મોક્ષોપાય · અધ્યાય 3.45

વિદૂરથસ્ તે ભર્તૈષ તનું ત્યક્ત્વા રણાઙ્ગને ।
તદ્ એવાન્તઃપુરં પ્રાપ્ય તાદૃગાત્મા ભવિષ્યતિ ॥

ઇત્ય્ આકર્ણ્ય વચો દેવ્યા લીલા સા તત્પુરાસ્પદા ।
પુનઃ પ્રહ્વા સ્થિતોવાચ વચનં વિહિતાઞ્જલિઃ ॥

દેવી ભગવતી જ્ઞપ્તિર્ નિત્યમ્ એવ મયાર્ચિતા ।
સ્વપ્નેષુ દર્શનં દેવિ સા દદાતિ નિશાસુ મે ॥

સા યાદૃગ્ એવ દેવેશિ તાદૃગ્ એવ ત્વમ્ અમ્બિકે ।
ત્વં મે કૃપણકારુણ્યાદ્ વરં દેહિ વરાનને ॥

ઇત્ય્ ઉક્તા સા તદા જ્ઞપ્તિસ્ સ્મૃત્વા તદ્ ભક્તિભાવનામ્ ।
ઇદં પ્રસન્ના પ્રોવાચ તાં લીલાં તત્પુરાસ્પદામ્ ॥

અનન્યયા ભાવનયા યાવજ્જીવમ્ અજીર્ણયા ।
પરિતુષ્ટાસ્મિ તે વત્સે ગૃહાણાભીપ્સિતં વરમ્ ॥

રણે દેહં પરિત્યજ્ય યત્ર તિષ્ઠતિ મે પતિઃ ।
અનેનૈવ શરીરેણ તત્ર સ્યામ્ એતદઙ્ગના ॥

એવમ્ અસ્તુ ત્વયાવિઘ્નં પૂજિતાસ્મિ સુતે ચિરમ્ ।
અનન્યભાવયા દેવિ પુષ્પધૂપસપર્યયા ॥

અથ તદ્દેશલીલાયાં ફુલ્લાયાં તદ્વરોદયાત્ ।
પૂર્વલીલાબ્રવીદ્ દેવીં સન્દેહલુલિતાશયા ॥

યે સત્યકામાસ્ સત્યૈકસઙ્કલ્પા બ્રહ્મરૂપિણઃ ।
ત્વાદૃશાસ્ સર્વમ્ એવાશુ તેષાં સિદ્ધ્યત્ય્ અભીપ્સિતમ્ ॥

તત્ તેનૈવ શરીરેણ કિમ્ અર્થં નાહમ્ ઈશ્વરિ ।
લોકાન્તરમ્ ઇમં નીતા તં ગિરિગ્રામકં ચ વા ॥

ન કિઞ્ચિત્ કસ્યચિદ્ અહં કરોમિ વરવર્ણિનિ ।
સર્વં સમ્પાદયત્ય્ આશુ સ્વયં જીવસ્ સમીહિતમ્ ॥

અહં હિ સરલે જ્ઞપ્તિસ્ સંવિન્માત્રાધિદેવતા ।
પ્રત્યેકમ્ અસ્મિ ચિચ્છક્તિર્ જીવશક્તિસ્વરૂપિણી ॥

જીવસ્યોદેત્ય્ અહંશક્તિર્ યસ્ય યસ્ય યથા યથા ।
ભાતિ તત્ફલદા નિત્યં તસ્ય તસ્ય તથા તથા ॥

માં સમારાધયન્ત્ય્ આશુ જીવશક્તિસ્ તથોદિતા ।
યથા ભવત્ય્ અદેહાસ્યાં મુક્તાસ્મીતિ ચિરં તદા ॥

તેન તેન પ્રકારેણ ત્વં મયા સમ્પ્રબોધિતા ।
તયા યુક્ત્યામલં ભાવં નીતાસિ વરવર્ણિનિ ॥

અનયૈવં ભાવનયા બોધિતાસ્મિ ચિરં યદા ।
તમ્ એવાર્થં પ્રાપ્નુવતી તદા સ્વચિતિશક્તિતઃ ॥

યસ્ય યસ્ય યથોદેતિ સ્વચિત્પ્રયતનં ચિરમ્ ।
ફલં દદાતિ કાલેન તસ્ય તસ્ય તથા તથા ॥

તપો વા દેવતા વાપિ ભૂત્વા સૈવ ચિદ્ અવ્યયા ।
ફલં દદાત્ય્ અથ સ્વૈરં નભઃફલનિપાતવત્ ॥

સ્વસંવિદ્દ્યોતનાદ્ અન્યન્ ન કિઞ્ચન કદાચન ।
ફલં ભવતિ તેનાશુ યથેચ્છસિ તથા કુરુ ॥

ચિદ્ભાવ એવ નનુ સર્વગતો ઽન્તરાત્મા યશ્ ચેતતિ પ્રયતતે ચ તદ્ એતિ તચ્છ્રીઃ ।
રમ્યં ન રમ્યમ્ અથવેતિ વિચાર્ય તસ્માદ્ યત્ પાવનં તદ્ અવબુધ્ય તદ્ અન્તર્ આસ્સ્વ ॥