Natya Shastra · Chapter 16

iti bharatīye nāṭyaśāstre chandovicitirnāma pañcadaśo 'dhyāyaḥ
atha ṣoḍaśo 'dhyāyaḥ
vibhūṣaṇaṃ cākṣarasaṃhatiśca śobhābhimānau guṇakīrtanaṃ ca /
protsāhanodāharaṇe niruktaṃ guṇānuvādo 'tiśayaśca hetuḥ

sārūpyamithyādhyavasāyasiddhi padoccayākrandamanorathāśca /
ākhyānayāñcāpratiṣedhapṛcchā dṛṣṭāntanirbhāsanasaṃśayāśca

āśīḥ priyoktiḥ kapaṭaḥ kṣamā ca prāptiśca paścāttapanaṃ tathaiva /
arthānuvṛttirhyupapattiyuktī kāryo 'nunītiḥ paridevanaṃ ca

ṣaṭtriṃśadetāni hi lakṣaṇāni proktāni vai bhūṣaṇasaṃmitāni /
kāvyeṣu bhāvārthagatāni tajjñaiḥ samyag prayojyāni yathārasaṃ tu

alaṅkārairguṇaiścaiva bahubhiḥ samalaṅkṛtam /
bhūṣaṇairiva vinyastaistad bhūṣaṇamiti smṛtam

yatrālpairakṣaraiḥ śliṣṭairvicitramupavarṇyate /
tamapyakṣarasaṅghātaṃ vidyāllakṣaṇasaṃjñitam

siddhairarthaissamaṃ kṛtvā hyasiddho 'rthaḥ prasādhyate /
yatra ślakṣṇavicitrārthā sā śobhetyabhidhīyate

dhāryamāṇastu bahubhirvacanaiḥ kāryayuktibhiḥ /
na yaḥ paryavatiṣṭheta so 'bhimānastu saṃjñitaḥ

kīrtyamānairguṇairyatra vividhārthasamudbhavaiḥ /
doṣā na parikathyante tajjñeyaṃ guṇakīrtanam

loke guṇātiriktānāṃ bahūnāṃ yatra nāmabhiḥ /
eko 'bhiśabdyate yastu vijñeyaṃ guṇakīrtanam

utsāhajananaiḥ spaṣṭairarthairopamyasaṃśrayaiḥ /
prasiddhairupagūḍhaṃ ca jñeyaṃ protsāhanaṃ budhaiḥ

yatraikasyāpi śabdasya darśanātsubahūnyapi /
yānti siddhimanuktāni tadudāharaṇaṃ smṛtam

niruktaṃ dvividhaṃ proktaṃ tathyaṃ cātathyameva vā /
siddhiprasādhitaṃ tathyamatathyaṃ cāprasādhitam

guṇānuvādo hīnānāmuttamairupamākṛtaḥ /
uttamārthaviśeṣo yaḥ sa cāpyatiśayaḥ smṛtaḥ

bahūnāṃ bhāṣamāṇānāmekasyārthavinirṇayāt /
siddhopamānavacanaṃ heturityabhisaṃjñitaḥ

apadeśastu parokṣo yasmādutpadyate 'nukaraṇena /
lakṣaṇasamānakaraṇāt sārūpyaṃ tattu nirdeśyam

abhūtapūrvairyatrārthaistulyasyārthasya nirṇayaḥ /
sa mithyādhyavasāyastu procyate kāvyalakṣaṇe

bahūnāṃ tu pradhānānāṃ madhye yannāma kīrtyate /
ekārthasādhanakṛtaṃ sā siddhiriti kīrtyate

guṇairbahubhirekārthaiḥ padairyaḥ saṃpraśasyate /
padoccayaṃ tu tadvidyānnānārthagrathanātmakam

ātmabhāvamupanyasya parasādṛśyayuktibhiḥ /
tīvrārthabhāṣaṇaṃ yatsyādākrandaḥ sa tu kīrtitaḥ

hṛdayasthasya bhāvasya suspaṣṭārthapradarśanam /
anyāpadeśakathanairmanoratha iti smṛtaḥ

apṛṣṭairathavā pṛṣṭairnirṇayaḥ kriyate tu yaḥ /
ākhyānamiti tajjñeyaṃ lakṣaṇaṃ nāṭakāśrayam

