Narada Purana · Chapter 1.80

iti śrībṛhannāradīyapurāṇe pūrvabhāge bṛhadupākhyāne tṛtīyapāde hanumaccaritraṃ nāma ekonāśītitamo 'dhyāyaḥ
sūta uvāca
śrutvā tu nārado viprāḥ kumāravacanaṃ muniḥ /
yatpapraccha punastacca yuṣmabhyaṃ pravadāmyaham

kārtavīryasya kavacaṃ tathā hanumato 'pi ca /
caritaṃ ca mahatpuṇyaṃ śrutvā bhūyo 'bravīdvacaḥ

nārada uvāca
sādhu sādhu muniśreṣṭha tvayātikaruṇātmanā /
śrāvitaṃ caritaṃ puṇyaṃ śivasya ca hanūmataḥ

tantrasyāṃsya kramaprāptaṃ kathanīyaṃ ca yattvayā /
tatprabrūhi mahābhāga kiṃ pṛṣṭvānyadvidāṃvara

sanatkumāra uvāca
atha vakṣye kṛṣṇamantrānbhuktimuktiphalapradān /
brahmādyā yānsamārādhya sṛṣṭyādikaraṇe kṣamāḥ

kāmaḥ kṛṣṇapadaṃ ṅataṃ govindaṃ ca tathāvidham /
gopījanapadaṃ paścādvallabhāyāgnisuṃdarī

aṣṭādaśārṇo mantro 'yaṃ durgādhiṣṭhātṛdaivataḥ /
nārado 'sya muniśchando gāyatrī devatā punaḥ

śrīkṛṣṇaḥ paramātmā ca kāmo bījaṃ prakīrtitam /
svāhā śaktirniyogastu caturvargaprasiddhaye

ṛṣiṃ śirasi vaktre tu chandaśca hṛdi devatām /
guhye bījaṃ padoḥ śaktiṃ nyasetsādhakasattamaḥ

yugevadābdhi nigamairdvābhyāṃ varṇairmanūdbhavaiḥ /
pañcāṅgāni pravinyasya tattvanyāsaṃ samācaret

hṛdantimādikāntārṇamaparādyāni cātmane /
matyantāni ca tatvāni jīvādyāni nyasetkramāt

jīvaṃ prāṇaṃ matimahṝṅkāraṃ manastathaiva ca /
śabdaṃ sparśaṃ rūparasau gandhaṃ śrotraṃ tvacaṃ tathā

netraṃ ca rasanāṅghrāṇaṃ vācaṃ pāṇiṃ padendriyam /
pāyuṃ śiśnamathākāśaṃ vāyuṃ vahniṃ jalaṃ mahīm

jīvaṃ prāṇaṃ ca sarvāge matyāditritayaṃ hṛdi /
mūrddhāsyahṛdguhya pādeṣvatha śabdādikānnyaset

karṇādisvasvasthāneṣu śrotrādīnīndriyāṇi ca /
tathā vāgādīndriyāṇi svasvasthānaṣu vinyaset

mūddhasyahṛdguhyapādeṣvākāśādīnnyasettataḥ /
hṛtpuṇḍarīkamarkenduhnibiṃbānyanukramāt

dviṣaṭhyaṣṭadaśakalāvyāptāni ca tathā mataḥ /
bhūtāṣṭāṃ gākṣipadagairvarṇaiḥ pragvinnyaseddhṛdi

athākāśādisthaleṣu vāsudevādikāṃstataḥ /
vāsudevaḥ saṃkarṣaṇaḥ pradyumnaścāniruddhakaḥ

nārāyaṇaśca kramaśaḥ parameṣṭhyādibhiryutāḥ /
parameṣṭhipumāñcchau caviśvanivṛttisarvakāḥ

śvetānilāgnyaṃbubhūmivarṇaiḥ prāgvatpravinyaset /
svabījādyaṃ kopatatvaṃ nṛsiṃhaṃ vyāpakena ca

prāgvadvinyasya sarvāge tattvanyāso 'yamīritaḥ /
makārādyā ādyavarṇāḥ sarve syuścandrabhūṣitāḥ

vāsudevādikā jñeyā ṅeṃtāḥ sādhakasattamaiḥ /
prāṇāyāmaṃ tataḥ kṛtvā pūrakumbhakarecakaiḥ

caturbhiḥ ṣaḍbhardvābhyāṃ ca mūlamantreṇa mantravit /
kecidāhurihācāryāḥ prāṇāyāmottaraṃ punaḥ

pīṭhanyāsaṃ vidhāyātha nyāsānanyānsamācaret /
daśatattvādi vinyasya vakṣyamāṇavidhānataḥ

mūrtipañjaranāmānaṃ pūrvoktaṃ vinyasedbudhaḥ /
sarvāṅge vyāpakaṃ kṛtvā kirīṭamanunā sudhīḥ

tatastārapuṭaṃ mantraṃ vyāpayya karayostriśaḥ /
pañcāṅgulīṣu karayoḥ pañcāṅgaṃ vinyasettataḥ

triśo mūlena mūrddhādipādāntaṃ vyāpakaṃ nyaset /
sakṛdvyāpayya tāreṇa mantranyāsaṃ tataścaret

śirolalāṭe bhrūmadhye karṇayoścakṣuṣostathā /
ghrāṇayorvadane kaṇṭhe hṛdi nābhau tathā punaḥ

kaṭyāṃ liṅge jānunośca pādayorvinyasetkramāt /
hṛdantānmantravarṇāṃśca tato mūrdhni dhruvaṃ nyaset

punarnayanayorāsye hṛdi guhye ca pādayoḥ /
vinyaseddhṛdayāntāni manoḥ pañcapadāni ca

bhūyo munyādikaṃ nyasya pañcāṅgaṃ pūrvavannyaset /
atha vakṣye mahāguhyaṃ sarvanyāsottamottamam

yasya vijñānamātreṇa jīvanmukto bhavennaraḥ /
aṇimādyaṣṭasiddhīnāmīśvaraḥ syānna saṃśayaḥ

yasyārādhanato mantrī kṛṣṇasaṃnidhyatāṃ vrajet /
tārādyābhirvyāhṛtibhiḥ saṃpuṭaṃ vinyasenmanum

mantreṇa puṭitāṃścāpi praṇavādyāṃstato nyaset /
gāyatryā puṭutaṃ mantraṃ vinyasenmātṛkāsthale

mantreṇa puṭitāṃ tāṃ ca gāyatrīṃ vinyasetkramāt /
mātṛkāpuṭitaṃ mūlaṃ vinyasetsādhakottamaḥ

mūlena puṭitāṃ caiva mātṛkāṃ vinyasetkramāt /
tṛcaṃ na mātṛkāvarṇānpūrvaṃ tattatsthale sudhīḥ

