Natya Shastra · Chapter 21

iti bhāratīye nāṭyaśāstre vṛttivikalpanaṃ nāma viṃśo 'dhyāyaḥ
atha ekaviṃśo 'dhyāyaḥ
āhāryābhinayaṃ viprā vyākhyāsyāmyanupūrvaśaḥ /
ysmāt prayogaḥ sarvo 'yamāhāryābhinaye sthitaḥ

nānāvasthā prakṛtaya pūrvaṃ naipathyasādhitāḥ /
aṅgādibhirabhivyaktimupagacchantyayatnataḥ

āhāryābhinayo nāma jñeyo nepathyajo vidhiḥ /
tatra kāryaḥ prayatnastu nāṭyasya śubhamicchatā

[tasminyatnastu kartavyo naipathye siddhimicchatā /
nāṭyasyeha tvalaṅkāro naipathyaṃ yatprakīrtitam]

caturvidhaṃ tu nepathyaṃ pusto 'laṅkāra eva ca /
tathāṅkaracanā caiva jñeyaṃ sajjīvameva ca

pustastu trividho jñeyo nānārūpapramāṇataḥ /
sandhimo vyājimaścaiva veṣṭimaśca prakīrtitaḥ

kiliñjacarmavastrādyairyadrūpaṃ kriyate budhaiḥ /
sandhimo nāma vijñeyaḥ pusto nāṭakasaṃsśrayaḥ

vyājimo nāma vijñeayo yantreṇa kriyate tu yaḥ /
veṣṭyate caiva yadrupaṃ veṣṭimaḥ sa tu saṃjñitaḥ

śailayānavimānāni carmavarmadhvajā nagāḥ /
ye kriyante hi nāṭye tu sa pusta iti saṃjñitaḥ

alaṅkārastu vijñeyo mālyābharaṇavāsasām /
nānāvidhaḥ samāyogo 'pyaṅgopāṅgavidhiḥ smṛtaḥ

veṣṭimaṃ vitataṃ caiva saṃghātyaṃ granthimaṃ tathā /
prālambitaṃ tathā caiva mālyaṃ pañcavidhaṃ smṛtam

caturvidhaṃ tu vijñeyaṃ nāṭye hyābharaṇaṃ budhaiḥ /
āvedhyaṃ bandhanīyaṃ ca kṣepyamāropyameva ca

āvedhyaṃ kuṇḍalādīha yatsyācchravaṇabhūṣaṇam /
āropyaṃ hemasūtrādi hārāśca vividhāśrayāḥ

śroṇīsūtrāṅgade muktābandhanīyāni sarvadā /
prakṣepya nūpuraṃ vidyādvastrābharaṇameva ca

bhūṣaṇānāṃ vikalpaṃ hi puruṣastrīsamāśrayam /
nāvidhaṃ pravakṣyāmi deśajātisamudbhavam

cūḍāmaṇiḥ samukuṭaḥ śiraso bhūṣaṇaṃ smṛtam /
kuṇḍalaṃ mocakaṃ kīlā karṇābharaṇamiṣyate

muktāvalī harṣakaṃ ca sūtrakaṃ kaṇṭhabhūṣaṇam /
vetikāṅgulimudrā ca syādaṅgulivibhūṣaṇam

hastalī valayaṃ caiva bāhunālīvibhūṣaṇam /
rucakaścūlikā kāryā maṇibandhavibhūṣaṇam

keyūre aṅgade caiva kūrparoparibhūṣaṇe /
trisaraścaiva hāraśca tathā vakṣovibhūṣaṇam

vyālambamauktiko hāro mālā caivāṅgabhūṣaṇam /
talakaṃ sūtrakaṃ caiva bhavetkaṭivibhūṣaṇam

ayaṃ puruṣaniryogaḥ kāryastvābharaṇāśrayaḥ /
devānāṃ pārthivānāṃ ca punarvakṣyāmi yoṣitām

śikhāpāśaṃ śikhāvyālaṃ piṇḍīpatraṃ tathaiva ca /
cūḍāmaṇirmakarikā muktājālagavākṣikam

śiraso bhūṣaṇaṃ caiva vicitraṃ śīrṣajolakam /
kaṇḍakaṃ śikhipatraṃ ca veṇīpucchaḥ sadorakaḥ

lalāṭatilakaṃ caiva nānāśilpaprayojitam /
bhrūgucchoparigucchaśca kusumānukṛtistathā

karṇikā karṇavalayaṃ tathā syātpatrakarṇikā /
kuṇḍalaṃ karṇamudrā ca karṇotkīlakameva ca

nānāratnavicitrāṇi dantapatrāṇi caiva hi /
karṇayorbhūṣaṇaṃ hyetatkarṇapūrastathaiva ca

tilakāḥ patralekhāśca bhavedgaṇḍavibhūṣaṇam /
trivaṇī caiva vijñeyaṃ bhavedvakṣovibhūṣaṇam

