Natya Shastra · Chapter 12

iti bharatīye nāṭyaśāstre maṇḍalavidhānaṃ nāma ekādaśo 'dhyāyaḥ samāptaḥ
atha dvādaśo 'dhyāyaḥ gatipracāra
evaṃ vyāyāmasaṃyoge kāryaṃ maṇḍalakalpanam /
ataḥ paraṃ pravakṣyāmi gatīstu prakṛtisthitāḥ

tatropavahanaṃ kṛtvā bhāṇḍavādyapuraskṛtam /
yathāmārgarasopetaṃ prakṛtīnāṃ praveśane

dhruvāyāṃ saṃprayuktāyāṃ paṭe caivāpakarṣite /
kāryaḥ praveśaḥ pātrāṇāṃ nānārtharasasambhavaḥ

sthānaṃ tu vaiṣṇavaṃ kṛtvā hyuttame madhyame tathā /
samunnataṃ samaṃ caiva caturasramurastathā

bāhuśīrṣe prasanne ca nātyutkṣipte ca kārayet /
grīvāpradeśaḥ kartavyo mayūrāñcitamastakaḥ

karṇādaṣṭāṅgulasthe ca bāhuśīrṣe prayojayet /
urasaścāpi cibukaṃ caturaṅgulasaṃsthitam

hastau tathaiva kartavyau kaṭīnābhitaṭasthitau /
dakṣiṇo nābhisaṃsthastu vāmaḥ kaṭitaṭasthitaḥ

pādayorantaraṃ kāryaṃ dvau tālāvardhameva ca /
pādotkṣepastu kartavyaḥ svapramāṇavinirmitaḥ

catustālo dvitālaścāpyekatālastathaiva ca /
catustālastu devānāṃ pārthivānāṃ tathaiva ca

dvitālaścaiva madhyānāṃ tālaḥ strīnīcaliṅginām /
catuṣkalo 'tha dvikalastathā hyekakalaḥ smṛtaḥ

catuṣkalo hyuttamānāṃ madhyānāṃ dvikalo bhavet /
tathā caikakalaḥ pādo nīcānāṃ saṃprakīrtitaḥ

sthitaṃ madhyaṃ drutaṃ caiva samavekṣya layatrayam /
yathāprakṛtināṭyajño gatimevaṃ prayojayet

dhairyopapannā gatiruttamānāṃ madhyā gatirmadhyamasammatānām /
drutā gatiśca pracurādhamānāṃ layatrayaṃ sattvavaśena yojyam

eṣa eva tu vijñeyaḥ kalātālalaye vidhiḥ /
punargatipracārasya prayogaṃ śruṇutānaghāḥ

svabhāvāttūttamagatau kāryaṃ jānukaṭīsamam /
yuddhacārīprayogeṣu jānustanasamaṃ nyaset

pārśvakrāntaiḥ salalitaiḥ pādairvādyānvitairatha /
raṅgakoṇonmukhaṃ gacchet samyak pañcapadāni ca

vāmavedhaṃ tataḥ kuryādvikṣepaṃ dakṣiṇena tu /
parivṛtya dvitīyaṃ tu gacchet koṇaṃ tataḥ param

tatrāpi vāmavedhastu vikṣepo dakṣiṇena ca /
tato bhāṇḍonmukho gacchet tānyeva tu padāni ca

evaṃ gatāgataiḥ kṛtvā padānāmiha viṃśatim /
vāmavedhaṃ tataḥ kuryāt vikṣepaṃ dakṣiṇasya ca

raṅge vikṛṣṭe bharatena kāryo gatāgataiḥ pādagatipracāraḥ /
tryaśrastrikoṇe caturasraraṅge gatipracāraścaturasra eva

yaḥ samaiḥ saṃhito gacchettatra kāryo layāśrayaḥ /
catuṣkalo 'tha dvikalastathaivaikakalaḥ punaḥ

atha madhyamanīcaistu gacchedyaḥ parivāritaḥ /
catuṣkalamathārdhaṃ ca tathā caikakalaṃ punaḥ

daityadānavayakṣāṇāṃ nṛpapannagarakṣasām /
catustālapramāṇena kartavyātha gatirbudhaiḥ

divaukasāṃ tu sarveṣāṃ madhyamā gatiriṣyate /
tatrāpi coddhatā ye tu teṣāṃ devaiḥ samā gatiḥ

