નર્મમાલા · અધ્યાય 3

ઇતિ અધિકરણભટ્ટાઃ સાતિકા વા ।
ઇતિ નર્મમાલાયાં દ્વિતીયઃ પરિહાસઃ ॥
તૃતીયઃ પરિહાસઃ
અથ યાગોત્સવે તસ્મિન્સર્વે દિવિરબાન્ધવાઃ ।
અલઙ્કૃતાશ્ચ લલના નિયોગિગૃહમાયયુઃ

ખટિકા કરણી હૈમી પારતો રત્નમૂટિકા ।
સિન્દૂરાદ્યા રજોભેદાઃ પઞ્ચરઙ્ગકસૂત્રકમ્

શાલિચૂર્ણં સિતચ્છત્રં શ્વેતવસ્ત્રં વિતાનકમ્ ।
નારાચાઃ ક્ષુરિકા સૂત્રં દર્પણં વીરકર્તરી

પતાકા વ્યજનં કૂર્ચઃ પુષ્પલક્ષાણિ ષોડશ ।
વાર્ધનીકલશૌ તામ્રૌ તિલાસ્તૈલં મૃગાજિનમ્

સ્રુક્સ્રુવૌ સમિધો દર્ભા લાજાઃ સિદ્ધાર્તકા ઘૃતમ્ ।
બિલ્વપૂગફલાક્ષોટજાતીફલયવાક્ષતમ્

ધૂપકુઙ્કુમકર્પૂરકૌતુકૌષધિચન્દનમ્ ।
પાદુકાપીઠપર્યઙ્કઘણ્ટિકાઘટકુણ્ડકમ્

મદ્યમાંસસુરાપૂપપલાણ્ડુશફરૌદનમ્ ।
પિષ્ટભૃષ્ટરસસ્વચ્છભક્ષ્યરોચકમોદકમ્

ચટકાપૂર્ણપાત્રાણિ ક્ષીરિણી કૃસરા દધિ ।
દશ કૃષ્ણા દશ શ્વેતાશ્છાગા મેષાશ્ચતુર્દશ

ભસ્ત્રા ચેત્યાદિસમ્ભારશ્ચીરિકાલિખિતં ક્ષણાત્ ।
સજ્જીકૃતં શ્રીસચિવૈર્ભોગમિત્રૈર્નિયોગિનઃ (?)

તતો નિત્યાવધાનેન ભગલિઙ્ગવિભૂષિતમ્ ।
ચકાર મણ્ડલં શિષ્યઃ સિન્દૂરાન્તરિતાન્તરમ્

અથાત્મારામતાદમ્ભમીલિતાઘૂર્ણિતેક્ષણઃ ।
ગુરુર્ગૃહીતઃ શિષ્યાભ્યાં સવ્યદક્ષિણહસ્તયોઃ

શતમાત્રેણાનુયાતઃ શિષ્યાણામાયયૌ શનૈઃ ।
લુણ્ઠિં કર્તુમિવાત્યુગ્રો નગરાધિપતિઃ સ્વયમ્

ચર્મકૃત્સૌનિકશ્ચક્રી ધીવરો હટ્ટતાપસઃ ।
વૃદ્ધવેશ્યા કલ્યપાલો મદ્યભટ્ટો જરદ્વિટઃ

પઞ્ચ નારઙ્ગકા રુગ્ણાસ્ત્રિટાઙ્કારો ઽથ પાચકઃ ।
ગોભક્ષો ભૈરવાચાર્યઃ કુલાચાર્યો ઽથ વાયકઃ

ચૂલિકાકૃતરુદ્રાક્ષો ઘટિલશ્છિન્નનાસિકઃ ।
મહાવ્રતી ભગમુખઃ શૈવાચાર્યસ્ત્રિઘણ્ટિકઃ

નગ્નો વેલાવ્રતી મૌની સ્તોત્રકૃજ્જાનુઘણ્ટિકઃ ।
દ્વિત્રાશ્ચોન્મત્તવનિતાઃ શ્વભિઃ પરિવૃતાસ્તથા

