Scripture Library

Narada Purana · Chapter 1.90

1.90.1

iti śrībṛhannāradīyapurāṇe pūrvabhāge bṛhadupākhyāne tṛtīyapāde lalitāstotra kavacasahasranāmakathanaṃ nāmaikonanavatitamo 'dhyāyāḥ // 89 //
sanatkumāra uvāca
athāto vipra nityānāṃ prayogādisamanvitam /
paṭalaṃ te 'bhidhāsyāmi nityābhyarcanadīpakam

1.90.2

lalitāyāstribhivarṇaiḥ sakalārtho 'bhidhīyate /
śeṣeṇa devīrūpeṇa tena syādidamīritam

1.90.3

aśeṣato jagatkṛtsnaṃ hṛllekhātmakamucyate /
tasyāścārthastu kathitaḥ sarvatantreṣu gopitaḥ

1.90.4

vyomnā prakāśamānatvaṃ grasamānatvamagninā /
tayorvimarśa īkāro bindunā tanniphaālanam

1.90.5

piṇḍakartari bījākhyā mantrā mālābhidhāḥ kramāt /
ekārṇavanto dvyarṇāśca tridiṅmukhārṇakāḥ

1.90.6

vṛttijārṇāṃllikhedaṅkairvyatyastakramayogataḥ /
tairbhedayo janaṃ kuryātsaṃdarbhāṇāmaśeṣataḥ

1.90.7

devyātmakaṃ samudayaṃ viśrāntiṃ ca śivātmakam /
ubhayātmakamapyātmasvarūpaṃ taiśca bhāvayet

1.90.8

kālenānyañca duḥkhārttivāsanānāśano dhruvam /
parāhṝntāmayaṃ sarvasvarūpaṃ cātmavigraham

1.90.9

sadātmakaṃ sphuratākhyamaroṣopādhivarjitam /
prakāśarūpamātmatve vastu tadbhāsate param

1.90.10

yata evamato loke nāstyamantraṃ yadakṣaram /
yadvidyeti samākhyātaṃ sarvathā sarvataḥ sadā

1.90.11

vāsareṣu tu teṣvevaṃ sarvāpattārakaṃ bhavet /
tadvidhānaṃ ca vakṣyāmi samyagāsavakalpanam

1.90.12

gauḍī paiṣṭī tathā mādhvītyevaṃ tattrividhaṃ smṛtam /
gatuḍamuṣṇodake kṣiptvā samāloḍya vinikṣipet

1.90.13

ghaṭe kācamaye tasmin dhātakīsumanorajaḥ /
khātvā bhūmau saṃdhyayostu karaiḥ saṃkṣobhya bhūyasā

1.90.14

māsamātre gate tasminnimagne rajasi drutam /
saṃśodhya pūjayettena gauḍī sā guḍayogataḥ

1.90.15

evaṃ madhusamāyogānmādhvī paiṣṭīṃ śṛṇu priya /
adhyarddhadviguṇe toye śrapayettandulaṃ śanaiḥ

1.90.16

dinatrayoṣite tasmindhātryaṅkurarajaḥ kṣipet /
dinamekaṃ dhṛte vāte nivāte sthāpayettataḥ

1.90.17

udakairlilitaṃ paścādgalitaṃ paiṣṭikaṃ madhu /
vṛkṣajaṃ phalajaṃ ceti dvividhaṃ kriyate madhu

1.90.18

tannirmāṇaṃ śṛṇuṣvādya yadāsvādānmanolayaḥ /
mṛdvīkāṃvātha kharjūraphalaṃ puṣpamathāpi vā

1.90.19

madhūkasyāṃbhasi kṣiptvā śatṛmarddhāvaśeṣitam /
prāksṛtāsavaleśena militaṃ divasadvayāt

1.90.20

gālitaṃ svādu pūjārhaṃ manolayakaraṃ śubham /
vārkṣaṃ tu nālikeraṃ syāddhintālasyātha tālataḥ

1.90.21

phalakāṇḍātsnutaṃ dugdhaṃ nītaṃ sadyo rasāvaham /
nālike raphalāntasthasalile śaśinā yute

1.90.22

arddhapūgaphalotthaṃ tu ramaṃ saṃkṣipya tāpayet /
ātape sadya evaitadāsavaṃ devatāpriyām

1.90.23

āsavairebhiruditairardhyaṃ devyai nivedayet /
devaiḥ kṛtvā tataḥ sadyo dadyāttatsiddhaye dvayam

1.90.24

sādhako niyatāhāraḥ samādhisthaḥ pibetsadā /
na kadācitpibotsiddho devyarthamaniveditam

1.90.25

pānaṃ ca tāvatkurvīta yāvatā syānmanolayaḥ /
tataḥ karoti cetsadyaḥ pātakī bhavati dhruvam

1.90.26

devatāguruśiṣṭānyaṃ pibannāsavamāśayā /
pātakī rājadaṇḍyaśca rikthopāsaka eva

1.90.27

sādhyasādhakayoretatkāmya eva samīritam /
siddhasya sarvadā proktaṃ yato 'sau tanmayo bhavet

1.90.28

pūjayetproktarūpastu proktarūpāśca tāḥ kramāt /
upacārairāsavaiśca matsyairmāṃsaistu saṃskṛtaiḥ

1.90.29

atha kāmyārcanaṃ vakṣye prayogāṃścāpi nārada /
yeṣāmācaraṇātsiddhiṃ sādhako labhate dhruvam

