Narasimha Purana · Chapter 12

śrutvemām amṛtāṃ puṇyāṃ sarvapāpapraṇāśinīm
avitṛptaḥ sa dharmātmā śuko vyāsam abhāṣata //

aho 'tīva tapaścaryā mārkaṇḍeyasya dhīmataḥ
yena dṛṣṭo hariḥ sākṣād yena mṛtyuḥ parājitaḥ //

na tṛptir asti me tāta śrutvemāṃ vaiṣṇavīṃ kathām
puṇyāṃ pāpaharāṃ tāta tasmād anyat tu me vada //

narāṇāṃ dṛḍhacittānām akāryaṃ neha kurvatām
yat puṇyam ṛṣibhiḥ proktaṃ tan me vada mahāmate //

narāṇāṃ dṛḍhacittānām iha loke paratra ca
puṇyaṃ yat syān muniśreṣṭha tan me nigadataḥ śṛṇu //

atraivodāharantīmām itihāsaṃ purātanam
yamyā ca saha saṃvādaṃ yamasya ca mahātmanaḥ //

vivasvān aditeḥ putras tasya putrau suvarcasau
jajñāte sa yamaś caiva yamī cāpi yavīyasī //

tau tatra saṃvivardhete pitur bhavana uttame
krīḍamānau svabhāvena svacchandagamanāv ubhau //

yamī yamaṃ samāsādya svasā bhrātaram abravīt //

na bhrātā bhaginīṃ yogyāṃ kāmayantīṃ ca kāmayet
bhrātṛbhūtena kiṃ tasya svasur yo na patir bhavet //

abhūta iva sa jñeyo na tu bhūtaḥ kathaṃcana
anāthāṃ nātham icchantīṃ svasāraṃ yo na nāthati //

kāṅkṣantīṃ bhrātaraṃ nāthaṃ bhartāraṃ yas tu necchati
bhrāteti nocyate loke sa pumān munisattamaḥ //

syād vānyatanayā tasya bharyā bhavati kiṃ tayā
īkṣatas tu svasā bhrātuḥ kāmena paridahyate //

yat kāryam aham icchāmi tvam eveccha tad eva hi
anyathāhaṃ mariṣyāmi tvām icchantī vicetanā //

kāmaduḥkham asahyaṃ nu bhrātaḥ kiṃ tvaṃ na cecchasi
kāmāgninā bhṛśaṃ taptā pralīyāmy aṅga mā ciram //

kāmārtāyāḥ striyāḥ kānta vaśago bhava mā ciram
svena kāyena me kāyaṃ saṃyojayitum arhasi //

kim idaṃ lokavidviṣṭaṃ dharmaṃ bhagini bhāṣase
akāryam iha kaḥ kuryāt pumān bhadre sucetanaḥ //

na te saṃyojayiṣyāmi kāyaṃ kāyena bhāmini
na bhrātā madanārtāyāḥ svasuḥ kāmaṃ prayacchati //

mahāpātakam ity āhuḥ svasāraṃ yo 'dhigacchati
paśūnām eṣa dharmaḥ syāt tiryagyonivatāṃ śubhe //

ekasthāne yathā pūrvaṃ saṃyogo nau na duṣyati
mātṛgarbhe tathaivāyaṃ saṃyogo nau na duṣyati //

kiṃ bhrātar apy anāthāṃ tvaṃ mā necchasi śobhanam
svasāraṃ nirṛtī rakṣaḥ saṃgacchati ca nityaśaḥ //

svayaṃbhuvāpi nindyeta lokavṛttaṃ jugupsitam
pradhānapuruṣācīrṇaṃ loko 'yam anuvartate //

tasmād aninditaṃ dharmaṃ pradhānapuruṣaś caret
ninditaṃ varjayed yatnād etad dharmasya lakṣaṇam //

yad yad ācarati śreṣṭhas tat tad evetaro janaḥ
sa yat pramāṇaṃ kurute lokas tad anuvartate //

atipāpam ahaṃ manye subhage vacanaṃ tava
viruddhaṃ sarvadharmeṣu lokeṣu ca viśeṣataḥ //

matto 'nyo yo bhaved yo vai viśiṣṭo rūpaśīlataḥ
tena sārdhaṃ pramodasva na te bhartā bhavāmy aham //

nāhaṃ spṛśāmi tanvā te tanuṃ bhadre dṛḍhavrataḥ
munayaḥ pāpam āhus taṃ yaḥ svasāraṃ nigṛhṇati //

durlabhaṃ caiva paśyāmi loke rūpam ihedṛśam
yatra rūpaṃ vayaś caiva pṛthivyāṃ kva pratiṣṭhitam //

na vijānāmi te cittaṃ kuta etat pratiṣṭhitam
ātmarūpaguṇopetāṃ na kāmayasi mohitām //

lateva pādape lagnā kāmaṃ tvaccharaṇaṃ gatā
bāhubhyāṃ saṃpariṣvajya nivasāmi śucismitā //

anyaṃ śrayasva suśroṇi devaṃ devy asitekṣaṇe
yas tu te kāmamohena cetasā vibhramaṃ gataḥ
tasya devasya devī tvaṃ bhavethā varavarṇini //

īpsitāṃ sarvabhūtānāṃ varyāṃ śaṃsanti mānavāḥ
subhadrāṃ cārusarvāṅgīṃ saṃskṛtāṃ paricakṣate //

tatkṛte 'pi suvidvāṃso na kariṣyanti dūṣaṇam
paritāpaṃ mahāprājñe na kariṣye dṛḍhavrataḥ //

cittaṃ me nirmalaṃ bhadre viṣṇau rudre ca saṃsthitam
ataḥ pāpaṃ nu necchāmi dharmacitto dṛḍhavrataḥ //

asakṛt procyamāno 'pi tayā caivaṃ dṛḍhavrataḥ
kṛtavān na yamaḥ kāryaṃ tena devatvam āptavān //

narāṇāṃ dṛḍhacittānām evaṃ pāpam akurvatām
anantaṃ phalam ity āhus teṣāṃ svargaphalaṃ bhavet //

etat tu yamyupākhyānaṃ pūrvavṛttaṃ sanātanam
sarvapāpaharaṃ puṇyaṃ śrotavyam anasūyayā //

yaś caitat paṭhate nityaṃ havyakavyeṣu brāhmaṇaḥ
saṃtṛptāḥ pitaras tasya na viśanti yamālayam //

yaś caitat paṭhate nityaṃ pitṝṇām anṛṇo bhavet
vaivasvatībhyas tīvrābhyo yātanābhyaḥ pramucyate //

putraitad ākhyānam anuttamaṃ mayā tavoditaṃ vedapadārthaniścitam
purātanaṃ pāpaharaṃ sadā nṛṇāṃ kim anyad adyaiva vadāmi śaṃsa me //