Nārāyaṇīya · Chapter 11.97

traiguṇyād bhinnarūpaṃ bhavati hi bhuvane hīnamadhyottamaṃ ya-
jñānaṃ śraddhā ca kartā vasatirapi sukhaṃ karma cāhārabhedāḥ /
tvatkṣetratvanniṣevādi tu yadiha punastvatparaṃ tattu sarvaṃ
prāhurnairguṇyaniṣṭhaṃ tadanubhajanato maṅkṣu siddho bhaveyam //

tvayyeva nyastacittaḥ sukhamayi vicaran sarvaceṣṭāstvadarthaṃ
tvadbhaktaiḥ sevyamānānapi caritacarānāśrayan puṃṇyadeśān /
dasyau vipre gṛhādiṣvapi ca samamatirmucyamānāvamāna-
spardhāsūyādidoṣaḥ satatamakhilabhūteṣu sampūjaye tvām //

tvadbhāvo yāvadeṣu sphurati na viśadaṃ tāvadevaṃ hyupāstiṃ
kurvannaikātmyabodhe jhaṭiti vikasati tvanmayo'haṃ careyam /
tvaddharmasyāsya tāvat kimapi na bhagavan! prastutasya praṇāśa-
stasmāt sarvātmanaiva pradiśa mama vibho! bhaktimārgaṃ manojham //

taṃ cainaṃ bhaktiyogaṃ draḍhayitumayi! me sādhyamārogyamāyur-
diṣṭyā tatrāpi sevyaṃ tava caraṇamaho bheṣajāyeva dugdham /
mārkaṇḍeyo hi pūrvaṃ gaṇakanigaditadvādaśābdāyuruccaiḥ
sevitvā vatsaraṃ tvāṃ tava bhaṭanivahairdrāvayāmāsa mṛtyum //