ṛṣaya ūcuḥ:
yadā manuṣyā rājānasteṣāṃ devagatiḥ katham /
atrocyate kathaṃ naiṣā gatī rājñāṃ bhaviṣyati

iha prakṛtayo divyā divyamānuṣya eva ca /
mānuṣya iti vijñeyā nāṭyanṛttakriyāṃ prati

devānāṃ prakṛtirdivyā rājñāṃ vai divyamānuṣī /
yā tvanyā lokaviditā mānuṣī sā prakīrtitā

devāṃśajāstu rājāno vedādhyātmasu kīrtitāḥ /
evaṃ devānukaraṇe doṣo hyatra na vidyate

ayaṃ vidhistu kartavyaḥ svacchandagamanaṃ prati /
saṃbhramotpātaroṣeṣu pramāṇaṃ na vidhīyate

sarvāsāṃ prakṛtīnāṃ tu avasthāntarasaṃśrayā /
uttamādhamamadhyānāṃ gatiḥ kāryā prayoktṛbhiḥ

caturardhakalaṃ vā syāt tadardhakalameva ca /
avasthāntaramāsādya kuryād gativiceṣṭitam

jyeṣṭhe catuṣkalaṃ hyatra madhyame dvikalaṃ bhavet /
dvikalā cottame yatra madhye tvekakalā bhavet

kalikaṃ madhyame yatra nīceṣvardhakalaṃ bhavet /
evamardhārdhahīnaṃ tu jaḍānāṃ saṃprayojayet

jvarārte ca kṣudhārte ca tapaḥśrānte bhayānvite /
vismite cāvahitthe ca tathautsukyasamanvite

śṛṅgāre caiva śoke ca svacchandagamane tathā /
gatiḥ sthitalayā kāryādhikalāntarapātitā

punaścintānvite caiva gatiḥ kāryā catuṣkalā /
asvasthakāmite caiva bhaye vitrāsite tathā

āvege caiva harṣe ca kārye yacca tvarānvitam /
aniṣṭaśravaṇe caiva kṣepe cādbhutadarśane

api cātyāyike kārye duḥkhite śatrumārgaṇe /
aparāddhānusaraṇe śvāpadānugatau tathā

eteṣvevaṃ gatiṃ prājño vikalāṃ saṃprayojayet /
uttamānāṃ gatiryā tu na tāṃ madhyeṣu yojayet

yā gatirmadhyamānāṃ tu na tāṃ nīceṣu yojayet /
gatiḥ śṛṅgāriṇī kāryā svasthakāmitasambhavā

dūtīdarśitamārgastu praviśedraṅgamaṇḍalam /
sūcayā cāpyabhinayaṃ kuryādarthasamāśrayam

hṛdyairgandhaistathā vastrairalaṅkāraiśca bhūṣitaḥ /
nānāpuṣpasugandhābhirmālābhiḥ samalaṃkṛtaḥ

gacchet salalitaiḥ pādairatikrāntasthitaistathā /
tathā sauṣṭhavasaṃyuktairlayatālavaśānugaiḥ

pādayoranugau hastau nityaṃ kāryau prayoktṛbhiḥ /
utkṣipya hastaṃ pātena pādayośca viparyayāt

pracchannakāmite caiva gatiṃ bhūyo nibodhata /
visarjitajanaḥ srastastathā dūtīsahāyavān

nirvāṇadīpo nātyarthaṃ bhūṣaṇaiśca vibhūṣitaḥ /
velāsadṛśavastraśca saha dūtyā śanaistathā

vrajet pracchannakāmastu pādairniśśabdamandagaiḥ /
śabdaśaṃkyutsukaśca syādavalokanatatparaḥ

vepamānaśarīraśca śaṃkitaḥ praskhalan muhuḥ /
rase raudre tu vakṣyāmi daityarakṣogaṇān prati

eka eva rasasteṣāṃ sthāyī raudro dvijottamāḥ /
nepathyaraudro vijñeyastvaṅgaraudrastathaiva ca

tathā svabhāvajaścaiva tridhā raudraḥ prakalpitaḥ /
rudhiraklinnadeho yo rudhirārdramukhastathā

//
|
tathā piśitahastaśca raudro nepathyajastu saḥ /
bahubāhurbahumukho nānāpraharaṇākulaḥ

sthūlakāyastathā prāṃśuraṅgaraudraḥ prakīrtitaḥ /
raktākṣaḥ piṅgakeśaśca asito vikṛtasvaraḥ

rūkṣo nirbhartsanaparo raudraḥ so 'yaṃ svabhāvajaḥ /
catustālāntarotkṣiptaiḥ pādaistvantarapātitaiḥ

gatirevaṃ prakartavyā teṣāṃ ye cāpi tadvidhāḥ /
ahṛdyā tu mahī yatra śmaśānaraṇakaśmalā

gatiṃ tatra prayuñjīta bībhatsābhinayaṃ prati /
kvacidāsannapatitaiḥ vikṛṣṭapatitaiḥ kvacit

elakākrīḍitaiḥ pādairuparyupari pātitaiḥ /
teṣāmevānugairhastairbībhatse gatiriṣyate

atha vīre ca karttavyā pādavikṣepasaṃyutā /
drutapracārādhiṣṭhānā nānācārīsamākulā

pārśvakrāntaidrutāviddhaiḥ sūcīviddhaistathaiva ca /
kalākālagataiḥ pādairāvege yojayet gatim

