣepeṇa krameṇeha

parasparaviniṣpannā jñeyā hyevaṃ tu jātayaḥ /
pṛthaglakṣaṇasaṃyuktā dvaigrāmikāḥ svarāśrayāḥ

catasro jātayo nityaṃ jñeyāḥ saptasvarā budhaiḥ /
catasraḥ ṣaṭsvarā jñeyāḥ smṛtāḥ pañcasvarā daśa

madhyamodīcyavā caiva tathā vai ṣaḍjakaiśikī /
kārmāravī ca saṃpūrṇā tathā gāndhārapañcamī

ṣāḍjyāndhrī nandayantī ca gāndhārodīcyavā tathā /
catasraḥ ṣaṭsvarā hyetāḥ jñeyāḥ pañca svarā daśa

naiṣādī cārṣabhī caiva dhaivatī ṣaḍjamadhyamā /
ṣaḍjodīcyavatī caiva pañca ṣaḍjāśritāḥ smṛtāḥ

gāndhārī raktagāndhārī madhyamā pañcamī tathā /
kaiśikī caiva pañcaitā madhyamagrāmasaṃśrayāḥ

yāstāḥ saptasvarā jñeyā yāścaitāḥ ṣaṭsvarāḥ smṛtāḥ /
kadācit ṣāḍavībhūtāḥ kadāciccauḍuve matāḥ

ṣaḍjagrāme tu sampūrṇā vijñeyā ṣaḍjakaiśikī /
ṣaṭsvarā caiva vijñeyā ṣāḍjī gāndhārayogataḥ

gāndhārapañcamī caiva madhyamodīcyavā tathā /
punaśca ṣaṭsvarā jñeyā gāndhārodīcyavā budhaiḥ

āndhrī ca nandayantī ca madhyamagrāmasaṃśrayāḥ /
evametā budhairjñeyā dvaigrāmikyo 'pi jātayaḥ

ata ūrdhvaṃ pravakṣyāmi tāsāmaṃśavikalpanam /
ṣaṭsvarāḥ saptame hyaṃśe neṣyante ṣaḍjamadhyamāḥ

saṃvādyalopādgāndhāre tadvadeva hi neṣyate /
gāndhārīraktagāndhārīkaiśikīnāṃ tu pañcamaḥ

ṣaḍjāyāṃ caiva gāndhāramaṃśakaṃ viddhi ṣāḍavam /
ṣāḍavaṃ dhaivate nāsti ṣaḍjodīcyāmathāṃśake

saṃvādyalopātsaptaitāḥ ṣāṭsvaryeṇa vivarjitāḥ /
gāndhārīraktagāndhāryoḥ ṣaḍjamadhyamapañcamāḥ

saptamaścaiva vijñeyo yeṣu nauḍuvitaṃ bhavet /
dvau ṣaḍjamadhyamāṃśo tu gāndhāro 'tha niṣādavān

ṛṣabhaścaiva pañcamyāṃ kaiśikyāṃ caiva dhaivataḥ /
evaṃ tu dvādaśaiveha varjyāḥ pañca svarāḥ sadā

tāstvanauḍuvitā nityaṃ kartavyā hi svarāśrayāḥ /
sarvasvarāṇāṃ nāśastu vihitastvatha jātiṣu

na madhyamasya nāśastu kartavyo hi kadācana /
sarvasvarāṇāṃ pravaro hyanāśī madhyamaḥ smṛtaḥ /
gāndharvakalpe vihitaḥ sāmasvapi ca madhyamaḥ

daśakaṃ jātilakṣaṇam:
grahāṃśau tāramandrau ca nyāso 'panyāsa eva ca /
alpatvaṃ ca bahutvaṃ ca ṣāḍavauḍuvite tathā

atha grahāḥ:
grahāstu sarvajātīnāmaṃśavatparikīrtitāḥ /
yatpravṛttaṃ bhavedgeyamaṃśo grahavikalpitaḥ

tatrāṃśo nāma:
yasmin bhavati rāgaśca yasmāccaiva pravartate /
mandraśca tāramandraśca yo 'tyarthaṃ copalabhyate

grahāpanyāsavinyāsasaṃnyāsanyāsagocaraḥ /
anuvṛttaśca yasyeha soṃ'śaḥ syāddaśalakṣaṇaḥ

pañcasvaraparā tāragatiryathā
aṃśāttāragatiṃ vidyādācaturthasvarādiha /
ā pañcamātpañcamādvā nātaḥparamiheṣyate