ગૂથલિપ્તસ્તથોન્મત્તો મન્ત્રવાદી રસાયની ।
ઇન્દ્રજાલી લતાવેશી વિજ્ઞાની કામતાત્ત્વિકઃ

ભટ્ટાશ્ચાન્યે ગુરોર્ધૂર્તાઃ પાનભોજનસેવકાઃ ।
વિવિશુઃ સ્વિન્નનૈવેદ્યામોદવક્ત્રોદકાકુલાઃ

અથામપક્વસંહારકારિણઃ સર્વહારિણઃ ।
મત્તા ગુરુભટ્ટાશ્ચક્રુસ્તિલધૂપઘૃતક્ષયમ્

એકો દ્વૌ બહવઃ પશ્ચાન્નિન્યુસ્તે ભસ્ત્રયા તથા ।
શાલિચૂર્ણયવાક્ષોટબિલ્વાર્ઘઘૃતચન્દનમ્

ઇતિ ગુરુભટ્ટાઃ ।
તતઃ સ્વભગિની રણ્ડા બાલૈવ વ્રતશાલિની ।
ધૃતા નિયોગિના યાગપરિચર્યાવિધૌ ગુરોઃ

જયત્યખણ્ડશીતાંશુમણ્ડલદ્યુતિતસ્કરી ।
પુણ્ડરીકમુખી રણ્ડા નવયૌવનમણ્ડિતા

મદશૌણ્ડં સમુદ્દણ્ડચણ્ડં સુખકરણ્ડકમ્ ।
વિના ચણ્ડરતોદ્ઘૃષ્ટં રણ્ડા ખણ્ડિતમાનસા

વિસ્તીર્ણશ્રોણિપુલિના પીવરોરુકુચસ્થલી ।
હરિણીહારિનયના રણ્ડા નેત્રરસાયનમ્

રણ્ડા સ્કન્ધદ્વયાસક્તમુક્તકેશી વિરાજતે ।
નેત્રોત્પલમુખામ્ભોજભૃઙ્ગવ્યાપ્તેવ પદ્મિની

નિઃસૂત્રરુચિરઃ કણ્ઠઃ સુવર્ણસુભગો ભગઃ ।
રણ્ડાયાઃ કર્ણપાશૌ ચ નિરાભરણસુન્દરૌ

પુષ્પતામ્બૂલરહિતા રણ્ડા સન્ત્યક્તભૂષણા ।
લાવણ્યેનાતિમાત્રેણ સંવિભક્તેવ વેધસા

હારેણ કિં સુમધ્યાયાઃ સુકેશ્યાઃ કુસુમેન કિમ્ ।
કિમઞ્જનેનાયતાક્ષ્યા રણ્ડાયા મણ્ડનેન કિમ્

કિં ધર્મો યત્ર નો રણ્ડા ધિક્સુખં રણ્ડયા વિના ।
રણ્ડાહીનો ઽસ્તુ મા મોક્ષઃ પ્રૌઢૈરિત્યુદિતં વિટૈઃ

રણ્ડા વિલોક્ય તરુણં કરોતિ ભ્રુકુટિં મૃષા ।
કણ્ઠગ્રહં ચિન્તયન્તી મનસા તુ પ્રહૃષ્યતિ

સંસ્મરન્તી રતિસુખં પીવરોરુકુચસ્થલી ।
રણ્ડા ભગસ્થલીં રાત્રૌ મૃદ્નાત્યુચ્છ્વાસિની સદા

વીક્ષતે તરુણં તિર્યક્કાન્તં સુભગમાનતા ।
સ્રવન્તી નિર્ભરં રેતો રણ્ડા ધેનુઃ પયો યથા