uttamānāmayaṃ prāyaḥ prokto gatiparikramaḥ /
madhyānāmadhamānāṃ ca gatiṃ vakṣyāmyahaṃ punaḥ

vismaye caiva harṣe ca vikṣiptapadavikramān /
āsādya tu rasaṃ hāsyametaccānyaṃ ca yojayet

punaśca karuṇe kāryā gatiḥ sthirapadairatha /
bāṣpāmburuddhanayanaḥ sannagātrastathaiva ca

utkṣiptapātitakarastathā sasvanarodanaḥ /
gacchettathādhyadhikayā pratyagrāpriyasaṃśraye

eṣā strīṇāṃ prayoktavyā nīcasattve tathaiva ca /
uttamānāṃ tu kartavyā sadhairyā bāṣpasaṅgatā

niḥśvāsairāyatotsṛṣṭaistathaivordhvanirīkṣitaiḥ /
na tatra sauṣṭhavaṃ kāryaṃ na pramāṇaṃ tathāvidham

madhyānāmapi sattvajñā gatiryojyā vidhānataḥ /
uraḥpātahatotsāhaḥ śokavyākulacetanaḥ

nātyutkṣiptaiḥ padairgacchet iṣṭabandhunipātane /
gāḍhaprahāre kāryā ca śithilāṅgabhujāśrayā

vighūṇitaśarīrā ca gatiścūrṇapadairatha /
śītena cābhibhūtasya varṣeṇābhidrutasya ca

gatiḥ prayoktṛbhiḥ kāryā strīnīcaprakṛtāvatha /
piṇḍīkṛtya tu gātrāṇi teṣāṃ caiva prakampanam

karau vakṣasi nikṣipya kubjībhūtastathaiva ca /
dantoṣṭhasphuraṇaṃ caiva cibukasya prakampanam

kāryaṃ śanaiśca kartavyaṃ śītābhinayane gatau /
tathā bhayānake caiva gatiḥ kāryā vicakṣaṇaiḥ

strīṇāṃ kāpuruṣāṇāṃ ca ye cānye sattvavarjitāḥ /
visphārite cale netre vidhutaṃ ca śirastathā

bhayasaṃyuktayā dṛṣṭyā pārśvayośca vilokanaiḥ /
drutaiścūrṇapadaiścaiva baddhvā hastaṃ kapotakam

pravepitaśarīraśca śuṣkoṣṭhasskhalitaṃ vrajet /
eṣānukaraṇe kāryā tarjane trāsane tathā

sattvaṃ ca vikṛtaṃ dṛṣṭvā śrutvā ca vikṛtaṃ svaram /
eṣā strīṇāṃ prakarttavyā nṛṇāṃ cākṣiptavikramā

kvacidāsannapatitairvikṛṣṭapatitaiḥ kvacit /
elakākrīḍitaiḥ pādairuparyupari pātitaiḥ

eṣāmevānugairhastairgatiṃ bhīteṣu yojayet /
vaṇijāṃ sacivānāṃ ca gatiḥ kāryā svabhāvajā

kṛtvā nābhitaṭe hastamuttānakhaṭakāmukham /
ādyaṃ cārālamuttānaṃ kuryātpārśvaṃ stanāntare

na niṣaṇṇaṃ na ca stabdhaṃ na cāpi parivāhitam /
kṛtvā gātraṃ tathā gacchettena caiva krameṇa tu

atikrāntairpadairviprā dvitālāntaragāmibhiḥ /
yatīnāṃ śramaṇānāṃ ca ye cānye tapasi sthitāḥ

teṣāṃ kāryā gatirye tu naiṣṭhikaṃ vratamāśritāḥ /
ālolacakṣuśca bhavedyugamātranirīkṣaṇaḥ

upasthitasmṛtiścaiva gātraṃ sarvaṃ vidhāya ca /
acañcalamanāścaiva yathāvalliṅgamāśritaḥ

vinītaveṣaśca bhavet kaṣāyavasanastathā /
prathamaṃ samapādena sthitvā sthānena vai budhaḥ

hastaṃ ca caturaṃ kṛtvā tathā caikaṃ prasārayet /
prasannaṃ vadanaṃ kṛtvā prayogasya vaśānugaḥ

aniṣaṇṇena gātreṇa gatiṃ gacched vyatikramāt /
uttamānāṃ bhavedeṣā liṅgināṃ ye mahāvratāḥ

ebhireva viparyastairguṇairanyeṣu yojayet /
tathā vratānugāvasthā hyanyeṣāṃ liṅgināṃ gatiḥ

vibhrāntā vāpyudāttā vā vibhrāntanibhṛtāpi vā /
śakaṭāsyasthitaiḥ pādairatikrāntaistathaiva ca

kāryā pāśupatānāṃ ca gatiruddhatagāminī /
andhakāre 'tha yāne ca gatiḥ kāryā prayoktṛbhiḥ

bhūmau visarpitaiḥ pādairhastairmārgapradarśibhiḥ /
rathasthasyāpi kartavyā gatiścūrṇapadairatha

samapādaṃ tathā sthānaṃ kṛtvā rathagatiṃ vrajet /
dhanurgṛhītvā caikena tathā caikena kūbaram

sūtaścāsya bhavedevaṃ pratodapragrahākulaḥ /
vāhanāni vicitrāṇi kartavyāni vibhāgaśaḥ

drutaiścūrṇapadaiścaiva gantavyaṃ raṅgamaṇḍale /
vimānasthasya kartavyā hyeṣaiva syandinī gatiḥ

