Narmamālā · Chapter 3

iti adhikaraṇabhaṭṭāḥ sātikā vā /
iti narmamālāyāṃ dvitīyaḥ parihāsaḥ //
tṛtīyaḥ parihāsaḥ
atha yāgotsave tasminsarve divirabāndhavāḥ /
alaṅkṛtāśca lalanā niyogigṛhamāyayuḥ

khaṭikā karaṇī haimī pārato ratnamūṭikā /
sindūrādyā rajobhedāḥ pañcaraṅgakasūtrakam

śālicūrṇaṃ sitacchatraṃ śvetavastraṃ vitānakam /
nārācāḥ kṣurikā sūtraṃ darpaṇaṃ vīrakartarī

patākā vyajanaṃ kūrcaḥ puṣpalakṣāṇi ṣoḍaśa /
vārdhanīkalaśau tāmrau tilāstailaṃ mṛgājinam

sruksruvau samidho darbhā lājāḥ siddhārtakā ghṛtam /
bilvapūgaphalākṣoṭajātīphalayavākṣatam

dhūpakuṅkumakarpūrakautukauṣadhicandanam /
pādukāpīṭhaparyaṅkaghaṇṭikāghaṭakuṇḍakam

madyamāṃsasurāpūpapalāṇḍuśapharaudanam /
piṣṭabhṛṣṭarasasvacchabhakṣyarocakamodakam

caṭakāpūrṇapātrāṇi kṣīriṇī kṛsarā dadhi /
daśa kṛṣṇā daśa śvetāśchāgā meṣāścaturdaśa

bhastrā cetyādisambhāraścīrikālikhitaṃ kṣaṇāt /
sajjīkṛtaṃ śrīsacivairbhogamitrairniyoginaḥ (?)

tato nityāvadhānena bhagaliṅgavibhūṣitam /
cakāra maṇḍalaṃ śiṣyaḥ sindūrāntaritāntaram

athātmārāmatādambhamīlitāghūrṇitekṣaṇaḥ /
gururgṛhītaḥ śiṣyābhyāṃ savyadakṣiṇahastayoḥ

śatamātreṇānuyātaḥ śiṣyāṇāmāyayau śanaiḥ /
luṇṭhiṃ kartumivātyugro nagarādhipatiḥ svayam

carmakṛtsaunikaścakrī dhīvaro haṭṭatāpasaḥ /
vṛddhaveśyā kalyapālo madyabhaṭṭo jaradviṭaḥ

pañca nāraṅgakā rugṇāstriṭāṅkāro 'tha pācakaḥ /
gobhakṣo bhairavācāryaḥ kulācāryo 'tha vāyakaḥ

cūlikākṛtarudrākṣo ghaṭilaśchinnanāsikaḥ /
mahāvratī bhagamukhaḥ śaivācāryastrighaṇṭikaḥ

nagno velāvratī maunī stotrakṛjjānughaṇṭikaḥ /
dvitrāśconmattavanitāḥ śvabhiḥ parivṛtāstathā

gūthaliptastathonmatto mantravādī rasāyanī /
indrajālī latāveśī vijñānī kāmatāttvikaḥ

bhaṭṭāścānye gurordhūrtāḥ pānabhojanasevakāḥ /
viviśuḥ svinnanaivedyāmodavaktrodakākulāḥ

athāmapakvasaṃhārakāriṇaḥ sarvahāriṇaḥ /
mattā gurubhaṭṭāścakrustiladhūpaghṛtakṣayam

eko dvau bahavaḥ paścānninyuste bhastrayā tathā /
śālicūrṇayavākṣoṭabilvārghaghṛtacandanam

iti gurubhaṭṭāḥ /
tataḥ svabhaginī raṇḍā bālaiva vrataśālinī /
dhṛtā niyoginā yāgaparicaryāvidhau guroḥ

jayatyakhaṇḍaśītāṃśumaṇḍaladyutitaskarī /
puṇḍarīkamukhī raṇḍā navayauvanamaṇḍitā