ગૌરઃ સુપીવરો ધત્તે રણ્ડાયા મુણ્ડિતો ભગઃ ।
મેરોરર્કહયોલ્લીઢશષ્પહેમતટભ્રમમ્

તુરગાદ્યાચિતાનીતસ્તબ્ધદીર્ઘધ્વજો નરઃ ।
યદિ નામ રતે શક્તો રણ્ડાં તોષયિતું ન વા

શ્રાદ્ધેષુ મુગ્ધવિપ્રાણાં જટિનાં ચ તપસ્વિનામ્ ।
વશે પતતિ ધન્યાનાં રણ્ડા રસતરઙ્ગિણી

ચૂલિકાન્યસ્તકુસુમઃ કર્ણે કૃતપવિત્રકઃ ।
યુવા રણ્ડાપ્રિયો વિપ્રઃ કન્દર્પેણોપમીયતે

ઉદઞ્ચદ્ગુરુદણ્ડસ્ય ચણ્ડસ્ય બ્રહ્મચારિણઃ ।
રણ્ડા દદાતિ સતતં શ્રદ્ધયા મૃતભોજનમ્

તમેવ તીર્થયાત્રાસુ પશ્ચાન્નયતિ સર્વદા ।
વહન્તી ખડ્ગપાત્રેણ બલિધૂપસમુદ્ગિકામ્

પરસ્પરપ્રાર્થનયા સુમુણ્ડિતભગધ્વજૌ ।
ભૂકમ્પકારિણૌ રાત્રૌ તૌ રણ્ડાબ્રહ્મચારિણૌ

દિવા દમ્ભનિધાનાય નમસ્તીર્થોપસેવિને ।
રાત્રૌ રણ્ડાભગાપાનક્ષીબાય બ્રહ્મચારિણે

રણ્ડા જટાભૃતાં ભીત્યા ગૌડલાટતપસ્વિનામ્ ।
દદાતિ .. ર્જિતાં પ્રીત્યા તલ્લિપ્તોરુ .. વાસકૃત્

ગત્વા ગુરુગૃહં રણ્ડા પત્યુઃ પર્વદિને સતી ।
કષન્તી કટિમા .. ભી રણ્ડા નિર્દયમોહનૈઃ

રણ્ડા તત્તન્મૃતોદ્ધારદીક્ષાદિવ્રતકારિણી ।
દદાતિ નિશિ નિઃશઙ્કા કામસત્ત્રં તપસ્વિનામ્

લિઙ્ગાર્ચનાપદેશેન દત્ત્વા વેશ્મનિ તાલકમ્ ।
કરોતિ ચર્મલિઙ્ગેન રણ્ડા કણ્ડૂવિખણ્ડનમ્

તયોપચર્યમાણો ઽથ મૃગાક્ષ્યા ગુરુરાકુલઃ ।
શિષ્યાશ્ચ તાં પપુર્નેત્રૈઃ ક્ષુધાર્તાઃ ક્ષીરિણીમિવ

[ઇતિ] રણ્ડા ।
તતઃ પ્રવિવિશુસ્તે તે દીક્ષાસમયિનો નરાઃ ।
બદ્ધનેત્રપટા મિથ્યામોહેનેવાન્ધકારિતાઃ

અથ વ્યજિજ્ઞપદ્ભૂમિન્યસ્તજાનુઃ કૃતાઞ્જલિઃ ।
ગુરું નિયોગિનઃ શ્રદ્ધાશુદ્ધાન્તં હટ્ટતાપસઃ

ઇહૈવ સુચિરં નાથ યાગવ્યગ્રે ત્વયિ સ્થિતે ।
પ્રતીક્ષન્તે પરે શિષ્યા યાગોત્સવસમુત્સુકાઃ

