Matsya Purana · Chapter 167

evamekārṇavībhūte śete lokemahādyutiḥ
pracchādya salilenorvīṃ haṃso nārāyaṇastadā //

mahato rajaso madhye mahārṇavasaraḥsu vai
virajaskaṃ mahābāhum akṣayaṃ brahma yadviduḥ //

ātmarūpaprakāśena tamasā saṃvṛtaḥ prabhuḥ
manaḥ sāttvikamādhāya yatra tatsatyamāsata //

yāthātathyaṃ paraṃ jñānaṃ bhūtaṃ tadbrahmaṇā purā
rahasyāraṇyakoddiṣṭaṃ yaccaupaniṣadaṃ smṛtam //

puruṣo yajña ityetad yatparaṃ parikīrtitam
yaścānyaḥ puruṣākhyaḥ syāt sa eṣa puruṣottamaḥ //

ye ca yajñakarā viprā ye cartvija iti smṛtāḥ
asmādeva purā bhūtā yajñebhyaḥ śrūyatāṃ tathā //

brahmāṇaṃ prathamaṃ vaktrād udgātāraṃ ca sāmagam
hotāramapi cādhvaryuṃ bāhubhyāmasṛjatprabhuḥ //

brahmaṇo brāhmaṇācchaṃsi prastotāraṃ ca sarvaśaḥ
tau mitrāvaruṇau pṛṣṭhāt pratiprastārameva ca //

udarātpratihartāraṃ potāraṃ caiva pārthiva
acchāvākamathorubhyāṃ neṣṭāraṃ caiva pārthiva //

pāṇibhyāmatha cāgnīdhraṃ subrahmaṇyaṃ ca jānutaḥ
grāvastutaṃ tu pādābhyām unnetāraṃ ca yājuṣam //

evamevaiṣa bhagavān ṣoḍaśaiva jagatpatiḥ
pravaktṝnsarvayajñānām ṛtvijo 'sṛjaduttamān //

tadeṣa vai vedamayaḥ puruṣo yajñasaṃjñitaḥ
vedāścaitanmayāḥ sarve sāṅgopaniṣadakriyāḥ //

svapityekārṇave caiva yadāścaryamabhūtpurā
śrūyatāṃ tadyathā viprā mārkaṇḍeyakutūhalam //

gīrṇo bhagavatastasya kukṣāveva mahāmuniḥ
bahuvarṣasahasrāyus tasyaiva varatejasā //

aṭaṃstīrthaprasaṅgena pṛthivīṃ tīrthagocarām
āśramāṇi ca puṇyāni devatāyatanāni ca //

deśānrāṣṭrāṇi citrāṇi purāṇi vividhāni ca
japahomaparaḥ śāntas tapo ghoraṃ samāsthitaḥ //

mārkaṇḍeyastatastasya śanairvaktrādviniḥsṛtaḥ
sa niṣkrāmanna cātmānaṃ jānīte devamāyayā //

niṣkramyāpyasya vadanād ekārṇavamatho jagat
sarvatastamasācchannaṃ mārkaṇḍeyo 'nvavaikṣata //

tasyotpannaṃ bhayaṃ tīvraṃ saṃśayaścātmajīvite
devadarśanasaṃhṛṣṭo vismayaṃ paramaṃ gataḥ //

cintayañjalamadhyastho mārkaṇḍeyo viśaṅkitaḥ
kiṃ nu syānmama cinteyaṃ mohaḥ svapno 'nubhūyate //

vyaktamanyatamo bhāvas teṣāṃ saṃbhāvito mama
na hīdṛśaṃ jagatkleśam ayuktaṃ satyamarhati //

naṣṭacandrārkapavane naṣṭaparvatabhūtale
katamaḥ syādayaṃ loka iti cintāmavasthitaḥ //

dadarśa cāpi puruṣaṃ svapantaṃ parvatopamam
salile 'rdhamatho magnaṃ jīmūtamiva sāgare //