ādau yatkrodhajananamante harṣapravardhanam /
yattu priyaṃ punarvākyaṃ sā yāñcā parikīrtitā

kāryeṣu viparīteṣu yadi kiñcit pravartate /
nivāryate ca kāryajjñaiḥ pratiṣedhaḥ prakīrtitaḥ

yatrākārodbhavairvākyairātmānamathavā param /
pṛcchannivābhidhatte 'rthaṃ sā pṛcchetyabhisaṃjñitā

vidvān pūrvopalabdhau yatsamatvamupapādayet /
nidarśanakṛtastajjñaiḥ sa dṛṣṭānta iti smṛtaḥ

anekayuktimadvākyamanekārthaprasādhakam /
anekavākyasaṃyuktaṃ tannirbhāsanamucyate

aparijñātatattvārthaṃ yatra vākyaṃ samāpyate /
so 'nekatvādvicārāṇāṃ saṃśayaḥ parikīrtitaḥ

yatra śāstrārthasampannāṃ manorathasamudbhavām /
aprārthanīyāmanyāṃ vā vidustāmāśiṣaṃ budhāḥ

ādau yat krodhajananamante harṣapravardhanam /
tat priyaṃ vacanaṃ jñeyamāśīrvādasamanvitam

chalayuktyā tvanyeṣāmabhisandhānābhibhāvakaṃkapaṭam /
dvitriprayogayukto vijñeyaḥ kapaṭasaṅghātaḥ

durjanodāhṛtai rūkṣaiḥ sabhāmadhye 'titāḍitaḥ /
akrodhaḥ krodhajananairvākyairyaḥ sā kṣamā bhavet

dṛṣṭvaivāvayavaṃ kañcidbhāvo yatrānumīyate /
prāptiṃ tāmabhijānīyāllakṣaṇaṃ nāṭakāśrayam

akāryaṃ sahasā kṛtvā'kṛtvā kāryamathāpi vā /
santāpo manaso yastu paścāttāpaḥ prakīrtitaḥ

praśrayeṇārthasaṃyuktaṃ yatparasyānuvartanam /
snehāddākṣiṇyayogādvā sānuvṛttistu saṃjñitā

prāptānāṃ yatra doṣāṇāṃ kriyate śamanaṃ punaḥ /
sā jñeyā hyupapattistu lakṣaṇaṃ nāṭakāśrayam

sādhyate yo 'rthasambandho mahadbhiḥ samavāyataḥ /
parasparānukūlyena sā yuktiḥ parikīrtitā

yatrāpasārayan doṣaṃ guṇamarthena yojayet /
guṇābhivādaṃ doṣān vā kāryaṃ tallakṣaṇaṃ viduḥ

apūrvakrodhajanitamaparādhaṃ pramṛjya yat /
sevārthaṃ madhuraṃ vākyamanunītiḥ prakīrtitā

doṣairyadanyanāmoktaiḥ prasiddhārthaiḥ prayojayet /
anyatrārthena sambaddhaṃ jñeyaṃ tat paridevanam

upamā rūpakaṃ caiva dīpakaṃ yamakaṃ tathā /
alaṅkārāstu vijñeyā catvāro nāṭakāśrayāḥ

yatkiñcit kāvyabandheṣu sādṛśyenopamīyate /
upamā nāma sā jñeyā guṇākṛtisamāśrayā

ekasyaikena sā kāryā hyanekenāthavā punaḥ /
anekasya tathaikena bahūnāṃ bahubhistathā

tulyaṃ te śaśinā vaktramityekenaikasaṃśrayā /
śaśāṅkavat prakāśante jyotīṃṣīti bhavettu yā

ekasyānekaviṣayā sopamā parikīrtitā /
śyenabarhiṇabhāsānāṃ tulyārthamiti yā bhavet

ekasya bahubhiḥ sāmyādupamā nāṭakāśrayā /
bahūnāṃ bahubhirjñeyā ghanā iva gajā iti

praśaṃsā caiva nindā ca kalpitā sadṛśī tathā /
yā kiñcitsadṛśī jñeyā sopamā pañcadhā budhaiḥ

praśaṃsā yathā:
dṛṣṭvā tu tāṃ viśālākṣīṃ tutoṣa manujādhipaḥ /
munibhiḥ sādhitāṃ kṛcchrāt siddhiṃ mūrtimatīmiva

nindā yathā:
sā taṃ sarvaguṇairhīnaṃ sasvaje karkaśacchavim /
vane kaṇṭakinaṃ vallī dāvadagdhamiva drumam

