Mokṣopāya · Chapter 6.178
jñāninaiva sadā bhāvyaṃ rāma na jñānabandhunā /
ajñataiva varaṃ manye na punar jñānabandhutā //
kim ucyate jñānabandhur jñānī caiva kim ucyate /
kiṃ phalaṃ jñānabandhutve jñānitve 'pi ca kiṃ phalaṃ //
vyācaṣṭe yaḫ paṭhati ca śāstraṃ bhogāya śilpivat /
yatate na tv anuṣṭhāne jñānabandhus sa ucyate //
karmaspandeṣu no bodhaḫ phalito yasya dṛśyate /
bodhaśilpopajīvitvāj jñānabandhus sa ucyate //
vasanāśanamātreṇa tuṣṭāś śāstraphalena ye /
ajñāñ jñānāṃśabandhūṃs tān vidyāc chāstrārthaśilpinaḥ //
pravṛttilakṣaṇe dharme vartate yaś śrutocitam /
adūravartijñānatvāj jñānabandhus sa ucyate //
ātmajñānaṃ vidur jñānaṃ jñānāny anyāni yāni tu /
tāni jñānāvabhāsāni sārasyānavabodhanāt //
ātmajñānam anāsādya jñānāntaralavena ye /
santuṣṭāẖ kaṣṭaceṣṭena te smṛtā jñānabandhavaḥ //
jñānoditajñeyavikāsaśāntyā vinā na santuṣṭadhiyeha bhāvyam /
tvaṃ jñānabandhutvam upetya rāma ramasva mā bhogabhavāmayeṣu //
āhārārthaṃ karma kuryād anindyaṃ kuryād āhāraṃ prāṇasandhāraṇārtham /
prāṇās sandhāryās tattvajijñāsanārthaṃ tattvaṃ jijñāsyaṃ yena bhūyo na duẖkham //
Original text: Mokṣopāya · Edition: Susanne Krause-Stinner Das erste und zweite Buch: Vairāgyaprakaraṇa; Mumukṣuvyavahāraprakaraṇa Wiesbaden Harrassowitz Walter Slaje Anonymus Casmiriensis: Mokṣopāya. Historisch-kritische Gesamtausgabe 1 Akademie der Wissenschaften und der Literatur, Mainz. Veröffentlichungen der Indologischen Kommission / Veröffentlichungen der Fächergruppenkommission für Außereuropäische Sprachen und Kulturen. Stu · Data entry Walter Slaje Susanne Krause-Stinner Peter Stephan Anett Krause Jürgen Hanneder Stanislav Jager · GRETIL (Göttingen) · CC BY-NC-SA 4.0