vinyasennyāsaṣaṭkaṃ ca ṣoḍhā nyāso 'yamīritaḥ /
anena nyāsavaryeṇa sākṣātkṛṣṇasamo bhavet

nyāsena puṭitaṃ dṛṣṭvā siddhagandharvakinnarāḥ /
devā api namantyenaṃ kiṃpunarmānavā bhuvi

sudarśanasya mantreṇa kuryāddigbandhanaṃ tataḥ /
devaṃ dhyāyansvahṛdaye sarvābhīṣṭapradāyakam

utphullakusumavrātanamraśākhairvaradrumaiḥ /
sasmeyamañjarīvṛndavallarīveṣṭitaiḥ śubhaiḥ

galatparāgadhūlibhiḥ surabhīkṛtadiṅmukhaḥ /
smarecchiśiritaṃ vṛndāvanaṃ mantrīsamāhitaḥ

unmīlannavakañjālivigalanmadhusaṃcayaiḥ /
lubdhāntaḥ karaṇairguñjaddvirephapaṭalaiḥ śubham

marālaparabhṛtkīrakapotanikarairmuhuḥ /
mukharīkṛtamānṛtyanmāyūrakulamañjulam

kālindyā lolakallolavipruṣairmandavāhibhiḥ /
unnidrāṃburuhavrātarajobhirdhūsaraiḥ śivaiḥ

pradīpita smarairgoṣṭhasuṃdarīmṛduvāsasām /
vilolanaparaiḥ saṃsevitaṃ vā tairnirantaram

smarettadante gīrvāṇabhūruhaṃ sumanoharam /
tadadhaḥ svarṇavedyāṃ ca ratnapīṭhamanuttamam

ratnakuṭṭimapīṭhe 'sminnaruṇaṃ kamalaṃ smaret /
aṣṭapatraṃ ca tanmadhye mukundaṃ saṃsmaretsthitam

phullendīvarakāntaṃ ca kekibarhāvataṃsakam /
pītāṃśukaṃ candramukhaṃ sarasīruhanetrakam

kaustubhodbhāsitāṅgaṃ ca śrīvatsāṃkaṃ subhūṣitam /
vrajastrīnetrakamalābhyarcitaṃ gogaṇāvṛtam

gopavṛndayutaṃ vaṃśīṃ vādayantaṃ smaretsudhīḥ /
evaṃ dhyātvā japedādāvayutadvitayaṃ budhaḥ

juhuyādaruṇāṃbhojaistaddaśāṃśaṃ samāhitaḥ /
japetpaścānmantrasiddhyai bhūtalakṣaṃ samāhitaḥ

aruṇaiḥ kamalaihutvā sarvasiddhīśvaro bhavet /
pūrvokte vaiṣṇave pīṭhe mūrtiṃ saṃkalpya mūlataḥ

tasyāmāvāhya cābhyarcedgopījanamanoharam /
mukhe veṇuṃ samabhyarcya vanamālāṃ ca kaustubham

śrīvatsaṃ ca hṛdi prārcya tataḥ puṣpāñjaliṃ kṣipet /
tataḥ śvetāṃ ca tulasīṃ śuklacandanapaṅkilām

raktāṃ ca tulasīṃ raktañcadanāktāṃ krasātsudhīḥ /
arpayeddakṣiṇe jadvayamaśvāriyugmakam

hayamāradvayenaiva hṛdi mūrdhni tathā punaḥ /
padmadvayaṃ ca vidhivattataḥ śīrṣe samarpayet

tulasīdvayamaṃbhojadvayamaśvāriyugmakam /
tataḥ sarvāṇi puṣpāṇi sarvāṅgeṣu samarpayet

dakṣiṇe vāsudevākhyaṃ svacchaṃ caitanyamavyayam /
vāme ca rukmiṇīṃ tadūnnityāṃ raktāṃ rajoguṇām

evaṃ saṃpūjya gopālaṃ kuryādāvaraṇārcanam /
yajeddāmasudāmau ca vasudāmaṃ ca kiṅkiṇīm

pūrvādyāśāsu dāmādyā ṅeṃnamontadhruvādikāḥ /
agninairṛtivāyvīśakoṇeṣu hṛdayādikān

dikṣvastrāṇi samabhyarcya patreṣu mahiṣīryajet /
rukmiṇī satyabhāmā ca nāgnajityabhidhā punaḥ

suvindā mitravindā ca lakṣmaṇā carkṣajā tataḥ /
suśīlā ca lasadramyacitritāṃbarabhūṣaṇā

tato yajeddalāgreṣu vasudevañca devakīm /
nandagopaṃ yaśodāṃ ca balabhadraṃ subhadrikām

gopānūgopīśca govindavilīnamatilocanān /
jñānamudrābhayakarau pitarau pītapāṇḍurau

divyamālyāṃbarālepabhūṣaṇe mātarau punaḥ /
dhārayantyau caruṃ caiva pāyasīṃ pūrṇapātrikām

aruṇaśyāmale hāramaṇikuṃ ḍalamaṇḍite /
balaḥ śaṅkhendudhavalo muśalaṃ lāṅgalaṃ dadhat

hālālolo nīlavāsā halavānekakuṇḍalaḥ /
kalā yā śyāmalā bhadrā subhadrā bhadrabhūṣaṇā

varābhayayutā pītavasanā rūḍhayauvanā /
veṇuvīṇāhemayaṣṭiśaṅkhaśṛṅgādipāṇayaḥ

gopā gopyaśca vividhaprābhṛtānnakarāṃbujāḥ /
mandāradīṃśca tadbāhye pūjayetkalpapādapān

mandāraśca tathā saṃtānako vai pārijātakaḥ /
kalpadrumastataḥ paścāddhvaricandanasaṃjñakaḥ

madhye dikṣu samabhyarcya bahiḥ śakrādikānyajet /
tadastrāṇi ca saṃpūjya yajetkṛṣṇāṣṭakena ca

kṛṣṇaṃ ca vāsudevaṃ ca devakīnandanaṃ tathā /
nārāyaṇaṃ yaduśreṣṭhaṃ vārṣṇeyaṃ dharmapālakam

asurākrāntabhūbhārahāriṇaṃ pūjayettataḥ /
ebhirāvaraṇaiḥ pūjā kartavyāsukhairiṇaḥ

saṃsārasāgarotthīrtyai sarvakāmāptaye budhaḥ /
evaṃ pūjādibhiḥ siddhā bhavadvaiśravaṇo yamaḥ

trikālapūjanaṃ cāsya vakṣye sarvārthasiddhidam /
śrīmadudyānasaṃvītihemabhūratnamaṇḍape

lasatkalpadrumādhastharatnābjapīṭhasaṃsthitam /
sutrāmaratnasaṃkāśaṃ guḍasnigdhālakaṃ śiśum