madaśauṇḍaṃ samuddaṇḍacaṇḍaṃ sukhakaraṇḍakam /
vinā caṇḍaratodghṛṣṭaṃ raṇḍā khaṇḍitamānasā

vistīrṇaśroṇipulinā pīvarorukucasthalī /
hariṇīhārinayanā raṇḍā netrarasāyanam

raṇḍā skandhadvayāsaktamuktakeśī virājate /
netrotpalamukhāmbhojabhṛṅgavyāpteva padminī

niḥsūtraruciraḥ kaṇṭhaḥ suvarṇasubhago bhagaḥ /
raṇḍāyāḥ karṇapāśau ca nirābharaṇasundarau

puṣpatāmbūlarahitā raṇḍā santyaktabhūṣaṇā /
lāvaṇyenātimātreṇa saṃvibhakteva vedhasā

hāreṇa kiṃ sumadhyāyāḥ sukeśyāḥ kusumena kim /
kimañjanenāyatākṣyā raṇḍāyā maṇḍanena kim

kiṃ dharmo yatra no raṇḍā dhiksukhaṃ raṇḍayā vinā /
raṇḍāhīno 'stu mā mokṣaḥ prauḍhairityuditaṃ viṭaiḥ

raṇḍā vilokya taruṇaṃ karoti bhrukuṭiṃ mṛṣā /
kaṇṭhagrahaṃ cintayantī manasā tu prahṛṣyati

saṃsmarantī ratisukhaṃ pīvarorukucasthalī /
raṇḍā bhagasthalīṃ rātrau mṛdnātyucchvāsinī sadā

vīkṣate taruṇaṃ tiryakkāntaṃ subhagamānatā /
sravantī nirbharaṃ reto raṇḍā dhenuḥ payo yathā

gauraḥ supīvaro dhatte raṇḍāyā muṇḍito bhagaḥ /
merorarkahayollīḍhaśaṣpahemataṭabhramam

turagādyācitānītastabdhadīrghadhvajo naraḥ /
yadi nāma rate śakto raṇḍāṃ toṣayituṃ na vā

śrāddheṣu mugdhaviprāṇāṃ jaṭināṃ ca tapasvinām /
vaśe patati dhanyānāṃ raṇḍā rasataraṅgiṇī

cūlikānyastakusumaḥ karṇe kṛtapavitrakaḥ /
yuvā raṇḍāpriyo vipraḥ kandarpeṇopamīyate

udañcadgurudaṇḍasya caṇḍasya brahmacāriṇaḥ /
raṇḍā dadāti satataṃ śraddhayā mṛtabhojanam

tameva tīrthayātrāsu paścānnayati sarvadā /
vahantī khaḍgapātreṇa balidhūpasamudgikām

parasparaprārthanayā sumuṇḍitabhagadhvajau /
bhūkampakāriṇau rātrau tau raṇḍābrahmacāriṇau

divā dambhanidhānāya namastīrthopasevine /
rātrau raṇḍābhagāpānakṣībāya brahmacāriṇe

raṇḍā jaṭābhṛtāṃ bhītyā gauḍalāṭatapasvinām /
dadāti .. rjitāṃ prītyā talliptoru .. vāsakṛt

gatvā gurugṛhaṃ raṇḍā patyuḥ parvadine satī /
kaṣantī kaṭimā .. bhī raṇḍā nirdayamohanaiḥ

raṇḍā tattanmṛtoddhāradīkṣādivratakāriṇī /
dadāti niśi niḥśaṅkā kāmasattraṃ tapasvinām

liṅgārcanāpadeśena dattvā veśmani tālakam /
karoti carmaliṅgena raṇḍā kaṇḍūvikhaṇḍanam

tayopacaryamāṇo 'tha mṛgākṣyā gururākulaḥ /
śiṣyāśca tāṃ papurnetraiḥ kṣudhārtāḥ kṣīriṇīmiva

