Scripture Library

Narada Purana · Chapter 1.78

1.78.1

iti śrībṛhannāradīyapurāṇe pūrvabhāge bṛhadupākhyāne tṛtīyapāde kārtavīryakavacakathanaṃ nāma saptasaptatitomo 'dhyāyaḥ
sanatkumāra uvāca
kārtavīryasya kavacaṃ kathitaṃ te munīśvara /
mohavidhvaṃsanaṃ jaitraṃ māruteḥ kavacaṃ śṛṇu

1.78.2

yasya saṃdhāraṇātsadyaḥ sarve naśyantyupadravāḥ /
bhūtapretārijaṃ duḥkhaṃ nāśameti na saṃśayaḥ

1.78.3

ekadāhaṃ gato draṣṭuṃ rāmaṃ ramayatāṃ varam /
ānandavanikāsaṃsthaṃ dhyāyantaṃ svātmanaḥ padam

1.78.4

tatra rāmaṃ ramānāthaṃ pūjitaṃ tridaśeśvaraiḥ /
namaskṛtya tadādiṣṭamāsanaṃ sthitavān puraḥ

1.78.5

tatra sarvaṃ mayā vṛttaṃ rāvaṇasya vadhāntakam /
pṛṣṭaṃ provāca rājendraḥ śrīrāmaḥ svayamādarāt

1.78.6

tataḥ kathānte bhagavānmāruteḥ kavacaṃ dadau /
mahyaṃ tatte pravakṣyāmi na prakāśyaṃ hi kutracit

1.78.7

bhaviṣyadetannirddiṣṭaṃ bālabhāvena nārada /
śrīrāmeṇāñjanāsūnāsūnorbhuktimuktipradāyakam

1.78.8

hanumān pūrvataḥ pātu dakṣiṇe pavanātmajaḥ /
pātu pratīcyāmakṣaghnaḥ saumye sāgaratārakaḥ

1.78.9

ūrddha pātu kapiśreṣṭhaḥ kesaripriyanandanaḥ /
adhastādviṣṇubhaktastu pātu madhye ca pāvaniḥ

1.78.10

laṅkāvidāhakaḥ pātu sarvāpadbhyo nirantaram /
sugrīvasacivaḥ pātu mastakaṃ vāyunandanaḥ

1.78.11

bhālaṃ pātu mahāvīro bhruvormadhye nirantaram /
netre chāyāpahārī ca pātu naḥ plavageśvaraḥ

1.78.12

kapolau karṇamūle ca pātu śrīrāmakiṅkaraḥ /
nāsāgramañjanāsūnuḥ pātu vaktraṃ harīśvaraḥ

1.78.13

pātu kaṇṭhe tu daityāriḥ skandhau pātu surārijit /
bhujau pātu mahātejāḥ karau ca caraṇāyudhaḥ

1.78.14

nakhānnākhāyudhaḥ pātu kukṣau pātu kapīśvaraḥ /
vakṣo mudrāpahārī ca pātu pārśve bhujāyudhaḥ

1.78.15

laṅkānibhañjanaḥ pātu pṛṣṭadeśe nirantaram /
nābhiṃ śrīrāmabhaktastu kaṭiṃ pātvanilātmajaḥ

1.78.16

guhyaṃ pātu mahāprajñaḥ sakthinī atithipriyaḥ /
ūrū ca jānunī pātu laṅkāprāsādabhañjanaḥ

1.78.17

jaṅghe pātu kapiśreṣṭho gulphau pātu mahābalaḥ /
acaloddhārakaḥ pātu pādau bhāskarasannibhaḥ

1.78.18

aṅgāni pātu sattvāḍhyaḥ pātu pādāṅgulīḥ sadā /
mukhāṅgāni mahāśūraḥ pātu romāṇi cātmavān

1.78.19

divārātrau trilokeṣu sadāgatiluto 'vatu /
sthitaṃ vrajantamāsīnaṃ pibantaṃ jakṣataṃ kapiḥ

1.78.20

lokottaraguṇaḥ śrīmān pātu tryaṃbakasaṃbhavaḥ /
pramattamapramattaṃ vā śayānaṃ gahaneṃ'buni

1.78.21

sthaleṃ'tarikṣe hyagnau vā parvate sāgare drume /
saṃgrāme saṃkaṭe ghore virāṅrūpadharo 'vatu

1.78.22

ḍākinīśākinīmārīkālarātrimarīcikāḥ /
śayānaṃ māṃ vibhuḥ pātu piśācoragarākṣasīḥ

1.78.23

divyadehadharo dhīmānsarvasattvabhayaṅkaraḥ /
sādhakendrāvanaḥ śaśvatpātu sarvata eva mām

1.78.24

yadrūpaṃ bhīṣaṇaṃ dṛṣṭvā palāyante bhayānakāḥ /
sa sarvarūpaḥ sarvajñaḥ sṛṣṭisthitikaro 'vatu