āroḍhumudvahed gātraṃ kiñcit syādunmukhasthitam /
asyaiva vaiparītyena kuryāccāpyavarohaṇam

adho 'valokanaiścaiva maṇḍalāvartanena ca /
ākāśagamane caiva kartavyā nāṭyayoktṛbhiḥ

sthānena samapādena tathā cūrṇapadairapi /
vyomnaścāvataredyastu tasyaitāṃ kārayet gatim

ṛjvāyatonnatanataiḥ kuṭilāvartitairatha /
bhraśyataśca tathākāśādapaviddhabhujā gatiḥ

vikīrṇavasanā caiva tathā bhūgatalocanā /
prāsādadrumaśaileṣu nadīnimnonnateṣu ca

ārohaṇāvataraṇaṃ ca kāryamarthavaśādbudhaiḥ /
prāsādārohaṇaṃ kāryaṃ atikrāntaiḥ padairatha

udvāhya gātraṃ pādaṃ ca sopāne nikṣipennaraḥ /
tathāvataraṇaṃ caiva gātramānamya recayet

prāsāde yanmayā proktaḥ pratāraḥ kevalo bhavet /
kiñcinnatāgrakāyā tu pratāre gatiriṣyate

jalapramāṇāpekṣā tu jalamadhye gatirbhavet /
toye 'lpe vasanotkarṣaḥ prājye pāṇivikarṣaṇaiḥ

prasārya bāhumekaikaṃ muhurbārivikarṣaṇaiḥ /
tiryak prasāritā caiva hiyamāṇā ca vāriṇā

aśeṣāṅgākulādhūtavadanā gatiriṣyate /
nausthasyāpi prayoktavyā drutaiścūrṇapadairgatiḥ

atikrāntena pādena dvitīyenāñcitena ca /
prāsādārohaṇe yattu tadevādriṣu kārayet

kevalamūrdhvanikṣepamadriṣvaṅgaṃ bhavedatha /
drume cārohaṇaṃ kāryamatikrāntaiḥ sthitaiḥ padaiḥ

sūcīviddhairapakrāntaiḥ pārśvakrāntaistathaiva ca /
etadevāvataraṇaṃ saritsvapi niyojayet

anenaiva vidhānena kartavyaṃ gaticeṣṭitam /
saṃjñāmātreṇa kartavyānyetāni vidhipūrvakam

kasmānmṛta iti prokte kiṃ kartavyaṃ prayoktṛbhiḥ /
aṅkuśagrahaṇānnāgaṃ khalīnagrahaṇāddhayam

pragrahagrahaṇādyānamevamevāpareṣvapi /
aśvayāne gatiḥ kāryā vaiśākhasthānakena tu

yathā cūrṇapadaiścitrairuparyupari pātitaiḥ /
pannagānāṃ gatiḥ kāryā pādaiḥ svastikasaṃjñitaiḥ

pārśvakrāntaṃ padaṃ kuryāt svastikaṃ recayediha /
viṭasyāpi tu kartavyā gatirlalitavikramā

pādairākuñcitaiḥ kiñcit tālābhyantarapātitaiḥ /
svasauṣṭhavasamāyuktau tathā hastau padānugau

khaṭakāvardhamānau tu kṛtvā viṭagatiṃ vrajet /
kañcukīyasya kartavyā vayovasthāviśeṣataḥ

avṛddhasya prayogajño gatimevaṃ prayojayet /
ardhatālotthitaiḥ pādairviṣkambhaiḥ ṛjubhistathā

samudvahannivāṅgāni paṅkalagna iva vrajet /
atha vṛddhasya kartavyā gatiḥ kampitadehikā

viṣkambhanakṛtaprāṇā mandotkṣiptapadakramā /
kṛśasyāpyabhineyā vai gatirmandaparikramā

vyādhigraste jvarārte ca tapaḥśrānte kṣudhānvite /
viṣkambhanakṛtaprāṇaḥ kṛśaḥ kṣāmodarastathā

kṣāmasvarakapolaśca dīnanetrastathaiva ca /
śanairutkṣepaṇaṃ caiva kartavyaṃ hastapādayoḥ

kampanaṃ caiva gātrāṇāṃ kleśanaṃ ca tathaiva ca /
dūrādhvānaṃ gatasyāpi gatirmandapadakramā

vikūṇanaṃ ca gātrasya jānunośca vimardanam /
sthūlasyāpi tu kartavyā gatirdehānukarṣiṇī

samudvahanabhūyiṣṭhā mandotkṣiptapadakramā /
viṣkambhagāmī ca bhavenniḥśvāsabahulastathā