[iti] raṇḍā /
tataḥ praviviśuste te dīkṣāsamayino narāḥ /
baddhanetrapaṭā mithyāmohenevāndhakāritāḥ

atha vyajijñapadbhūminyastajānuḥ kṛtāñjaliḥ /
guruṃ niyoginaḥ śraddhāśuddhāntaṃ haṭṭatāpasaḥ

ihaiva suciraṃ nātha yāgavyagre tvayi sthite /
pratīkṣante pare śiṣyā yāgotsavasamutsukāḥ

ya eṣa prathito loke gṛhakṛtye mahattamaḥ /
kṛtayāgasamārambhaḥ sa bhavantamudīkṣate

brahmahatyādi pāpaṃ yanniḥsaṃkhyaṃ tasya vidyate /
ekaghaṇṭāṭanatkāramātreṇa bhavatā hṛtam

manyate sa tṛṇaṃ sarvaṃ sarvasaṃhārapātakam /
yato mūrdhni tvayā hastastasya pañcaphaṇo dhṛtaḥ

tvatprasādātsamuttīrṇāṃ sa kāmapi daśāṃ śritaḥ /
śaṅkarāyatanebhyo 'pi śaivaḥ sarvaṃ jahāra yat

sarvasvaharaṇaṃ dharmasatkāryaṃ brāhmaṇakṣayaḥ /
yattasya nirvikalpasya tattavaiva vijṛmbhitam

[iti] *gṛhakṛtyamahattamaḥ svakaṣaṇakāmikāro vā /
tvāmiyaṃ nātha gaṇikā nimantrayitumāgatā /
ghaṭīpratiṣṭhā gehe 'syāḥ kriyatāṃ śiṣyavatsala

vitīrṇairbhavatā nityaṃ vaśīkaraṇacūrṇakaiḥ /
asthiśeṣāḥ kṛtāste te yayā dhanikakāmukāḥ

śmaśānakośaśapathaiḥ kṣīṇajihvākarādharā /
tvadrakṣārakṣitaivaiṣā kāmukacchadmacāriṇī

tailonmṛṣṭe manāksneho vadane na tu cakṣuṣi /
veśyāyāḥ kṣīṇavitteṣu saṃkoco nāntyajātiṣu

yadi sadbhāvinī *vaiśyā yadi kālaḥ kṛpāparaḥ /
acauro yadi kāyasthastadveśyāpyanurāgiṇī

veśyā /
cakṣurvaidyo 'yamāyātastapasvī sarvasaṃśrayaḥ /
kiṃśāruvartibhiryena sarvamandhīkṛtaṃ jagat

grīṣme 'kṣikopabāhulyādasya lagne śaratphale /
sampūrṇaḥ kriyatāṃ yāgaḥ pāṇḍuvallīnirantaraḥ

iti cakṣurvaidyaḥ /
nāpitaḥ śalyahartāyaṃ nṛṇāṃ yenopajīvinā /
nītānyaṇḍāni durlepaiḥ sthūlasthālīpramāṇatām

prākpratiṣṭhāpitā yena cāmuṇḍāmuṇḍakārthinā /
*yo 'sau tasyāstvayā varṣadine yāgaṃ samīhate

mūlyena mahatā dhīmānnāsāsaṃśleṣaṇāya yaḥ /
māṃsapeṣīmapi chittvā dadāti svavadhūbhagāt

śalyahartā /
ayañca taruṇībhāryo vaṇigvṛddho mahādhanaḥ /
maithune śaktidāridryādvājīkaraṇamicchati

lālinā srutanetreṇa vṛddhena śvāsakāsinā /
ślathapralambaśiśnena taruṇī ramate katham

ārūḍho 'pi rate yatnādutthānopahatadhvajaḥ /
vṛddhaḥ prāpnoti no nidrāmṛṇaṃ dhyāyannivādhanaḥ

niṣpīḍitāntrasaṃkāśaśiśno 'pi suratotsukaḥ /
hastaṃ dattvā bhage vṛddho nidhānamiva rakṣati

māṃsakṣīraghṛtāhāraṃ kṛtvā vṛddho ratāśayā /
rātrau vamati tatsarvaṃ bhajate vā viṣūcikām

