Mokṣopāya · Chapter 6.151

satāsatā vā jīvena kenāpy anyena vā guro /
tathā na kenacid vāpi dehenaivātha vāpi ca //

bhāvitaṃ piṇḍadānādeḫ phalaṃ yady anubhūyate /
tadākartur na doṣeṇa sambandha iti me matiḥ //

akartuḫ piṇḍadānādeẖ kriyāpīṭhasya sanmate /
virodhabhāvanaṃ cittāt kva gacchati vadāśu me //

parasparānapekṣitvāt kriyātyāgāt prajāhitam /
bhavet teneha saṃyogo jāyate mahatainasā //

aham ity eva yasyāsti saṃvit tasyāsti cittabhūḥ /
yatra yat patitaṃ bījaṃ tad avaśyaṃ prarohati //

jñānād ṛte vimūḍhasya bālasya ca sacetasaḥ /
satyaṃ samastam evedam ā sarganiyatikramāt //

mṛtena jīvatā vāpi sarvaẖ kartavyatākramaḥ /
bhāvitas tena sarvatra sa hi sarvaphalapradaḥ //

evaṃ cet tat suraguro na kiñcid yena bhāvitam /
pāṣāṇeneva manasā sa mukta iti vedmy aham //

na kiñcid bhāvitaṃ yena dṛṣajjāḍye tu tiṣṭhatā /
sa mukto nātra sandeho muktiẖ kevalataiva hi //

nakiñcidbhāvanaṃ jantor jīvato nopapadyate /
jñānād ṛte jīvataiva kila kiñcinmayī yataḥ //

yayā kayācid vā yuktyā nakiñcidbhāvanaṃ yadi /
nūnaṃ rūḍham arūḍhasya tat prāpyaṃ nāvaśiṣyate //

itthaṃ purā surapure 'suranāyakasya rāmaivamuttamavidā guruṇā surāṇām /
tat te mayādya kathitaṃ kathayānayeha piṇḍādidānakṛtacāru vicārayeti //