1.90.30

caitre damanakairarcetpūrṇāyāṃ madanotsavam /
vaiśākhe māsi pūrṇāyāṃ pūjayeddhemapuṣpakaiḥ

1.90.31

jyaiṣṭhyāṃ phalairyajenddevīṃ kadalīpanasāmnajaiḥ /
āṣāḍhyāṃ candanairelājātīkaṅkolakuṅkumaiḥ

1.90.32

śrāvaṇyāmāgamoktena vidhinārcetpavitrakaiḥ /
prauṣṭhapadyāṃ gandhapuṣpairyajedvā ketakīsumaiḥ

1.90.33

āśvāyujyāṃ kanyakārcā bhūṣāvastradhanādibhiḥ /
kārtikyāṃ kuṅkumaiścaiva niśi dīpagaṇairapi

1.90.34

sacandrairmārgaśīrṣyāṃ tu nālikerairapūpakaiḥ /
pauṣyāṃ saśarkaraguḍairgavāṃ dugdhaiḥ samarcayet

1.90.35

svarṇaraupyaiḥ paṅkajaistu māghyāṃ saugandhikādibhiḥ /
phaālgunyāṃ vividhairdravyaiḥ phalaiḥ puṣpaiḥ sugandhibhiḥ

1.90.36

parvatāgre yajeddevīṃ palāśakusumairniśi /
siddhadravyaiśca saptāhātkhecarīmelanaṃ bhavet

1.90.37

araṇye vaṭamūle vā kuñje vā dharaṇībhṛtām /
kadambagajātipuṣpābhyāṃ siddhadravyaiḥ śivāṃ yajet

1.90.38

māsena siddhā yakṣiṇyaḥ pratyakṣā vāñchitapradāḥ /
ketakīkusumaiḥ siddhāśceṭakā vāridhestaṭe

1.90.39

ājñāmabhīṣṭāṃ kurvanti raṇe māyāṃ mahādbhutām /
vasūni mālāṃ bhūṣāṃ ca dadyurasyehayāniśam

1.90.40

pīṭhamṛkṣadrumaiḥ kṛtvā tatra devīṃ yajenniśi /
śālmalaiḥ kusumaiḥ siddhadravyairmāsaṃ tu nirbhayam

1.90.41

śyaśānadeśe viprendra siddhyantyasya piśācakāḥ /
aśmapātaprahārādyairjīyādābhirdviṣaściram

1.90.42

nirjane vipine rātrau māsamātraṃ tu nirbhayaḥ /
yajeddevīṃ cakragatāṃ siddhadravyasamanvitām

1.90.43

mālatījātapunnāgaketakīmarubhiḥ kramāt /
tena siddhyanti vetālāstānāruhyecchayā caret

1.90.44

śmaśāne caṇḍikāgehe nirjane vipine 'pi vā /
madhyarātre yajeddevīṃ kṛṣṇavastravibhūṣaṇaiḥ

1.90.45

kṛṣṇacakre 'tikṛṣṇāṃ tāmatikruddhāśayo yajet /
sādhya yoniṃ tadagre tu baliṃ chindannivedayet

1.90.46

siddhadravyasametaṃ tu māsāttadbhālalocanāt /
jāyante bhīṣaṇāḥ kṛtyāstābhyaḥ siddhiṃ nivedayet

1.90.47

viśvasaṃhārasaṃtuṣṭāḥ punaretya nijecchayā /
devyā lalāṭanetre syuḥ prārthite tu tirohitāḥ

1.90.48

raktabhūṣāṃbarālepamālābhūṣitavigrahāḥ /
udyāne nirjane devīṃ cakre saṃcintya pūjayet

1.90.49

kahlāracaṃpakāśokapāṭalāśatapatrakaiḥ /
siddhadravyasamopetairmāyāḥ siddhyanti māsataḥ

1.90.50

yāsāṃ prasādalābhena kāmarūpo bhavennaraḥ /
yābhirviśvajayī viśvacārī viśvavinodavān

1.90.51

ṣaḍādhārābjamadhye tu cakraṃ saṃchitya pūjayet /
candracandanakastūrīmṛganābhimahodayaiḥ

1.90.52

trikālajño bhaveddevīṃ teṣu samyagvicintayet /
pūrṇapratītau bhavyāni vikale 'bhavyamīritam

1.90.53

devīṃ cakreṇa sahitāṃ smaredbhaktiyuto naraḥ /
vivekā vibhavā viśvā vitatā ca prakīrtitā

1.90.54

kāminī khecarī garvā purāṇā parameśvarī /
gaurī śivā hyameyā ca vimalā vijayā parā

1.90.55

pavitrā pīḍanī vidyā viśveśī śivavallabhā /
aśeṣarūpā svānandāṃbujākṣī cāpyaninditā

1.90.56

varadā vākyadā vāṇī vividhā vedavigrahā /
vidyā vāgīśvarī satyā saṃyatā ca sarasvatī

1.90.57

nirmalānandarūpā ca hyamṛtā mānadā tathā /
pūṣā caiva tathā tuṣṭiḥ puṣṭiścāpi ratirdhṛtiḥ

1.90.58

śāśinī candrikā kāntirjyotsnā śrīḥ prītiraṅgadā /
devīnāmāni caitāni culuke salile smaran

1.90.59

mātṛkāsahitāṃ vignāṃ trirāvṛttyāmṛtātmikām /
tāḍīṃ sārasvatīṃ jihvāṃ dīpākārāṃ smaranpibet