kalpitā yathā:
kṣaranto dānasalilaṃ lālāmantharagāminaḥ /
mataṅgajā virājante jaṅgamā iva parvatāḥ

sadṛśī yathā:
yattvayādya kṛtaṃ karma paricittānurodhinā /
sadṛśaṃ tattavaiva syādatimānuṣakarmaṇaḥ

kiñcitsadṛśī yathā:
sampūrṇacandravadanā nīlotpaladalekṣaṇā /
mattamātaṅgagamanā samprāpteyaṃ sakhī mama

upamāyā budhairete bhedā jñeyāḥ samāsataḥ /
śeṣā ye lakṣaṇairnoktāste grāhyāḥ kāvyalokataḥ

nānādhikaraṇārthānāṃ śabdānāṃ saṃpradīpakam /
ekavākyena saṃyuktaṃ taddīpakamucyate

prasṛtaṃ madhuraṃ cāpi guṇaiḥ sarvairalaṅkṛtam /
kāvye yannāṭake viprāstaddīpakamiti smṛtam

yathā:
sarāṃsi haṃsaiḥ kusumaiśca vṛkṣā mattairdvirephaiśca saroruhāṇi /
goṣṭhībhirudyānavanāni caiva tasminnaśūnyāni sadā kriyante

svavikalpena racitaṃ tulyāvayavalakṣaṇam /
kiñcitsādṛśyasampannaṃ yadrūpaṃ rūpakaṃ tu tat

nānādravyānurāgādyairyadaupamyaguṇāśrayam /
rūpanirvarṇanāyuktaṃ tadrūpakamiti smṛtam

yathā:
padmānanāstāḥ kumudaprahāsā vikāsinīlotpalacārunetrāḥ /
vāpīstriyo haṃsakulairnaḥ svanadbhirvirejuranyonyamivāhvayantyaḥ

śabdābhyāsastu yamakaṃ padādiṣu vikalpitam /
viśeṣadarśanañcāsya gadato me nibodhata

pādāntayamakaṃ caiva kāñcīyamakameva ca /
samudgayamakaṃ caiva vikrāntayamakaṃ tathā

yamakaṃ cakravālaṃ ca sandaṣṭayamakaṃ tathā /
padādiyamakañcaiva hyāmreḍitamathāpi ca

caturvyavasitañcaiva mālāyamakameva ca /
etādṛśavidhaṃ jñeyaṃ yamakaṃ nāṭakāśrayam

caturṇāṃ yatra pādānāmante syātsamamakṣaram /
tadvai pādāntayamakaṃ vijñeyaṃ nāmato yathā

dinakṣayāt saṃhṛtaraśmimaṇḍalaṃ
divīva lagnaṃ tapanīyamaṇḍalam |
vibhāti tāmraṃ divi sūryamaṇḍalaṃ
yathā taruṇyāḥ stanabhāramaṇḍalam

lokānāṃ prabhaviṣṇurdaityendragadānipātanasahiṣṇuḥ /
jayati suradaityajiṣṇurbhagavānasuravaramathanakārī viṣṇuḥ

pādasyānte tathā cādau syātāṃ yatra same pade /
tatkāñcīyamakaṃ caiva vijñeyaṃ sūribhiryathā

yāmaṃ yāmaṃ candravatīnāṃ dravatīnāṃ
vyaktāvyaktā sārajanīnāṃ rajanīnām |
phulle phulle sambhramare vābhramare vā
rāmā rāmā vismayate ca smayate ca

ardhenaikena yadvṛttaṃ sarvameva samāpyate /
samudgayamakaṃ nāma tajjñeyaṃ paṇḍitairyathā

ketakīkusumapāṇḍuradantaḥ
śobhate pravarakānanahastī |
ketakīkusumapāṇḍuradantaḥ
śobhate pravarakānanahastī

ekaikaṃ pādamutkramya dvau pādau sadṛśau yadi /
vikrāntayamakaṃ nāma tadvijñeyamidaṃ yathā

sa pūrvaṃ vāraṇo bhūtvā dviśṛṅga iva parvataḥ /
abhavaddantavaikalyādviśṛṅga iva parvataḥ

pūrvasyāntena pādasya parasyādiryadā samaḥ /
cakravaccakravālaṃ tu vijñeyaṃ nāmato yathā

tulyātpādadvayādantyādekenādiryadā samaḥ /
sarvatra cakravālantu tadvijñeyaṃ budhairyathā