calatkanakakuṇḍalollasitacārugaṇḍasthalaṃ sughoṇadharamadbhutasmitamukhāṃvutaṃ sundaram /
sphuradvimalaratnayukkanakasūtranaddha dadhatsuvarṇaparimaṇḍitaṃ subhagapaiṇḍarīkaṃ nakham

samuddhūsarorasthale dhenudhūlyā supuṣṭāṅgamaṣṭāpadākalpadīptam /
kaṭīlasthale cārujaṅghāntayugmaṃ pinaddhaṃ kvaṇatkiṅkiṇījāladāmnā

hasantaṃ hasadvandhujīvaprasūnaprabhāpāṇipādāṃbujodārakāntyā /
dadhānaṃ karo dakṣiṇe pāyasānna suhaiyaṅgavīnaṃ tathā vāmahaste

lasadgopagopīgavāṃ vṛndamadhye sthitaṃ vāsavādyaiḥ surairarcitāndhrim /
mahābhārabhūtāmarārātiyūthāṃstataḥ pūtanādīnnihṝntuṃ pravṛttam

evaṃ dhyātvārccayeddevaṃ pūrvavatsthiramānasaḥ /
dadhnā guḍena naivedyaṃ datvā daśaśataṃ japet

madhyandine yajedevaṃ viśiṣyarūpadhāriṇam /
nāradādyairmunigaṇaiḥ suravṛndaiśca pūjitam

lasadgopagopīgavāṃ vṛndamadhyastitaṃ sāṃdrameghaprabhaṃsuṃndarāṅgam /
śikhaṇḍicchadāpīḍamabjāyatākṣaṃ lasañcillikaṃ pūrṇacadrānanaṃ ca

calatkuṇḍalollāsigaṇḍasthalaśrībharaṃ sundaraṃ mandahāsaṃ sunāsam /
sukārtasvarābhāṃbaraṃ divyabhūṣaṃ kvaṇatkiṅkiṇījālamattānulepam

veṇuṃ dhamantaṃ svakare dadhānaṃ savye daraṃ yaṣṭimudāraveṣam /
dakṣe tathaivepsitadānadakṣaṃ dhyātvārcayennandajamindirāptyai

evaṃ dhyātvārcayetkṛṣṇaṃ pūrvavadvaiṣṇavottamaḥ /
apūpapāyasānnādyairnaivaidyaṃ parikalpayet

hutvā cāṣṭattaraśataṃ payo 'naiḥ sarpiṣāplutaiḥ /
svasvadikṣu baliṃ dadyāddiśedācamanaṃ tataḥ

aṣṭttarasahasraṃ ca prajapenmantramuttamam /
ahno madhye yajedevaṃ yaḥ kṛṣṇaṃ vaiṣṇavottamaḥ

devāḥ sarve namasyanti lokānāṃ vallabho naraḥ /
medhāyuḥśrīkāntiyuktaḥ putraiḥ pautraiśca varddhate

tṛtīyakālapūjāyāmasti kālavikalpanā /
sāyāhne niśi vetyatra vadantyeke vipaścitaḥ

daśākṣareṇa cedrātrau sāyāhne 'ṣṭādaśārṇataḥ /
ubhayīmubhayenaiva kuryādityapare jaguḥ

sāyāhne dvāravatyāṃ tu citrodyānopaśobhite /
aṣṭasāhasrasaṃkhyātairbhavanairupamaṇḍite

haṃsasārasasaṃkīrṇakamalotpalaśālibhiḥ /
sarobhirnīlāṃbhobhiḥ parīte bhavanottame

udyatpradyotanodyotadyutau śrīmaṇimaṇḍale /
hemāṃbhojāsanāsīnaṃ kṛṣṇaṃ trailokyamohanam

munivṛndaiḥ parivṛtamātmatattvavinirṇaye /
tebhyo munibhyaḥ svaṃ dhāma diśantaṃ paramakṣaram

unnidredīvaraśyāmaṃ padmapatrāyatekṣaṇam /
snigdhaṃ kuntalasaṃbhinnakirīṭavanamālinam

cāruprasannavadanaṃ sphuranmakarakuṇḍalam /
śrīvatsavakṣasaṃ bhrājatkaustubhaṃ sumanoharam

kāśmīrakapiśoraskaṃ pītakauśeyavāsasam /
hārakeyūrakaṭakakaṭisūtrairalaṅkṛtam

hṛtaviśvaṃbharābhūribhāraṃ muditamānasam /
śaṅkhacakragadāpadmarājadbhujacatuṣṭayam

evaṃ dhyātvārcayenmantrī syādaṅgaiḥ prathamāvṛttiḥ /
dvitīyā mahiṣībhistu tṛtīyāyāṃ samarcayet

nāradaṃ parvataṃ jiṣṇuṃ niśaṭhoddhavadārukān /
viṣvaksenaṃ ca śaineyaṃ dikṣvagre vinatāsutam

lokapālaiśca vajrādyaiḥ pūjayedvaiṣṇavottamaḥ /
evaṃ saṃpūjya vidhivatpāyasaṃ vinivedayet

tarpayitvā khaṇḍamiśradugdhabuddhyā jalairiha /
japedaṣṭaśataṃ mantrī bhāvayanpuruṣottamam

pūjāsu homaṃ sarvāsu kuryānmadhyandine 'thavā /
āsanādarghyaparyantaṃ kṛtvā stutvā nametsudhīḥ

samarthātmānamudvāsya svīyahṛtsarasīruhe /
vinyasya tanmayo bhūtvā punarātmānamarcayet

sāyāhne vāsudevaṃ yo nityamevaṃ samarcayet /
sarvānkāmānavāpyānte sa yāti paramāṃ gatim

rātrau cenmadanākrāntacetasaṃ nandanandanam /
yajedrāsapariśrāntaṃ gopīmaṇḍalamadhyagam

vikasatkundakahlāramallikākusumodgataiḥ /
rajobhirdhūsarairmandamārutaiḥ śiśirīkṛte

unmīlannavakairavālivigalanmādhvīkalabdhāntaraṃ bhrāmyanmattamilindagītalalite sanmallikojjṛmbhite /
pīyūṣāṃśukarairviśālitaharitprānte smaroddīpane kālindīpulināṅgaṇe smitamukhaṃ veṇuṃ raṇantaṃ muhuḥ

antastoyalasannavāṃbudaghaṭāsaṃghaṭṭakāratviṣaṃ cañcañcillikamaṃbujāyatadṛśaṃ bimbādharaṃ sundaram /
māyūracchadabaddhamaulivilasaddhaṃmillamālaṃ calaṃ dīpyatkuṇḍalaratnaraśmivilasadgaṇḍadvayodbāsitam

kāñcīnūpurahārakaṅkaṇalasatkeyūrabhūṣānvitaṃ gopīnāṃ dvitayāṃ tare sulalitaṃ vanyaprasūnasrajam /
anyonyaṃ vinibaddhagopadayitādorvallivītaṃ lasadrāsakrīḍanalolupaṃ manasijākrāntaṃ mukundaṃ bhavet