1.78.25

svayaṃ brahmā svayaṃ viṣṇuḥ sākṣāddevo maheśvaraḥ /
sūryamaṇḍalagaḥ śrīdaḥ pātu kālatraye 'pi mām

1.78.26

yasya śabdamupākarṇya daityadānavarākṣasāḥ /
devā manuṣyāstiryañcaḥ sthāvarā jaṅgamāstathā

1.78.27

sabhayā bhayanirmuktā bhavanti svakṛtānugāḥ /
yasyānekakathāḥ puṇyāḥ śrūyante pratikalpake

1.78.28

so 'vatātsādhakaśreṣṭhaṃ sadā rāmaparāyaṇamaḥ /
vaidhātradhātṛprabhṛti yatkiñciddṛśyate 'tyalam

1.78.29

viddhvi vyāptaṃ yathā kīśarūpeṇānañjanena tat /
yo vibhuḥ so 'hameṣo 'haṃ svīyaḥ svayamaṇurbṛhat

1.78.30

ṛgyajuḥsāmarūpaśca praṇavastrivṛdadhvaraḥ /
tasmai svasmai ca sarvasmai nato 'smyātmasamādhinā

1.78.31

anekānantabrahmāṇḍadhṛte brahmasvarūpiṇe /
samīraṇātmane tasmai nato 'smyātmasvarūpiṇe

1.78.32

namo hanumate tasmai namo mārutasūnave /
namaḥ śrīrāmabhaktāya śyāmāya mahate namaḥ

1.78.33

namo vānara vīrāya sugrīvasakhyakāriṇe /
saṃkāvidahanāyātha mahāsāgaratāriṇe

1.78.34

sītāśokavināśāya rāmamudrādharāya ca /
rāvaṇāntanidānāya namaḥ sarvottarātmane

1.78.35

meghanādamakhadhvaṃsakāraṇāya namonamaḥ /
aśokavanavidhvaṃsakāriṇe jayadāyine

1.78.36

vāyuputrāya vīrāya ākāśodaragāmine /
vanapālaśiraśchetre laṅkāprāsādabhañjine

1.78.37

jvalatkāñcanavarṇāya dīrghalāṅgūladhāriṇe /
saumitrijayadātre ca rāmadūtāya te namaḥ

1.78.38

akṣasya vadhakartre ca brahmaśastranivāriṇe /
lakṣmaṇāṅgamahāśaktijātakṣatavināśine

1.78.39

rakṣoghnāya ripughnāya bhūtaghnāya namonamaḥ /
ṛkṣavānaravīraughaprāsādāya namonamaḥ

1.78.40

parasainyabalaghnāya śastrāstraghnāya te namaḥ /
viṣaghnāya dviṣaghnāya bhayaghnāya namonamaḥ

1.78.41

mahīripubhayaghnāya bhaktatrāṇaikakāriṇa /
parapreritamantrāṇāṃ mantrāṇāṃ staṃbhakāriṇe

1.78.42

payaḥ pāṣāṇataraṇakāraṇāya namonamaḥ /
bālārkamaṇḍalagrāsakāriṇe duḥkhahāriṇe

1.78.43

nakhāyudhāya bhīmāya dantāyudhadharāya ca /
vihṝṅgamāya śavāya vajradehāya te namaḥ

1.78.44

pratigrāmasthitāyātha bhūtapretavadhārthine /
karasthaśailaśastrāya rāma śastrāya te namaḥ

1.78.45

kaupīnavāsase tubhyaṃ rāmabhaktiratāya ca /
dakṣiṇāśābhāskarāya satāṃ candrodayātmane

1.78.46

kṛtyākṣatavyathāghnāya sarvakleśaharāya ca /
svāmyājñāpārthasaṃgrāmasakhyasaṃjayakāriṇe

1.78.47

bhaktānāṃ divyavādeṣu saṃgrāme jayakāriṇe /
kilkilāvuvakārāya ghoraśabdakarāya ca

1.78.48

sarvāgnivyādhisaṃstaṃbhakāriṇe bhayahāriṇe /
sadā vanaphalāhārasaṃtṛptāya viśeṣataḥ

1.78.49

mahārṇavaśilābaddhvasetubandhāya te namaḥ /
ityetatkathitaṃ vipra māruteḥ kavacaṃ śivam

1.78.50

yasmai kasmai na dātavyaṃ rakṣaṇīyaṃ prayatnataḥ /
aṣṭagandhairvilikhyātha kavacaṃ dhārayettu yaḥ

1.78.51

kaṇṭhe vā dakṣiṇe bāhau jayastasya pade pade /
kiṃ punarbahunoktena sādhitaṃ lakṣamādarāt

1.78.52

prajaptametatkavacamasādhyaṃ cāpi sādhayet

Original text: Nāradapurāṇa (or Nāradīyapurāṇa) · Data entry members of the Sansknet Project · GRETIL (Göttingen) · CC BY-NC-SA 4.0