śuṣkacarmopamaṃ vṛddhaṃ madhuparke kṣaṇaṃ patim /
sajane taruṇī dṛṣṭvā hrītā yāti rasātalam

etena vṛddhavaṇijā dravyairvṛddhaviṭoditaiḥ /
liptaliṅgena satataṃ dagdhevāyāsitā vadhūḥ

sa eṣa bahunikṣepasaṃbhakṣaṇakṛtakṣaṇaḥ /
draviṇāvaskarakṣetraṃ vaṇigvāsarataskaraḥ

nṛtyati vyādhikāleṣu kuṭilaḥ kalipannagaḥ /
ajñātatṛṇakāṣṭhādivikrayī dravyanāmabhiḥ

taruṇākāṅkṣiṇīṃ vṛddhaḥ priyāmavicalekṣaṇaḥ /
so 'yaṃ nirīkṣate dūrānmṛṣṭaṃ bhojyamivāturaḥ

tasmātpauṣpikamāsādya kriyatāṃ mantrasaṃpadā /
gṛhiṇī rāgiṇī yena labdhaśakteḥ prajāyate

vṛddhavaṇik /
ityādiśiṣyairāhvānaṃ śrutvā tena niveditam /
sarvaṃ karomītyavadadbhrūvikārākulo guruḥ

tato dinānte vipulāṃ kṛtvāgre śivakuṇḍikām /
guruṇā saha te śiṣyāḥ papurbhuktottaraṃ ciram

niyogilalanāḥ sarvāste ca tanmitrabāndhavāḥ /
kapāleṣu taducchiṣṭaṃ *vamitvā bahuśaḥ papuḥ

kaścidgātuṃ pravṛtto 'tha kaścidroditi sasvanam /
kaścidvyāghūrṇate kaścitplavate kṛtaśūtkṛtiḥ

kaścidatyantavaikalyaṃ nāṭayanbhaktisambhavam /
niśceṣṭastiṣṭhati ciraṃ saṃprāptaḥ śavatāmiva

kaścidvilolasragdāmabhūṣito madanirbharaḥ /
kṛtakaṇṭhagrahaḥ puṃsāṃ cucumba lalanā api

tataḥ kṣībo guruḥ kiṃ citsvakāvyaṃ deśabhāṣayā /
vīṇāvaṃśaravodagraṃ kocchikāvādyakṛjjagau

athaikabhujamānandādudyamyaikena pāṇinā /
gururnanarta dvābhyāṃ ca śanairutthāya cāsanāt

tataḥ śiṣyāḥ samuttasthuraṭṭahāsaninādinaḥ /
kṛtāṅganāpariṣvaṅgā visrastakaṭikarpaṭāḥ

śanaiḥ prayāte rātryardhe vinaṣṭe dīpamaṇḍale /
nirvibhāgo 'bhavatteṣāṃ raticakramahotsavaḥ

prabhāte gururutthāya tvarayā kalaśapradaḥ /
kṛtavadvidadhe sarvaṃ śiṣyairanyairnimantritaḥ

jvarādikāle vaidyānāṃ śaratkāle niyoginām /
puṣpakāle gurūṇāṃ ca hemapūrṇā vasundharā

athāviśatpṛthuśvāsaḥ kampamānaḥ sphuṭanniva /
pārśvāvalokī puruṣaḥ paramāpto niyoginaḥ

so 'bravīdadya rātryardhe gṛhakṛtyamahattamaḥ /
rājarāśidhanaṃ bhūri hṛtvā yātaḥ sahānugaḥ

anuktvāpasṛte tasmiṃstatsambandhiniyoginām /
palāyanavyatikaraḥ ko 'pi jāto gṛhe gṛhe

capeṭotsphoṭitamukhastvatsvāmī bandhanaṃ bhaṭaiḥ /
nītaḥ patatpurīṣo 'gre sa tāvatparipālakaḥ

