Natya Shastra · Chapter 23

bāhyamapyupacāraṃ tu pravakṣyāmyatha vaiśike /
iti bhāratīye nāṭyaśāstre sāmānyābhinayo nāmādhyāyo dvāviṃśaḥ
atha trayoviṃśo 'dhyāyaḥ
viśeṣayetkalāḥ sarvā yasmāttasmāttu vaiśikaḥ /
veśopacāre sādhurvā vaiśikaḥ parikīrtitaḥ

yo hi sarvakalopetaḥ sarvaśilpavicakṣaṇaḥ /
strīcittagrahaṇābhijño vaiśikaḥ sa bhavetpumān

guṇastasya tu vijñeyāḥ svaśarīrasamutthitāḥ /
āhāryāḥ sahajāścaiva trayastriṃśatsamāsataḥ

śāstravicchilpasaṃpanno rūpavān priyadarśanaḥ
vikrānto dhṛtimāṃścaiva vayoveṣakulānvitaḥ

surabhirmadhurastyāgi sahiṣṇuravikatthanaḥ
aśaṅkitaḥ priyābhāṣī caturaḥ śubhadaḥ śuciḥ

kāmopacārakuśalo dakṣiṇo deśakālavit /
adīnavākyaḥ smitavān vāgmī dakṣaḥ priyaṃvadaḥ

strīlubdhāḥ saṃvibhāgī ca śraddhadhāno dṛḍhasmṛtiḥ /
gamyāsu cāpyavisrambhī mānī ceti hi vaiśikaḥ

anuyuktaḥ śucirdakṣo dakṣiṇaḥ pratipattimān /
bhaveccitrābhidhāyī ca vayasyastasya tadguṇaḥ

vijñānaguṇasaṃpanā kathinī liṅginī tathā /
prātiveśyā sakhī dāsī kumārī kāruśilpinī

dhātrī pāṣaṇḍinī caiva tathā raṅgopajīvinī /
protsāhane 'thakuśalā madhurakathā dakṣiṇāthakālajñā

laḍahā saṃvṛtamantrā dūtī tvebhirguṇaiḥ kāryā /
tayāpyutsāhanaṃ kāryaṃ nānādarśitakāraṇam

yathoktakathanaṃ caiva tathā bhāvapradarśanam /
na jaḍaṃ rūpasampannaṃ nārthavantaṃ na cāturam

dūtaṃ vā'pyathavā dūtīṃ budhaḥ kuryātkadācana /
kulabhogadhanādhikyaiḥ kṛtvādhikavikatthanam

dūtī nivedayetkāmamarthāṃścaivānuvarṇayet /
na cākāmapravṛttāyāḥ kṛddhāyā vāpi saṅgamaḥ

nānupāyaḥ prakartavyo dūtyā hi puruṣāśrayaḥ /
utsave ratrisañcāra uddyāne mitraveśmani

dhātrigṛheṣu sakhyā vā tathā caiva nimantraṇe /
vyādhitavyapadeśena śunyāgāraniveśane

kāryaḥ samāgamo nṝṇāṃ strībhiḥ prathamasaṅgame /
evaṃ samāgamaṃ kṛtvā sopāyaṃ vidhipūrvakam

anuraktā viraktā vā liṅgākāraistu lakṣayet /
svabhāvabhāvātiśayairnārī yā madanāśrayā

karoti nibhṛtāṃ līlāṃ nityaṃ sā madanāturā /
sakhīmadhye guṇān brūte svadhanaṃ ca prayacchati

pūjayatyasya mitrāṇi dveṣṭi śatrujanaṃ sadā /
gamāgame sakhīnāṃ yā hṛṣṭā bhavati cādhikam

tuṣyatyasya kathābhistu sasnehaṃ ca nirīkṣate /
supte tu paścāt svapiti cumbitā praticumbati

uttiṣṭhatyapi pūrvaṃ ca tathā kleśasahāpi ca /
utsave muditā yā ca vyasane yā ca duḥkhitā

evaṃvidhairguṇairyuktā tvanuraktā tu sā smṛtā /
viraktāyāstu cinhāni cumbitā nābhicumbati