tridhā mandragatiḥ |
aṃśaparā nyāsaparā aparanyāsaparā ceti |
mandrastvaṃśaparo nāsti nyāsau tu dvau vyavasthitau /
gāndhāranyāsaliṅge tu dṛṣṭamārṣabhasevanam

atha nyāsa ekaviṃśatisaṅkhyaḥ |
aṅgasamāptau nyāsaḥ |
tadvadapanyāso hyaṅgamadhye ṣaṭpañcāśatsaṅkhyaḥ |
yathā:
nyāso 'ṅgasamāptau sa caikaviṃśatisaṅkhyastathā /
akṣarāṇi ṣaṭpañcāśatsaṃkhyo 'panyāso 'ṅgamadhye bhavet

tatra prathamaṃ vidārīmadhye nyāsasvaraprayuktastu /
vivadanaśīlaṃ muktvā saṃnyāsaḥ so 'bhidhātavyaḥ /
kṛtvā padāvasāne vinyāsātkvāpi vinyāsaḥ

tathā:
alpatve 'tha bahutve balavadabalatā viniścayādeva /
jātisvaraistu nityaṃ jātyalpatvaṃ dvividhametat

sañcārāṃśe balasthānāmalpatve durbalāsu ca /
nyāsaścāntaramārgastu jātīnāṃ vyaktikārakaḥ

pañcasvaramauḍuvitaṃ vijñeyaṃ daśavidhaṃ prayogajñaiḥ /
triṃśatprakāravihitaṃ pūrvoktaṃ lakṣaṇaṃ cāsya

ṣaṭsvarasya prayogo 'sti tathā pañcasvarasya ca /
catuḥsvaraprayogo 'pi hyavakṛṣṭadhruvāsviha

dvaigrāmikīṇāṃ jātīnāṃ sarvāsāmapi nityaśaḥ /
aṃśāstriṣaṣṭirvijñeyāsteṣāṃ caivāṃśavad grahāḥ

aṃśagrahamidānīṃ vakṣyāmaḥ |
tatra:
madhyamodīcyavāyāstu nandayantyāstathaiva ca /
tathā gāndhārapañcamyāḥ pañcamoṃ'śo grahastathā

dhaivatyāśca tathā hyaṃśau vijñeyau dhaivatarṣabhau /
pañcamyāśca tathā jñeyau grahāṃśau pañcamarṣabhau

gāndhārodīcyavāyāstu grahāṃśau ṣaḍjamadhyamau /
ārṣabhyāśca grahā aṃśā dhaivatarṣabhasaptamāḥ

gāndhāraśca niṣādaśca hyārṣabhaśca tathāparaḥ /
niṣādinyāstrayo hyete grahā aṃśāśca kīrtitāḥ

ṣaḍjapañcamagāndhāraistribhireva prakīrtitāḥ /
aṃśairgrahaistathā caiva vijñeyā ṣaḍjakaiśikī

ṣaḍjaśca madhyamaścaiva niṣādo dhaivatastathā /
ṣaḍjodīcyavatījātergrahā aṃśāśca kīrtitāḥ

pañcamaścārṣabhaścaiva niṣādo dhaivatastathā /
kārmāravyā budhairaṃśā grahāśca parikīrtitāḥ

gāndhāraścārṣabhaścaiva pañcamo 'tha niṣādavān /
catvaroṃśā bhavantyāndhryā grahāścaiva tathaiva hi

ṣaḍjaścātharṣabhaścaiva madhyamaḥ pañcamastathā /
madhyamāyā grahā jñeyā aṃśāścaiva sadhaivatāḥ

niṣādaṣaḍjagāndhāramadhyamāḥ pañcamastathā /
gāndhārīraktagāndhāryorgrahā aṃśāḥ prakīrtitāḥ

ṣaḍjī dhaivatagāndhāraṣaḍjamadhyamapañcamaiḥ /
grahairaṃśaiśca vijñeyā vikṛtā svarayogataḥ

kaiśikyāścārṣabhaṃ hitvā grahāṃśāḥ ṣaṭ svarāḥ smṛtāḥ /
saptasvaragrahāṃśā tu vijñeyā ṣaḍjamadhyamā

ete triṣaṣṭirvijñeyāḥ sarvāsvaṃśāstu jātiṣu /
aṃśavacca grahāstāsāṃ sarvāsāmeva nityaśaḥ

sarvāsāmeva jātīnāṃ trijātistu gaṇaḥ smṛtaḥ /
te ca sapta gaṇā jñeyā vardhamānasvarā budhaiḥ

ekasvaro dvisvaraśca trisvaro 'tha catuḥsvaraḥ /
pañcasvaraścaturthā syādekadhā saptaṣaṭsvarau

etaduktaṃ mayā tvāsāṃ grahāṃśaparikalpanam /
punaścaiva pravakṣyāmi nyāsāpanyāsayogataḥ

pañcāṃśā tu bhavet ṣāḍjī niṣādarṣabhavarjitā /
apanyāso bhavedatra gāndhāraḥ pañcamastathā

nyāsaścātra bhavet ṣaḍjo lopyaḥ saptama eva ca /
ṣaḍjagāndhārasañcāraḥ ṣaḍjadhaivatayostathā