ય એષ પ્રથિતો લોકે ગૃહકૃત્યે મહત્તમઃ ।
કૃતયાગસમારમ્ભઃ સ ભવન્તમુદીક્ષતે

બ્રહ્મહત્યાદિ પાપં યન્નિઃસંખ્યં તસ્ય વિદ્યતે ।
એકઘણ્ટાટનત્કારમાત્રેણ ભવતા હૃતમ્

મન્યતે સ તૃણં સર્વં સર્વસંહારપાતકમ્ ।
યતો મૂર્ધ્નિ ત્વયા હસ્તસ્તસ્ય પઞ્ચફણો ધૃતઃ

ત્વત્પ્રસાદાત્સમુત્તીર્ણાં સ કામપિ દશાં શ્રિતઃ ।
શઙ્કરાયતનેભ્યો ઽપિ શૈવઃ સર્વં જહાર યત્

સર્વસ્વહરણં ધર્મસત્કાર્યં બ્રાહ્મણક્ષયઃ ।
યત્તસ્ય નિર્વિકલ્પસ્ય તત્તવૈવ વિજૃમ્ભિતમ્

[ઇતિ] *ગૃહકૃત્યમહત્તમઃ સ્વકષણકામિકારો વા ।
ત્વામિયં નાથ ગણિકા નિમન્ત્રયિતુમાગતા ।
ઘટીપ્રતિષ્ઠા ગેહે ઽસ્યાઃ ક્રિયતાં શિષ્યવત્સલ

વિતીર્ણૈર્ભવતા નિત્યં વશીકરણચૂર્ણકૈઃ ।
અસ્થિશેષાઃ કૃતાસ્તે તે યયા ધનિકકામુકાઃ

શ્મશાનકોશશપથૈઃ ક્ષીણજિહ્વાકરાધરા ।
ત્વદ્રક્ષારક્ષિતૈવૈષા કામુકચ્છદ્મચારિણી

તૈલોન્મૃષ્ટે મનાક્સ્નેહો વદને ન તુ ચક્ષુષિ ।
વેશ્યાયાઃ ક્ષીણવિત્તેષુ સંકોચો નાન્ત્યજાતિષુ

યદિ સદ્ભાવિની *વૈશ્યા યદિ કાલઃ કૃપાપરઃ ।
અચૌરો યદિ કાયસ્થસ્તદ્વેશ્યાપ્યનુરાગિણી

વેશ્યા ।
ચક્ષુર્વૈદ્યો ઽયમાયાતસ્તપસ્વી સર્વસંશ્રયઃ ।
કિંશારુવર્તિભિર્યેન સર્વમન્ધીકૃતં જગત્

ગ્રીષ્મે ઽક્ષિકોપબાહુલ્યાદસ્ય લગ્ને શરત્ફલે ।
સમ્પૂર્ણઃ ક્રિયતાં યાગઃ પાણ્ડુવલ્લીનિરન્તરઃ

ઇતિ ચક્ષુર્વૈદ્યઃ ।
નાપિતઃ શલ્યહર્તાયં નૃણાં યેનોપજીવિના ।
નીતાન્યણ્ડાનિ દુર્લેપૈઃ સ્થૂલસ્થાલીપ્રમાણતામ્

પ્રાક્પ્રતિષ્ઠાપિતા યેન ચામુણ્ડામુણ્ડકાર્થિના ।
*યો ઽસૌ તસ્યાસ્ત્વયા વર્ષદિને યાગં સમીહતે

મૂલ્યેન મહતા ધીમાન્નાસાસંશ્લેષણાય યઃ ।
માંસપેષીમપિ છિત્ત્વા દદાતિ સ્વવધૂભગાત્

શલ્યહર્તા ।
અયઞ્ચ તરુણીભાર્યો વણિગ્વૃદ્ધો મહાધનઃ ।
મૈથુને શક્તિદારિદ્ર્યાદ્વાજીકરણમિચ્છતિ

