Markandeya Purana · Chapter 42

iti śrīmārkaṇḍeyapurāṇe yogicaryānāmaikacatvāriṃśo 'dhyāyaḥ
dvicatvāriṃśo 'dhyāyaḥ
dattātreya uvāca
evaṃ yo vartate yogī samyagyogavyavasthitaḥ /
na sa vyāvartituṃ śakyo janmāntaraśatairapi

dṛṣṭvā ca paramātmānaṃ pratyakṣaṃ viśvarūpiṇam /
viśvapādaśirogrīvaṃ viśveśaṃ viśvabhāvanam

tatprāptaye mahatpuṇyamomityekākṣaraṃ japet /
tadevādhyayanaṃ tasya svarūpaṃ śṛṇvataḥ param

akāraśca tathokāro makāraścākṣaratrayam /
etā eva trayo mātrāḥ sāttvarājasatāmasāḥ

nirguṇā yogigamyānyā cārdhamātrordhvasaṃsthitā /
gāndhārīti ca vijñeyā gāndhārasvarasaṃśrayā

pipīlikāgatisparśā prayuktā mūrdhni lakṣyate /
yathā prayukta oṅgāraḥ pratiniryāti mūrdhani

tathoṅkāramayo yogī tvakṣare tvakṣaro bhavet /
prāṇo dhanuḥ śaro hyātmā brahma vedhyamanuttamam

apramattena veddhavyaṃ śaravattanmayo bhavet /
omityetat trayo vedāstrayo lokāstrayo 'gnayaḥ

viṣṇur-brahmā-haraścaiva ṛksāmāni yajūṃṣi ca /
mātrāḥ sārdhāśca tistraśca vijñeyāḥ paramārthataḥ

tatra yuktastu yo yogī sa tallayamavāpnuyāt /
akārastvatha bhūrloka ukāraścocyate bhuvaḥ

savyañjano makāraśca svarlokaḥ parikalpyate /
vyaktā tu prathamā mātrā dvitīyāvyaktasaṃjñitā

mātrā tṛtīyā cicchaktirardhamātrā paraṃ padam /
anenaiva krameṇaitā vijñeyā yogabhūmayaḥ

omityuccāraṇāt sarvaṃ gṛhītaṃ sadasad bhavet /
hrasvā tu prathamā mātrā dvitīyā dairghyasaṃyutā

tṛtīyā ca plutārdhākhyā vacasaḥ sā na gocarā /
ityetadakṣaraṃ brahma paramoṅkārasaṃjñitam

yastu veda naraḥ samyak tathā dhyāyati vā punaḥ /
saṃsāracakramutsṛjya tyaktatrividhabandhanaḥ

prāproti brahmaṇi layaṃ parame paramātmani /
akṣīṇakarmabandhaśca jñātvā mṛtyumariṣṭataḥ

utkrāntikāle saṃsmṛtya punaryogitvamṛcchati /
tasmādasiddhayogena siddhayogena vā punaḥ /
jñeyanyariṣṭāni sadā yenotkrāntau na sīdati