śailā yathā śatrubhirāhatā hatā hatāśca bhūyastvanupuṅkhapuṅkhagaiḥ /
khagaiśca sarvairyudhi sañcitāścitāścitādhirūḍhā nihitāstalaistalaiḥ

ādau dvau yatra pādau tu bhavetāmakṣare samau /
sandaṣṭayamakaṃ nāma vijñeyaṃ tadbudhairyathā

paśya paśya ramaṇasya me guṇān yena yena vaśagāṃ karoti mām /
yena yena hi sameti darśanaṃ tena tena vaśagāṃ karoti mām

ādau pādasya tu yatra syāt samāveśaḥ samākṣaraḥ /
pādādiyamakaṃ nāma tadvijñeyaṃ budhairyathā

viṣṇuḥ sṛjati bhūtāni viṣṇuḥ saṃharate prajāḥ /
viṣṇuḥ prasūte trailokyaṃ viṣṇurlokādhidaivatam

pādasyāntaṃ padaṃ yatra dvirdvirekamihocyate /
jñeyamāmreḍitaṃ nāma yamakaṃ tatra sūribhiḥ

vijṛmbhitaṃ niḥśvasitaṃ muhurmuhuḥ kathaṃ vidheyaṃ smaraṇaṃ pade pade /
yathā ca te dhyānamidaṃ punaḥ punardhuvaṃgatā te rajanī vinā vinā

sarve pādāḥ samā yatra bhavanti niyatākṣarāḥ /
caturvyavasitaṃ nāma tadvijñeyaṃ budhairyathā

vāraṇānāmayameva kālo vāraṇānāmayameva kālaḥ /
vāraṇānāmayameva kālo vāraṇānāmayameva kālaḥ

nānārūpaiḥ svarairyuktaṃ yatraikaṃ vyañjanaṃ bhavet /
tanmālāyamakaṃ nāma vijñeyaṃ paṇḍitairyathā

lalī balī halī mālī khelī mālī salī jalī /
khalo balo 'balo mālī musalī tvābhirakṣatu

asau hi rāmā rativigrahapriyā rahaḥpragalbhā ramaṇaṃ manogatam /
ratena rātriṃ ramayet pareṇa vā na cedudeṣyattaruṇaḥ paro ripuḥ

na puṣkarākṣaḥ kṣatajokṣitākṣaḥ kṣaratkṣatevyaḥ kṣatajaṃdurīkṣaḥ /
kṣatairgavākṣairiva saṃvṛtājñaḥ sākṣāt sahasrākṣa ivāvabhāti

ebhirarthakriyāpekṣaiḥ kāryaṃ kāvyaṃ tu lakṣaṇaiḥ /
ataḥ paraṃ pravakṣyāmi kāvye doṣān guṇāṃstathā

gūḍhārthamarthāntaramarthahīnaṃ bhinnārthamekārthamabhiplutārtham /
nyāyāvapetaṃ viṣamaṃ visandhi śabdacyutaṃ vai daśa kāvyadoṣāḥ

paryāyaśabdābhihataṃ gūḍhārthamabhisaṃjñitam /
avarṇyaṃ varṇyate yatra tadarthāntaramiṣyate

arthahīnaṃ tvasambaddhaṃ sāvaśeṣārthameva ca /
bhinnārthamabhivijñeyamasabhyaṃ grāmyameva ca

vivakṣito 'nya evārtho yatrānyārthena bhidyate /
bhinnārthaṃ tadapi prāhuḥ kāvyaṃ kāvyavicakṣaṇāḥ

aviśeṣābhidhānaṃ yat tadekārthamiti smṛtam /
abhiplutārthaṃ vijñeyaṃ yat padena samasyate

nyāyādapetaṃ vijñeyaṃ pramāṇaparivarjitam /
vṛttabhedo bhavedyatra viṣamaṃ nāma tadbhavet

anupaśiṣṭaśabdaṃ yat tadvisandhīti kīrtitam /
śabdacyutañca vijñeyamaśabdasvarayojanāt

ete doṣāstu vijñeyāḥ sūribhirnāṭakāśrayāḥ /
guṇā viparyayādeṣāṃ mādhuryaudāryalakṣaṇāḥ

śleṣaḥ prasādaḥ samatāsamādhirmādhuryamojaḥ padasaukumāryam /
arthasya ca vyaktirudāratā ca kāntiśca kāvyasya guṇā daśaite