yāvanno*lluñcitaśmaśrurbaddhvā tvamapi nīyase /
tāvadrājabhaye ghore nītirasmin vidhīyatām

iti bruvāṇe tanmitre taiḥ śiṣyaiḥ sahite gurau /
tūrṇaṃ prayāte niḥśvasya niyogī duḥkhito 'vadat

aho nu kāladaurātmyādghoratā kiyatī kaleḥ /
sādhavaḥ sarvathā naṣṭāḥ kaṣṭaṃ dharmo 'stamāgataḥ

ityuktvā sānugo yāvatpalāyanakṛtodyamaḥ /
sa susrāva bhayānmūtraṃ tāvadetya bhaṭairvṛtaḥ

sa rājñā hṛtasarvasvaḥ praklinno bandhane ciram /
dhanena veśyayā svasrā mocito niragāttataḥ

tato vibhavahīno 'sau jāpī svapnanirīkṣakaḥ /
babhūva sarvapraṇataścāṭukāraḥ priyaṃvadaḥ

yo 'bhūdabhyutthitastabdho niyogī liṅgasannibhaḥ /
adhikāraparibhraṃśātsa vṛddhavṛṣaṇāyate

adhikāramadāndhānāṃ dṛṣṭikopavatāṃ sadā /
netranairmalyajananaṃ bandhanaṃ paramāñjanam

yaḥ pādapatitānārtānpūjyānapyavamanyate /
bhraṣṭādhikāraścaraṇau śakṛlliptau sa vandate

aho bata muhūrtena bhavanti na bhavanti ca /
palāladahanajvālācapalā diviraśriyaḥ

svayamutthāya yātāyāṃ jāyāyāṃ nirdhano 'tha saḥ /
babhrāma laulyanilayaḥ piṇḍārthī bandhuveśmasu

rūkṣaḥ kṛśo 'timalinaḥ syūtadagdhapaṭaccaraḥ /
piśāca iva duṣprekṣyo dinaireva babhūva saḥ

tuṣāgnikuṇḍikātāpadagdhasphigvṛṣaṇodaraḥ /
vātaśūlāpanodāya jānugrathitadāmakaḥ

devadvijadhana*grāsajātakoṣṭhagalagrahaḥ /
kṣutkṣāmakukṣiḥ śuṣkāsyaḥ patito 'vaskare bhraman

śvajagdhajānucaraṇaḥ prasravadbhūriśoṇitaḥ /
kṛpārdrocchiṣṭabhugdattabhaktagolakanirvṛtaḥ

dagdhārdhakarpaṭīniryatsakeśavṛṣaṇadvayaḥ /
bhasmapralipta*śīrṣāṃsavakṣaḥpārśvo gatatrapaḥ

pralapankāñcikākāṅkṣī kenaciddattamaṇḍakaḥ /
prapāpālikayā ḍombabhrāntyā pāne tiraskṛtaḥ

rajasvalāpalālena channāṅgastuhināgame /
śarāvakarparādānakalahe yācakārbhakaiḥ /
vahnipātraprahāreṇa dagdhabhrūśmaśrulocanaḥ

caṇḍālaiḥ pretakāryeṣu laguḍairāhato 'sakṛt /
paṅkaśāyī sa cukrośa sattratīrthāgravartmasu

nṛpurīṣapraṇāle 'tha patito 'sāvadhomukhaḥ /
uccaiḥkṛtakaṭiḥ prāṇānutsasarja narādhamaḥ

iti daurgatyatapasā prayātaḥ so 'sthiśeṣatāṃ /
saśarīraḥ svayaṃ prāpto narakaṃ narakaṇṭakaḥ

evaṃ krameṇa śānteṣu niyogidivirāgniṣu /
modate gatasantāpaḥ santoṣasubhago janaḥ

iti diviraniyogivrātaduśceṣṭitānāṃ kusṛticaritacarcā narmamālā kṛteyam /
api sujanavinodāyombhitā hāsyasiddhyai kathayati phalabhūtaṃ sarvalokopadeśam