નારદસ્મૃતિ · અધ્યાય v7

નિક્ષિપ્તં વા પરદ્રવ્યં નષ્ટં લબ્ધ્વાપહૃત્ય વા ।
વિક્રીયતે ઽસમક્ષં યદ્ વિજ્ઞેયો ઽસ્વામિવિક્રયઃ ॥

દ્રવ્યમ્ અસ્વામિવિક્રીતં પ્રાપ્ય સ્વામી સમાપ્નુયાત્ ।
પ્રકાશં ક્રયતઃ શુદ્ધિઃ ક્રેતુઃ સ્તેયં રહઃ ક્રયાત્ ॥

અસ્વામ્યનુમતાદ્ દાસાદ્ અસતશ્ ચ જનાદ્ રહઃ ।
હીનમૂલ્યમ્ અવેલાયાં ક્રીણંસ્ તદ્દોષભાગ્ ભવેત્ ॥

ન ગૂહેતાગમં ક્રેતા શુદ્ધિસ્ તસ્ય તદાગમાત્ ।
વિપર્યયે તુલ્યદોષઃ સ્તેયદણ્ડં ચ સો ઽર્હતિ ॥

વિક્રેતા સ્વામિને ઽર્થં ચ ક્રેતુર્ મૂલ્યં ચ તત્કૃતમ્ ।
દદ્યાદ્ દણ્ડં તથા રાજ્ઞે વિધિર્ અસ્વામિવિક્રયે ॥

પરેણ નિહિતં લબ્ધ્વા રાજન્ય્ ઉપહરેન્ નિધિમ્ ।
રાજગામી નિધિઃ સર્વઃ સર્વેષાં બ્રાહ્મણાદ્ ઋતે ॥

બ્રાહ્મણો ઽપિ નિધિં લબ્ધ્વા ક્ષિપ્રં રાજ્ઞે નિવેદયેત્ ।
તેન દત્તં ચ ભૂઞ્જીત સ્તેનઃ સ્યાદ્ અનિવેદયન્ ॥

સ્વમ્ અપ્ય્ અર્થં તથા નષ્ટં લબ્ધ્વા રાજ્ઞે નિવેદયેત્ ।
ગૃહ્ણીયાત્ તત્ર તં શુદ્ધમ્ અશુદ્ધં સ્યાત્ તતો ઽન્યથા ॥