vividhaśrutibhinnamanojñatarasvarasaptakamūrchanatānagaṇaiḥ /
bhramamāṇamamūbhirudāramaṇisphuṭamaṇḍanasiṃjitacārutanum

itaretarabaddhakarapramadāgaṇakalpitarāsavihāravidhau /
maṇiśaṅkugamapyamunā vapuṣā bahudhā vihitasvakadivyatanum

evaṃ dhyātvārcayenmantrī syādaṅgaiḥ prathamāvṛtiḥ /
śrīkāmaḥ sasvarādyāni kalābjairvaiṣṇavottamaḥ

yajetkeśavakīrtyādimithunāni ca ṣoḍaśa /
indrādyānapi vajrādīnpūjayettadanantaram

pṛnthu suvṛttaṃ masṛṇaṃ vitastimātronnataṃ kau vinikhanya śaṅkum /
ākramya padbhyāmitaretaraistu hastairbhramo 'yaṃ khalu rāsagoṣṭhī

sapūjyaivaṃ ca payasā sasito palasarpiṣā /
naivedyamarcayitvā tu caṣakairnṛpasaṃkhyakaiḥ

satataṃ pāpapte (?) mantrī mithuneṣvarpayetkramāt /
vidhāya pūrvavaccheṣaṃ sahasraṃ prajapenmanum

stutvā natvā ca saṃprārthya pūjāśeṣaṃ samāpayet /
evaṃ yaḥ pūjayetkṛṣṇaṃ sa sasmṛddheḥ padaṃ bhavet

aṇimādyaṣṭasiddhīnāmīśvaraḥ syānna saṃśayaḥ /
bhuktveha vividhānbhogānante viṣṇupadaṃ vrajet

evaṃ pūjādibhiḥ siddhe manaukāmyāni sādhayet /
aṣṭāviṃśativāraṃ vā trikālaṃ pūjayetsudhīḥ

svakālavihitān bhūyaḥ parivārāṃśca tarpayet /
prātarddadhnā guḍāktena madhyāhne payasā punaḥ

navanītayutenātha sāyāhne tarpayetpunaḥ /
sasitopalamiśreṇa payasā vaiṣṇavottamaḥ

tarpayāmipadaṃ yojyaṃ mantrānte sveṣu nāmasu /
dvitīyānteṣu tu punaḥ pūjāśeṣaṃ samāpayet

abhyukṣyatatprasādādbhirātmānaṃ prapabedapaḥ /
tattṛtpastamathodvāsya tanmayaḥ prajapenmanum

atha dravyāṇi kāmyeṣu procyante tarpaṇeṣu ca /
tāni proktavidhānānāmāśrityānyatamaṃ bhajet

pāyasaṃ dādhikaṃ cājyaṃ gauḍānnaṃ kṛsaraṃ payaḥ /
dadhīni kadalī mocā ciñcā rajasvalā tathā

apūpā modakā lājāḥ pṛthukā navanītakam /
dravyaṣoḍaśakaṃ hyetatkathitaṃ padmajādibhiḥ

lājānte pṛthukaṃ prākca samarpya ca sitopalam /
catuḥsaptativāraṃ yaḥ prātarevaṃ pratarpayet

dhyātvā kṛṣṇapadaṃ matrī maṇḍalādiṣṭamāpnuyāt /
dhāroṣṇapakkapayasā navanītaṃ dadhīni ca

daugdhāmrāmājyaṃ matsyaṇḍī kṣaudraṃ kīlālameva ca /
pūjayennavabhirdravyaiḥ pratyekaṃ ravisaṃkhyayā

evamaṣṭotaraśataṃsaṃkhyākaṃ tarpaṇaṃ punaḥ /
yaḥ kuryādvaiṣṇavaśreṣṭhaḥ pūrvoktaṃ phalamāpnuyāt

kiṃ bahūktena sarveṣṭadāyakaṃ tarpaṇaṃ tvidam /
sasitopaladhāroṣṇadugdhabuddhyā jalena vai

kṛṣṇaṃ prataparyan grāmaṃ vrajanprāpnoti sādhakaḥ /
dhanavastrāṇi bhojyaṃ ca parivāragaṇaiḥ saha

yāvatsaṃtarpayenmantrī tāvatsaṃkhyaṃ japenmanum /
tarpaṇenaiva kāryāṇi sādhayedakhilānyapi

kāmyahomamatho vakṣye sādhakānāṃ hitāya ca /
śrīpuṣpairjuhuyānmantrī śriyamicchannininditām

sājyenānnena juhuyātghṛtānnasya samṛddhaye /
vanyapuṣpairdvijān jātīpuṣpaiśca pṛthivīpatīn

asitaiḥ kusumairvaiśyān śūdrānnīlotpalaistathā /
vaśayellavaṇaiḥ sarvānaṃbujairyuvatījanam

gośālāsu kṛto homaḥ pāyasena sasarpiṣā /
gavāṃ śāntiṃ karotyāśu gopālo gokuleśvaraḥ

śikṣāveṣadharaṃ kṛṣṇaṃ kiṅkiṇījālaśobhitam /
dhyātvā pratarpayenmantrī dugdhabuddhyā śubhairjalaiḥ

dhanaṃ dhānyaṃ sutānkīrtiṃ prītastasmai dadāti saḥ /
brahmavṛkṣasamidbhirvā kuśairvā tilatandulaiḥ

juhuyādayutaṃ mantrī trimadhvāktairhutāśane /
vaśaye dbrāhmaṇāṃścātha rājavṛkṣasamudbhavaiḥ

prasūnaiḥ kṣatriyānvaiśyānkuraṇḍakusumaistathā /
pāṭalotthaiśca kusumairvaśayedantimānsudhīḥ

śvetapadmai raktapapdaiścaṃpakaiḥ pāṭalaiḥ kramāt /
hutvāyutaṃ trimadhvāktairvaśayettadvarāṅganāḥ

nityaṃ hayārikusumaurniśīthe trimadhuplutaiḥ /
varastrīrvaśayetprājñaḥ samyagdhṛtvā dināṣṭakam

ayutatritayaṃ rātrau siddhārthaistrimadhuplutaiḥ /
pratyahaṃ juhvato māsātsureśo 'pi vaśībhavet

āhṛtya ballavīvastrāṇyārūḍhaṃ nīpabhūruhe /
smaretkṛṣṇaṃ japedrātrau sahasraṃ khendūhātsudhīḥ

haṭhādākarṣayecchīghramurvaśīmapi sādhakaḥ /
bahunā kimihoktena mantro 'yaṃ sarvavaśyakṛt

rahasyaṃ paramaṃ cātha vakṣye mokṣapradaṃ nṛṇām /
dhyāyetsvahṛtsarasije devakīnandanaṃ vibhum