īpsitenārthajātena sambaddhānāṃ parasparam /
śliṣṭatā yā padānāṃ hi śleṣa ityabhidhīyate

vicāragahanaṃ yatsyāt sphuṭañcaiva svabhāvataḥ /
svataḥ supratibaddhañca śliṣṭaṃ tat parikīrtyate

apyanukto budhairyatra śabdo 'rtho vā pratīyate /
sukhaśabdārthasaṃyogāt prasādaḥ parikīrtyate

nāticūrṇapadairyuktā na ca vyarthābhidāyibhiḥ /
durbodhanaiśca na kṛtā samatvāt samatā matā

anyonyasadṛśā yatra tathā hyanyonyabhūṣaṇāḥ /
alaṅkārā guṇāścaiva samāḥ syuḥ samatāṃ matāḥ

abhiyuktairviśeṣastu yo 'rthasyehopalakṣyate /
tena cārthena sampannaḥ samādhiḥ parikīrtyate

upamāsviha dṛṣṭānāmarthānāṃ yatnatastathā /
prāptānāṃ cātisaṃkṣepāt samādhirnirṇayo yataḥ

bahuśo yacchrutaṃ vākyamuktaṃ vāpi punaḥ punaḥ /
nodvejayati yasmāddhi tanmādhuryamiti smṛtam

samāsavadbhirvividhairvicitraiśca padairyutam /
sānusvārairudāraiśca tadojaḥ parikīrtyate

avagīto 'pi hīno 'pi syādudāttāvabhāsakaḥ /
yatra śabdārthasampattistadojaḥ parikīrtitam

sukhaprayojyairyacchabdairyuktaṃ suśliṣṭasandhibhiḥ /
sukumārārthasaṃyuktaṃ saukumāryaṃ taducyate

suprasiddhābhidhānā tu lokakarmavyavasthitā /
yā kriyā kriyate kāvye sārthavyaktiḥ pratīyate

yasyārthānupraveśena manasā parikalpyate /
anantaraṃ prayogastu sā'rthavyaktirudāhṛtā

divyabhāvaparītaṃ yacchṛṅgārādbhutayojitam /
anekabhāvasaṃyuktamudāratvaṃ prakīrtitam

anekārthaviśeṣairyat sūktaiḥ sauṣṭhavasaṃyutaiḥ /
upetamaticitrārthaiḥ udāttaṃ tacca kīrtyate

yanmanaśśrotraviṣayamāhlādayati hīnduvat /
līlādyarthopapannāṃ vā tāṃ kāntiṃ kavayo viduḥ

yo manaśśrotraviṣayaḥ prasādajanako bhavet /
śabdabandhaḥ prayogeṇa sa kānta iti bhaṇyate

evamete hyalaṅkārā guṇā doṣāśca kīrtitāḥ /
prayogameṣāṃ ca punarvakṣyāmi rasasaṃśrayam

laghvakṣaraprāyakṛtamupamārūpakāśrayam /
kāvyaṃ kāryaṃ tu nāṭyajñaiḥ vīraraudrādbhutāśrayam

gurvakṣaraprāyakṛtaṃ bībhatse karuṇe tathā /
kadācidraudravīrābhyāṃ yadāgharṣaṇajaṃ bhavet

rūpadīpakasaṃyuktamāryāvṛttasamāśrayam /
śṛṅgāre ca rase vīre kāvyaṃ syānnāṭakāśrayam

uttarottarasaṃyuktaṃ vīre kāvyaṃ tu yadbhavet /
jagatyatijagatyāṃ vā saṃkṛtyāṃ vāpi tadbhavet

tathaiva yuddhasampheṭā utkṛtyāṃ saṃprakīrtitau /
karuṇe śakvarī jñeyā tathaivātidhṛtirbhavet

yadvīre kīrtitaṃ cchandaḥ tadraudre 'pi prayojayet /
śeṣāṇāmarthayogena cchandaḥ kāryaḥ prayoktṛbhiḥ

yacchandaḥ pūrvamuddiṣṭaṃ viṣamārdhasame samam /
udāramadhuraiḥ śabdaistatkāryaṃ tu rasānugam

