Mokṣopāya · Chapter 6.130

evam uktvā sa bhagavān manus tūṣṇīm avasthitaḥ /
ikṣvākunā nṛpendreṇa muditenābhipūjitaḥ //

jagāmākāśam āviśya śrīmān paitāmahaṃ gṛham /
etāṃ dṛṣṭim avaṣṭabhya rāmātmārāmatāṃ vraja //

evaṃ sthite he bhagavañ jīvanmuktasya sanmateḥ /
apūrvo 'tiśayaẖ ko 'sau bhavaty ātmavidāṃ vara //

jñasya kasmiṃścid evāṅga bhavaty atiśaye na dhīḥ /
nityatṛptaḫ praśāntātmā sa ātmany eva tiṣṭhati //

apūrvo 'tiśayaẖ ko vā sādhor jagati vidyate /
sarve hy atiśayā loke śataśaḫ pūrvatāṃ gatāḥ //

dhūrtais siddhaiś ca tajjñaiś ca tathānyair mṛgapakṣibhiḥ /
kṛtam ākāśayānādi kā tasya syād apūrvatā //

kevalaṃ śāntasaṃrambhaṃ prakṛtavyavahāravān /
tajjñas saṅkṣapayan dehaṃ svastha ātmani tiṣṭhati //

nottamaṃ na ca sāmānyaṃ nāśrutaṃ na bahuśrutam /
na suvṛttaṃ na durvṛttaṃ jñaṃ vidanti janā ime //

lokācāragatasyāpi lokavat saṃsthitasya ca /
brahman viditavedyasya brūhi cihnaṃ manāg api //

na kiñcid apy apūrvatvaṃ janāt tasyāṅga lakṣyate /
yac ca syād asya vā citraṃ tad anyatrāpi lakṣyate //

tattvajñasyeha he rāma na lokālokanakṣamam /
vidyate lakṣaṇaṃ sākṣād aṇimādy apadādi vā //

vyavahārī yathaivājñas tajjño loke tathaiva hi /
vyavahāravaśaprāpte sukhe duẖkhe ca tiṣṭhati //

eka eva viśeṣo 'tra sa cādṛśyo janasthitau /
sati vāsati vā dehe yad antaẖkṣīṇaduẖkhatā //

svānubhūtyātmakād asmān nirduẖkhatvād ṛte paraḥ /
śiraśśṛṅgādi tajjñasya cihnam anyan na vidyate //

mahākartā mahābhoktā mahātyāgī sa yady api /
tajjño bhavati tad rāma te 'pi sādhāraṇā guṇāḥ //

prāyo 'jñasyāpi vai dṛṣṭaṃ kāmalobhāditānavam /
tapodānaṃ yaśaś caiva naitaj jñatvasya lakṣaṇam //

nityam evottamānandād anyat svānubhavasthitāt /
kṣayātiśayanirmuktāc cihnaṃ tajjñasya nāsti vai //

mahākartṛtvam atha vā cihnaṃ tajjñasya dṛśyate /
tat sādho sādhu sāmānyam uktaṃ ca bahudhā mayā //

etāvad eva khalu liṅgam aliṅgamūrtes saṃśāntasaṃsṛticirabhramanirvṛtasya /
tajjñasya yan madanakopaviṣādamohalobhāpadām anudinaṃ nipuṇaṃ tanutvam //