śramasvedābhibhūtaśca vrajeccūrṇapadaistathā /
mattānāṃ tu gatiḥ kāryā made taruṇamadhyame

vāmadakṣiṇapādābhyāṃ ghūrṇamānāpasarpaṇaiḥ /
avakṛṣṭe pade caiva hyanavasthitapādikā

vighūrṇitaśarīrā ca karaiḥ praskhalitaistathā /
unmattasyāpi kartavyā gatistvaniyatakramā

bahucārīsamāyuktā lokānukaraṇāśrayā /
rūkṣasphuṭitakeśaśca rajodhvastatanustathā

animittaprakathano bahubhāṣī vikāravān /
gāyatyakasmāddhasati saṅge cāpi na sajjate

nṛtyatyapi ca saṃhṛṣṭo vādayatyapi vā punaḥ /
kadāciddhāvati javāt kadācidavatiṣṭhate

kadācidupaviṣṭastu śayānaḥ syāt kadācana /
nānācīradharaścaiva rathyāsvaniyatālayaḥ

unmatto bhavati hyevaṃ tasyaitāṃ kārayed gatim /
sthitvā nūpurapādena daṇḍapādaṃ prasārayet

baddhāṃ cārīṃ tathā caiva kṛtvā svastikameva ca /
anena cārīyogena paribhrāmya tu maṇḍalam

bāhyabhramarakaṃ caiva raṅgakoṇe prasārayet /
trikaṃ sulalitaṃ kṛtvā latākhyaṃ hastameva ca

viparyayagatairhastaiḥ padbhyāṃ saha gatirbhavet /
trividhā tu gatiḥ kāryā khañjapaṅgukavāmanaiḥ

vikalāṅgaprayogeṇa kuhakābhinayaṃ prati /
ekaḥ khañjagatau nityaṃ stabdho vai caraṇo bhavet

tathā dvitīyaḥ kāryastu pādo 'gratalasañcaraḥ /
stabdhenotthāpanaṃ kāryamaṅgasya caraṇena tu

gamanena niṣaṇṇaḥ syādanyena caraṇena tu /
itareṇa niṣīdecca krameṇānena vai vrajet

eṣā khañjagatiḥ kāryā talaśalyakṣateṣu ca /
pādenāgratalasthena hyañcitena vrajettathā

niṣaṇṇadehā paṅgostu natajaṅghā tathaiva ca /
sarvasaṅkucitāṅgā ca vāmane gatiriṣyate

na tasya vikramaḥ kāryo vikṣepaścaraṇasya ca /
sodvāhitā cūrṇapadā sā kāryā kuhanātmikā

vidūṣakasyāpi gatirhāsyatrayasamanvitā /
aṅgavākyakṛtaṃ hāsyaṃ hāsyaṃ nepathyajaṃ smṛtam

danturaḥ khalatiḥ kubjaḥ khañjaśca vikṛtānanaḥ /
ya īdṛśaḥ praveśaḥ syādaṅgahāsyaṃ tu tadbhavet

yadā tu bakavadgacchedullokitavilokitaiḥ /
anyāyatapadatvācca aṅgahāsyo bhavetsa tu

kāryahāsyaṃ tu vijñeyamasaṃbaddhaprabhāṣaṇāt /
anarthakairvikāraiśca tathā cāślīlabhāṣitaiḥ

cīracarmamaśībhasmagairikādyaistu maṇḍitaḥ /
yastādṛśo bhavedviprā hāsyo nepathyajastu saḥ

tasmāttu prakṛtiṃ jñātvā bhāvaḥ kāryastu tattvataḥ /
gatipracāraṃ vibhajet nānāvasthāntarātmakam

svabhāvajāyāṃ vinyasya kuṭilaṃ vāmake kare /
tadā dakṣiṇahaste ca kuryāccaturakaṃ punaḥ

pārśvamekaṃ śiraścaiva hasto 'tha caraṇastathā /
paryāyaśaḥ sannamayellayatālavaśānugaḥ

svabhāvajā tu tasyaiṣā gatiranyā vikārajā /
alābhalābhāt muktasya stabdhā tasya gatirbhavet

kāryā caiva hi nīcānāṃ ceṭādīnāṃ parikramāt /
adhamā iti ye khyātā nānāśīlāśca te punaḥ

pārśvasekaṃ śiraścaiva karaḥ sacaraṇastathā |
śakārasyāpi kartavyā gatiścañcaladehikā /
gatau nameta ceṭānāṃ dṛṣṭiścārdhavicāriṇī

vastrābharaṇasaṃsparśairmuhurmuhuravekṣitaiḥ /
gātrairvikāravikṣiptaiḥ lambavastrasrajā tathā