લાલિના સ્રુતનેત્રેણ વૃદ્ધેન શ્વાસકાસિના ।
શ્લથપ્રલમ્બશિશ્નેન તરુણી રમતે કથમ્

આરૂઢો ઽપિ રતે યત્નાદુત્થાનોપહતધ્વજઃ ।
વૃદ્ધઃ પ્રાપ્નોતિ નો નિદ્રામૃણં ધ્યાયન્નિવાધનઃ

નિષ્પીડિતાન્ત્રસંકાશશિશ્નો ઽપિ સુરતોત્સુકઃ ।
હસ્તં દત્ત્વા ભગે વૃદ્ધો નિધાનમિવ રક્ષતિ

માંસક્ષીરઘૃતાહારં કૃત્વા વૃદ્ધો રતાશયા ।
રાત્રૌ વમતિ તત્સર્વં ભજતે વા વિષૂચિકામ્

શુષ્કચર્મોપમં વૃદ્ધં મધુપર્કે ક્ષણં પતિમ્ ।
સજને તરુણી દૃષ્ટ્વા હ્રીતા યાતિ રસાતલમ્

એતેન વૃદ્ધવણિજા દ્રવ્યૈર્વૃદ્ધવિટોદિતૈઃ ।
લિપ્તલિઙ્ગેન સતતં દગ્ધેવાયાસિતા વધૂઃ

સ એષ બહુનિક્ષેપસંભક્ષણકૃતક્ષણઃ ।
દ્રવિણાવસ્કરક્ષેત્રં વણિગ્વાસરતસ્કરઃ

નૃત્યતિ વ્યાધિકાલેષુ કુટિલઃ કલિપન્નગઃ ।
અજ્ઞાતતૃણકાષ્ઠાદિવિક્રયી દ્રવ્યનામભિઃ

તરુણાકાઙ્ક્ષિણીં વૃદ્ધઃ પ્રિયામવિચલેક્ષણઃ ।
સો ઽયં નિરીક્ષતે દૂરાન્મૃષ્ટં ભોજ્યમિવાતુરઃ

તસ્માત્પૌષ્પિકમાસાદ્ય ક્રિયતાં મન્ત્રસંપદા ।
ગૃહિણી રાગિણી યેન લબ્ધશક્તેઃ પ્રજાયતે

વૃદ્ધવણિક્ ।
ઇત્યાદિશિષ્યૈરાહ્વાનં શ્રુત્વા તેન નિવેદિતમ્ ।
સર્વં કરોમીત્યવદદ્ભ્રૂવિકારાકુલો ગુરુઃ

તતો દિનાન્તે વિપુલાં કૃત્વાગ્રે શિવકુણ્ડિકામ્ ।
ગુરુણા સહ તે શિષ્યાઃ પપુર્ભુક્તોત્તરં ચિરમ્

નિયોગિલલનાઃ સર્વાસ્તે ચ તન્મિત્રબાન્ધવાઃ ।
કપાલેષુ તદુચ્છિષ્ટં *વમિત્વા બહુશઃ પપુઃ

કશ્ચિદ્ગાતું પ્રવૃત્તો ઽથ કશ્ચિદ્રોદિતિ સસ્વનમ્ ।
કશ્ચિદ્વ્યાઘૂર્ણતે કશ્ચિત્પ્લવતે કૃતશૂત્કૃતિઃ

કશ્ચિદત્યન્તવૈકલ્યં નાટયન્ભક્તિસમ્ભવમ્ ।
નિશ્ચેષ્ટસ્તિષ્ઠતિ ચિરં સંપ્રાપ્તઃ શવતામિવ

કશ્ચિદ્વિલોલસ્રગ્દામભૂષિતો મદનિર્ભરઃ ।
કૃતકણ્ઠગ્રહઃ પુંસાં ચુચુમ્બ લલના અપિ

તતઃ ક્ષીબો ગુરુઃ કિં ચિત્સ્વકાવ્યં દેશભાષયા ।
વીણાવંશરવોદગ્રં કોચ્છિકાવાદ્યકૃજ્જગૌ

