મત્સ્ય પુરાણ · અધ્યાય 99

શૃણુ નારદ વક્ષ્યામિ વિષ્ણોર્વ્રતમનુત્તમમ્
વિભૂતિદ્વાદશી નામ સર્વદેવનમસ્કૃતમ્ ॥

કાર્ત્તિકે ચૈત્રવૈશાખે માર્ગશીર્ષે ચ ફાલ્ગુને
આષાઢે વા દશમ્યાં તુ શુક્લાયાં લઘુભુઙ્નરઃ
કૃત્વા સાયન્તનીં સંધ્યાં ગૃહ્ણીયાન્નિયમં બુધઃ ॥

એકાદશ્યાં નિરાહારઃ સમભ્યર્ચ્ય જનાર્દનમ્
દ્વાદશ્યાં દ્વિજસંયુક્તઃ કરિષ્યે ભોજનં વિભો ॥

તદવિઘ્નેન મે યાતુ સફલં સ્યાચ્ચ કેશવ
નમો નારાયણાયેતિ વાચ્યં ચ સ્વપતા નિશિ ॥

તતઃ પ્રભાત ઉત્થાય કૃતસ્નાનજપઃ શુચિઃ
પૂજયેત્પુણ્ડરીકાક્ષં શુક્લમાલ્યાનુલેપનૈઃ ॥

વિભૂતયે નમઃ પાદાવ્ અશોકાય ચ જાનુની
નમઃ શિવાયેત્યૂરૂ ચ વિશ્વમૂર્તે નમઃ કટિમ્ ॥

કન્દર્પાય નમો મેઢ્રમ્ આદિત્યાય નમઃ કરૌ
દામોદરાયેત્યુદરં વાસુદેવાય ચ સ્તનૌ ॥

માધવાયેત્યુરો વિષ્ણોઃ કણ્ઠમ્ ઉત્કણ્ઠિને નમઃ
શ્રીધરાય મુખં કેશાન્ કેશવાયેતિ નારદ ॥

પૃષ્ઠં શાર્ઙ્ગધરાયેતિ શ્રવણૌ વરદાય વૈ
સ્વનામ્ના શઙ્ખચક્રાસિ ગદાજલજપાણયે
શિરઃ સર્વાત્મને બ્રહ્મન્ નમ ઇત્યભિપૂજયેત્ ॥

મત્સ્યમુત્પલસંયુક્તં હૈમં કૃત્વા તુ શક્તિતઃ
ઉદકુમ્ભસમાયુક્તમ્ અગ્રતઃ સ્થાપયેદ્બુધઃ ॥

ગુડપાત્રં તિલૈર્યુક્તં સિતવસ્ત્રાભિવેષ્ટિતમ્
રાત્રૌ જાગરણં કુર્યાદ્ ઇતિહાસકથાદિના ॥

પ્રભાતાયાં તુ શર્વર્યાં બ્રાહ્મણાય કુટુમ્બિને
સકાઞ્ચનોત્પલં દેવં સોદકુમ્ભં નિવેદયેત્ ॥

યથા ન મુચ્યસે દેવ સદા સર્વવિભૂતિભિઃ
તથા મામુદ્ધરાશેષ દુઃખસંસારકર્દમાત્ ॥

દશાવતારરૂપાણિ પ્રતિમાસં ક્રમાન્મુને
દત્તાત્રેયં તથા વ્યાસમ્ ઉત્પલેન સમન્વિતમ્
દદ્યાદેવં સમા યાવત્ પાષણ્ડાનભિવર્જયેત્ ॥

સમાપ્યૈવં યથાશક્ત્યા દ્વાદશ દ્વાદશીઃ પુનઃ
સંવત્સરાન્તે લવણ પર્વતેન સમન્વિતામ્
શય્યાં દદ્યાન્મુનિશ્રેષ્ઠ ગુરવે ધેનુસંયુતામ્ ॥

ગ્રામં ચ શક્તિમાન્દદ્યાત્ ક્ષેત્રં વા ભવનાન્વિતમ્
ગુરું સમ્પૂજ્ય વિધિવદ્ વસ્ત્રાલંકારભૂષણૈઃ ॥

અન્યાનપિ યથાશક્ત્યા ભોજયિત્વા દ્વિજોત્તમાન્
તર્પયેદ્ વસ્ત્રગોદાનૈ રત્નૌઘધનસંચયૈઃ
અલ્પવિત્તો યથાશક્ત્યા સ્તોકં સ્તોકં સમાચરેત્ ॥

યશ્ચાપ્યતીવ નિઃસ્વઃ સ્યાદ્ ભક્તિમાન્માધવં પ્રતિ
પુષ્પાર્ચનવિધાનેન સ કુર્યાદ્વત્સરદ્વયમ્ ॥

અનેન વિધિના યસ્તુ વિભૂતિદ્વાદશીવ્રતમ્
કુર્યાત્પાપવિનિર્મુક્તઃ પિતૄણાં તારયેચ્છતમ્ ॥

જન્મનાં શતસાહસ્રં ન શોકફલભાગ્ભવેત્
ન ચ વ્યાધિર્ભવેત્તસ્ય ન દારિદ્ર્યં ન બન્ધનમ્
વૈષ્ણવો વાથ શૈવો વા ભવેજ્જન્મનિ જન્મનિ ॥

યાવદ્યુગસહસ્રાણાં શતમષ્ટોત્તરં ભવેત્
તાવત્સ્વર્ગે વસેદ્બ્રહ્મન્ ભૂપતિશ્ચ પુનર્ભવેત્ ॥