netrayorañjanaṃ jñeyamadharasya ca rañjanam /
dantānāṃ vividho rāgaścaturṇāṃ śuklatāpi vā

rāgāntaravikalpo 'tha śobhanenādhikojvalaḥ /
mugdhānāṃ sundarīṇāṃ ca muktābhāsitaśobhanāḥ

suraktā vāpi dantā syuḥḥ padmapallavarañjanāḥ /
aśmarāgoddyotitaḥ syādadharaḥ pallavaprabhaḥ

vilāsaśca bhavettāsāṃ savibhrāntanirīkṣitam /
muktāvalī vyālapaṅktirmañjarī ratnamālikā

ratnāvalī sūtrakaṃ ca jñeyaṃ kaṇṭhavibhūṣaṇam /
dvisarastrisaraścaiva catussarakameva ca

tathā śṛṅkhalikā caiva bhavetkaṇṭhavibhūṣaṇam /
aṅgadaṃ valayaṃ caiva bāhumūlavibhūṣaṇam

nānāśilpakṛtāścaiva hārā vakṣovibhūṣaṇam /
maṇijālāvanaddhaṃ ca bhavet stanavibhūṣaṇam

kharjūrakaṃ socchitikaṃ bāhunālīvibhūṣaṇam /
kalāpī kaṭakaṃ śaṅkho hastapatraṃ sapūrakam

mudrāṅgulīyakaṃ caiva hyaṅgulīnāṃ vibhūṣaṇam /
muktājālāḍhyatalakaṃ mekhalā kāñcikāpi vā

raśanā ca kalāpaśca bhavecchroṇīvibhūṣaṇam /
ekayaṣṭirbhavetkāñcī mekhalā tvaṣṭayaṣṭikā

dviraṣṭayaṣṭi raśanā kalāpaḥ pañcaviṃśakaḥ /
dvātriṃśacca catuḥṣaṣṭiḥ śatamaṣṭottaraṃ tathā

muktāhārā bhavantyete devapārthivayoṣitām /
nūpuraḥ kiṅkiṇīkāśca ghaṇṭikā ratnajālakam

saghoṣe kaṭake caiva gulphoparivibhūṣāṇam /
jaṅghayoḥ pādapatraṃ syādaṅgulīṣvaṅgulīyakam

aṅguṣṭhatilakāścaiva pādayośca vibhūṣaṇam /
tathālaktakarāgaśca nānābhaktiniveśitaḥ

aśokapalāvacchāyaḥ syāt svābhāvika eva ca /
etadvibhūṣaṇaṃ nāryā ākeśādānakhādapi

yathābhavarasāvasthaṃ vijñeyaṃ dvijasattamāḥ /
āgamaśca pramāṇaṃ ca rūpanirvarṇanaṃ tathā

viśvakarmamatātkāryaṃ subuddhyāpi prayoktṛbhiḥ /
na hi śakyaṃ suvarṇena muktābhirmaṇibhistathā

svādhīnamiti rucyaiva kartumaṅgasya bhūṣaṇam /
vibhāgato 'bhiprayuktamaṅgaśobhākaraṃ bhavet

yathā sthānāntaragataṃ bhūṣaṇaṃ ratnasaṃyutam /
na tu nāṭyaprayogeṣu kartavyaṃ bhūṣaṇaṃ guru

khedaṃ janayate taddhi savyāyataviceṣṭanāt /
gurubhāvāvasannasya svedo mūrchā ca jāyate

gurvābharaṇasanno hi ceṣṭāṃ na kurute punaḥ /
tasmāttanutvacakṛtaṃ sauvarṇaṃ bhūṣaṇaṃ bhavet

ratnavajjatubaddhaṃ vā na khedajananaṃ bhavet /
svecchayā bhūṣaṇavidhirdivyānāmupadiśyate

yatnabhāvaviniṣpannaṃ mānuṣāṇāṃ vibhūṣaṇam /
[veṣṭitaṃ vitataṃ caiva saṃghātyaṃ grathimaṃ tatha

lambaśobhi tathā caiva mālyaṃ pañcavidhaṃ smṛtam /
ācchādanaṃ bahuvidhaṃ nānāpattanasaṃbhavam

tajjñeyaṃ triprakāraṃ tu śuddhaṃ raktaṃ vicitritam] /
divyānāṃ bhūṣaṇavidhirya eṣa parikīrtitaḥ

mānuṣāṇāṃ tu kartavyo nānādeśasamāśrayaḥ /
bhūṣaṇaiścāpi veṣaiśca nānāvasthāsamāśrayaiḥ

divyāṅganānāṃ kartavyā vibhaktiḥ svasvabhūmijā /
vidyādharīṇāṃ yakṣīṇāmapsaronāgayoṣitām