śrīmatkundendugauraṃ sarasijanayanaṃ śaṅkhacakre gadābje bibhrāṇaṃ hastapadmairnavanalinalasanmālayādīpyamānam /
vande vedyaṃ munīndraiḥ kaṇikamunilasaddivyabhūṣābhirāmaṃ divyāṅgālepabhāsaṃ sakalabhayaharaṃ pītavastraṃ nurārim

evaṃ dhyātvā pumāṃsaṃ sphuṭahṛdayasarojāsanāsīnamādyaṃ sāṃdrāṃbhodācchabiṃbādbhutakanakanibhaṃ saṃjapedarkalakṣam /
manvorekaṃ dvitārāntaritamathaḥ hunedarkasāhasramidhmaiḥ kṣīridrūttharyathoktaiḥ samadhughṛtasitenāthavā pāyasena

evaṃ lokeśvarārādhyaṃ kṛṣṇaṃ svahṛdayāṃbuje /
dhyāyannanudinaṃ mantrī trisahasraṃ japenmanum

sāyāhnoktena vidhinā saṃpūjya havanaṃ punaḥ /
kṛtvā pūrvoktavidhinā mantrī tadgatamānasaḥ

evaṃ yo bhajate nityaṃ vidvān gopālanandanam /
samuttīrya bhavāṃbhodhiṃ sa yāti paramaṃ padam

madhye keṇeṣu bāhyeṣvanalapurapuṭasyālikhetkarṇikāyāṃ kandarpaṃ sādhyayuktaṃ vivaragataṣaḍarṇadviṣaḥ keśareṣu /
śaktiḥ śrīpūrvikāṇidvinavalipimanorakṣarāṇicchadānāṃ madhye varṇāndaśānto daśalipimanuvaryasya vaikaikaśo 'bjam

bhūsadmanābhivṛtamasragamanmathena gorocanāvilikhitaṃ tapanīyasūcyā /
paṭṭe hiraṇyaracite gulikīkṛtaṃ tadgopālayantramakhilārthadametaduktam

saṃyātasiktamabhijaptamimaṃ mahadbhirdhāryaṃ jagattrayavaśīkaraṇaikadakṣam /
rakṣāyaśaḥ sutamahīdhanadhānyalakṣmīsaubhāgyalipsubhirajasramanarghyavīryam

smarastrivikramākrāntaścākrīṣṭyāya hṛdityasau /
ṣaḍakṣaro 'yaṃ saṃproktaḥ sarvasiddhikaro manuḥ

kroḍaḥ śāntīnduvahnyāḍhyo māyā bīja prakīrtatam /
govindavahnicandrāḍhyo manuḥ śrībījamīritam

ābhyāmaṣṭādaśaklipaḥ syādviṃśatyakṣaro manuḥ /
śālagrāme maṇau yantre maṇḍale pratimāsu vā

nityaṃ pūjā hareḥ kāryā na tu kevalabhūtale /
evaṃ yo bhajante kṛṣṇaṃ sa yāti paramāṃ gatim

viṃśārṇasya munirbrahmā gāyatrī chanda īritam /
kṛṣṇaśca devatā kāmo bījaṃ śaktirdviṭho budhaiḥ

rāmāgnivedavedābdhernetrārṇairaṅgakalpanam /
mūlena vyāpakaṃ kṛtvā manunā puṭitānatha

mātṛkārṇānnyasettattatsthāneṣu susamāhitaḥ /
daśatattvāni vinyasya mūlena vyāpakaṃ caret

mantranyāsaṃ tataḥ kuryāddevatābhāvasiddhaye /
śīrṣe lalāṭe bhrūmadhye netrayoḥ karṇayostathā

nasorvakre ca cibuke kaṇṭhe dormūlake hṛdi /
udare nābhideśe ca liṅge mūlasaroruhe

kaṭyāṃ jānvorjaṅghayośca gulphayoḥ pādayoḥ kramāt /
nyaseddhṛdantānmantrāṇāṃ sṛṣṭinyāso 'yamīritaḥ

hṛdaye codare nābhau liṅge mūlasaroruhe /
kaṭyāṃ jānvorjaṅghayośca gulphayoḥ pādayostathā

mūrdhni kapole bhrūmadhye netrayoḥ karṇayornasoḥ /
vadane cibuke kaṇṭhe dormūle vinyasetkramāt

namotānmantravarṇāṃśca sthitinyāso 'yamīritaḥ /
pādayorgulphayoścaiva jaṅghayorjānunostathā

kaṭyāṃ mūle dhvaje nābhau jaṭhare hṛdaye punaḥ /
dormūle kaṇṭhadeśe ca cibuke vadane nasoḥ

karṇayornetrayoścaiva bhrūmadhye niṭile tathā /
mūrdhni nyasenmantravarṇānsaṃhārākhyo 'yamīritaḥ

punaḥ sṛṣṭisthitinyāsau vidhāya vaiṣṇavottamaḥ /
mūrtipañjaranāmānaṃ vinyasetpūrvavattataḥ

punaḥ ṣaḍaṅgaṃ kṛtvātha dhyāyetkṛṣṇaṃ hṛdaṃbuje /
dvāravatyāṃ sahasrārkabhāsvarairbhavanottamaiḥ

analpaiḥ kalpavṛkṣaiśca parīte maṇimaṇḍape /
jvaladratna mayastaṃbhadvāratoraṇakuḍyake

phullapraphullasañcitravitānālaṃbimauktike /
padmarāgasthalīrājadratnasaṃghaiśca madhyataḥ

anāratagaladratnadhārāḍhyasvastastaroradhaḥ /
ratnapradīpāvalibhiḥ pradīpitadigantare

udyadādityasaṃkāśamaṇisiṃhāsanāṃbuje /
samāsīno 'cyuto dhyeyo drutahāṭakasannibhaḥ

samānoditacandrārkataḍitkoṭisamadyutiḥ /
sarvāṅgasuṃdaraḥ saumyaḥ sarvābharaṇabhūṣitaḥ

pītavāsāḥ śaṅkhacakragadāṃbhojalasatkaraḥ /
anāhatocchaladratnadhāraughakalaśaṃ spṛśan

vāmapādāṃbujāgreṇa muṣṇatā pallavacchavim /
rukmiṇīsatyabhāme 'sya mūrdhni ratnaughadhārayā

siṃcantyau dakṣavāmasthe svadosthakalaśotthayā /
nāgnajitī sunandā ca diśantyau kalaśau tayoḥ

tābhyāṃ ca dakṣavāmasthamitravindāsulakṣmaṇe /
ratnanadyāḥ samuddhṛtya ratnapūrṇauṃ ghaṭau tayoḥ