1.90.60

abdāñcaturvidhaṃ tasya pāṇḍityaṃ bhuvi jāyate /
evaṃ nityamuṣaḥ kāle yaḥ kuryācchuddhamānasaḥ

1.90.61

sa yogī brahmavijñānī śivayogī tathātmavit /
anugrahoktacakrasthāṃ devīṃ tābhirvṛtāsmaret

1.90.62

caṃpakendīvarairmāsādārogyamupajāyate /
jvarabhūtagrahonmādaśītakākāmalākṣihṛt

1.90.63

dantakarṇajvaraśiraḥ śūlagulmādi kukṣijāḥ /
vraṇapramehacchardyarśograhaṇyāmatridoṣajāḥ

1.90.64

sarve tathā śamaṃ yānti pūjayā parameśvarī /
dravyaṃ cakrasya nirmāṇe kāśmīraṃ samudī ritam

1.90.65

siṃdūraṃ gairikaṃ lākṣā daradaṃ candanadvayam /
biladvāre likhettryasraṃ ṣoḍaśatryasrasaṃyutam

1.90.66

daradenāsya madhyasthāṃ pūjayetparameśvarīm /
tābhistacchaktibhiḥ sākaṃ siddhadravyaiḥ sugandhibhiḥ

1.90.67

kusumairmāsamātreṇa nāgakanyāsamanvitam /
pātālādiṣu lokeṣu ramayatyaniśaṃ ciram

1.90.68

yakṣarākṣasagandharvasiddhavidyādharāṅganāḥ /
piśācā guhyakā vīrāḥ kinnirā bhujagāstathā

1.90.69

siddhyanti pūjanāttatra tathā tatproktakālataḥ /
kiṃśukairbhūṣaṇāvāptau pāṭalairgajasiddhaye

1.90.70

raktotpalairaśvasiddhau kumudaiścarasiddhaye /
utpalairuṣṭrasaṃsiddhyai tagaraiḥ paśusiddhaye

1.90.71

jaṃbīrairmahiṣāvāptyai lakucairajasiddhaye /
dāḍimairnidhisaṃsiddhyai madhukairgānasiddhaye

1.90.72

bakulairaṅganāsiddhyai kahlāraiḥ putrasiddhaye /
śatapatrairjayāvāptyai ketakairvāhanāptaye

1.90.73

saurabhāḍhyaiḥ prasūnaistu nityaṃ saubhāgyasiddhaye /
pūjayenmāsamātraṃ vā dviguṇaṃ triguṇaṃ tu vā

1.90.74

yāvatphalāvāptikāṅkṣī śarkarāghṛtapāyasaiḥ /
sacakraparivārāṃ tāṃ devīṃ salilamadhyagām

1.90.75

tarppayetkusumaiḥ sārdhyaiḥ sarvopadravaśāntaye /
ghṛtaiḥ pūrṇāyuṣaḥ siddhyai kṣauddraiḥ saubhāgyasiddhaye

1.90.76

dugdhairārogyasaṃsiddhyai tribhiraiśvaryasiddhaye /
nālikerodakaiḥ prītyai himatoyairnṛpāptaye /
sarvārthasiddhaya tauryairabhiṣiñcenmaheśvarīm

1.90.77

pūgodyāne yajeddevīṃ siddhadravyairdivāniśam /
nivasaṃstatra tatpuṣpairjāyate manmathopamaḥ

1.90.78

pūrṇāsu niyattaṃ devīṃ kanyakāyāṃ samarcayan /
kṛtyāḥ pareritā mantrā vimukhāṃstān grasaṃti vai

1.90.79

liṅgatrayamayīṃ devīṃ cakrasthābhiśca śaktibhiḥ /
pūjayanniṣṭamakhilaṃ labhate 'tra paratra ca

1.90.80

śatamānakṛtaiḥ svarṇapuṣpaiḥ saurabhyavāsitaiḥ /
pūjayanmāsamātreṇa prāgjanmādyairvimucyate

1.90.81

tathā ratnaiśca navabhirmāsaṃ tu yadi pūjayet /
vimuktasarvapāpaughaistāṃ ca paśyati cakṣuṣā

1.90.82

aṃśukairarcayeddevīṃ māsamātraṃ sugandhibhiḥ /
mucyate pāpakṛtyādiduḥkhaughairitarairapi

1.90.83

devīrūpaṃ svamātmānaṃ cakraṃ śaktīḥ samantataḥ /
bhāvayanviṣayaiḥ puṣpaiḥ pūjayaṃstanmayo bhavet

1.90.84

ṣoḍaśānāṃ tu nityānāṃ pratyeka tithayaḥ kramāt /
tattittithau tadbhajanaṃ japahomādikaṃ caret

1.90.85

ghṛtaṃ ca śarkarā dugdhamapūpaṃ kadalīpalam /
kṣaudraṃ guḍaṃ nālikeraphalaṃ lājā tilaṃ dadhi

1.90.86

pṛthukaṃ caṇakaṃ mudgapāyasaṃ ca nivedayet /
kāmeśvaryādiśaktīnāṃ sarvāsāmapi coditam

1.90.87

ādyāyā lalitāyāstu sarvāṇyetāni sarvadā /
nivedayeñca juhuyādvahnau dadyānnṛṇāmapi

1.90.88

tattadvidyākṣaraproktamauṣadhaṃ tatpramāṇataḥ /
saṃpiṣya guṭikīkṛtya tābhiḥ sarvaṃ ca sādhayet