sagarvitā cūrṇapadā śakārasya gatirbhavet /
jātyā nīceṣu yoktavyā vilokanaparā gatiḥ

asaṃsparśācca lokasya svāṅgāni vinigūhya ca /
mlecchānāṃ jātayo yāstu pulindaśabarādayaḥ

teṣāṃ deśānusāreṇa kāryaṃ gativiceṣṭitam /
pakṣiṇāṃ śvāpadānāṃ ca paśūnāṃ ca dvijottamāḥ

svasvajātisamutthena svabhāvena gatirbhavet /
siṃharkṣavānarāṇāṃ ca gatiḥ kāryā prayoktṛbhiḥ

yā kṛtā narasiṃhena viṣṇunā prabhaviṣṇunā /
ālīḍhasthānakaṃ kṛtvā gātraṃ tasyaiva cānugam

jānūpari karaṃ hyekamaparaṃ vakṣasi sthitam /
avalokya diśaḥ kṛtvā cibukaṃ bāhumastake

gantavyaṃ vikramairviprāḥ pañcatālāntarotthitaiḥ /
niyuddhasamaye caiva raṅgāvataraṇe tathā

siṃhādīnāṃ prayoktavyā gatireṣā prayoktṛbhiḥ /
śeṣāṇāmarthayogena gatiṃ sthānaṃ ca yojayet

vāhanārthaprayogeṣu raṅgāvataraṇeṣu ca /
evametāḥ prayoktavyā narāṇāṃ gatayo budhaiḥ

noktā yā yā mayā hyatra grāhyāstāstāśca lokataḥ /
ataḥ paraṃ pravakṣyāmi strīṇāṃ gativiceṣṭitam

strīṇāṃ sthānāni kāryāṇi gatiṣvābharaṇeṣu ca /
āyataṃ cāvahitthaṃ ca aśvakrāntamathāpi ca

sthānānyetāni nārīṇāmatha lakṣaṇamucyate /
vāmaḥ svabhāvato yatra pādo viracitaḥ samaḥ

tālamātrāntare nyastastryaśraḥ pakṣasthito 'paraḥ /
prasannamānanamuraḥ samaṃ yatra samunnatam

latānitambagau hastau sthānaṃ jñeyaṃ tadāyatam /
dakṣiṇastu samaḥ pādaḥ tryaśraḥ pakṣasthito 'paraḥ

vāmaḥ samunnatakaṭiścāyate sthānake bhavet /
āvāhane visarge ca tathā nirvarṇaneṣu ca

cintāyāṃ cāvahitthe ca sthānametat prayojayet /
raṅgāvataraṇārambhaḥ puṣpāñjalivisarjanam

manmatherṣyodbhavaṃ kopaṃ tarjanyaṅgulimoṭanam /
niṣedhagarvagāmbhīryamaunaṃ mānāvalambanam

sthāne 'smin saṃvidhātavyaṃ digantaranirūpaṇam /
samo yatra sthito vāmastryaśraḥ pakṣasthito 'paraḥ

samunnatakaṭirvāmastvavahitthaṃ tu tadbhavet /
puro vicalitastryaśrastadanyopasṛtaḥ samaḥ

pādastālāntaranyastastrikamīṣatsamunnatam /
pāṇirlatākhyo yatraikastadanyastu nitambagaḥ

avahitthaṃ samākhyātaṃ sthānamāgamabhūṣaṇaiḥ /
strīṇāmetat smṛtaṃ sthānaṃ saṃlāpe tu svabhāvaje

niścaye paritoṣe ca vitarke cintane tathā /
vilāsalīlāvibvokaśṛṃgārātmanirūpaṇe

sthānametatprayoktavyaṃ bharturmārgavilokane /
pādaḥ samasthitaścaika ekaścāgratalāñcitaḥ

sūcīviddhamaviddhaṃ vā tadaśvakrāntamucyate /
skhalitaṃ ghūrṇitaṃ caiva galitāmbaradhāraṇam

kusumastabakādānaṃ parirakṣaṇameva ca /
vitrāsanaṃ salalitaṃ taruśākhāvalambanam

sthāne 'smin saṃvidhānīyaṃ strīṇāmetatprayoktṛbhiḥ /
śākhāvalambane kāryaṃ stabakagrahaṇe tathā

viśrāmeṣvatha devānāṃ narāṇāṃ cārthayogataḥ /
sthānakaṃ tāvadeva syādyāvacceṣṭā pravartate

bhagnaṃ ca sthānakaṃ nṛtte cārī cetsamupasthitā /
evaṃ sthānavidhiḥ kāryaḥ strīṇāṃ nṛṇāmathāpi ca

punaścāsāṃ pravakṣyāmi gatiṃ prakṛtisaṃsthitām /
kṛtvāvahitthaṃ sthānaṃ tu vāmaṃ cādhomukhaṃ karam