jāṃbavatī suśīlā ca diśantyau dakṣavāmake /
bahiḥ ṣoḍaśa sāhasrasaṃkhyākāḥ paritaḥ priyāḥ

dhyeyāḥ kanakaratnaughadhārāyukkalaśojvalāḥ /
tadbahiścāṣṭanidhāyaḥ pūrayanto dhanairdharām

tadbahirvṛṣṇayaḥ sarve purovacca svarādayaḥ /
evaṃ dhyātvā japellakṣapañcakaṃ taddaśāṃśataḥ

aruṇaiḥ kamalairhutvā pīṭhe pūrvodite yajet /
vilipya gandhapaṅkena likhedaṣṭadalāṃbujam

karṇikāyāṃ ca ṣaṭkoṇaṃ sasādhyaṃ tatra manmatham /
śiṣṭaistu saptadaśabhirakṣarairveṣṭayetsvaram

prāgrakṣo 'nilakoṇeṣu śriyaṃ śiṣṭeṣu saṃvidam /
ṣaṭsu saṃdhiṣu ṣaṭkarṇe kesareṣu triśastriśaḥ

vilikhetsmaragāyatrīṃ mālāmantraṃ dalāṣṭake /
ṣaṭūṣaḥ saṃlikhya tadbāhye veṣṭayenmātṛkākṣaraiḥ

bhūbiṃbaṃ ca likhedbāhye śrīmāyādigvidikṣvapi /
bhūgrahaṃ caturasraṃ syādaṣṭavajravibhūṣitam

etadyantraṃ hāṭakādipaṭṭeṣvālikhya pūrvavat /
saṃskṛtaṃ dhārayedyo vai sor'cyate tridaśairapi

syādgāyatrī vāmadevapuṣpabāṇau tu ṅeṃtimau /
vidmahedhīmahiyutau tanno 'naṅgaḥ pracodayāt

japyā japādau gopālamanūnāṃ janarañjanī /
hṛdayaṃ kāmadevāya ṅeṃtaṃ sarvajanapriyam

uktvā sarvajanānte tu saṃmohanapadaṃ tathā /
jvala jvala prajvaleti procya sarvajanasya ca

hṛdayaṃ mama ca brūyādvaśaṅkuruyugaṃ śiraḥ /
prokto madanamantro 'ṣṭacatvāriṃśadbhirakṣaraiḥ

japādau smarabījādyo jagattrayavaśīkaraḥ /
pīṭha prāgvatsamabhyarcya mūrti saṃkalpya mūlataḥ

tatrāvāhyācyutaṃ bhaktyā sakalīkṛtya pūjayet /
āsanādivibhūṣāntaṃ punarnyāsakramādyajet

sṛṣṭiṃ sthitiṃ ṣaḍaṅgaṃ ca kirīṭaṃ kuṇḍaladvayam /
śaṅkhaṃ cakraṃ gadāṃ padmaṃ mālāṃ śrīvatsakaustubhau

gandhapuṣpaiḥ samabhyarcya mūlena vaiṣṇavottamaḥ /
ṣaṭkoṇeṣu ṣaḍaṅgāni digdaleṣu kramādyajet

vāsudevādikānkoṇeṣu tu śāntyādikāṃstataḥ /
patrāgragā mahiṣyo 'ṣṭau yajetsādhakasattamaḥ

tataḥ ṣoḍaśasāhasraṃ sakṛdevārcayetpriyāḥ /
indranīlamukundāṃśca karālānandakacchapān

śaṅkhapadmau tataḥ padmānnidhīnaṣṭau kramādyajet /
tadbahirlokapālāṃśca vajrādyānapi pūjayet

evaṃ saptāvṛttivṛtaṃ kṛṣṇamabhyarcya cādarāt /
prīṇayeddadhikhaṇḍājyamiśreṇa tu payoṃ'dhasā

divyopacāraṃ datvātha stutvā natvā ca keśavam /
udvāsayetsvahṛdaye parivāragaṇaiḥ saha

nyasyātmānaṃ samabhyarcya tanmayo viharetsudhīḥ /
ratnābhiṣekadhyānejyā viṃśatyarṇāśrite ritā

evaṃ yo bhajate mantraṃ sa samṛddheḥ padaṃ bhavet /
japahomārcanadhyānairyo manuṃ prajapedamum

tadveśma pūryate ratnaiḥ ravarṇadhānyairanāratam /
pṛthvī pṛthvī kare tasya sarvasasyasamākulā

putrairmitraiḥ susaṃpannaḥ prayātyante parāṃ gatim /
vahnāvabhyarcya govindaṃ śuklapuṣpaiḥ satandulaiḥ

ājyāktairayutaṃ hutvā bhasma tanmūrdhni dhārayet /
tasyānnādisamṛddhiḥ syāttadūśe sarvayoṣitaḥ

raktāṃbhojaistrimadhvaktairhunellakṣaṃ samāhitaḥ /
śriyā tasyaindramaiśvaryaṃ tṛṇaleśāyate dhruvam

trimadhvaktaiḥ sitaiḥ puṣpairaṣṭottarasahasrakam /
yo hunetpratyahaṃ māsātpurodhā nṛpaterbhavet

evamādiprayogāṃśca sādhayenmanunāmunā /
mantrarājamatho vakṣye daśārṇaṃ sarvasiddhidam

smṛtiḥ sadyānvitā sākṣirlohito janavallabhā /
pavano 'gnipriyānto 'yaṃ daśārṇo mantra īritaḥ

nārado 'sya muniśchando virāṭ kṛṣṇo 'sya devatā /
kāmo bījaṃ vahnijāyā śaktiḥ proktā manīṣibhiḥ

ācakraṃ ca vicakraṃ ca sucakraṃ tadanantaram /
trailokyarakṣaṇaṃ cakramasurāntakagacakrakam

etairṅeṭhadvayāntaiśca cakraiḥ pañcāṅgakaṃ manoḥ /
tatastārapuṭaṃ mantraṃ vyāpayya karayostriśaḥ

seṃdūnhṛdantānmantrārṇānpraṇavāntaritānnyaset /
dakṣāṅguṣṭhācca vāmāṅguṣṭhāntamaṅguliparvasu

sṛṣṭinyāso 'yamuditaḥ sthitinyāso 'dhunocyate /
nyasedvāmakaniṣṭhādikaniṣṭāntaṃ sthitau sudhīḥ

vāmāṅguṣṭhānnyaseddakṣāṃ guṣṭhāntaṃ saṃhṛtau tathā /
saṃhṛtirdeṣasaṃghātahāriṇī parikīrtitā

vidyāpradaśca sṛṣṭyanto varṇināṃ śuddhacetasām /
sthityantaḥ syādgṛhasthānāmevaṃ kāmyādirūpataḥ

saṃhārānte munīndrāṇāṃ viraktānāṃ ca sarvaśaḥ /
punaḥ sthitikrameṇārṇānmanoraṅguliṣu nyaset