1.90.89

ravivāre 'ruṇāṃbhojaiḥ kumudaiḥ somavārake /
bhaume raktotpalaiḥ saumye vāre tagarasaṃbhavaiḥ

1.90.90

guruvāre sukahlāraiḥ śukravāre sitāṃbujaiḥ /
nīlotpalairmandavāre pūjayediṣṭamādarāt

1.90.91

nivedayetkramātteṣu ravivārādiṣu kramāt /
pāyasaṃ dugdhakadalīnavanītasitāghṛtam

1.90.92

evamiṣṭaṃ samārādhya devīṃ gandhādibhiryajet /
grahapīḍāṃ vijityāśusukhāni ca samaśnute

1.90.93

ardharātre tu sādhyāṃ strīṃ smaranmadanavahninā /
dahyamānāṃ hṛtasvāntāṃ mastakasthāpitāñjalim

1.90.94

vikīrṇakeśīmālolalocanāmaruṇāruṇām /
vāyupreṅkhatpatākāsthapadā padmakalevarām

1.90.95

vivekavidhurāṃ mattāṃ mānalajjābhayātigām /
cintayannarcayeñcakraṃ madhye devīṃ digaṃbarām

1.90.96

japādāḍimabandhūkakiṃśukādyaiḥ samarcayet /
anyaiḥ sugandhiśephaālīkusumādyaiḥ samarcayet

1.90.97

trisaptarātrādāyāti proktarūpā madākulā /
yāvaccharīrapātaḥ syācchāpo vānapagāsya sā

1.90.98

padmairaktaistrimadhvaktairhemāllakṣmīmavāpnuyāt /
tathaiva kairavai raktairaṅganāḥ svavaśaṃ nayet

1.90.99

samānarūpavatsāyāḥ śuklāyā goḥ payaḥplutaiḥ /
mallikāmālatījātīśatapatrairhutairbhavet

1.90.100

kīrtividyādhanārogyasaubhāgyavittapādikam /
āragvadhaprasūnaistu kṣaudrāktairhavanādbhavet

1.90.101

svarṇādistaṃ bhanaṃ śatrornṛpādīnāṃ krudho 'pi ca /
ājyāktaiḥ karavīrotthaiḥ prasūnairaruṇairhutaiḥ

1.90.102

raktāṃbarāṇi vanitā bhūpāmātyavaśaṃ tathā /
bhūṣāvāhanavāṇijyasiddhayaścāsya vāñchitāḥ

1.90.103

lavaṇaiḥ sarṣarpairairitarairvātha homataḥ /
satailāktairniśāmadhye tvānayedvāñchitāṃ vadhūm

1.90.104

tailāktairjuhuyātkṛṣṇadarapuṣpairniśātare /
māsādarātestasyārtirjvareṇa bhavati dhruvam

1.90.105

āruṣkarairdhṛtābhyaktaistadbījairniśi homataḥ /
śatrorddāhavraṇāni syurduḥsādhyāni cikitsakaiḥ

1.90.106

tathā tattailasaṃsiktairbījairaṅkolakairapi /
maricaiḥ sarṣapājyāktaunaśi homānusārataḥ

1.90.107

vāñchitāṃ vanitāṃ kāmajvarārtāmānayeddrutam /
śālibhiścājyasaṃsiktairhemācchālīnavāpnuyāt

1.90.108

mudgairmudgaṃ ghṛtairājyaṃ siddhairitthaṃ hutairbhavet /
sādhyarkṣavṛkṣasaṃbhūtāṃ piṣṭapādarajaḥkṛtām

1.90.109

rājīmarīciloṇotthāṃ puttalīṃ juhuyānniśi /
prapadābhyāṃ ca jaṅghābhyāṃ jānubhyāmuruyugmataḥ

1.90.110

nābheradhastāddhṛdayādbhinnenākaṇṭhastathā /
śirasā ca sutīkṣṇena cchitvā śastreṇa vai kramāt

1.90.111

evaṃ dvādaśadhā homānnaranārīnarādhipāḥ /
vaśyā bhavanti saptāḍājjvarārttīścāsya vāñchayā

1.90.112

piṣṭena guḍayuktena maricairjīrakairyutām /
kṛtvā puttalikāṃ sādhyanāmayuktāmatho hṛdi

1.90.113

sanāmahomasaṃpātaghṛtepācyatāṃ punaḥ /
spṛśannijakarāgreṇa sahasraṃ prajapenmanum

1.90.114

abhyarcya tad ghṛtābhyaktaṃ bhakṣayettaddhiyā japan /
naranārīnṛpāstasya vaśyāḥ syurmaraṇāvadhiṃ

1.90.115

śaktayaṣṭagandhaṃ saṃpiṣya kanyayā śiśire jale /
tena vai tilakaṃ bhāle dhārayanvaśayejjagat

1.90.116

śālitandulamādāya prasthaṃ bhāṇḍe nave bhipet /
samānavarṇevatsāyā raktāyā goḥ payastathā

1.90.117

dvuguṇaṃ tatra nikṣipya śrapayetsaṃskṛte 'nale /
ghṛtena siktaṃ sikthaṃ tu kṛtvā tatsasitaṃ kare

1.90.118

vidhāya vidyāmaṣṭorddhūśataṃ jasvā hunettataḥ /
evaṃ homo mahālakṣmīmāvahetpratipatkṛtaḥ

1.90.119

śukravāreṣvapi tathā varṣānnṛpasamo bhavet /
pañcamyāṃ tu viśeṣeṇa prāgvaddhomaṃ samācaret

