Narada Smriti · Chapter v7
nikṣiptaṃ vā paradravyaṃ naṣṭaṃ labdhvāpahṛtya vā /
vikrīyate 'samakṣaṃ yad vijñeyo 'svāmivikrayaḥ //
dravyam asvāmivikrītaṃ prāpya svāmī samāpnuyāt /
prakāśaṃ krayataḥ śuddhiḥ kretuḥ steyaṃ rahaḥ krayāt //
asvāmyanumatād dāsād asataś ca janād rahaḥ /
hīnamūlyam avelāyāṃ krīṇaṃs taddoṣabhāg bhavet //
na gūhetāgamaṃ kretā śuddhis tasya tadāgamāt /
viparyaye tulyadoṣaḥ steyadaṇḍaṃ ca so 'rhati //
vikretā svāmine 'rthaṃ ca kretur mūlyaṃ ca tatkṛtam /
dadyād daṇḍaṃ tathā rājñe vidhir asvāmivikraye //
pareṇa nihitaṃ labdhvā rājany upaharen nidhim /
rājagāmī nidhiḥ sarvaḥ sarveṣāṃ brāhmaṇād ṛte //
brāhmaṇo 'pi nidhiṃ labdhvā kṣipraṃ rājñe nivedayet /
tena dattaṃ ca bhūñjīta stenaḥ syād anivedayan //
svam apy arthaṃ tathā naṣṭaṃ labdhvā rājñe nivedayet /
gṛhṇīyāt tatra taṃ śuddham aśuddhaṃ syāt tato 'nyathā //
Original text: Nāradasmṛti · Edition: Richard W. Lariviere The Nāradasmṛti. Critically edited with an introduction, annotated translation, and appendices Philadelphia Dep. of South Asia Regional Studies University of Pennsylvania studies on South Asia 4-5 · Data entry Yasuke Ikari · GRETIL (Göttingen) · CC BY-NC-SA 4.0