ṣāḍavaṃ saptamopetamalpau vai saptamarṣabhau /
gāndhārasya ca bāhulyaṃ tvatra kāryaṃ prayoktubhiḥ

ārṣabhyāmṛṣabhastvaṃśo niṣādo dhaivatastathā /
eta eva hyapanyāsā nyāsaścāpyṛṣabhaḥ smṛtaḥ /
ṣaṭpañcasvaratā cātra ṣaḍjapañcamayorvinā

dhaivatyāṃ dhaivato nyāsastvaṃśāvṛṣabhadhaivato /
apanyāsā bhavantyatra dhaivatārṣabhamadhyamāḥ

ṣaḍjapañcamahīnaṃ tu pāñcsvaryaṃ vidhīyate /
pañcamena vinā caiva ṣāḍavaṃ parikīrtitam

ārohiṇau ca tau kāryau laṅghanīyau tathaiva ca /
niṣādaścarṣabhaścaiva gāndhāro balavāṃstathā

niṣādinyāṃ niṣādoṃ'śo sagāndhārarṣabhastathā /
eta eva hyapanyāsā nyāsaścaivātra saptamaḥ

dhaivatyā iva kartavye ṣāḍavauḍuvite tathā /
tadvacca laṅghanīyau tu balavantau tathaiva ca

aṃśāstu ṣaḍjakaiśikyāḥ ṣaḍjagāndhārapañcamāḥ /
apanyāsā bhavantyatra ṣaḍjapañcamasaptamāḥ

gāndhāraśca bhavennyāso hainasvaryaṃ na cātra tu /
daurbalyaṃ cātra kartavyaṃ dhaivatasyārṣabhasya ca

(madhyama)
ṣaḍjaśca madhyamaścaiva niṣādo dhaivatastathā /
syuḥ ṣaḍjodīcyavāṃśāstu nyāsaścaiva tu madhyamaḥ

apanyāso bhavatyasya dhaivataḥ ṣaḍja eva ca /
parasparāṃśagamanamiṣṭataśca vidhīyate

ṣāṭsvaryamṛṣabhāpetaṃ kāryaṃ gāndharvavedibhiḥ /
pañcamārṣabhahīnaṃ tu pāñcasvaryaṃ tu tatra vai

ṣaḍjaścāpyṛṣabhaścaiva gāndhāraśca balī bhavet /
gāndhārasya ca bāhulyaṃ mandrasthāne vidhīyate

sarveṃśāḥ ṣaḍjamadhyāyāmapanyāsāstathaiva ca /
ṣaḍjaśca madhyamaścāpi nyāsau nāryau prayoktṛbhiḥ

gāndhārasaptamāpetaṃ pāñcasvaryaṃ vidhīyate /
ṣāḍavaṃ saptamāpetaṃ kāryaṃ cātra prayogataḥ

sarvasvarāṇāṃ sañcāra iṣṭatastu vidhīyate /
ṣaḍjagrāmāśritā hyetā vijñeyāḥ sapta jātayaḥ

ataḥ paraṃ pravakṣyāmi madhyamagrāmasaṃśrayāḥ /
gāndhāryāḥ pañca evāṃśā dhaivatarṣabhavarjitāḥ

ṣaḍjaśca pañcamaścaiva hyapanyāsau prakīrtitau /
gāndhāraśca bhavennyāsaḥ ṣāḍavaṃ carṣabhaṃ vinā

dhaivatarṣabhayorhīnaṃ tathā cauḍuvitaṃ bhavet /
laṅghanīyau ca tau nityamārṣabhāddhaivataṃ vrajet /
vihitastviti gāndhāryāḥ svaranyāsāṃśagocaraḥ

lakṣaṇaṃ raktagāndhāryā gāndhāryā eva yatsmṛtam /
dhaivato balavānatra daurbalyaṃ tasya lopataḥ

gāndhāraṣaḍjayoścātra sañcāraścārṣabhādvinā /
apanyāsastathā caiva madhyamastu vidhīyate