1.90.120

tasyāṃ tithau trimadhvaktairmallikādyaiḥ sitairhunet /
annājyābhyāṃ ca niyataṃ hutvānnāḍhyo bhavennaraḥ

1.90.121

yadyaddhi vāñchitaṃ vastu tattatsarvaṃ tu sarvadā /
ghṛtahomādavāpnoti tathaiva tilatandulaiḥ

1.90.122

aruṇaiḥ paṅkajairhemaṃ kurvaṃstrimadhurāplutaiḥ /
maṇḍalāllabhate lakṣmīṃ mahatīṃ ślādhyavigrahām

1.90.123

kahlāraiḥ kṣaudrasaṃsiktaiḥ pūrṇādyaṃ taddināvadhi /
juhuyānnityaśo bhaktyā sahasraṃ vikacaiḥ śubhaiḥ

1.90.124

sa tu kīrtiṃ dhanaṃ putrānprāpnuyānnātra saṃśayaḥ /
caṃpakaiḥ kṣaudrasaṃsiktaiḥ sahasrahavanāddhruvam

1.90.125

labhate svarṇaniṣkāṇāṃ śataṃ māsena nārada /
pāṭalairghṛtasaṃsiktaistrisahasraṃ hutaistathā

1.90.126

darśādimāsāllabhate citrāṇi vasanāni ca /
karpūracandanādyāni sugandhāni tu māsataḥ

1.90.127

vastūni labhate hṛdyairanyairbhogopayogibhiḥ /
śālibhiḥ kṣīrasiktābhiḥ saptamīṣu śataṃ hutam

1.90.128

tena śālisamṛddhiḥ syājmāsaiḥ ṣaḍrabhirasaṃśayam /
tilairhutaistu divasairvarṣādārogyamāpnuyāt

1.90.129

svajanmarkṣatriṣu tathā dūrvābhirjjuhuyānnaraḥ /
nirātaṅko mahābhogaḥ śataṃ varṣāṇi jīvati

1.90.130

guḍūcītiladūrvābhistriṣu janmasu vā hunet /
tenāyuḥśrīyaśobhogapuṇyanidhyādimānbhavet

1.90.131

ghṛtapāyasadugdhaistu hutaisteṣu triṣu kramāt /
āyurārogyavibhavairnṛpāmātyo bhavettathā

1.90.132

saptamyāṃ kadalīhomātsaubhāgyaṃ labhate 'nvaham /
dūrvātrikaistu prādeśamānaistrisvādusaṃyutaiḥ

1.90.133

juhuyāddinaśo ghore sannipātajvare tathā /
taddineṣu japedvidyāṃ nityaśaḥ salilaṃ spṛśan

1.90.134

sahasravāraṃ tattoyaiḥ snānaṃ pānaṃ samācaret /
pākādyamapi tairava kuryādrogavimuktaye

1.90.135

sādhyarkṣavṛkṣasaṃcūrṇaṃ tryūṣaṇaṃ sarṣapaṃ tilam /
piṣṭaṃ ca sādhyapādottharajasā ca samanvitam

1.90.136

kṛtvā puttalikāṃ samyagdhṛdaye nāmasaṃyutām /
prāgvacchitvāyasaistīkṣṇaiḥ śastraiḥ puttalikāṃ hanet

1.90.137

evaṃ dinaiḥ saptabhistu sādhyo vaśyo bhaveddṛḍham /
tathāvidhāṃ puttalikāṃ kuṇḍamadhye nikhanya ca

1.90.138

uparyagniṃ nidhāyātha vidyayā dinaśo hunet /
trisahasraṃ triyamāyāṃ sarṣapaistadrasāplutaiḥ

1.90.139

śatayojanadūrādapyānayedvanitāṃ balāt /
vaśayedvanitāṃ hāeṃmātkauśikairmadhumiśritaiḥ

1.90.140

nālikeraphalope tairguḍairlakṣmīmavāpnuyāt /
tathājyasiktaiḥ kahlāraiḥ kṣīrāktairaruṇotpalaiḥ

1.90.141

trimadhvaktaiścaṃparkaśca prasūnairbakulodbhavaiḥ /
madhūkajaiḥ prasūnaiśca hutaiḥ kanyāmavāpnuyāt

1.90.142

punnāgajairhutairvastrāṇyājyairiṣṭamavāpnuyāt /
māhiṣairmahiṣīrājairajān gavyaiśca gāstathā

1.90.143

avāpnoti hutairājyaiḥ ratnai ratnaṃ ca sādhakaḥ /
śālipiṣṭamayīṃ kṛtvā puttalīṃ sasitāṃ tataḥ

1.90.144

hṛddeśanyastanāmārṇāṃ pacettailājyayorniśi /
tanmanāśca divārātrau vidyājaptāṃ tu bhakṣayet

1.90.145

saptarātraprayogeṇa naro nārī nṛpo 'pi vā /
dāsavadvaśamāyāti cittaprāṇādi cārpayet

1.90.146

hayāripuṣpairaruṇaiḥ sitairvā juhuyāttathā /
trisaptarātrānmahatīmavāpnoti śriyannaraḥ

1.90.147

chāgamāṃsaistrimadhvaktairhemātsvarṇamavāpnuyāt /
kṣīrāktaiḥ sasyasaṃpannāṃ bhuvamāpnoti maṇḍalāt

1.90.148

padmākṣairhavanāllakṣmīmavāpnoti tribhirdinaiḥ /
bilvairdaśāṃśaṃ juhuyānmantrādyaiḥ sādhane jape