ṛṣidaivatakanyānāṃ veṣairnānātvamiṣyate /
tathā ca siddhagandharvarākṣasāsurayoṣitām

divyānāṃ naranārīṇāṃ tathaiva ca śikhaṇḍakam /
śikhāpuṭaśikhaṇḍaṃ tu muktābhūyiṣṭhabhūṣaṇam

vidyādharīṇāṃ kartavyaḥ śuddho veṣaparicchadaḥ /
yakṣiṇyo 'psaraścaiva karyā ratnavibhūṣaṇāḥ

samastānāṃ bhavedveṣo yakṣīṇā kevalaṃ śikhā /
divyanāmiva kartavyaṃ nāgastrīṇāṃ vibhūṣaṇam

muktāmaṇilatāprāyāḥ phaṇāstāsāṃ tu kevalāḥ /
kāryaṃ tu munikanyānāmekaveṇīdharaṃ śiraḥ

na cāpi vibhūṣaṇavidhistāsāṃ veṣo vanocitaḥ /
muktāmarakataprāyaṃ maṇḍanaṃ siddhayoṣitām

tāsāṃ tu caiva kartavyaṃ pītavastraparicchadam /
padmarāgamaṇiprāyaṃ gandharvīṇāṃ vibhūṣaṇam

vīṇāhastaśca kartavyaḥ kausumbhavasanastathā /
indranīlaistu kartavyaṃ rākṣasīṇāṃ vibhūṣaṇam

sitadaṃṣṭrā ca kartavyā kṛṣṇavastraparicchadam /
vaiḍūryamuktābharaṇāḥ kartavyā surayoṣitām

śukapiñchanibhaiarvastraiḥ kāryastāsāṃ paricchadaḥ /
puṣyarāgaistu maṇibhiḥ kvacidvaiḍūryabhūṣitaiḥ

divyavānaranārīṇāṃ kāryo nīlaparicchadaḥ /
evaṃ śṛṅgāriṇaḥ kāryā veṣā divyāṅganāśrayāḥ

avasthāntamāsādya śuddhāḥ kāryāḥ punastathā /
mānuṣīṇāṃ tu kartavyā nānādeśasamudbhavāḥ

veṣābharaṇasaṃyogān gadatastānnibodhata /
āvantyayuvatīnāṃ tu śirassālakakuntalam

gauḍīyānāmalakaprāyaṃ saśikhāpāśaveṇikam /
ābhīrayuvatīnāṃ tu dviveṇīdhara eva tu

śiraḥ parigamaḥ kāryo nīlaprāyamathāmbaram /
tathā pūrvotarastrīṇāṃ samunnaddhaśikhaṇḍakam

ākeśācchādanaṃ tāsāṃ deśakarmaṇi kīrtitam /
tathaiva dakṣiṇastrīṇāṃ kāryamullekhyasaṃśrayam

kumbhībandhakasaṃyuktaṃ tathāvartalalāṭikam /
[gaṇikānāṃ tu kartavyamicchāvicchitti maṇḍanam]

deśajātividhānena śeṣāṇāmapi kārayet /
veṣaṃ tathā cābharaṇaṃ kṣurakarma paricchadam

[āgamaṃ cāpi naipathye nāṭyasyaivaṃ prayojayet] /
adeśayukto veṣo hi na śobhāṃ janayiṣyati

mekhalorasi baddhā tu hāsyaṃ samupapādayet /
tathā proṣitakāntāsu vyasanābhihatāsu ca

veṣo vai malinaḥ kārya ekaveṇīdharaṃ śiraḥ /
vipralambhe tu nāryāstu śuddho veṣo bhavediha

nātyābharaṇasaṃyukto na cāpi mṛjayānvitaḥ /
evaṃ strīṇāṃ bhavedveṣo deśāvasthāsamudbhavaḥ

puruṣāṇāṃ punaścaiva veṣānvakṣyāmi tattvataḥ /
tatrāṅkaracanā pūrvaṃ kartavyā nāṭyayoktṛbhiḥ

tataḥ paraṃ prayoktavyā veṣā deśasamudbhavāḥ /
sito nīlaśca pītaśca caturtho rakta eva ca

ete svabhāvajā varṇā yaiḥ kāryaṃ tvaṅgavartanam /
saṃyogajāḥ punaścānye upavarṇā bhavanti hi

tānahaṃ sampravakṣyāmi yathākāryaṃ prayoktṛbhiḥ /
sitanīlasamāyoge kāraṇḍava iti smṛtaḥ

sitapītasāmāyogātpāṇḍuvarṇaḥ prakīrtitaḥ /
sitiaraktasamāyoge padmavarṇaḥ prakīrtitaḥ

pītanīlasamāyogāddharito nāma jāyate /
nīlaraktasamāyogātkaṣāyo nāma jāyate

raktapītasamāyogādgauravarṇa iti smṛtaḥ /
ete saṃyogajā varṇā hyupavarṇāstathāpare

tricaturvarṇasaṃyuktā bahavaḥ saṃprakīrtitāḥ /
balastho yo bhavedvarṇastasya bhāgo bhavettataḥ

durbalasya ca bhāgau dvau nīlaṃ muktvā pradāpayet /
nīlasyaiko bhavedbhāgaścatvāro 'nye tu varṇake

balavānsarvavarṇānāṃ nīla eva prakīrtitaḥ /
evaṃ varṇavidhiṃ jñātvā nānāsaṃyogasaṃśrayam

tataḥ kuryādyathāyogamaṅgānāṃ vartanaṃ budhaḥ /
vartanacchādanaṃ rūpaṃ svaveṣaparivarjitam

nāṭyadharmapravṛttaṃ tu jñeyaṃ tatprakṛtisthitam /
svavarṇamātmanaśchādyaṃ varṇakairveṣasaṃśrayaiḥ