punaścakraiśca pūrvoktaiḥ pañcāgaṃ karayornyaset /
tato mūlena puṭitānmātṛkārṇānsabindukān

vinyasenmātṛkānyāsasthāneṣu praṇataḥ sudhīḥ /
tatastārapuṭaṃ mūlaṃ vyāpakatvena vinyaset

saṃhārasṛṣṭibhedena daśatattvāni vinyaset /
namontamūlamantrārṇapadāyāmyāni cātmane

matyantāni ca tattvāni pṛthivyādyāni ca kramāt /
pṛthvī jalaṃ tathā vahnirvāyurākāśameva ca

ahṝṅkāro mahattatvaṃ prakṛtiṃ puruṣaṃ param /
pravinyasenmastake ca netrayoḥ śrotrayornasoḥ

vadane hṛdaye nābhau liṅge jānvośca pādayoḥ /
praṇavāntaritānvarṇānhṛdantānvijyasenmanoḥ

sṛṣṭinyāso 'yamākhyātaḥ sthitinyāsaṃ śṛṇu dvija /
hṛdi nābhau dhvaje jānvoḥ pādayormastake punaḥ

netrayoḥ karṇayorghrāṇe vadane vinyasetkramāt /
padorjānvorliṅgadeśe nābhau hṛdi mukhe nasoḥ

karṇayornetrayormūrdhni saṃhārākhyo 'yamīritaḥ /
sṛṣṭyanto varṇināṃnyāsaḥ sthityantogṛhamedhinām

yatervairāgyayuktasya saṃhārāntaḥ prakīrtitaḥ /
caturddhā varṇināṃ caiva gṛhasthānāṃ ca pañcadhā

yatīnāṃ ca tridhā nyāsaḥ prokto 'yaṃ kramataḥ śubhaḥ /
kecidvirakte gṛhage saṃhārāntaṃ vidurbudhāḥ

vibhūtipañjaraṃ nyāsaṃ kuryādiṣṭāptaye tataḥ /
manordaśāvṛttimayaṃ kṛṣṇasāṃnidhyakārakam

ādhāre ca dhvaje nābhau hṛdi kaṇṭhe mukhe śaye /
ūrvośca kandharāyāṃ ca nābhau kukṣau tathā hṛdi

stanayoḥ pārśvayoḥ śroṇyormastakevadanetathā /
netrayoḥ karṇayornāsāpuṭayośca kapolayoḥ

evaṃ dakṣiṇadormūsasaṃdhyagreṣvaṅgulīṣu ca /
tataḥ śirasi tatpūrvādyāṃśāsu svakalāsu ca

doṣṇoḥ sakthnoḥ śirokṣyāsyakaṇṭhahṛjjaṭhareṣu ca /
mūlādhāre liṅgadeśe jānunoḥ pādayostathā

śrotragaṇḍāṃsavakṣojapārśvaliṅgeṣu vinyaset /
ūrvorjānvorjaṅghayośca pādayorvinyasetkramāt

vibhūtipañjarākhyo 'yaṃ nyāsaḥ sarvārthasiddhidaḥ /
anena nyāsavaryeṇa sākṣātkṛṣṇatanurbhavet

mūrti pañjaranāmānaṃ nyāsaṃ pūrvoditaṃ nyaset /
tato daśāṅgapañcāṅgau nyāsavaryauṃ nyase kramāt

hṛdi mūrdhni śikhāyāṃ ca sarvāṅge dikṣu pārśvayoḥ /
kaṭyāṃ pṛṣṭhe tathā mūrdhni vinyasedvaiṣṇavottamaḥ

pañcāṅgāni nyasedbhūyaścakraiḥ prāgvatsamāhitaḥ /
anyo 'pyaṣṭādaśārṇoktaḥ kartavyo nyāsasaṃcayaḥ

tataḥ kirīṭamantreṇa vyāpakaṃ racayetsudhīḥ /
veṇubilvādimudrāṃśca darśayetsādhakottamaḥ

sudarśanasya mantreṇa kuryāddigbandhanaṃ tataḥ /
anaṅguṣṭhāśca ṛjavaḥ karaśākhā bhavanti cet

hṛnmudreyaṃ samākhyātā śiromudrā tathā bhavet /
adhoṅguṣṭhā tu yā muṣṭiḥ śikhāmudreyamīritā /
prasāritakarāṅgulyorvarmamudreyamīritā

nārācamuṣṭyā dhṛtabāhuyugmaḥ aṅguṣṭhatarjanyudito dhvanistu /
viṣvagvimuktā kathitāstramudrā yatrākṣiṇī tarjanimadhyame ca

oṣṭhe vāmakarāṅguṣṭo lagnastasya kaniṣṭikā /
dakṣiṇāṅguṣṭasaṃsaktā tatkaniṣṭhā prasāritā

tarjanī madhyamānāmā kiñcitsakuñcya cālitā /
veṇumudreyamuditā suguptā preyasī hareḥ /
nocyante tatra siddhatvānmālāśrīvatsakaustubhāḥ

vāmāṅguṣṭhaṃ samudraṃ tamaparakarāṅguṣṭhakenātha baddhvā saṃpīḍyāgraṃ ca dakṣāṅgulibhirapi ca tāṃ vāmahastāṅgulībhiḥ /
gāḍhaṃ baddhvā svakīye hṛdayasarasije sthāpayetkāmabījaṃ proccāryaiṣā tu gopyā sakalasukhakarī vilvamudrā munīndraiḥ

kāyena manasā vācā yatpāpaṃ samupārjitam /
mudrāyā jñāna mātreṇa sarvaṃ nāśamupaiṣyati

dhyānaṃ japastrikālārcā kāryā pūrvoditā manoḥ /
sarveṣvekaḥ kramaḥ prokto daśārṇāṣṭādaśārṇayoḥ

evaṃ siddhe manau mantrī prayogānkartumarhati /
uddaṇḍabāhudordaṃhadhṛtagovarddhanācalam

anyahastāgulīvyaktasvaravaṃśārpitānanam /
dhyāyankṛṣṇaṃ japenmantraṃ vrajecchatraṃ vinā sudhīḥ

varṣavātāśanibhyo 'pi bhayaṃ tasya na jāyate /
moghamedhaughavrātādgagatendraṃ taṃ smaranhunet

loṇairayutasaṃkhyaiḥ syādanāvṛṣṭirna saṃśayaḥ /
krīḍantamarkajātīre majjanasnāpanādibhiḥ

tacchīkarajalāsāraiḥ sicyamānaṃ priyājanaiḥ /
dhyātvāyutaṃ payaḥ siktairhunedvā nīratarpaṇaiḥ

vṛṣṭirbhavatyakāle 'pi mahatī nātra saṃśayaḥ /
sadāhamohairārtasya visphoṭakajvarādibhiḥ

amumeva smaranmūrdhni japecchāntirbhavetkṣaṇāt /
athavā garuḍārūḍhaṃ pradyumnabalasaṃyutam

nijajvaraniṣpiṣṭajvarābhiṣṭutamacyutam /
dhyātvā mūrdhni japenmantraṃ jvaramukto bhavejjvarī

dhyātvaivamagnāvabhyarcya yathoktaiścaturaṅgulaiḥ /
juhuyādamṛtākhaṇḍairayutaṃ jvaraśāntaye