nābhipradeśe vinyasya savyaṃ ca khaṭakāmukham /
tataḥ salalitaṃ pādaṃ tālamātrasamutthitam

dakṣiṇaṃ vāmapādasya bāhyapārśve vinikṣipet /
tenaiva samakālaṃ ca latākhyaṃ vāmakaṃ bhujam

dakṣiṇaṃ vinametpārśvaṃ nyasennābhitaṭe tataḥ /
nitambe dakṣiṇaṃ kṛtvā hastaṃ codveṣṭya vāmakam

tato vāmapadaṃ dadyāt latāhastaṃ ca dakṣiṇam /
līlayodvāhitenātha śirasānugatena ca

kiñcinnatena gātreṇa gacchetpañcapadīṃ tataḥ /
yo vidhiḥ puruṣāṇāṃ tu raṅgapīṭhaparikrame

sa eva pramadānāṃ vai kartavyo nāṭyayoktṛbhiḥ /
ṣaṭkalaṃ tu na kartavyaṃ tathāṣṭakalameva ca

pādasya patanaṃ tajjñaiḥ khedanaṃ tadbhavetstriyāḥ /
sayauvanānāṃ nārīṇāmevaṃ kāryā gatirbudhaiḥ

sthavīyasīnāmetāsāṃ sampravakṣyāmyahaṃ gatim /
kṛtvāpaviddhaṃ sthānantu vāmaṃ nyasya kaṭītaṭe

ādyaṃ cārālamuttānaṃ kuryānnābhistanāntare /
na niṣaṇṇaṃ na ca stabdhaṃ na cāpi parivāhitam

kṛtvā gātraṃ tato gacchettenaiveha krameṇa tu /
preṣyāṇāmapi kartavyā gatirudbhrāntagāminī

kvacidunnamitairgātraiḥ āviddhabhujavikramā /
sthānaṃ kṛtvāvahitthaṃ ca vāmaṃ cādhomukhaṃ bhujam

nābhipradeśe vinyasya savyaṃ ca khaṭakāmukham /
ardhanārīgatiḥ kāryā strīpuṃsābhyāṃ vimiśritā

udāttalalitairgātraiḥ pādairlīlāsamanvitaiḥ /
yā pūrvamevābhihitā hyuttamānāṃ gatirmayā

strīṇāṃ kāpuruṣāṇāṃ ca tato 'rdhārdhaṃ tu yojayet /
madhyamottamanīcānāṃ nṛṇāṃ yad gaticeṣṭitam

strīṇāṃ tadeva kartavyā lalitaiḥ padavikramaiḥ /
bālānāmapi kartavyā svacchandapadavikramā

na tasyāḥ sauṣṭhavaṃ kāryaṃ na pramāṇaṃ prayoktṛbhiḥ /
tṛtīyā prakṛtiḥ kāryā nāmnā caiva napuṃsakā

narasvabhāvamutsṛjya strīgatiṃ tatra yojayet /
viparyayaḥ prayoktavyaḥ puruṣastrīnapuṃsake

svabhāvamātmanastyaktvā tadbhāvagamanādiha /
vyājena krīḍayā vāpi tathā bhūyaṃ ca vañcanāt

strī puṃsaḥ prakṛtiṃ kuryāt strībhāvaṃ puruṣo 'pi ca /
dhairyodāryeṇa sattvena buddhyā tadvacca karmaṇā

strī pumāṃsaṃ tvabhinayet veṣavākyaviceṣṭitaiḥ /
strīveṣabhāṣitairyuktaṃ preṣitāpreṣitaistathā

mṛdusannagatiścaiva pumān strībhāvamācaret /
jātihīnāśca yā nāryaḥ pulindaśabarāṅganāḥ

yāścāpi tāsāṃ kartavyā tajjātisadṛśī gatiḥ /
vratasthānāṃ tapaḥsthānāṃ liṅgasthānāṃ tathaiva ca

khasthānāṃ caiva nārīṇāṃ samapādaṃ prayojayet /
uddhatā ye 'ṅgahārāḥ syuḥ yāścāryo maṇḍalāni ca

tāni nāṭyaprayogajñairna kartavyāni yoṣitām /
tathāsanavidhiḥ kāryo nṛṇāṃ strīṇāṃ viśeṣataḥ

nānābhāvasamāyuktastathā ca śayanāśrayaḥ /
viṣkambhitāñcitau pādau trikaṃ kiñcitsamunnatam

hastau kaṭyūruvinyastau svasthe syādupaveśane /
pādaḥ prasāritaḥ kiñcidekaścaivāsanāśrayaḥ