ākṛtistasya kartavyā yasya prakṛtirāsthitā /
yathā jantuḥ svabhāvaṃ svaṃ parityajyānyadaihikam

tatsvabhāvaṃ hi bhajate dehāntaramupāśritaḥ /
veṣeṇa varṇakaiścaiva cchāditaḥ puruṣastathā

parabhāvaṃ prakurute yasya veṣaṃ samāśritaḥ /
devadānavagandharvayakṣarākṣasapannagāḥ

prāṇisaṃjñāḥ smṛtā hyete jīvabandhāśca ye 'pare /
[strībhāvāḥ parvatāḥ nadyaḥ samudrā vāhanāni ca

nānāśastrāṇyapi tathā vijñeyāḥ prāṇisaṃjñayā] /
śailaprāsādayantrāṇi carmavarmadhvajāstathā

nānāpraharaṇādyāśca te 'prāṇina iti smṛtāḥ /
athavā kāraṇopetā bhavantyete śarīriṇaḥ

veṣabhāṣāśrayopetā nāṭyadharmamavekṣya tu /
varṇānāṃ tu vidhiṃ jñātvā vayaḥ prakṛtimeva ca

kuryādaṅgasya racanāṃ deśajātivayaḥśritatām /
devā gaurāstu vijñeyā yakṣāścāpsarastathā

rudrārkadruhiṇaskandāstapanīyaprabhāḥ smṛtāḥ /
somo bṛhaspatiḥ śukro varuṇastārakāgaṇāḥ

samudrahimavadgaṅgāḥ śvetā hi syurbalastathā /
raktamaṅgārakaṃ vidyāt pītau budhahutāśanau

nārāyaṇo naraścaiva śyāmo nāgaśca vāsukiḥ /
daityāśca dānavāścaiva rākṣasā guhyakā nagāḥ

piśācā jalamākāśamasitāni tu varṇataḥ /
bhavanti ṣaṭsu dvīpeṣu puruṣaścaiva varṇataḥ

kartavyā nāṭyayogena niṣṭaptakanakaprabhāḥ /
jāmbūdvīpasya varṣe tu nānāvarṇāśrayā narāḥ

uttarāṃstu kurustyaktvā te cāpi kanakaprabhāḥ /
bhadrāśvapuruṣāḥ śvetāḥ kartavyā varṇatastathā

ketumāle narā nīlā gaurāḥ śeṣeṣu kīrtitāḥ /
nānāvarṇāḥ smṛtā bhūtā gandharvā yakṣapannagāḥ

vidyādharāstathā caiva pitarastu samā narāḥ /
punaśca bhārate varṣe tāṃstānvarṇānnibodhata

rājānaḥ padmavarṇāstu gaurāḥ śyāmāstathaiva ca /
ye cāpi sukhino martyā gaurā kāryāstu vaiḥ budhaiḥ

kukarmiṇo grahagrastāḥ vyādhitāstapasi sthitāḥ /
āyastakarmiṇaścaiva hyasitāśca kujātayaḥ

ṛṣyayaścaiva kartavyā nityaṃ tu badaraprabhāḥ /
tapaḥsthitāśca ṛṣayo nityāmevāsitā budhaiḥ

kāraṇavyapadeśena tathā cātmecchayā punaḥ /
varṇastatra prakartavyo deśajativaśānugaḥ

deśaṃ karma ca jātiṃ ca pṛthivyuddeśasaṃśrayam /
vijñāya vartanā kāryā puruṣāṇāṃ prayogataḥ

kirātabarbarāndhrāśca draviḍāḥ kāśikosalāḥ /
pulindā dākṣiṇātyāśca prāyeṇa tvasitāḥ smṛtāḥ

śakāśca yavanāścaiva pahlavā vāhlikāśca ye /
prāyeṇa gaurāḥ kartavyā uttarā ye śritā diśam

pāñcālāḥ śaurasenāśca māhiṣāścauḍramāgadhāḥ /
aṅgā vaṅgāḥ kaliṅgāśca śyāmāḥ kāryāstu varṇataḥ

brāhmaṇāḥ kṣatriyāścaiva gaurāḥ kāryāstathaiva hi /
vaiśyāḥ śūdrāstathā caiva śyāmāḥ kāryāstu varṇataḥ

evaṃ kṛtvā yathānyāyaṃ mukhāṅgopāṅgavartanām /
śmaśrukarma prayuñjīta deśakālavayo 'nugam

