Mañjuśrīnāmasaṃgīti (another edition) · Verses 21-40

mahārthāṃ nāmasaṃgītiṃ pavitrām aghanāśanīṃ
mañjuśrījñānakāyasya mattaḥ śrotuṃ samudyataḥ //

tat sādhu deśayāmy eṣa ahaṃ te guhyakādhipaḥ
śṛṇu tvam ekāgramanās tat sādhu bhagavann iti //

atha śākyamunir bhagavāṃ savakalaṃ mantrakulaṃ mahat
mantravidyādharakulaṃ vyavalokya kulatrayaṃ //

lokalokottarakulaṃ lokālokakulaṃ mahat
mahāmudrākulaṃ cāgryaṃ mahoṣṇīṣakulaṃ mahat //

imāṃ ṣaḍmantrarājānaṃ saṃyuktām advayodayāṃ
anutpādadharmiṇīṃ gāthāṃ bhāṣate sma girāṃ pateḥ //

a ā i ī u ū e ai o au aṃ aḥ sthito hṛdi
jñānamūrtir ahaṃ buddho buddhānāṃ tryadhvavartināṃ //

oṃ vajratīkṣṇaduḥkhacchedaprajñājñānamūrtaye |
jñānakāyavāgīśvaraarapacanāye te namaḥ ||

tadyathā bhagavāṃ buddhaḥ saṃbuddho 'kārasaṃbhavaḥ
akāraḥ sarvavarṇāgryo mahārthaḥ paramākṣaraḥ //

mahāprāṇo hy anutpādo vāgudāhāravarjitaḥ
sarvābhilāpahetvagryaḥ sarvavāksuprabhāsvaraḥ //

mahāmahamahārāgaḥ sarvasatvaratiṃkaraḥ
mahāmahamahādveṣaḥ sarvakleśamahāripuḥ //

mahāmahamahāmoho mūḍhadhīmohasūdanaḥ
mahāmahamahākrodho mahākrodharipur mahān //

mahāmahamahālobhaḥ sarvalobhanisūdanaḥ
mahākāmo mahāsaukhyo mahāmodo mahāratiḥ //

mahārūpo mahākāyo mahāvarṇo mahāvapuḥ
mahānāma mahodāro mahāvipulamaṇḍalaḥ //

mahāprajñāyudhadharo mahākleśāṅkuśo 'graṇīḥ
mahāyaśā mahākīrtir mahājyotir mahādyutiḥ //

mahāmāyādharo vidvān mahāmāyārthasādhakaḥ
mahāmāyāratirato mahāmāyendrajālikaḥ //

mahādānapatiḥ śreṣṭho mahāśīladharo 'graṇīḥ
mahākṣāntidharo dhīro mahāvīryaparākramaḥ //

mahādhyānasamādhistho mahāprajñāśarīradhṛk
mahābalo mahopāyaḥ praṇidhijñānasāgaraḥ //

mahāmaitrīmayo 'meyo mahākāruṇiko 'gradhīḥ
mahāprajño mahādhīmāṃ mahopāyo mahākṛtiḥ //

mahāṛddhibalopeto mahāvego mahājavaḥ
maharddhiko maheśākhyo mahābalaparākramaḥ //

mahābhavādrisaṃbhettā mahāvajradharo ghanaḥ
mahākrūro mahāraudro mahābhayabhayaṃkaraḥ //