Mokṣopāya · Chapter 3.45
vidūrathas te bhartaiṣa tanuṃ tyaktvā raṇāṅgane /
tad evāntaḥpuraṃ prāpya tādṛgātmā bhaviṣyati //
ity ākarṇya vaco devyā līlā sā tatpurāspadā /
punaḥ prahvā sthitovāca vacanaṃ vihitāñjaliḥ //
devī bhagavatī jñaptir nityam eva mayārcitā /
svapneṣu darśanaṃ devi sā dadāti niśāsu me //
sā yādṛg eva deveśi tādṛg eva tvam ambike /
tvaṃ me kṛpaṇakāruṇyād varaṃ dehi varānane //
ity uktā sā tadā jñaptis smṛtvā tad bhaktibhāvanām /
idaṃ prasannā provāca tāṃ līlāṃ tatpurāspadām //
ananyayā bhāvanayā yāvajjīvam ajīrṇayā /
parituṣṭāsmi te vatse gṛhāṇābhīpsitaṃ varam //
raṇe dehaṃ parityajya yatra tiṣṭhati me patiḥ /
anenaiva śarīreṇa tatra syām etadaṅganā //
evam astu tvayāvighnaṃ pūjitāsmi sute ciram /
ananyabhāvayā devi puṣpadhūpasaparyayā //
atha taddeśalīlāyāṃ phullāyāṃ tadvarodayāt /
pūrvalīlābravīd devīṃ sandehalulitāśayā //
ye satyakāmās satyaikasaṅkalpā brahmarūpiṇaḥ /
tvādṛśās sarvam evāśu teṣāṃ siddhyaty abhīpsitam //
tat tenaiva śarīreṇa kim arthaṃ nāham īśvari /
lokāntaram imaṃ nītā taṃ girigrāmakaṃ ca vā //
na kiñcit kasyacid ahaṃ karomi varavarṇini /
sarvaṃ sampādayaty āśu svayaṃ jīvas samīhitam //
ahaṃ hi sarale jñaptis saṃvinmātrādhidevatā /
pratyekam asmi cicchaktir jīvaśaktisvarūpiṇī //
jīvasyodety ahaṃśaktir yasya yasya yathā yathā /
bhāti tatphaladā nityaṃ tasya tasya tathā tathā //
māṃ samārādhayanty āśu jīvaśaktis tathoditā /
yathā bhavaty adehāsyāṃ muktāsmīti ciraṃ tadā //
tena tena prakāreṇa tvaṃ mayā samprabodhitā /
tayā yuktyāmalaṃ bhāvaṃ nītāsi varavarṇini //
anayaivaṃ bhāvanayā bodhitāsmi ciraṃ yadā /
tam evārthaṃ prāpnuvatī tadā svacitiśaktitaḥ //
yasya yasya yathodeti svacitprayatanaṃ ciram /
phalaṃ dadāti kālena tasya tasya tathā tathā //
tapo vā devatā vāpi bhūtvā saiva cid avyayā /
phalaṃ dadāty atha svairaṃ nabhaḥphalanipātavat //
svasaṃviddyotanād anyan na kiñcana kadācana /
phalaṃ bhavati tenāśu yathecchasi tathā kuru //
cidbhāva eva nanu sarvagato 'ntarātmā yaś cetati prayatate ca tad eti tacchrīḥ /
ramyaṃ na ramyam athaveti vicārya tasmād yat pāvanaṃ tad avabudhya tad antar āssva //
Original text: Mokṣopāya · Edition: Susanne Krause-Stinner Das erste und zweite Buch: Vairāgyaprakaraṇa; Mumukṣuvyavahāraprakaraṇa Wiesbaden Harrassowitz Walter Slaje Anonymus Casmiriensis: Mokṣopāya. Historisch-kritische Gesamtausgabe 1 Akademie der Wissenschaften und der Literatur, Mainz. Veröffentlichungen der Indologischen Kommission / Veröffentlichungen der Fächergruppenkommission für Außereuropäische Sprachen und Kulturen. Stu · Data entry Walter Slaje Susanne Krause-Stinner Peter Stephan Anett Krause Jürgen Hanneder Stanislav Jager · GRETIL (Göttingen) · CC BY-NC-SA 4.0