Mṛgendrāgama · Chapter 1.10

granthijanyaṃ kalākāla vidyārāganṛmātaraḥ
guṇadhīgarvacittākṣa mātrābhūtānyanukramāt //

vidhatte dehasiddhyarthaṃ yatsākṣādyatpadāntarāt
yathā yunakti yaddhetos tādṛktadadhunocyate //

kartṛśaktiraṇornityā vibhvī ceśvaraśaktivat
tamaścchannatayārtheṣu nābhāti niranugrahā //

tadanugrāhakaṃ tattvaṃ kalākhyaṃ taijasaṃ haraḥ
māyāṃ vikṣobhya kurute pravṛttyaṅgaṃ paraṃ hi tat //

tena pradīpakalpena tadāsvacchaciteraṇoḥ
prakāśayatyekadeśaṃ vidārya timiraṃ ghanam //

kala ityeṣa yo dhātuḥ saṃkhyāne preraṇe ca saḥ
protsāraṇaṃ preraṇaṃ sā kurvatī tamasaḥ kalā //

ityetadubhayaṃ vipra saṃbhūyānanyavatsthitam
bhogakriyāvidhau jantor nijaguḥ kartṛkārakam //

evaṃ vyaktakriyāśaktir didṛkṣurgocaraṃ dṛśaḥ
bhajatyanugrahāpekṣaṃ svayaṃ draṣṭumaśaknuvat //

tadarthaṃ kṣobhayitveśaḥ kalāmeva janikṣamām
tattvaṃ vidyākhyamasṛjat karaṇaṃ paramātmanaḥ //

tena prakāśarūpeṇa jñānaśaktiprarocinā
sarvakārakaniṣpādyam avaiti viṣayaṃ param //

tadabhivyaktacicchakti dṛṣṭārtho 'pyapipāsitaḥ
naiti taṃ janakaṃ rāgaṃ tasmādevāsṛjatprabhuḥ //

sa tena rañjito bhogyaṃ malīmasamapi spṛhan
ādatte na ca bhuñjāno virāgamadhigacchati //

iti pravṛttaḥ karaṇaiḥ kāryarūḍhaiḥ sabhauvanaiḥ
bhogabhūmiṣu nā bhuṅkte bhogānkālānuvartinaḥ //

tuṭyādipratyayasyārthaḥ kālo māyāsamudbhavaḥ
kalayannā samutthānān niyatyā niyataṃ paśum //

sasādhanasya bhogasya karmatantratayā jaguḥ
kecinniyāmakaṃ karma yadanyadatiricyate //

bhogo 'rthaḥ sarvatattvānāṃ so 'pi karmanibandhanaḥ
karmaivāstu śarīrādi tataḥ sarvamapārthakam //

atha dehādisāpekṣaṃ tatpumarthaprasādhakam
tato niyatisāpekṣam astu karma niyāmakam //

puṃstattvaṃ tata evābhūt puṃspratyayanibandhanam
āpūrakaṃ pradhānāder bhauvanerudrasaṃśrayam //

tataḥ prādhānikaṃ tattvaṃ kalātattvādajījanat
saptagranthinidānasya yattadgauṇasya kāraṇam //

tato buddhyādyupādānaṃ gauṇaṃ sattvaṃ rajastamaḥ
tadvṛttayaḥ prakāśādyāḥ prasiddhā eva bhūyasā //

trayo guṇāstathāpyekaṃ tattvaṃ tadaviyogataḥ
ekaikaśrutireteṣāṃ vṛttyādhikyanibandhanā //

na tadasti jagatyasmin vastu kiñcidacetanam
yanna vyāptaṃ guṇairyasminn eko vāmiśrako guṇaḥ //

buddhitattvaṃ tato nānā bhāvapratyayalakṣaṇam
paraṃ tadātmano bhogyaṃ vakṣyamāṇārthasaṃskṛtam //

bhāvā buddhiguṇā dharma jñānavairāgyabhūtayaḥ
sāttvikā vyatyayenaite rāgamutsṛjya tāmasāḥ //

pratyayāstadupādānās te 'ṣṭau nava caturguṇāḥ
sapta pañca ca vikhyātāḥ siddhyādyā vargaśo mune //

bhāvāḥ sapratyayāsteṣāṃ leśāllakṣaṇamucyate
sāṃsiddhikā vainayikāḥ prākṛtāśca bhavantyaṇoḥ //

viśiṣṭadharmasaṃskāra samuddīpitacetasām
guṇaḥ sāṃsiddhiko bhāti dehābhāve 'pi pūrvavat //

lokadhīguruśāstrebhyo bhāti vainayiko guṇaḥ
samarjito vainayiko manovāktanuceṣṭayā //

prākṛto dehasaṃyoge vyaktaḥ svapnādibodhavat
svargo muktiḥ prakṛtitvā- vighātau yonikrāntirnirayāvāptibandhau
rūpeṣvarthā vainayaprākṛteṣu sampadyante savighātāḥ krameṇa //

vaśyākrāntistatparijñānayogo bhogānicchā vighnasaṃghavyapāyaḥ
bhogāsaktirnyakkṛtirdehalabdhir vighnaścārthāsteṣu sāṃsiddhikeṣu //