Matsya Purana · Chapter 59

pādapānāṃ vidhiṃ sūta yathāvadvistarādvada
vidhinā kena kartavyaṃ pādapodyāpanaṃ budhaiḥ //

ye ca lokāḥ smṛtāsteṣāṃ tānidānīṃ vadasva naḥ
yatphalaṃ labhate pretya tatsarvaṃ vaktumarhasi //

pādapānāṃ vidhiṃ vakṣye tathaivodyānabhūmiṣu
taḍāgavidhivatsarvam āsādya jagadīśvara //

ṛtviṅmaṇḍapasambhāraś cācāryaścaiva tadvidhaḥ
pūjayedbrāhmaṇāṃstadvad dhemavastrānulepanaiḥ //

sarvauṣadhyudakaiḥ siktān piṣṭātakavibhūṣitān
vṛkṣānmālyairalaṃkṛtya vāsobhirabhiveṣṭayet //

sūcyā sauvarṇayā kāryaṃ sarveṣāṃ karṇavedhanam
añjanaṃ cāpi dātavyaṃ tadvaddhemaśalākayā //

phalāni sapta cāṣṭau vā kāladhautāni kārayet
pratyekaṃ sarvavṛkṣāṇāṃ vedyāṃ tānyadhivāsayet //

dhūpo 'tra guggulaḥ śreṣṭhas tāmrapātrairadhiṣṭhitān
saptadhānyasthitānkṛtvā vastragandhānulepanaiḥ //

kumbhānsarveṣu vṛkṣeṣu sthāpayitvā nareśvara
sahiraṇyānaśeṣāṃstān kṛtvā balinivedanam //

yathāsvaṃ lokapālānām indrādīnāṃ viśeṣataḥ
vanaspateśca vidvadbhir homaḥ kāryo dvijātibhiḥ //

tataḥ śuklāmbaradharāṃ sauvarṇakṛtabhūṣaṇām
sakāṃsyadohāṃ sauvarṇa śṛṅgābhyām atiśālinīm
payasvinīṃ vṛkṣamadhyād utsṛjedgāmudaṅmukhīm //

tato 'bhiṣekamantreṇa vādyamaṅgalagītakaiḥ
ṛgyajuḥsāmamantraiśca vāruṇairabhitastathā
taireva kumbhaiḥ snapanaṃ kuryādbrāhmaṇapuṃgavaḥ //

snātaḥ śuklāmbarastadvad yajamāno 'bhipūjayet
gobhir vibhavataḥ sarvān ṛtvijastānsamāhitaḥ //

hemasūtraiḥ sakaṭakair aṅgulīyapavitrakaiḥ
vāsobhiḥ śayanīyaiśca tathopaskarapādukaiḥ
kṣīreṇa bhojanaṃ dadyād yāvaddinacatuṣṭayam //

homaśca sarṣapaiḥ kāryo yavaiḥ kṛṣṇatilaistathā
palāśasamidhaḥ śastāś caturthe 'hni tathotsavaḥ
dakṣiṇā ca punastadvad deyā tatrāpi śaktitaḥ //

yadyadiṣṭatamaṃ kiṃcit tattad dadyādamatsarī
ācārye dviguṇaṃ dadyāt praṇipatya visarjayet //

anena vidhinā yastu kuryādvṛkṣotsavaṃ budhaḥ
sarvānkāmānavāpnoti phalaṃ cānantyamaśnute //

yaścaikamapi rājendra vṛkṣaṃ saṃsthāpayennaraḥ
so 'pi svarge vasedrājan yāvadindrāyutatrayam //

bhūtānbhavyāṃśca manujāṃs tārayeddrumasaṃmitān
paramāṃ siddhimāpnoti punarāvṛttidurlabhām //

ya idaṃ śṛṇuyānnityaṃ śrāvayedvāpi mānavaḥ
so 'pi sampūjito devair brahmaloke mahīyate //