Matsya Purana · Chapter 70

varṇāśramāṇāṃ prabhavaḥ purāṇeṣu mayā śrutaḥ
sadācārasya bhagavan dharmaśāstraviniścayaḥ
paṇyastrīṇāṃ sadācāraṃ śrotumicchāmi tattvataḥ //

tasminneva yuge brahman sahasrāṇi tu ṣoḍaśa
vāsudevasya nārīṇāṃ bhaviṣyantyambujodbhava //

tābhirvasantasamaye kokilālikulākule
puṣpite pavanotphulla kahlārasarasastaṭe //

nirbharāpānagoṣṭhīṣu prasaktābhiralaṃkṛtaḥ
kuraṅganayanaḥ śrīmān mālatīkṛtaśekharaḥ //

gacchansamīpamārgeṇa sāmbaḥ parapuraṃjayaḥ
sākṣātkandarpo rūpeṇa sarvābharaṇabhūṣitaḥ //

anaṅgaśarataptābhiḥ sābhilāṣamavekṣitaḥ
pravṛddho manmathastāsāṃ bhaviṣyati yadātmani //

tadāvekṣya jagannāthaḥ sarvato jñānacakṣuṣā
śāpaṃ vakṣyati tāḥ sarvā vo hariṣyanti dasyavaḥ
matparokṣaṃ yataḥ kāma laulyādīdṛgvidhaṃ kṛtam //

tataḥ prasādito deva idaṃ vakṣyati śārṅgabhṛt
tābhiḥ śāpābhitaptābhir bhagavān bhūtabhāvanaḥ //

uttārabhūtaṃ dāsatvaṃ samudrādbrāhmaṇapriyaḥ
upadekṣyatyanantātmā bhāvikalyāṇakārakam //

bhavatīnām ṛṣirdālbhyo yadvrataṃ kathayiṣyati
tadaivottāraṇāyālaṃ dāsatve 'pi bhaviṣyati
ityuktvā tāḥ pariṣvajya gato dvāravatīśvaraḥ //

tataḥ kālena mahatā bhārāvataraṇe kṛte
nivṛtte mausale tadvat keśave divamāgate //

śūnye yadukule sarvaiś caurairapi jite 'rjune
hṛtāsu kṛṣṇapatnīṣu dāsabhogyāsu cāmbudhau //

tiṣṭhantīṣu ca daurgatya saṃtaptāsu caturmukha
āgamiṣyati yogātmā dālbhyo nāma mahātapāḥ //

tāstamarghyeṇa sampūjya praṇipatya punaḥ punaḥ
lālapyamānā bahuśo bāṣpaparyākulekṣaṇāḥ //

smarantyo vipulānbhogān divyamālyānulepanān
bhartāraṃ jagatāmīśam anantamaparājitam //

divyabhāvāṃ tāṃ ca purīṃ nānāratnagṛhāṇi ca
dvārakāvāsinaḥ sarvān devarūpānkumārakān
praśnamevaṃ kariṣyanti munerabhimukhaṃ sthitāḥ //

dasyubhirbhagavānsarvāḥ paribhuktā vayaṃ balāt
svadharmāccyavane 'smākam asminnaḥ śaraṇaṃ bhava //

ādiṣṭo 'si purā brahman keśavena ca dhīmatā
kasmādīśena saṃyogaṃ prāpya veśyātvamāgatāḥ //

veśyānāmapi yo dharmas taṃ no brūhi tapodhana
kathayiṣyatyatastāsāṃ sa dālbhyaścaikitāyanaḥ //

jalakrīḍāvihāreṣu purā sarasi mānase
bhavatīnāṃ ca sarvāsāṃ nārado 'bhyāśamāgataḥ //

hutāśanasutāḥ sarvā bhavantyo 'psarasaḥ purā
apraṇamyāvalepena paripṛṣṭaḥ sa yogavit
kathaṃ nārāyaṇo 'smākaṃ bhartā syād ityupādiśa //

tasmādvarapradānaṃ vaḥ śāpaścāyamabhūtpurā
śayyādvayapradānena madhumādhavamāsayoḥ //

suvarṇopaskarotsargād dvādaśyāṃ śuklapakṣataḥ
bhartā nārāyaṇo nūnaṃ bhaviṣyatyanyajanmani //

yadakṛtvā praṇāmaṃ me rūpasaubhāgyamatsarāt
paripṛṣṭo 'smi tenāśu viyogo vo bhaviṣyati
caurairapahṛtāḥ sarvā veśyātvaṃ samavāpsyatha //

evaṃ nāradaśāpena keśavasya ca dhīmataḥ
veśyātvamāgatāḥ sarvā bhavantyaḥ kāmamohitāḥ
idānīmapi yadvakṣye tacchṛṇudhvaṃ varāṅganāḥ //

purā devāsure yuddhe hateṣu śataśaḥ suraiḥ
dānavāsuradaityeṣu rākṣaseṣu tatastataḥ //

teṣāṃ vrātasahasrāṇi śatānyapi ca yoṣitām
pariṇītāni yāni syur balādbhuktāni yāni vai
tāni sarvāṇi deveśaḥ provāca vadatāṃ varaḥ //

veśyādharmeṇa vartadhvam adhunā nṛpamandire
bhaktimatyo varārohās tathā devakuleṣu ca //

rājānaḥ svāminastulyāḥ sutā vāpi ca tatsamāḥ
bhaviṣyati ca saubhāgyaṃ sarvāsāmapi śaktitaḥ //

yaḥ kaścicchulkamādāya gṛhameṣyati vaḥ sadā
nidhanenopacāryo vaḥ sa tadānyatra dāmbhikāt //

