Matsya Purana · Chapter 68

kimudvegādbhute kṛtyam alakṣmīḥ kena hanyate
mṛtavatsābhiṣekādi kāryeṣu ca kimiṣyate //

purā kṛtāni pāpāni phalantyasmiṃstapodhana
rogadaurgatyarūpeṇa tathaiveṣṭavadhena ca //

tadvighātāya vakṣyāmi sadā kalpāṇakārakam
saptamīsnapanaṃ nāma janapīḍāvināśanam //

bālānāṃ maraṇaṃ yatra kṣīrapāṇāṃ pradṛśyate
tadvadvṛddhāturāṇāṃ ca yauvane cāpi vartatām //

śāntaye tatra vakṣyāmi mṛtavatsābhiṣecanam
etad evādbhutodvega cittabhramavināśanam //

bhaviṣyati ca vārāho yatra kalpastapodhana
vaivasvataśca tatrāpi yadā tu manuruttamaḥ //

bhaviṣyati ca tatraiva pañcaviṃśatimaṃ yadā
kṛtaṃ nāma yugaṃ tatra haihayānvayavardhanaḥ
bhavitā nṛpatirvīraḥ kṛtavīryaḥ pratāpavān //

sa saptadvīpamakhilaṃ pālayiṣyati bhūtalam
yāvadvarṣasahasrāṇi saptasaptati nārada //

jātamātraṃ ca tasyāpi yāvatputraśataṃ tathā
cyavanasya tu śāpena vināśamapayāsyati //

sahasrabāhuśca yadā bhavitā tasya vai sutaḥ
kuraṅganayanaḥ śrīmān sambhūto nṛpalakṣaṇaiḥ //

kṛtavīryastadārādhya sahasrāṃśuṃ divākaram
upavāsairvratairdivyair vedasūktaiśca nārada
putrasya jīvanāyālam etatsnānamavāpsyati //

kṛtavīryeṇa vai pṛṣṭa idaṃ vakṣyati bhāskaraḥ
aśeṣaduṣṭaśamanaṃ sadā kalmaṣanāśanam //

alaṃ kleśena mahatā putrastava narādhipa
bhaviṣyati ciraṃjīvī kiṃtu kalmaṣanāśanam //

saptamīsnapanaṃ vakṣye sarvalokahitāya vai
jātasya mṛtavatsāyāḥ saptame māsi nārada
athavā śuklasaptamyām etatsarvaṃ praśasyate //

grahatārābalaṃ labdhvā kṛtvā brāhmaṇavācanam
bālasya janmanakṣatraṃ varjayettāṃ tithiṃ budhaḥ
tadvadvṛddhāturāṇāṃ ca kṛtyaṃ syāditareṣu ca //

gomayenānuliptāyāṃ bhūmāvekāgnivattadā
taṇḍulai raktaśālīyaiś caruṃ gokṣīrasaṃyutam
nirvapetsūryarudrābhyāṃ tanmantrābhyāṃ vidhānataḥ //

kīrtayetsūryadevatyaṃ saptarcaṃ ca ghṛtāhutīḥ
juhuyādrudrasūktena tadvadrudrāya nārada //

hotavyāḥ samidhaścātra tathaivārkapalāśayoḥ
yavakṛṣṇatilairhomaḥ kartavyo 'ṣṭaśataṃ punaḥ //

vyāhṛtībhistathājyena tathaivāṣṭaśataṃ punaḥ
hutvā snānaṃ ca kartavyaṃ maṅgalaṃ yena dhīmatā //

vipreṇa vedaviduṣā vidhivaddarbhapāṇinā
sthāpayitvā tu caturaḥ kumbhānkoṇeṣu śobhanān //

pañcamaṃ ca punarmadhye dadhyakṣatavibhūṣitam
sthāpayedavraṇaṃ kumbhaṃ saptarcenābhimantritam //

saureṇa tīrthatoyena pūrṇaṃ ratnasamanvitam
sarvānsarvauṣadhairyuktān pañcagavyasamanvitān
pañcaratnaphalaiḥ puṣpair vāsobhiḥ pariveṣṭayet //

gajāśvarathyāvalmīkāt saṃgamāddhradagokulāt
saṃśuddhāṃ mṛdamānīya sarveṣveva vinikṣipet //

caturṣvapi ca kumbheṣu ratnagarbheṣu madhyamam
gṛhītvā brāhmaṇastatra saurānmantrānudīrayet //

nārībhiḥ saptasaṃkhyābhir avyaṅgāṅgībhiratra ca
pūjitābhiryathāśaktyā mālyavastravibhūṣaṇaiḥ
saviprābhiśca kartavyaṃ mṛtavatsābhiṣecanam //

dīrghāyurastu bālo 'yaṃ jīvatputrā ca bhāminī
ādityaścandramāḥ sārdhaṃ grahanakṣatramaṇḍalaiḥ //

saśakrā lokapālā vai brahmaviṣṇumaheśvarāḥ
te te cānye ca devaughāḥ sadā pāntu kumārakam //

mitraḥ śanirvā hutabhug ye ca bālagrahāḥ kvacit
pīḍāṃ kurvantu bālasya mā māturjanakasya vai //

tataḥ śuklāmbaradharā kumārapatisaṃyutā
saptakaṃ pūjayedbhaktyā strīṇāmatha guruṃ punaḥ //

kāñcanīṃ ca tataḥ kuryāt tāmrapātroparisthitām
pratimāṃ dharmarājasya gurave vinivedayet //

vastrakāñcanaratnaughair bhakṣyaiḥ saghṛtapāyasaiḥ
pūjayedbrāhmaṇāṃstadvad vittaśāṭhyavivarjitaḥ //

bhuktvā ca guruṇā ceyam uccāryā mantrasaṃtatiḥ
dīrghāyurastu bālo 'yaṃ yāvadvarṣaśataṃ sukhī //

yatkiṃcidasya duritaṃ tatkṣiptaṃ vaḍavānale
brahmā rudro vasuḥ skando viṣṇuḥ śakro hutāśanaḥ //

rakṣantu sarve duṣṭebhyo varadāḥ santu sarvadā
evamādīni vākyāni vadantaṃ pūjayedgurum //

śaktitaḥ kapilāṃ dadyāt praṇamya ca visarjayet
caruṃ ca putrasahitā praṇamya raviśaṃkarau //

hutaśeṣaṃ tadāśnīyād ādityāya namo 'stviti
idamevādbhutodvega duḥsvapneṣu praśasyate //

karturjanmadinarkṣaṃ ca tyaktvā sampūjayetsadā
śāntyarthaṃ śuklasaptamyām etatkurvanna sīdati //

sadānena vidhānena dīrghāyurabhavannaraḥ
saṃvatsarāṇāmayutaṃ śaśāsa pṛthivīmimām //

puṇyaṃ pavitramāyuṣyaṃ saptamīsnapanaṃ raviḥ
kathayitvā dvijaśreṣṭha tatraivāntaradhīyata //

etatsarvaṃ samākhyātaṃ saptamīsnānamuttamam
sarvaduṣṭopaśamanaṃ bālānāṃ paramaṃ hitam //

ārogyaṃ bhāskarādicched dhanamiccheddhutāśanāt
īśvarājjñānam anvicchen mokṣam icchejjanārdanāt //

etanmahāpātakanāśanaṃ syāt paraṃ hitaṃ bālavivardhanaṃ ca
śṛṇoti yaścainamananyacetās tasyāpi siddhiṃ munayo vadanti //