śilīmukhavinirbhinnabhīṣmatāpaharaṃ harim /
dhyātvā japetspṛśannārtaṃ pāṇibhyāṃ jvaraśāntaye

sāṃdīpanāya dadataṃ putraṃ dhyātvāyutaṃ hunet /
yathoktairamṛtākhaṇḍairapamṛtyunivṛttaye

sapārthaṃ mṛtaputrāyārpayantaṃ ca dvijanmane /
sutaṃ dhyātvā japellakṣaṃ putrapautrādivṛddhaye

putrajīvaphalairhutvāyutaṃ madhurasaṃplutaiḥ /
tatkāṣṭhairedhite vahnau sutāndīrghāyuṣo labhet

kṣīradruktvāthasaṃpūrṇamabhyarcya kalaśaṃ niśi /
prātarjjaptvāyutaṃ nārīmabhiṣiñceddiṣaḍdinam

evaṃ kṛte tu vandhyāpi labhetputrāṃścirāyuṣaḥ /
prātarvācaṃyamāśvatthadalasaṃpuṭakaṃ jalam

aṣṭottaraśataṃ japtaṃ māsaṃ putrārthinī pibet /
sarvalakṣaṇasaṃpannaṃ vandhyāpi labhate sutam

jitvā kṛtyāṃ kāśirājapreṣitāṃ ca nijāriṇaḥ /
tejasā tasya nagaraṃ dahṝntaṃ bhāvayanharim

hunetsaptadinaṃ mantrī susnehāktaiśca sarṣapaiḥ /
kṛtyākartāramevāsmai kupitā nāśayeddhruvam

badarīdrumasaṃkīrṇe sthitaṃ divyāśrame śubhe /
spṛśantaṃ karapadmābhyāṃ ghaṇṭākarṇakalevaram

dhyātvaivaṃ juhuyāllakṣaṃ tilaistrimadhurāplutaiḥ /
mahāpāpayuto 'pyevaṃ pūto bhavati tatkṣaṇāt

dyūtāsaktau rukmibalau dveṣayantaṃ hariṃ smaran /
juhuyādiṣṭayordviṣṭyai gulikā gomayodbhavāḥ

nityaṃ sahasraṃ saptāhānmitho vidveṣayedarīn /
varṣantaṃ garuḍārūḍhaṃ jvaladagnimukhaiḥ śaraiḥ

dhāvantaṃ ripusaṃghātamanudhāvatamacyutam /
dhyātvā saptasahasraṃ tu japenmantramananyadhīḥ

uccāṭanaṃ bhavatyeva śatrūṇāṃ saptabhirdinaiḥ /
dhyāyannutkṣiptavatsaṃ tu kapitthaphalahāriṇam

prajapedayutaṃ śatrumuñcāṭayati tatkṣaṇāt /
ātmānaṃ kaṃsamathanaṃ dhyāyanmañcānnipātitam

kaṃsātmānaṃ vyakarṣantaṃ gatāsuṃ taṃ japenmanum /
ripujanmarkṣavṛkṣotthasamidbhirayutaṃ niśi

juhuyādevamugro 'pi sapatno nidhanaṃ vrajet /
athavā niṃbatailāktairhunedhobhirakṣajaiḥ

ayutaṃ niyato rātrau mārayedacirādarīn /
niśādiṣṭadalavyoṣakārpāsāsthikarairniśi

hunederaṇḍatailāktaiḥ śmaśāne ripuśāntaye /
na śastaṃ māraṇaṃ karma kuryyāñcedayutaṃ hunet

pāyasairvā hunettāvacchāntaye śāntamānasaḥ /
pārijātaharaṃ kṛṣṇaṃ dhyāyan lakṣaṃ japenmanum

sarvatraiva jayastasya na kadāpi parājayaḥ /
vyākhyāmudrākaraṃ kṛṣṇaṃ rathasthaṃ bhāvayañjapet

pārthe diśantaṃ gītārthaṃ dharmavṛddhyai sumānavaḥ /
pāvāśapuṣpairmadhvaktairlakṣaṃ vidyāptayehunet

rāṣṭrapūrgrāmavastūnāṃ śarīrasyāpi rakṣaṇe /
viśvarūpadhara prodyadbhānukoṭisamaprabham

agrīṣomātmakaṃ kṛṣṇaṃ drutacāmīkaraprabham /
arkāgnidyotitāsyāṅghriṃpraṅkaja divyabhūṣaṇam

nānāyudhadharaṃ prāptaṃ viśvākāśāvakāśakam /
dhyātvā lakṣa japenmantraṃ rakṣaṇāya samāhitaḥ

raktairvanyaprasūnairyo dinādau pūjayeddharim /
dinamadhyoktavidhinā japedaṣṭottaraṃ śatam

sahasramaṇḍalānmantrī vaśayenmukharāndvijān /
jātipuṣpaiḥ kṣatriyāṃśca gopaveṣadharaṃ smaran

dhyāyan krīḍārataṃ kṛṣṇaṃ raktairaśvāripuṣpakaiḥ /
vaśayedvaiśyajātīyān śūdrānnīlotpalaiḥ smaran

gītanṛtyarataṃ śvetapuṣpaiḥ sājyaiśca tandulaiḥ /
hutvānvahaṃ saptadinaṃ bhasma bhāle ca mūrddhani

dhārayanvaśayetkāntāṃ sāpi tadvatpatiṃ dhruvam /
tāṃbūlaṃ kusumaṃ vāsoṃ'janaṃ candanameva ca

sahasraṃ manunā japtaṃ dadyādyasmai narāya ca /
so 'cirādeṣa vaśagaḥ saputrapaśubāndhavaḥ

vṛndāraṇyasthitaṃ dhyāyanballavīsaṃyutaṃ harim /
apāmārgasamidbhistu hutvā tu vaśayejjagat

saṃprāpya sadguror dīkṣāṃ kṛṣṇaṃ yo vidhināmunā /
arcayedvaiṣṇavaśreṣṭhaḥ so 'ṣṭasiddhīśvaro bhavet

tasya darśanamātreṇa vādino niṣprabhāḥ smṛtāḥ /
vasetsarasvatī vakre gṛhe cāpi sabhāsadaḥ

bhuktvā nānāvidhānbhogānante viṣṇupadaṃ vrajet