मञ्जुश्रीनामसंगीति (अन्य संस्करण) · श्लोक 21-40

महार्थां नामसंगीतिं पवित्राम् अघनाशनीं
मञ्जुश्रीज्ञानकायस्य मत्तः श्रोतुं समुद्यतः ॥

तत् साधु देशयाम्य् एष अहं ते गुह्यकाधिपः
शृणु त्वम् एकाग्रमनास् तत् साधु भगवन्न् इति ॥

अथ शाक्यमुनिर् भगवां सवकलं मन्त्रकुलं महत्
मन्त्रविद्याधरकुलं व्यवलोक्य कुलत्रयं ॥

लोकलोकोत्तरकुलं लोकालोककुलं महत्
महामुद्राकुलं चाग्र्यं महोष्णीषकुलं महत् ॥

इमां षड्मन्त्रराजानं संयुक्ताम् अद्वयोदयां
अनुत्पादधर्मिणीं गाथां भाषते स्म गिरां पतेः ॥

अ आ इ ई उ ऊ ए ऐ ओ औ अं अः स्थितो हृदि
ज्ञानमूर्तिर् अहं बुद्धो बुद्धानां त्र्यध्ववर्तिनां ॥

ओं वज्रतीक्ष्णदुःखच्छेदप्रज्ञाज्ञानमूर्तये ।
ज्ञानकायवागीश्वरअरपचनाये ते नमः ॥

तद्यथा भगवां बुद्धः संबुद्धो ऽकारसंभवः
अकारः सर्ववर्णाग्र्यो महार्थः परमाक्षरः ॥

महाप्राणो ह्य् अनुत्पादो वागुदाहारवर्जितः
सर्वाभिलापहेत्वग्र्यः सर्ववाक्सुप्रभास्वरः ॥

महामहमहारागः सर्वसत्वरतिंकरः
महामहमहाद्वेषः सर्वक्लेशमहारिपुः ॥

महामहमहामोहो मूढधीमोहसूदनः
महामहमहाक्रोधो महाक्रोधरिपुर् महान् ॥

महामहमहालोभः सर्वलोभनिसूदनः
महाकामो महासौख्यो महामोदो महारतिः ॥

महारूपो महाकायो महावर्णो महावपुः
महानाम महोदारो महाविपुलमण्डलः ॥

महाप्रज्ञायुधधरो महाक्लेशाङ्कुशो ऽग्रणीः
महायशा महाकीर्तिर् महाज्योतिर् महाद्युतिः ॥

महामायाधरो विद्वान् महामायार्थसाधकः
महामायारतिरतो महामायेन्द्रजालिकः ॥

महादानपतिः श्रेष्ठो महाशीलधरो ऽग्रणीः
महाक्षान्तिधरो धीरो महावीर्यपराक्रमः ॥

महाध्यानसमाधिस्थो महाप्रज्ञाशरीरधृक्
महाबलो महोपायः प्रणिधिज्ञानसागरः ॥

महामैत्रीमयो ऽमेयो महाकारुणिको ऽग्रधीः
महाप्रज्ञो महाधीमां महोपायो महाकृतिः ॥

महाऋद्धिबलोपेतो महावेगो महाजवः
महर्द्धिको महेशाख्यो महाबलपराक्रमः ॥

महाभवाद्रिसंभेत्ता महावज्रधरो घनः
महाक्रूरो महारौद्रो महाभयभयंकरः ॥