śuddhaṃ vicitraṃ śyāmaṃ ca tathā romaśameva ca /
bhaveccaturvidhaṃ śmaśru nānāvasthāntarātmakam

śuddhaṃ tu liṅgināṃ kāryaṃ tathāmātyapurodhasām /
madhyasthā ye ca puruṣā ye ca dīkṣāṃ samāśritāḥ

divyā ye puruṣāḥ kecitsiddhavidyādharādayaḥ /
pārthivāśca kumārāśca ye ca rājopajīvinaḥ

śṛṅgāriṇaśca ye martyā yauvanonmādinaśca ye /
teṣāṃ vicitraṃ kartavyaṃ śmaśru nāṭyaprayoktṛbhiḥ

anistīrṇapratijñānāṃ duḥkhitānāṃ tapasvinām /
vyasanābhihatānāṃ ca śyāmaṃ śmaśru prayojayet

ṛṣīṇāṃ tāpasānāṃ ca ye ca dīrghavratā narāḥ /
tathā ca cīrabaddhānāṃ romaśaṃ śmaśru kīrtitam

evaṃ nānāprakāraṃ tu śmaśru kāryaṃ prayoktṛbhiḥ /
ata ūrdhvaṃ pravakṣyāmi veṣānnānāprayogajān

śuddho vicitro malinastrividho veṣa ucyate /
teṣāṃ niyogaṃ vakṣyāmi yathāvadanupūrvaśaḥ

devābhigamane caiva maṅgale niyamasthite /
tithinakṣatrayoge ca vivāhakaraṇe tathā

dharmapravṛttaṃ yatkarma striyo vā puruṣasya vā /
veṣasteṣāṃ bhavecchuddho ye ca prāyatnikā narāḥ

devadānavayakṣāṇāṃ gandharvoragarakṣasām /
nṛpāṇāṃ karkaśānāṃ ca citro veṣa udāhṛtaḥ

vṛddhānāṃ brāhmaṇānāṃ ca śreṣṭhyamātyapurodhasām /
vaṇijāṃ kāñcukīyānāṃ tathā caiva tapasvinām

viprakṣetriyavaiśyānāṃ sthānīyā ye ca mānavāḥ /
śuddho vastravidhisteṣāṃ kartavyo nāṭakāśrayaḥ

unmattānāṃ pramattānāmadhvagānāṃ tathaiva ca /
vyasanopahatānāṃ ca malino veṣa ucyate

śuddharaktavicitrāṇi vāsāṃsyūrdhvāmbarāṇi ca /
yojayennāṭyatattvajño veṣayoḥ śuddhacitrayoḥ

kuryādveṣe tu maline malinaṃ tu vicakṣaṇaḥ /
muninirgranthaśākyeṣu yatipāśupateṣu ca

vratānugastu kartavyo veṣo lokasvabhāvataḥ /
cīravalkalacarmāṇi tāpasānāṃ tu yojayet

parivāṇmuniṣkyānāṃ vāsaḥ kāṣāyamiṣyate /
nānācitrāṇi vāsāṃsi kuryātpāśupateṣvatha

kujātayaśca ye proktāsteṣāṃ caiva yathārhataḥ /
antaḥpurapraveśe ca viniyuktā hi ye narāḥ

kāṣāyakañcukapaṭāḥ kāryāste 'pi yathāvidhi /
avasthānatarataścaiva nṛṇāṃ veṣo bhavedatha

veṣaḥ sāṃgrāmikaścaiva śūrāṇāṃ saṃprakīrtitaḥ /
vicitraśastrakavaco baddhatūṇo dhanurdharaḥ

citro veṣastu kartavyo nṛpāṇāṃ nityameva ca /
kevalastu bhavecchuddho nakṣatrotpātamaṅgale

evameṣa bhavedveṣo deśajātivayo 'nugaḥ /
uttamādhamamadhyānāṃ strīṇāṃ nṛṇāmathāpi ca

evaṃ vastravidhiḥ kāryaḥ prayoge nāṭakāśraye /
nānāvasthāṃ samāsādya śubhāśubhakṛtastathā

tathā pratiśiraścāpi kartavyaṃ nāṭakāśrayam /
divyānāṃ mānuṣāṇāṃ ca deśajātivayaḥśritam

pārśvāgatā mastakinastathā caiva kirīṭinaḥ /
trividho mukuṭo jñeyo divyapārthivasaṃśritaḥ

devagandharvayakṣāṇāṃ pannagānāṃ sarakṣasām /
kartavyā naikavihiata mukuṭāḥ pārśvamaulayaḥ

uttamā ye ca divyānāṃ te ca kāryāḥ kirīṭinaḥ /
madhyamā maulinaścaiva kaniṣṭhāḥ ṣirṣamaulinaḥ

narādhipānāṃ kartavyā mastake mukuṭā budhaiḥ /
vidyādharāṇāṃ ca siddhānāṃ cāraṇānāṃ tathaiva ca