અથૈકભુજમાનન્દાદુદ્યમ્યૈકેન પાણિના ।
ગુરુર્નનર્ત દ્વાભ્યાં ચ શનૈરુત્થાય ચાસનાત્

તતઃ શિષ્યાઃ સમુત્તસ્થુરટ્ટહાસનિનાદિનઃ ।
કૃતાઙ્ગનાપરિષ્વઙ્ગા વિસ્રસ્તકટિકર્પટાઃ

શનૈઃ પ્રયાતે રાત્ર્યર્ધે વિનષ્ટે દીપમણ્ડલે ।
નિર્વિભાગો ઽભવત્તેષાં રતિચક્રમહોત્સવઃ

પ્રભાતે ગુરુરુત્થાય ત્વરયા કલશપ્રદઃ ।
કૃતવદ્વિદધે સર્વં શિષ્યૈરન્યૈર્નિમન્ત્રિતઃ

જ્વરાદિકાલે વૈદ્યાનાં શરત્કાલે નિયોગિનામ્ ।
પુષ્પકાલે ગુરૂણાં ચ હેમપૂર્ણા વસુન્ધરા

અથાવિશત્પૃથુશ્વાસઃ કમ્પમાનઃ સ્ફુટન્નિવ ।
પાર્શ્વાવલોકી પુરુષઃ પરમાપ્તો નિયોગિનઃ

સો ઽબ્રવીદદ્ય રાત્ર્યર્ધે ગૃહકૃત્યમહત્તમઃ ।
રાજરાશિધનં ભૂરિ હૃત્વા યાતઃ સહાનુગઃ

અનુક્ત્વાપસૃતે તસ્મિંસ્તત્સમ્બન્ધિનિયોગિનામ્ ।
પલાયનવ્યતિકરઃ કો ઽપિ જાતો ગૃહે ગૃહે

ચપેટોત્સ્ફોટિતમુખસ્ત્વત્સ્વામી બન્ધનં ભટૈઃ ।
નીતઃ પતત્પુરીષો ઽગ્રે સ તાવત્પરિપાલકઃ

યાવન્નો*લ્લુઞ્ચિતશ્મશ્રુર્બદ્ધ્વા ત્વમપિ નીયસે ।
તાવદ્રાજભયે ઘોરે નીતિરસ્મિન્ વિધીયતામ્

ઇતિ બ્રુવાણે તન્મિત્રે તૈઃ શિષ્યૈઃ સહિતે ગુરૌ ।
તૂર્ણં પ્રયાતે નિઃશ્વસ્ય નિયોગી દુઃખિતો ઽવદત્

અહો નુ કાલદૌરાત્મ્યાદ્ઘોરતા કિયતી કલેઃ ।
સાધવઃ સર્વથા નષ્ટાઃ કષ્ટં ધર્મો ઽસ્તમાગતઃ

ઇત્યુક્ત્વા સાનુગો યાવત્પલાયનકૃતોદ્યમઃ ।
સ સુસ્રાવ ભયાન્મૂત્રં તાવદેત્ય ભટૈર્વૃતઃ

સ રાજ્ઞા હૃતસર્વસ્વઃ પ્રક્લિન્નો બન્ધને ચિરમ્ ।
ધનેન વેશ્યયા સ્વસ્રા મોચિતો નિરગાત્તતઃ