1.90.149

evaṃ saṃsiddhamantrastu mantritaiśculukodakaiḥ /
phaṇidaṣṭamṛtānāṃ tu mukhe saṃtāḍya jīvayet

1.90.150

tatkarṇayorjapanvidyāṃ yaṣṭyā vā japasiddhayā /
saṃtāḍyaśīrṣaṃ sahasā mṛtamutthāpayediti

1.90.151

kṛtvā yoniṃ kuṇḍamadhye tatrāgnau vidhivaddhrunet /
tilasarṣapagodhūmaśālidhānyayavairhunet

1.90.152

trimadhvaktairekaśo vā sametairvā samṛddhaye /
bakulaiścaṃpakairabjaiḥ kahlārairaruṇotpalaiḥ

1.90.153

kairavairmallikākundamadhūkairindirāptaye /
aśokaiḥ pāṭalairvilvairjātīvikaṅkataiḥ sitaiḥ

1.90.154

navanīlotpalairaśvaripujaiḥ karṇikārajaiḥ /
homāllakṣmīṃ ca saubhāgyaṃ nidhimāyuryaśo labhet

1.90.155

dūrvāṃ guḍūcīmaśvatthaṃ vaṭamāragvadhaṃ tathā /
sitārkaplakṣajaṃ hutvā cirānmucyeta rogataḥ

1.90.156

ikṣujaṃbūnālikeramocāguḍasitāyutaiḥ /
acalāṃ labhate lakṣmīṃ bhoktā ca bhavati dhruvam

1.90.157

sarṣapājyairhute mṛtyuḥ kāṣṭhāgnau vairimṛtyave /
caturaṅgulajairhemāñcaturaṅgabale ripoḥ

1.90.158

saptāhādrogaduḥkhārtirbhavatyeva na saṃśayaḥ /
nityaṃ nityārcanaṃ kuryāttathā homaṃ ghṛtena vai

1.90.159

vidyābhimantritaṃ toyaṃ pibetprātastadāptaye /
candanośīrakarpūrakastūrīrocanānvitaiḥ

1.90.160

kāśmīrakālāgurubhirmṛgasvedamayairapi /
pūjayecca śivāmetairgandhaiḥ sarvārthasiddhaye

1.90.161

sarvābhirapi nityābhiḥ prātarmātṛkayā samam /
trijaptābhiḥ pibettoyaṃ tathā vāksidvaye śivam

1.90.162

vidadhyātsādhanaṃ prāgvadvarṇalakṣaṃ payovrataḥ /
trisvādusiktairaruṇairaṃbujairhavanaṃ caret

1.90.163

japatarpaṇahomārcāsekasiddhamanurnaraḥ /
kuryāduktānprayogāṃśca na cettanmanudevatāḥ

1.90.164

prāṇāṃstasya grasaṃtyeva kupitāstatkṣaṇānmune /
anayā vidyayā loke yadasādhyaṃ na tatkvacit

1.90.165

araṇyavaṭamūle ca parvatāgraguhāsu ca /
udyānamadhyakāntāre mātṛpādapamūlataḥ

1.90.166

siṃdhutīre vane caitā yakṣiṇīḥ sādhayennaraḥ /
kamalaiḥ kairavai raktaiḥ sitaiḥ saugandhikotpalaiḥ

1.90.167

sugandhiśiphaālikayā trimadhvaktairyathāvidhi /
homātsaptasu vāreṣu tanmaṇḍalata eva vai

1.90.168

vijayaṃ samavāproti samare dvandvayuddhake /
mallayuddhe śastrayuddhe vāde dyūtahnaye 'pi ca

1.90.169

vyavahāreṣu sarvatra jayamāpnoti niścitam /
caturaṅgulajaiḥ puppairhemātsaṃstaṃbhayedarīn

1.90.170

tathaiva karṇikārotthaiḥ punnāgotthairnamerujaiḥ /
caṃpakaiḥ ketakai rājavṛkṣajairmādhavodbhavaiḥ

1.90.171

prāgvaddāreṣu juhuyātkramātpuṣpaistu saptabhiḥ /
prokteṣu staṃbhanaṃ śatrorbhaṅgo vā bhavati dhruvam

1.90.172

śatrornakṣatravṛkṣāgnau tatsamiddhistu homataḥ /
sarṣapājyaplutābhiste praṇamantyeva pādayoḥ

1.90.173

mṛtyukāṣṭhānale mṛtyupatrapuṣpaphalairapi /
samidbhirjuhuyātsamyagvāre śārcanapūrvakam

1.90.174

arāteścaturaṅgaṃ tu balaṃ rogārdditaṃ bhavet /
tenāsya vijayo bhūyānnidhanenāpi vā punaḥ

1.90.175

arkavārer'kajairidhmaiḥ samiddhe 'gnau tadudbhavaiḥ /
patraiḥ puṣpaiḥ phalaiḥ kāṇḍairmūlaiścāpi hunetkramāt

1.90.176

savarṇāruṇavatsāyā ghṛtasiktaistu maṇḍalāt /
arātidiṅmukho bhūtvā kuṇḍe tryasre vidhānataḥ

1.90.177

palāyate vā rogārtaḥ praṇamedvā bhayānvitaḥ /
palāśedhmānale tasya pañcāṅgaistadghṛtāplutaiḥ

1.90.178

homena somavāre ca bhavetprāgvanna saṃśayaḥ /
khādiredhmānale tasya pañcāṅgaistadghṛtāplutaiḥ