jvalantamiva tejobhir goyuktamiva bhāskaram
śarvaryāṃ jāgratamiva bhāsantaṃ svena tejasā //

devaṃ draṣṭumihāyātaḥ ko bhavāniti vismayāt
tathaiva sa muniḥ kukṣiṃ punareva praveśitaḥ //

sampraviṣṭaḥ punaḥ kukṣiṃ mārkaṇḍeyo 'tivismayaḥ
tathaiva tu punarbhūyo vijānansvapnadarśanam //

sa tathaiva yathāpūrvaṃ yo dharāmaṭate purā
puṇyatīrthajalopetāṃ vividhānyāśramāṇi ca //

kratubhiryajamānāśca samāptavaradakṣiṇān
apaśyaddevakukṣisthān yājakāñchataśo dvijān //

sadvṛttamāsthitāḥ sarve varṇā brāhmaṇapūrvakāḥ
catvāraścāśramāḥ samyag yathoddiṣṭā mayā tava //

evaṃ varṣaśataṃ sāgraṃ mārkaṇḍeyasya dhīmataḥ
carataḥ pṛthivīṃ sarvāṃ na kukṣyantaḥ samīkṣitaḥ //

tataḥ kadācidatha vai punarvaktrādviniḥsṛtaḥ
suptaṃ nyagrodhaśākhāyāṃ bālamekaṃ niraikṣata //

tathaivaikārṇavajale nīhāreṇāvṛtāmbare
avyagraḥ krīḍate loke sarvabhūtavivarjite //

sa munirvismayāviṣṭaḥ kautūhalasamanvitaḥ
bālamādityasaṃkāśaṃ nāśaknodabhivīkṣitum //

sa cintayaṃstathaikānte sthitvā salilasaṃnidhau
pūrvadṛṣṭamidaṃ mene śaṅkito devamāyayā //

agādhasalile tasmin mārkaṇḍeyaḥ savismayaḥ
plavaṃstathārtim agamad bhayātsaṃtrastalocanaḥ //

sa tasmai bhagavānāha svāgataṃ bālayogavān
babhāṣe meghatulyena svareṇa puruṣottamaḥ //

mā bhairvatsa na bhetavyam ihaivāyāhi me 'ntikam
mārkaṇḍeyo munistvāha bālaṃ taṃ śramapīḍitaḥ //

ko māṃ nāmnā kīrtayati tapaḥ paribhavanmama
divyaṃ varṣasahasrākhyaṃ dharṣayanniva me vayaḥ //

na hyeṣa vaḥ samācāro deveṣvapi mamocitaḥ
māṃ brahmāpi hi deveśo dīrghāyuriti bhāṣate //

kastamo ghoramāsādya māmadya tyaktajīvitaḥ
mārkaṇḍeyeti māmuktvā mṛtyumīkṣitumarhati //

evamābhāṣya taṃ krodhān mārkaṇḍeyo mahāmuniḥ
tathaiva bhagavānbhūyo babhāṣe madhusūdanaḥ //

ahaṃ te janako vatsa hṛṣīkeśaḥ pitā guruḥ
āyuṣpradātā paurāṇaḥ kiṃ māṃ tvaṃ nopasarpasi //

māṃ putrakāmaḥ prathamaṃ pitā te 'ṅgiraso muniḥ
pūrvamārādhayāmāsa tapastīvraṃ samāśritaḥ //

tatastvāṃ ghoratapasā prāvṛṇodamitaujasam
uktavānahamātmasthaṃ maharṣim amitaujasam //

kaḥ samutsahate cānyo yo na bhūtātmakātmajaḥ
draṣṭumekārṇavagataṃ krīḍantaṃ yogavartmanā //

tataḥ prahṛṣṭavadano vismayotphullalocanaḥ
mūrdhni baddhāñjalipuṭo mārkaṇḍeyo mahātapāḥ //