તતો વિભવહીનો ઽસૌ જાપી સ્વપ્નનિરીક્ષકઃ ।
બભૂવ સર્વપ્રણતશ્ચાટુકારઃ પ્રિયંવદઃ

યો ઽભૂદભ્યુત્થિતસ્તબ્ધો નિયોગી લિઙ્ગસન્નિભઃ ।
અધિકારપરિભ્રંશાત્સ વૃદ્ધવૃષણાયતે

અધિકારમદાન્ધાનાં દૃષ્ટિકોપવતાં સદા ।
નેત્રનૈર્મલ્યજનનં બન્ધનં પરમાઞ્જનમ્

યઃ પાદપતિતાનાર્તાન્પૂજ્યાનપ્યવમન્યતે ।
ભ્રષ્ટાધિકારશ્ચરણૌ શકૃલ્લિપ્તૌ સ વન્દતે

અહો બત મુહૂર્તેન ભવન્તિ ન ભવન્તિ ચ ।
પલાલદહનજ્વાલાચપલા દિવિરશ્રિયઃ

સ્વયમુત્થાય યાતાયાં જાયાયાં નિર્ધનો ઽથ સઃ ।
બભ્રામ લૌલ્યનિલયઃ પિણ્ડાર્થી બન્ધુવેશ્મસુ

રૂક્ષઃ કૃશો ઽતિમલિનઃ સ્યૂતદગ્ધપટચ્ચરઃ ।
પિશાચ ઇવ દુષ્પ્રેક્ષ્યો દિનૈરેવ બભૂવ સઃ

તુષાગ્નિકુણ્ડિકાતાપદગ્ધસ્ફિગ્વૃષણોદરઃ ।
વાતશૂલાપનોદાય જાનુગ્રથિતદામકઃ

દેવદ્વિજધન*ગ્રાસજાતકોષ્ઠગલગ્રહઃ ।
ક્ષુત્ક્ષામકુક્ષિઃ શુષ્કાસ્યઃ પતિતો ઽવસ્કરે ભ્રમન્

શ્વજગ્ધજાનુચરણઃ પ્રસ્રવદ્ભૂરિશોણિતઃ ।
કૃપાર્દ્રોચ્છિષ્ટભુગ્દત્તભક્તગોલકનિર્વૃતઃ

દગ્ધાર્ધકર્પટીનિર્યત્સકેશવૃષણદ્વયઃ ।
ભસ્મપ્રલિપ્ત*શીર્ષાંસવક્ષઃપાર્શ્વો ગતત્રપઃ

પ્રલપન્કાઞ્ચિકાકાઙ્ક્ષી કેનચિદ્દત્તમણ્ડકઃ ।
પ્રપાપાલિકયા ડોમ્બભ્રાન્ત્યા પાને તિરસ્કૃતઃ

રજસ્વલાપલાલેન છન્નાઙ્ગસ્તુહિનાગમે ।
શરાવકર્પરાદાનકલહે યાચકાર્ભકૈઃ ।
વહ્નિપાત્રપ્રહારેણ દગ્ધભ્રૂશ્મશ્રુલોચનઃ

ચણ્ડાલૈઃ પ્રેતકાર્યેષુ લગુડૈરાહતો ઽસકૃત્ ।
પઙ્કશાયી સ ચુક્રોશ સત્ત્રતીર્થાગ્રવર્ત્મસુ

નૃપુરીષપ્રણાલે ઽથ પતિતો ઽસાવધોમુખઃ ।
ઉચ્ચૈઃકૃતકટિઃ પ્રાણાનુત્સસર્જ નરાધમઃ

ઇતિ દૌર્ગત્યતપસા પ્રયાતઃ સો ઽસ્થિશેષતાં ।
સશરીરઃ સ્વયં પ્રાપ્તો નરકં નરકણ્ટકઃ

એવં ક્રમેણ શાન્તેષુ નિયોગિદિવિરાગ્નિષુ ।
મોદતે ગતસન્તાપઃ સન્તોષસુભગો જનઃ

ઇતિ દિવિરનિયોગિવ્રાતદુશ્ચેષ્ટિતાનાં કુસૃતિચરિતચર્ચા નર્મમાલા કૃતેયમ્ ।
અપિ સુજનવિનોદાયોમ્ભિતા હાસ્યસિદ્ધ્યૈ કથયતિ ફલભૂતં સર્વલોકોપદેશમ્