1.90.179

vāre bhaumasya havanāttadāpnoti suniścitam /
apāmārgasya saumye 'hni pippalasya gurordine

1.90.180

uduṃbarasya bhṛguje śamyā mānde 'hni goghṛtaiḥ /
śubhrapītasitaśyāmavarṇādyāḥ pūrvavattathā

1.90.181

tatphalaṃ samavāpnoti tatsamiddīpite 'nale /
pratipattithimārabhya pañcamyantaṃ krameṇa vai

1.90.182

śālīcaṇakamudgaiśca yavamāṣaiśca homataḥ /
māhiṣājyaplutaistābhistithibhiḥ samavāpnuyāt

1.90.183

ṣaṣṭhyādisaptamyantaṃ tu cājābhavaghṛtaistathā /
prāguktairnistuṣairhemātprāguktaphalamāpnuyāt

1.90.184

tadvarddhaṃ pañcake tvetaiḥ samastaiśca tiladvayaiḥ /
sitānnaiḥ pāyasaiḥ siktairāvikaistu ghṛtaistathā

1.90.185

havanāttadavāpnoti yadādau phalamīritam /
evaṃ nakṣatravṛkṣotthavahnau taistairmadhuplutaiḥ

1.90.186

havanādapi tatprāptirbhavatyeva na saṃśayaḥ /
vidyāṃ saṃsādhya pūrvaṃ tu paścāduktānaśeṣataḥ

1.90.187

prayogānsādhayeddhīmān maṅgalāyāḥ prasādataḥ /
saṃpūjya devatāṃ viprakumārīṃ kanyakāṃ tu vā

1.90.188

saśubhāvayavāṃ mugdhāṃ snātāṃ dhautāṃbarāṃ śubhām /
tathāvidhaṃ kumāraṃ vā saṃsthāpyabhyarcya vidyayā

1.90.189

spṛṣṭaśīrṣo japedvidyāṃ śatavāraṃ tathārcayet /
prasūnairaruṇaiḥ śubhraiḥ saurabhāḍhyairathāpi vā

1.90.190

dadyādgugguladhūpaṃ ca yāvatkarmāvasānakam /
tato devyā samāviṣṭe tasminsaṃpūjya bhaktitaḥ

1.90.191

tatastāmupacāraistaiḥ prāguktairvidyayā vratī /
prajapaṃstāṃ tataḥ pṛcchedabhīṣṭaṃ kathayecca sā

1.90.192

bhūtaṃ bhavadbhaviṣyaṃ ca yadanyanmanasi sthitam /
janmāntarāṇyatītāni sarvaṃ sā pūjitā vadet

1.90.193

tatastāṃ prāgvadabhyarcya svātmanyudvāsya tāṃ japet /
sahasravāraṃ sthiradhīḥ pūrṇātmā vicaretsukhī

1.90.194

madhuratrayasaṃsiktairaruṇairaṃbajaiḥ śriyam /
prāpnoti maṇḍalaṃ homātsitaiśca mahadyaśaḥ

1.90.195

kṣaudrāktairuptalai raktairhavanātproktakālataḥ /
suvarṇaṃ samavāpnoti nidhiṃ vā vasudhāṃ tu vā

1.90.196

kṣīrāktaiḥ kairavairhemātproktaṃ kāmamavāpnuyāt /
dhānyāni vividhānyāśu subhagaḥ sa bhavennaraḥ

1.90.197

ājyāktairutpalairhemādvāñchitaṃ samavāpnuyāt /
tadaktairapi kahlārairhavanādrājavallabhaḥ

1.90.198

palāśapuṣpaistrisvāduyuktaistatkālahomataḥ /
caturvidhaṃ tu pāṇḍityaṃ bhavatyeva na saṃśayaḥ

1.90.199

lājaistrimadhuropetaistatkālahavanena vai /
kanyakāṃ labhate patnīṃ samastaguṇasaṃyutām

1.90.200

nālikeraphalakṣodaṃ sasitaṃ saguḍaṃ tu vā /
kṣaudrākṣaṃ juhuyāttadvadayatnāddhanadopamaḥ

1.90.201

tathaivānnājyahomena satandulatilairapi /
prasūnairaruṇaistadvattathā bandhūkasaṃbhavaiḥ

1.90.202

sitaiḥ prasūnarvāksiddhiṃ havanātsamavāpnuyāt /
sitaraktaistumilitairāyurārogyamāpnuyāt

1.90.203

dūrvātrikaistrimadhvaktairhavanāttu jayecca tān /
tathā guḍūcyā homena pāyasena tilena ca

1.90.204

śrīkhaṇḍapaṅkakarpūramilitaiḥ śatapatrakaiḥ /
havanācchriyamāpnoti yāvadanvayagā bhavet

1.90.205

kuṅkumaṃ himatoyena piṣṭvā karpūrasaṃyutam /
tatpaṅka mardditairhemātkahlārairvikacaiḥ sumaiḥ

1.90.206

rājakalpaḥ śriyā bhūyājjīvedvarṣaśataṃ bhuvi /
niḥsapatno nirātaṅko nirdrando nirmalāśayaḥ

1.90.207

ikṣukāṇḍasya śakalairhavanādvastramāpnuyāt /
tathaiva karavīrotthaiḥ prasūnairaruṇaiḥ sitaiḥ

1.90.208

kṣaudrāktaiḥ pāṭalāpuṣpairhavanādvaśayedvadhūḥ /
tathaiva paṅkajairhemādrūpājīvāṃ vaśaṃ nayet