śabdānudāramadhurān pramadābhidheyān nāṭyāśrayeṣu kṛtiṣu prayayeta kartum /
tairbhūṣitā bahu vibhānti hi kāvyabandhāḥ padmākarā vikasitā iva rājahaṃsaiḥ

trividhaṃ hyakṣaraṃ kāryaṃ kavibhirnāṭakāśrayam /
hrasvaṃ dīrghaṃ plutañcaiva rasabhāvavibhāvakam

ekamātraṃ bhaved hrasvaṃ dvimātraṃ dīrghamiṣyate /
plutaṃ caiva trimātraṃ syādakṣaraṃ svarayojanāt

smṛte cāsūyite caiva tathā ca paridevite /
paṭhatāṃ brāhmaṇānāñca plutamakṣaramiṣyate

akārastu smṛte kāryaṃ ūkāraścāpyasūyite /
paridevite tu hākāra Oṃkāro 'dhyayane tathā

hrasvadīrghaplutānīha yathābhāvaṃ yathārasam /
kāvyayogeṣu sarveṣu hyakṣarāṇi prayojayet

cekrīḍitaprabhṛtibhirvikṛtaistu śabdaiḥ yuktā na bhānti lalitā bharataprayogāḥ /
yajñakriyeva rurucarmadhuraiḥ kṛtāktaiḥ veśyā dvijairiva kamaṇḍaludaṇḍahastaiḥ

mṛdulalitapadārthaṃ gūḍhaśabdārthahīnaṃ budhajanasukhabhogyaṃ yuktimannṛttayogyam /
bahurasakṛtamārgaṃ sandhisandhānayuktaṃ bhavati jagati yogyaṃ nāṭakaṃ prekṣakāṇām

anubandhaḥ
bhūṣaṇākṣarasaṅghātau śobhodāharaṇe tathā /
hetusaṃśayadṛṣṭāntāḥ prāptābhiprāya eva ca

nidarśanaṃ niruktaṃ ca siddhiścātha viśeṣaṇam /
guṇātipātātiśayau tulyatarkaḥ padoccayaḥ

dṛṣṭaṃ caivopadiṣṭaṃ ca vicārastadviparyayaḥ /
bhraṃśaścānunayo mālā dākṣiṇyaṃ garhaṇaṃ tathā

arthāpattiḥ prasiddhiśca pṛcchā sārūpyameva ca /
manorathaśca leśaśca kṣobho 'tha guṇakīrtanam

jñeyānyanuktasiddhiśca priyaṃ vacanameva ca /
ṣaṭtriṃśallakṣaṇānyeva kāvyabandheṣu nirdiśet

alaṅkārairguṇaiścaiva bahubhiḥ samalaṃkṛtam /
bhūṣaṇairiva citrārthaistad bhūṣaṇamiti smṛtam

yatrālpairakṣaraiḥ śliṣṭairvicitramupavarṇyate /
tamapyakṣarasaṅghātaṃ vidyāllakṣaṇasaṃjñitam

siddhairarthaiḥ samaṃ kṛtvā hyasiddho 'rthaḥ prayujyate /
yatra śliṣṭā vicitrārthā sā śobhetyabhidhīyate

yatra tulyārthayuktena vākyenābhipradarśanāt /
sādhyante nipuṇairarthāstadudāharaṇaṃ smṛtam

yat prayojanasāmarthyāt vākyamiṣṭārthasādhakam /
samāsoktaṃ manogrāhi sa heturiti saṃjñitaḥ

aparijñātatattvārthaṃ vākyaṃ yatra samāpyate /
anekatvādvicārāṇāṃ sa saṃśaya iti smṛtaḥ

sarvalokamanogrāhi yastu pakṣārthasādhakaḥ /
hetornidarśanakṛtaḥ sa dṛṣṭānta iti smṛtaḥ

dṛṣṭvaivāvayavān kāṃścid bhāvo yatrānumīyate /
prāptiṃ tāmapi jānīyāllakṣaṇaṃ nāṭakāśrayam

abhūtapūrvo yo 'pyarthaḥ sādṛśyātparikalpitaḥ /
lokasya hṛdayagrāhī so 'bhiprāya iti smṛtaḥ

yatrārthānāṃ prasiddhānāṃ kriyate parikīrtanam /
parāpekṣādyudāsārthaṃ tannidarśanamucyate

niravadyasya vākyasya pūrvoktārthaprasiddhaye /
yaducyate tu vacanaṃ niruktaṃ tadudāhṛtam

