Mokṣopāyaṭīkā · Chapter 1.20

māṃsaputtalikāyāś ca yantralolāṅgapañjare /
snāyvasthigranthiśālinyāḥ striyāḥ Ś4: °yaḥ kim iva śobhanam //

tvaṅmāṃsaraktabāṣpāsru pṛthak kṛtvā vilocanam /
samālokaya ramyaṃ cet kim mudhā parimuhyasi //

itaḥ keśā ito raktam itīyam pramadātanuḥ /
kim etayā ninditayā karotu vipulāśayaḥ //

vāsovilepanair yāni lālitāni N11: l*ā*li° punaḥ punaḥ /
tāny aṅgāny avalumpanti N11: av(i)a° kravyādāḥ sarvadehinām //

meroḥ śṛṅgataṭollāsigaṅgājalarayopamā /
dṛṣṭā yasmin stane muktā hārasyollāsaśālinaḥ //

śmaśāneṣu diganteṣu sa eva lalanāstanaḥ /
śvabhir āsvādyate kāle laghupiṇḍa ivāndhasaḥ //

raktamāṃsādidigdhāni karabhasya yathā vane /
tathaivāṅgāni kāminyās tat praty api hi ko grahaḥ //

āpātaramaṇīyatvaṃ kalpyate kevalaṃ striyāḥ /
manye tad api nāsty atra mune mohaikakāraṇe //

vipulollāsadāyinyā madonmathanapūrvakam /
ko viśeṣo vikāriṇyā madirāyā iha striyāḥ Ś4: °yaḥ //

lalanālānasaṃlīnā mune mānavadantinaḥ /
prabodhaṃ nādhigacchanti dīrghair api śamāṅkuśaiḥ //

keśakajjaladhāriṇyas tīkṣṇāḥ prakṛtitaḥ sadā /
duṣkṛtāgniśikhā nāryo dahanti tṛṇavan naram //

te vandyās te mahātmānas ta eva puruṣā bhuvi /
ye sukhena samuttīrṇāḥ sādho yauvatasaṅkaṭāt //

jvalatām atidūre 'pi sarasā api nīrasam /
striyo hi narakāgnīnāṃ dāru cāru ca dāruṇam //

kīrṇāndhakārakavarī tarattārakalocanā /
pūrṇendubimbavadanā kumudotkarahāsinī //

līlāvilolapuruṣā N11, Ś4: °paru° kāryasaṃhārakāriṇī /
paraṃ vimohanam buddheḥ kāminī dīrghayāminī //

puṣpābhirāmamadhurā karapallavalāsinī /
bhramarabhrūvilāsāḍhyā stabakastanadhāriṇī //

puṣpakesaragaurāṅgī naramāraṇatatparā /
dadāty uttamavaivaśyaṃ kāntā viṣamahālatā //

sītkārocchvāsamātreṇa bhujaṅgadalanotkayā /
kāntayoddhriyate jantuḥ kariṇyevorago bilāt //

kāmanāmnā kirātena vikīrṇā Ś4: °kīrṇāṃ mugdhacetasām /
nāryo naravihaṅgānām aṅgabandhanavāgurāḥ //

lalanāvipulālāne manomattamataṅgajaḥ /
ratiśṛṅkhalayā brahman baddhas tiṣṭhati mūkavat //

janmapalvalamatsyānāṃ karmakoṭaravāriṇām /
puṃsāṃ durvāsanārajjur nārī baḍiśapiṇḍikā //

mandureva turaṅgānām ālānam iva dantinām /
puṃsām abjam ivālīnām bandhanaṃ vāmalocanāḥ //

nānārasamayī citrā bhogabhūmir iyam mune /
striyam āśritya saṃyātā parām iha hi saṃsthitim //

sarveṣāṃ doṣaratnānāṃ susamudgikayānayā /
duḥkhaśṛṅkhalayā nityam alam astu mama striyā //

kiṃ stanena kim akṣṇā N11, Ś4: akṣā vā kiṃ nitambena kim bhruvā /
māṃsamātraikasāreṇa karomy aham avastunā //

ito māṃsam ito raktam ito 'sthīni ca vāsaraiḥ /
brahman katipayair eva yāti strī viśarārutām //

yās tā niṣparuṣais tūlair lālitāḥ patibhiḥ striyaḥ /
tā mune pravibhaktāṅgyaḥ Ś4: °ktyāṅgyāḥ svapanti pitṛbhūmiṣu //

yasmin ghananavasneham mukhe pattrāṅkuraśriyaḥ Ś4: pannā°; N11: pa-(?)ā° /
kāntena racitā brahmañ śīryate tat tu Ś4: tantu° jaṅgale //

keśāḥ śmaśānavṛkṣeṣu yānti cāmaraleśatām /
asthīny uḍuvad ābhānti dinair avanimaṇḍale //

pibanti pāṃsavo raktaṃ kravyādāś cāpy anekaśaḥ /
carmānalaśikhā bhuṅkte khaṃ yānti prāṇavāyavaḥ //

ity eṣā lalanāṅgānām acireṇaiva bhāvinī /
sthitir mayā vaḥ kathitā kim bhrāntim anudhāvatha //

bhūtapañcakasaṅghaṭṭasaṃsthānaṃ lalanābhidham /
rasād abhivahatv etat kathaṃ nāma dhiyānvitaḥ //

śākhāvitānagahanā kaṭvamlaphalaśālinī /
pratānottālatām eti cintā kāntānusāriṇī //

śocyatām paramām eti taruṇas taruṇīrataḥ /
nibaddhaḥ kariṇīlobhād vindhyakhāte yathā dvipaḥ //

yasya strī tasya bhogecchā niḥstrīkasya na bhogabhūḥ /
striyaṃ tyaktvā jagat tyaktaṃ jagat tyaktvā sukhī bhavet //

āpātamātramadhureṣu duruttareṣu bhogeṣu nāham alipakṣatipelaveṣu N11: °pakya° /
brahman rame Ś4: name maraṇarogajarādibhītyā śāmyāmy aham param upaimi vanam prayatnāt //