gāndhārodīcyavāṃśau tu vijñeyau ṣaḍjamadhyamau /
pāñcasvaryaṃ na caivātra ṣāṭsvaryamṛṣabhaṃ vinā

kāryaścāntaramārgaśca nyāsopanyāsa eva ca /
ṣaḍjodīcyavatīvattu pāñcasvaryeṇa jātucit

madhyamāyā bhavantyaṃśā vinā gāndhārasaptamau /
eta eva hyapanyāsā nyāsaścaiva tu madhyamaḥ

gāndhārasaptamāpetaṃ pāñcasvaryaṃ vidhīyate /
ṣāḍavaṃ cāpyagāndhāraṃ kartavyaṃ tu prayogataḥ

ṣaḍjamadhyamayoścātra kāryaṃ bāhulyameva hi /
gāndhāralaṅghanaṃ cātra kāryaṃ nityaṃ prayoktṛbhiḥ

madhyamodīcyavā pūrṇā hyaṃśa ekastu pañcamaḥ /
śeṣo vidhistu kartavyo gāndhārodīcyavāṃ gataḥ

dvāvaṃśāvatha pañcamyāmṛṣabhaḥ pañcamastathā /
sa(ṛ)niṣādāvapanyāsau nyāsaścaiva tu pañcamaḥ

madhyamāvattu kartavye ṣāḍavauḍuvite tathā /
daurbalyaṃ cātra kartavyaṃ ṣaḍjagāndhāramadhyamaiḥ

kuryādapyatra sañcāraṃ pañcamasyārṣabhasya ca /
gāndhāragamanaṃ caiva kāryaṃ tvalpaśca saptamaḥ

(lpaṃ ca saptamāt)
atha gāndhārapañcamyāḥ pañcamoṃ'śaḥ prakīrtitaḥ /
tāragatyā tu ṣaḍjo 'pi kadācinnātivartate

ṛṣabhaḥ pañcamaścaiva hyapanyāsau prakīrtitau /
nyāsaścaiva tu gāndhāro sā ca pūrṇasvarā sadā /
pañcamyā yaśca gāndhāryāḥ sañcāraḥ sa vidhīyate

pañcamaścārṣabhaścaiva gāndhāro 'tha niṣādavān /
catvāroṃ'śā bhavantyāndhryāmapanyāsāsta eva hi

gāndhāraśca bhavennyāsaḥ ṣaḍjāpetaṃ tu ṣāḍavam /
gāndhārārṣabhayoścāpi sañcārastu parasparam

saptamasya ca ṣaṣṭhasya nyāso gatyanupūrvaśaḥ /
ṣaḍjasya laṅghanaṃ cātra nāsti cauḍuvitaṃ sadā

nandayantyāḥ kramān nyāsāpanyāsāṃśāḥ prakīrtitāḥ /
gāndhāro madhyamaścaiva pañcamaścaiva nityaśaḥ

ṣaḍjo lopyaśca laṅghyaśca nāndhrīsañcaraṇaṃ bhavet /
laṅghanaṃ hyṛṣabhasyāpi tacca mandragataṃ smṛtam

tāragatyā tu ṣaḍjastu kadācinnātivartate /
gāndhāro vā grahaḥ kāryastathā nyāsaśca nityaśaḥ

kārmāravyāḥ smṛtā hyaṃśā ārṣabhaḥ pañcamastathā /
dhaivataśca niṣādaścāpyapanyāsāsta eva tu /
pañcamaśca bhavennyāso hainasvaryaṃ na cātra tu

gāndhārasya viśeṣeṇa sarvato gamanaṃ bhavet

kaiśikyāstu tathā hyaṃśāḥ sarve caivārṣabhaṃ vinā /
eta eva hyapanyāsā nyāsau gāndhārasaptamau

dhaivateṃśe niṣāde ca nyāsaḥ pañcama iṣyate /
apanyāsaḥ kadācittu ṛṣabho 'pi vidhīyate

ārṣabhe ṣāḍavaṃ cātra dhaivatarṣabhavarjitam /
tathā cauḍuvitaṃ kuryād balinau cāntyapañcamau

daurbalyamṛṣabhasyātra laṅghanaṃ ca viśeṣataḥ /
aṃśavat kalpitaścānyaiḥ ṣāḍave tu vidhīyate /
ṣaḍjamadhyāvadatrāpi sañcārastu bhavediha

evametā budhairjñeyā jātayo daśalakṣaṇāḥ /
yathā yasmin rase yāśca gadato me nibodhata