1.90.209

sarūpavatsāsitagokṣīrāktasitahomataḥ /
labhate 'nupamāṃ lakṣmīmapi pāpiṣṭhacetanaḥ

1.90.210

sauvīrāktaistu kārpāsabījastatkālahomataḥ /
arddhendukuṇḍe niyataṃ vaśagā ripavo mune

1.90.211

ariṣṭapatraistadbījaistadvahnau taistathā hutaiḥ /
mṛtyubījairnimbatailasiktairhemānnihṝnti tān

1.90.212

rogārtāṃsturagāṃstadvatpañcagavyairhutairdhruvam /
akṣabījaistu tailāktairhemaḥ sarvavināśanaḥ

1.90.213

karañjabījaiḥ saṃsiktairhemādvairī piśācavān /
tathaivākṣatarūdbhūtapañcāṅgahavanādapi

1.90.214

niṃbatailānvitairakṣadrumabījaistu homataḥ /
taddine syādapasmārī vairī bhavati niścitam

1.90.215

arāterjanmanakṣatravṛkṣendhanagate 'nale /
tadyonipiśitaistaiśca havanānmṛtyukṛdripoḥ

1.90.216

padmākṣabījaiḥ sarṣapatailāktairhavanāttathā /
jāyante vairiṇaḥ kuṣṭharogā dehavilopakāḥ

1.90.217

maricaiḥ sarṣapairhemāttailāktairmadhyarājake /
dāhajvareṇa grastaḥ syādarātistaddine dhruvam

1.90.218

evaṃ nigrahahomeṣu svarakṣāyai tathānvaham /
snigdhaiḥ saṃprāptasadvidyairjapahomādi kārayet

1.90.219

mṛtyuñjayena vā tattatprayogasthābhireva vā /
vidyābhiranyathāsiddhamantramasyāśu nāśayet

1.90.220

lakṣatrayaṃ kṛte proktaṃ tretāyāṃ dviguṇaṃ tathā /
dvāpare triguṇaṃ proktaṃ kalautattu caturguṇam

1.90.221

daśāṃśaṃ havanaṃ kāryaṃ tarpaṇaṃ taddaśāṃśataḥ /
taddaśāṃśaṃ mārjanaṃ syāddaśāṃśaṃ dvijabhojanam

1.90.222

evaṃ krameṇa sarvāsāṃ yā yā saṃkhyā japasya sā /
kāryā siddhyai tu vidyāyāstataḥ kuryātprayogakān

1.90.223

dviguṇo hi japaḥ kāryaḥ kāmeśvaryā munīśvara /
siddhe mantre prayogāṃstu vidadhīta yathā tathā

1.90.224

japo lakṣaṃ samākhyāto homādistaddhaśāṃśataḥ /
kartavyo bhagamālāyā vidyāsiddhyaimunīśvara

1.90.225

nityaklinnājapaḥ prokto lakṣaṃ homo haśāṃśataḥ /
kāryaḥ siddhyai tu vidyāyāḥ prayogānsādhayettataḥ

1.90.226

tato maunī payobhakṣaḥ prajapennavalakṣakam /
bheruḍāmantramuktaṃ tu śeṣaṃ kuryātprayatnataḥ

1.90.227

lakṣatrayaṃ japo vahnivāsinyāḥ samudīritaḥ /
anyatsarvaṃ purāvacca kāryyaṃ sādhakasattamaiḥ

1.90.228

mahāvajreśvarīvidyājapo lakṣatrayo mataḥ /
havanādi daśāṃśena kāryaṃ proktakrameṇa hi

1.90.229

atandrito japellakṣamitaṃ dūtīmanuṃ mune /
taddaśāṃśakrameṇaiva homādiḥ proktamārgataḥ

1.90.230

tvaritāṃ prajapellakṣapramitāṃ taddaśāṃśataḥ /
kṛtvā homādikaṃ sarvaṃ vidyāsiddhiyaimunīśvara

1.90.231

japo lakṣaṃ samākhyāto homādistaddaśāṃśataḥ /
vidyāyāḥ kulasundaryāḥ kartavyo dvijasattama

1.90.232

nityānityājapo vipratrilakṣapramito mataḥ /
homādistaddaśāṃśena proktaḥ proktavidhānataḥ

1.90.233

tripañcāśallakṣamukto niyamena munīśvara /
japo nityapatākāyā homādistaddaśāṃśataḥ

1.90.234

vijayāyā jayaḥ prokto lakṣamānena nārada /
anyatpūrvavadākhyātaṃ vidyāsiddhyai tu sādhanam

1.90.235

dantalakṣapramāṇena sarvamaṅgālikāṃ japet /
taddaśāṃśakrameṇaiva homādi samudīritam

1.90.236

aṣṭalakṣaṃ haviṣyāśī jvālāmālinikāṃ japet /
homādistaddaśāṃśena proktadravyaiḥ samīritaḥ

1.90.237

citrāyā bhūpalakṣaṃ tu japo homādikastataḥ /
proktena vidhinā kāryo vidyāsiddhyai munīśvara

1.90.238

etatsaṃkṣepataḥ proktaṃ nityāpaṭalamādita /
jñātavyaṃ sarvamevātra yantrasādhanapūrvakam

Original text: Nāradapurāṇa (or Nāradīyapurāṇa) · Data entry members of the Sansknet Project · GRETIL (Göttingen) · CC BY-NC-SA 4.0