bahūnāṃ ca pradhānānāṃ nāma yatrābhikīrtyate /
abhipretārthasiddhyarthaṃ sā siddhirabhidhīyate

siddhān bahūn pradhānārthān uktvā yatra prayujyate /
viśeṣayuktaṃ vacanaṃ vijñeyaṃ tadviśeṣaṇam

guṇābhidhānairvividhairviparītārthayojitaiḥ /
guṇātipāto madhurairniṣṭhurārthairbhavedatha

bahūn guṇān kīrtayitvā sāmānyajanasambhavān /
viśeṣaḥ kīrtyate yastu jñeyaḥ so 'tiśayo budhaiḥ

rūpakairupasābhirvā tulyārthaiḥ suprayojitaiḥ /
apratyakṣārthasaṃsparśastulyatarkaḥ prakīrtitaḥ

bahūnāṃ ca prayuktānāṃ padānāṃ bahubhiḥ padaiḥ /
uccayaḥ sadṛśārtho yaḥ sa vijñeyaḥ padoccayaḥ

yathādeśaṃ yathākālaṃ yathārūpaṃ ca varṇyate /
yatpratyakṣaṃ parokṣaṃ vā dṛṣṭaṃ tadvarṇato 'pi vā

parigṛhya tu śāstrārthaṃ yadvākyamabhidhīyate /
vidvanmanoharaṃ svantamupadiṣṭaṃ taducyate

pūrvāśayasamānārthairapratyakṣārthasādhanaiḥ /
anekopādhisaṃyukto vicāraḥ parikīrtitaḥ

vicārasyānyathābhāvastathā dṛṣṭopadiṣṭayoḥ /
sandehātkalpyate yastu sa vijñeyo viparyayaḥ

vācyamarthaṃ parityajya dṛṣṭādibhiranekadhā /
anyasminneva patanādiha bhraṃśaḥ sa iṣyate

ubhayoḥ prītijanano viruddhābhiniviṣṭayoḥ /
arthasya sādhakaścaiva vijñeyo 'nunayo budhaiḥ

īpsitārthaprasiddhyarthaṃ kīrtyate yatra sūribhiḥ /
prayojanānyanekāni sā māletyabhisaṃjñitā

hṛṣṭaiḥ prasannavadanairyatparasyānuvartanam /
kriyate vākyaceṣṭābhistaddākṣiṇyamiti smṛtam

yatra saṃkīrtayan doṣaṃ guṇamarthena darśayet /
guṇātipātād doṣādvā garhaṇaṃ nāma tadbhavet

arthāntarasya kathane yatrānyo 'rthaḥ pratīyate /
vākyamādhuryasampannā sārthāpattirudāhṛtā

vākyaiḥ sātiśayairuktā vākyārthasya prasādhakaiḥ /
lokaprasiddhairbahubhiḥ prasiddhiriti kīrtitā

yatrākārodbhavairvākyairātmānamathavā param /
pṛcchyate cābhidhatte 'rthaṃ sā pṛcchetyabhisaṃjñitā

dṛṣṭaśrutānubhūtārthakathanādisamudbhavam /
sādṛśyaṃ kṣobhajananaṃ sārūpyamiti saṃjñitam

hṛdayasthasya vākyasya gūḍhārthasya vibhāvakam /
anyāpadeśaiḥ kathanaṃ manoratha iti smṛtaḥ

yadvākyaṃ vākyakuśalairupāyenābhidhīyate /
sadṛśārthābhiniṣpattyāḥ sa leśa iti kīrtitaḥ

paradoṣairvicitrārthairyatrātmā parikīrtyate /
adṛṣṭo 'pyanyo 'pi vā kaścit sa tu kṣobha iti smṛtaḥ

loke guṇātiriktānāṃ guṇānāṃ yatra nāmabhiḥ /
eko 'pi śabdyate tattu vijñeyaṃ guṇakīrtanam

prastāvenaiva śeṣo 'rthaḥ kṛtsno yatra pratīyate /
vacanena vinānuktasiddhiḥ sā parikīrtitā

yatprasannena manasā pūjyaṃ pūjayituṃ vacaḥ /
hṛṣṭaprakāśanārthaṃ tu sā priyoktirudāhṛtā

etāni kāvyasya ca lakṣaṇāni ṣaṭtriṃśaduddeśanidarśanāni /
prabandhaśobhākaraṇāni tajjñaiḥ samyak prayojyāni rasāyanāni