nāmagotre tataḥ procya dīrghāyurlokapūjitaḥ
tasmai bhagavate bhaktyā namaskāramathākarot //

iccheyaṃ tattvato māyām imāṃ jñātuṃ tavānagha
yadekārṇavamadhyasthaḥ śeṣe tvaṃ bālarūpavān //

kiṃsaṃjñaścaiva bhagavāṃl loke vijñāyase prabho
tarkaye tvāṃ mahātmānaṃ ko hyanyaḥ sthātumarhati //

ahaṃ nārāyaṇo brahman sarvabhūtavināśanaḥ
ahaṃ sahasraśīrṣākhyo yaḥ padairabhisaṃjñitaḥ //

ādityavarṇaḥ puruṣo makhe brahmamayo makhaḥ
ahamagnirhavyavāho yādasāṃ patiravyayaḥ //

ahamindrapade śakro varṣāṇāṃ parivatsaraḥ
ahaṃ yogī yugākhyasya yugāntāvarta eva ca //

ahaṃ sarvāṇi sattvāni daivatānyakhilāni tu
bhujaṃgānāmahaṃ śeṣas tārkṣyo vai sarvapakṣiṇām //

kṛtāntaḥ sarvabhūtānāṃ viśveṣāṃ kālasaṃjñitaḥ
ahaṃ dharmastapaścāhaṃ sarvāśramanivāsinām //

ahaṃ caiva sariddivyā kṣīrodaśca mahārṇavaḥ
yattatsatyaṃ ca paramam ahamekaḥ prajāpatiḥ //

ahaṃ sāṃkhyamahaṃ yogo 'pyahaṃ tatparamaṃ padam
ahamijyā kriyā cāham ahaṃ vidyādhipaḥ smṛtaḥ //

ahaṃ jyotirahaṃ vāyur ahaṃ bhūmirahaṃ nabhaḥ
ahamāpaḥ samudrāśca nakṣatrāṇi diśo daśa //

ahaṃ varṣamahaṃ somaḥ parjanyo 'hamahaṃ raviḥ
kṣīrodasāgare cāhaṃ samudre vaḍavāmukhaḥ //

vahniḥ saṃvartako bhūtvā pibaṃstoyamayaṃ haviḥ
ahaṃ purāṇaḥ paramaṃ tathaivāhaṃ parāyaṇam //

ahaṃ bhūtasya bhavyasya vartamānasya saṃbhavaḥ
yatkiṃcitpaśyase vipra yacchṛṇoṣi ca kiṃcana //

yalloke cānubhavasi tatsarvaṃ māmanusmara
viśvaṃ sṛṣṭaṃ mayā pūrvaṃ sṛjyaṃ cādyāpi paśya mām //

yuge yuge ca srakṣyāmi mārkaṇḍeyākhilaṃ jagat
tadetadakhilaṃ sarvaṃ mārkaṇḍeyāvadhāraya //

śuśrūṣurmama dharmāṃśca kukṣau cara sukhaṃ mama
mama brahmā śarīrastho devaiśca ṛṣibhiḥ saha //

vyaktamavyaktayogaṃ mām avagacchāsuradviṣam
ahamekākṣaro mantras tryakṣaraścaiva tārakaḥ //

parastrivargād oṃkāras trivargārthanidarśanaḥ
evamādipurāṇeśo vadanneva mahāmatiḥ //

vaktramāhṛtavānāśu mārkaṇḍeyaṃ mahāmunim
tato bhagavataḥ kukṣiṃ praviṣṭo munisattamaḥ //

sa tasminsukhamekānte śuśrūṣurhaṃsamavyayam
yo 'hameva vividhatanuṃ pariśrito mahārṇave vyapagatacandrabhāskare
śanaiścaranprabhurapi haṃsasaṃjñito 'sṛjajjagadviharati kālaparyaye //