śiraḥ pārśvanataṃ caiva sacinta upaveśane /
cibukopāśritau hastau bāhuśīrṣāśritaṃ śiraḥ

sampraṇaṣṭendriyamanāḥ śokautsukyopaveśane /
prasārya bāhū śithilau tathā śropāśrayāśritaḥ

mohamūrcchāmadaglāniviṣādeṣūpaveśayet /
sarvapiṇḍīkṛtāṅgastu saṃyuktaiḥ pādajānubhiḥ

vyādhivrīḍitanidrāsu dhyāne copaviśennaraḥ /
tathā cotkaṭikaṃ sthānaṃ sphikpārṣṇīnāṃ samāgamaḥ

pitrye nivāpe japye ca sandhyāsvācamane 'pi ca /
viṣkambhitaṃ punaścaivaṃ jānuṃ bhūmau nipātayet

priyāprasādane kāryaṃ homādikaraṇeṣu ca /
mahīgatābhyāṃ jānubhyāmadhomukhamavasthitam

devābhigamane caiva ruṣitānāṃ prasādane /
śoke cākrandane tīvre mṛtānāṃ caiva darśane

trāsane ca kusattvānāṃ nīcānāṃ caiva yācane /
homayajñakriyāyāṃ ca preṣyāṇāṃ caiva kārayet

munīnāṃ niyameṣveṣa bhavedāsanajo vidhiḥ /
tathāsanavidhiḥ kāryo vividho nāṭakāśrayaḥ

strīṇāṃ ca puruṣāṇāṃ ca bāhyaścābhyantarastathā /
ābhyantarastu nṛpaterbāhyo bāhyagatasya ca

devānāṃ nṛpatīnāṃ ca dadyāt siṃhāsanaṃ dvijaḥ /
purodhasāmamātyānāṃ bhavedvetrāsanaṃ tathā

muṇḍāsanaṃ ca dātavyaṃ senānīyuvarājayoḥ /
kāṣṭhāsanaṃ dvijātīnāṃ kumārāṇāṃ kuthāsanam

evaṃ rājasabhāṃ prāpya kāryastvāsanajo vidhiḥ /
strīṇāṃ cāpyāsanavidhiṃ sampravakṣyāmyahaṃ punaḥ

siṃhāsanaṃ tu rājñīnāṃ devīnāṃ muṇḍamāsanam /
purodho 'mātyapatnīnāṃ dadyādvetrāsanaṃ tathā

bhoginīnāṃ tathā caiva vastraṃ carma kutho 'pi vā /
brāhmaṇītāpasīnāṃ ca paṭṭāsanamathāpi ca

veśyānāṃ ca pradātavyamāsanaṃ ca mayūrakam /
śeṣāṇāṃ pramadānāṃ tu bhaved bhūmyāsanaṃ dvijāḥ

evamābhyantaro jñeyo bāhyaścāsanajo vidhiḥ /
tathā svagṛhavārtāsu cchandenāsanamiṣyate

niyamasthamunīnāṃ ca bhavedāsanajo vidhiḥ /
liṅgināmāsanavidhiḥ kāryo vratasamāśrayaḥ

bruṣīmuṇḍāsanaprāyaṃ vetrāsanamathāpi ca /
home yajñakriyāyāṃ ca pitrye 'rthe ca prayojayet

sthānīyā ye ca puruṣāḥ kulavidyāsamanvitāḥ /
teṣāmāsanasatkāraḥ karttavya iha pārthivaiḥ

same samāsanaṃ dadyāt madhye madhyamamāsanam /
atirikte 'tiriktaṃ ca hīne bhūmyāsanaṃ bhavet

upādhyāyasya nṛpatergurūṇāmagrato budhaiḥ /
bhūmyāsanaṃ tathā kāryamathavā kāṣṭhamāsanam

naunāgarathayāneṣu bhūmikāṣṭhāsaneṣu ca /
sahāsanaṃ na duṣyeta gurūpādhyāyapārthivaiḥ

ākuñcitaṃ samaṃ caiva prasāritavivartane /
udvāhitaṃ nataṃ caiva śayane karma kīrtyate

sarvairākuñcitairaṅgaiḥ śayyāviddhe tu jānunī /
sthānamākuñcitaṃ nāma śītārtānāṃ prayojayet

uttānitamukhaṃ caiva srastamuktakaraṃ tathā /
samaṃ nāma prasuptasya sthānakaṃ saṃvidhīyate

ekaṃ bhujamupādhāya samprasāritajānukam /
sthānaṃ prasāritaṃ nāma sukhasuptasya kārayet

adhomukhasthitaṃ caiva vivartitamiti smṛtam /
śastrakṣatamṛtotkṣiptamattonmatteṣu kārayet

aṃsopari śiraḥ kṛtvā karpūrakṣobhameva ca /
udvāhitaṃ tu vijñeyaṃ līlayā veśane prabhoḥ

īṣatprasārite jaṅghe yatra srastau karāvubhau /
ālasyaśramakhedeṣu nataṃ sthānaṃ vidhīyate

gatiprācārastu mayodito 'yaṃ noktaśca yaḥ so 'rthavaśena sādhyaḥ /
ataḥ paraṃ raṅgaparikramasya vakṣyāmi kakṣyāṃ pravibhāgayuktām