devatānāṃ pitṝṇāṃ ca puṇyāhe samupasthite
gobhūhiraṇyadhānyāni pradeyāni svaśaktitaḥ
brāhmaṇānāṃ varārohāḥ kāryāṇi vacanāni ca //

yaccāpyanyadvrataṃ samyag upadekṣyāmyahaṃ tataḥ
avicāreṇa sarvābhir anuṣṭheyaṃ ca tatpunaḥ //

saṃsārottāraṇāyālam etadvedavido viduḥ
yadā sūryadine hastaḥ puṣyo yātha punarvasuḥ //

bhavetsarvauṣadhīsnānaṃ samyaṅnārī samācaret
tadā pañcaśarasyāpi saṃnidhātṛtvameṣyati
arcayetpuṇḍarīkākṣam anaṅgasyānukīrtanaiḥ //

kāmāya pādau sampūjya jaṅghe vai mohakāriṇe
meḍhraṃ kandarpanidhaye kīṭaṃ prītimate namaḥ //

nābhiṃ saukhyasamudrāya vāmāya ca tathodaram
hṛdayaṃ hṛdayeśāya stanāvāhlādakāriṇe //

utkaṇṭhāyeti vaikuṇṭham āsyamānandakāriṇe
vāmāṅgaṃ puṣpacāpāya puṣpabāṇāya dakṣiṇam //

mānasāyeti vai mauliṃ vilolāyeti mūrdhajam
sarvātmane ca sarvāṅgaṃ devadevasya pūjayet //

namaḥ śivāya śāntāya pāśāṅkuśadharāya ca
gadine pītavastrāya śaṅkhacakradharāya ca //

namo nārāyaṇāyeti kāmadevātmane namaḥ
sarvaśāntyai namaḥ prītyai namo ratyai nama śriyai //

namaḥ puṣṭyai namastuṣṭyai namaḥ sarvārthasampade
evaṃ sampūjya deveśam anaṅgātmakamīśvaram
gandhairmaulyaistathā dhūpair naivedyena ca kāminī //

tata āhūya dharmajñaṃ brahmāṇaṃ vedapāragam
avyaṅgāvayavaṃ pūjya gandhapuṣpārcanādibhiḥ //

śāleyataṇḍulaprasthaṃ ghṛtapātreṇa saṃyutam
tasmai viprāya sā dadyān mādhavaḥ prīyatāmiti //

yatheṣṭāhārayuktaṃ vai tameva dvijasattamam
ratyarthaṃ kāmadevo 'yam iti citte 'vadhārya tam //

yadyadicchati viprendras tattatkuryādvilāsinī
sarvabhāvena cātmānam arpayetsmitabhāṣiṇī //

evamādityavāreṇa sarvametatsamācaret
taṇḍulaprasthadānaṃ ca yāvanmāsāstrayodaśa //

tatastrayodaśe māsi samprāpte tasya bhāminī
viprasyopaskarairyuktāṃ śayyāṃ dadyādvilakṣaṇām //

sopadhānakaviśrāmāṃ sāstarāvaraṇāṃ śubhām
pradīpopānahacchattra pādukāsanasaṃyutām //

sapatnīkamalaṃkṛtya hemasūtrāṅgulīyakaiḥ
sūkṣmavastraiḥ sakaṭakair dhūpamālyānulepanaiḥ //

kāmadevaṃ sapatnīkaṃ guḍakumbhopari sthitam
tāmrapātrāsanagataṃ haimanetrapaṭāvṛtam //

sakāṃsyabhājanopetam ikṣudaṇḍasamanvitam
dadyādetena mantreṇa tathaikāṃ gāṃ payasvinīm //

yathāntaraṃ na paśyāmi kāmakeśavayoḥ sadā
tathaiva sarvakāmāptir astu viṣṇo sadā mama //

yathā na kamalā dehāt prayāti tava keśava
tathā mamāpi deveśa śarīre sve kuru prabho //

tathā ca kāñcanaṃ devaṃ pratigṛhṇandvijottamaḥ
ka idaṃ kasmā adāditi vaidikaṃ mantramīrayet //

tataḥ pradakṣiṇīkṛtya visarjya dvijapuṃgavam
śayyāsanādikaṃ sarvaṃ brāhmaṇasya gṛhaṃ nayet //

tataḥ prabhṛti yo vipro ratyarthaṃ gṛhamāgataḥ
sa mānyaḥ sūryavāre ca sa mantavyo bhavettadā //

evaṃ trayodaśaṃ yāvan māsamevaṃ dvijottamān
tarpayeta yathākāmaṃ proṣite 'nyaṃ samācaret //

tadanujñayā rūpavānyo yāvadabhyāgato bhavet
ātmano 'pi yathāvighnaṃ garbhabhūtikaraṃ priyam //

daivaṃ vā mānuṣaṃ vā syād anurāgeṇa vā tataḥ
sācārānaṣṭapañcāśad yathāśaktyā samācaret //

etaddhi kathitaṃ samyag bhavatīnāṃ viśeṣataḥ
adharmo 'yaṃ tato na syād veśyānāmiha sarvadā //

puruhūtena yatproktaṃ dānavīṣu purā mayā
tadidaṃ sāmprataṃ sarvaṃ bhavatīṣvapi yujyate //

sarvapāpapraśamanam anantaphaladāyakam
kalyāṇīnāṃ ca kathitaṃ tatkurudhvaṃ varānanāḥ //

karoti yāśeṣamakhaṇḍametat kalyāṇinī mādhavalokasaṃsthā
sā pūjitā devagaṇair aśeṣair ānandakṛtsthānam upaiti viṣṇoḥ //

tapodhanaḥ so 'pyabhidhāya caivaṃ tadā ca tāsāṃ vratamaṅganānām
svasthānameṣyatyanu tāḥ samastaṃ vrataṃ kariṣyanti ca devayānaiḥ //