granthimatkeśamukuṭāḥ kartavyāstu prayoktṛbhiḥ /
rākṣodānavadaityānāṃ piṅgakeśekṣaṇāni hi

haricchśmaśrūṇi ca tathā mukuṭāsyāni kārayet /
uttamaścāpi ye tatra te kāryāḥ pārśvamaulinaḥ

kasmāttu mukuṭāḥ sṛṣṭāḥ prayoge divypārthive /
keśānāṃ chedanaṃ dṛṣṭaṃ vedavāde yathāśruti

bhadrīkṛtasya vā yajñe śirasaśchādanecchayā /
keśānāmapyadīrghatvātsmṛtaṃ mukuṭadhāraṇam

senāpateḥ punaścāpi yuvarājasya caiva hi /
yojayedardhamukuṭaṃ mahāmātrāśca ye narāḥ

amātyānāṃ kañcukināṃ tathā śreṣṭhipurodhasām /
veṣṭanābaddhapaṭṭāni pratiśīrṣāṇi kārayet

piśāconmattabhūtānāṃ sādhakānāṃ tapasvinām /
anistīrṇapratijñānāṃ lambakeśaṃ bhavecchiraḥ

śākyaśrotriyanirgranthaparivrāḍdīkṣiteṣu ca /
śiromuṇḍaṃ tu kartavyaṃ yajñadīkṣānviteṣu ca

tathā vratānugaṃ caiva śeṣānāṃ liṅgināṃ śiraḥ /
muṇḍaṃ vā kuñcitaṃ vāpi lambakeśamathāpi vā

dhūrtānāṃ caiva kartavyaṃ ye ca rātryupajīvinaḥ /
śṛṅgāracittāḥ puruṣāsteṣāṃ kuñcitamūrdhajāḥ

bālānāmapi kartavyaṃ triśikhaṇḍavibhūṣitam /
jaṭāmakuṭabaddhaṃ ca munīnāṃ tu bhavecchiraḥ

ceṭānāmapi kartavyaṃ triśikhaṃ muṇḍameva vā /
vidūṣakasya khalatiḥ syātkākapadameva vā

śeeṣāṇāmarthayogena deśajātisamāśrayam /
śiraḥ prayoktṛbhiḥ kāryaṃ nānāvasthāntarāśrayam

bhūṣaṇairvarṇakairvastrairmālyaiścaiva yathāvidhi /
evaṃ nānāprakāraistu buddhyā veṣānprakalpayet

pūrvaṃ tu prakṛtiṃ sthāpya prayogaguṇasaṃbhavām /
strīṇāṃ vā puruṣāṇāṃ vāpyavasthāṃ prāpya tādṛśīm

sarve bhāvāśca divyānāṃ kāryā mānuṣasaṃśrayāḥ /
teṣāṃ cānimiṣatvādi naiva kāryaṃ prayoktṛbhiḥ

iha bhāvarasāścaiva dṛṣṭibhiḥ saṃpratiṣṭhitāḥ /
dṛṣṭyaiva sthāpito hyarthaḥ paścādaṅgairvibhāvyate

evaṃ jñeeyāṅgaracanā nānāprakṛtisaṃbhavā /
sajīva iti yaḥ proktastasya vakṣyāmi lakṣaṇam

yaḥ prāṇināṃ praveśo vai sajīva iti saṃjñitaḥ /
catuṣpado 'tha dvipadastathā caivāpadaḥ smṛtaḥ

uragānapadān vidyād dvipadānkhagamānuṣān /
grāmyā āraṇyāḥ paśavo vijñeyāḥ syuścatuṣpadāḥ

ye te tu yaddhasaṃpheṭairuparodhaistathaiva ca /
nānāpraharaṇopetāḥ prayojyā nāṭake budhaiḥ

āyudhāni ca kāryāṇi puruṣāṇāṃ pramāṇataḥ /
tānyahaṃ vartayiṣyāmi yathāpustapramāṇataḥ

bhiṇḍirdvādaśatālaḥ syāddaśa kunto bhavedatha /
aṣṭau śataghnī śūlaṃ ca tomaraḥ śaktireva vā

aṣṭau tālā dhanurjñeyamāyāmo 'sya dvihastakaḥ /
śaro gadā ca vajrā ca catustālaṃ vidhīyate

aṅgulāni tvasiḥ kāryaścatvāriṃśatpramāṇataḥ /
dvādaśāṅgulakaṃ cakraṃ tato 'rdhaṃ prāsa iṣyate

prāsavatpaṭṭasaṃ vidyāddaṇḍaścaiva tu viṃśatiḥ /
viṃśatiḥ kaṇayaścaiva hyaṅgulāni pramāṇataḥ

śoḍaṣāṅgulavistīrṇaṃ sabalaṃ saṃpraghaṇṭikam /
triṃśadaṅgulimānena kartavyaṃ kheṭakaṃ budhaiḥ

jarjaro daṇḍakāṣṭhaṃ ca tathaiva pratiśīrṣakam /
chatraṃ cāmaraṃ caiva dhvajo śṛṅgāra eva ca

yatkiñcinmānuṣe loke dravyaṃ puṃsāṃ prayojakam /
yaccopakaraṇaṃ sarve nāṭye tatsaṃprakīrtitam

yadyasya viṣayaprāptaṃ tenohyaṃ tasya lakṣaṇam /
jarjare daṇḍakāṣṭhe ca saṃpravakṣyāmi lakṣaṇam

māhendrā vai dhvajāJ proktā lakṣaṇairviśvakarmaṇā /
eṣānyatamaṃ kuryājjarjaraṃ dārukarmataḥ

athavā vṛkṣayoniḥ syātpraroho vāpi jarjaraḥ /
veṇureva bhavecchreṣṭhastasya vakṣyāmi lakṣaṇam

śvetabhūmyāāṃ tu yo jātaḥ puṣyanakṣatrajastathā /
saṃgrāhyo vai bhavedveṇurjarjarārthe prayatnataḥ

pramāṇamaṅgulānāṃ tu śatamaṣṭottaraṃ bhavet /
pañcaparvā caturgranthistālamātrastathaiva ca

sthūlagranthirna kartavyo na śākhī na ca kīṭavān /
na kṛmikṣataparvā ca na hīnaścānyaveṇubhiḥ

madhusarpissarṣapāktaṃ mālyadhūpapuraskṛtam /
upāsya vidhivadveṇuṃ gṛhṇiyājjarjaraṃ prati

yo vidhiryaḥ kramaścaiva māhebdre tu dhvaje smṛtaḥ /
sa jarjarasya kartavyaḥ puṣyaveṇusamāśrayaḥ

bhavedyo dīrghaparvā tu tanupatrastathaiva ca /
parvāgrataṇḍulaścaiva puṣyaveṇuḥ sa kīrtitaḥ

vidhireṣa mayā prokto jarjarasya pramāṇataJḥ /
ata ūrdhvaṃ pravakṣyāmi daṇḍakāṣṭhasya lakṣaṇam

kapitthabilvavaṃśebhyo daṇḍakāṣṭhaṃ bhavedatha /
vakraṃ caiva hi kartavyaṃ tribhāge lakṣaṇānvitam

kīṭairnopahataṃ yacca vyādhinā na ca pīḍitam /
mandaśākhaṃ bhavedyacca daṇḍakāṣṭhaṃ tu tadbhavet

yastvebhirlakṣaṇairhīnaṃ daṇḍakāṣṭhaṃ sajarjaram /
kārayetsa tvapacayaṃ mahāntaṃ prāpnuyāddhruvam

atha śīrṣavibhāgārthaṃ ghaṭī kāryā prayatnataḥ /
svapramāṇavinirdiṣṭā dvātriṃśatyaṅgulāni vai

bilvamadhyena kartavyā ghaṭī sirasamāśrayā /
svinnena bilvakalkena draveṇa ca samanvitā

bhasmanā vā tuṣairvāpi kārayetpratiśīrṣakam /
saṃchādya tu tato vastrairbilvadugdhairghaṭāśrayaiḥ

bilvakalkena cīraṃ tu digdhvā saṃyojayedghaṭīm /
na sthūlāṃ nānatāṃ tanvīṃ dīrghāṃ naiva ca kārayet.

tasyāmātapaśuṣkāyāṃ suśuṣkāyāmathāpi vā /
chedyaṃ budhāḥ prakurvanti vidhidṛṣṭena karmaṇā

sutīkṣṇena tu śastreṇa ardhārdhaṃ pravibhajya ca /
svapramāṇavinirdiṣṭaṃ lalāṭakṛtakoṇakam

ardhāṅgulaṃ lalāṭaṃ tu kāryaṃ chedyaṃ ṣaḍaṅgulam /
ardhārdhamaṅgulaṃ chedyaṃ kaṭayordvyaṅgulaṃ bhavet

kaṭānte karṇanālasya chedyaṃ dvyadhikamaṅgulam /
tryaṅgulaṃ karṇavivaraṃ tathā syācchedyameva hi

tataścaivāvaṭuḥ kāryā susamā dvādaśāṅgulā /
ghaṭyāṃ hyetatsadā cchedye vidhānaṃ vihitaṃ mayā
tasyoparigatā kāryā mukuṭā bahuśilpajāḥ /
nānāratnapraticchannā bahurūpopaśobhitāḥ

tathopakaraṇānīha nāṭyayogakṛtāni vai /
bahuprakārayuktāni kurvīta prakṛtiṃ prati

yatkiñcidasmin loke tu carācarasamanvite /
vihitaṃ karma śilpaṃ vā tattūpakaraṇaṃ smṛtam

yadyasya viṣayaṃ prāptaṃ tattadevābhigacchati /
nāstantaḥ puruṣāṇāṃ hi nāṭyopakaraṇāśraye

yadyenotpāditaṃ karma śilpayogakriyāpi vā /
tasya tena kṛtā sṛṣṭiḥ pramāṇaṃ lakṣaṇaṃ tathā

yā kāṣṭhayantrabhūyiṣṭhā kṛtā sṛṣṭirmahātmanā /
na sāsmākaṃ nāṭyayoge kasmātkhedāvahā hi sā

yaddravyaṃ jīvaloke tu nānālakṣaṇalakṣitam /
tasyānukṛtisaṃsthānaṃ nāṭyoopakaraṇaṃ bhavet

prāsādagṛhayānāni nānāpraharaṇāni ca /
na śakyaṃ tāni vai kartuṃ yathoktānīha lakṣaṇaiḥ

lokadharmī bhavettvanyā nāṭyadharmī tathāparā /
svabhāvo lokadharmī tu vibhāvo nāṭyameva hi

āyasaṃ na tu kartavyaṃ na ca sāramayaṃ tathā /
nāṭyopakaraṇaṃ tajjñairgurukhedakara bhavet

kāṣṭhacarmasu vastrṣu jatuveṇudaleṣu ca /
nāṭyopakaraṇānīha laghukarmāṇi kārayet

carmavarmadhvajāḥ śailāḥ prāsādā devatāgṛhāḥ /
hayavāraṇayānāni vimānāni gṛhāṇi ca

pūrvaṃ veṇudalaiḥ kṛtvā kṛtīrbhāvasamāśrayāḥ /
tataḥ suraṅgairacchādya vastraiḥ sārūpyamānayet

athavā yadi vastrāṇāmasānnidhyaṃ bhavediha /
tālīyairvā kiliñjairvā ślakṣṇairvastrakriyā bhavet

tathā praharaṇāni syustṛṇaveṇudalādibhiḥ /
jantubhāṇḍakriyābhiśca nānārūpāṇi nāṭake

pratipādaṃ pratiśiraḥ pratihastaṃ pratitvacam /
tṛṇaiḥ kiliñjairbhāṇḍairvā sārūpyāṇi tu kārayet

yadyasya sadṛśaṃ rūpaṃ sārūpyaguṇasaṃbhavam /
mṛṇmayaṃ tattu kṛtsnaṃ tu nānārūpaṃ tu kārayet

bhāṇḍavastramadhūcchiṣṭairlākṣayābhradalena ca /
nāgāste vividhāḥ kāryā hyatasīśaṇabilvajaiḥ

nānākusumajātīśca phalāni vividhāni ca /
bhāṇḍavastramadhūcchiṣṭairlākṣayā vāpi kārayet

bhāṇḍavastramadhūcchiṣṭaistāmrapatraistathaiva ca /
samyakca nīlīrāgeṇāpyabhrapatreṇa caiva hi

rañjitenābhrapatreṇa maṇīścaiva prakārayet /
upāśrayamathāpyeṣaṃ śulbavaṅgena kārayet

vividhā mukuṭā divā pūrvaṃ ye gaditā mayā /
te 'bhrapatrojvalāḥ kāryā maṇīvyālopaśobhitāḥ

na śāstraprabhavaṃ karma teṣāṃ hi samudāhṛtam /
ācāryabuddhyā kartavyamūhāpohaprayojitam

eṣa martyakriyāyogo bhaviṣyatkalpito mayā /
kasmādalpabalatvaṃ hi manuṣyeṣu bhaviṣyati

martyānāmapi no śakyā vibhāvāḥ sarvakāñcanāḥ /
neṣṭāḥ suvarṇaratnaistu mukuṭā bhūṣaṇāni vā

yuddhe niyuddhe nṛtte vā vṛṣṭivyāpārakarmaṇi /
gurubhāvāvasannasya svedo mūrchā ca jāyate

svedamūrchāklamārtasya prayogastu vinaśyati /
prāṇātyayaḥ kadācicca bhavedvyāyataceṣṭayā

tasmāttāmramayaiḥ patrairabhrakai rañjitairapi /
bheṇḍairapi madhūcchiṣṭaiḥ kāryāṇyābharaṇāni tu

evaṃ lokopacāreṇa svabuddhivibhavena ca /
nāṭyopakaraṇānīha budhaḥ samyak prayojayet

na bhedyaṃ naiva ca cchedyaṃ na prahartavyameva ca /
raṅge praharaṇaiḥ kāryaṃ saṃjñāmātraṃ tu kārayet

athavā yogaśikṣābhirvidyāmāyākṛtena vā /
śastramokṣaḥ prakartavyo raṅgamadhye prayoktṛbhiḥ

evaṃ nānāprakāraistu āyudhābharaṇāni ca /
noktāni yāni ca mayā lokād grāhyāṇi tānyapi

āhāryābhinayo hyeṣa mayā proktaḥ samāsataḥ /
ata ūrdhvaṃ pravakṣyāmi sāmānyābhinayaṃ prati