મઞ્જુશ્રીનામસંગીતિ (અન્ય આવૃત્તિ) · શ્લોક 21-40

મહાર્થાં નામસંગીતિં પવિત્રામ્ અઘનાશનીં
મઞ્જુશ્રીજ્ઞાનકાયસ્ય મત્તઃ શ્રોતું સમુદ્યતઃ ॥

તત્ સાધુ દેશયામ્ય્ એષ અહં તે ગુહ્યકાધિપઃ
શૃણુ ત્વમ્ એકાગ્રમનાસ્ તત્ સાધુ ભગવન્ન્ ઇતિ ॥

અથ શાક્યમુનિર્ ભગવાં સવકલં મન્ત્રકુલં મહત્
મન્ત્રવિદ્યાધરકુલં વ્યવલોક્ય કુલત્રયં ॥

લોકલોકોત્તરકુલં લોકાલોકકુલં મહત્
મહામુદ્રાકુલં ચાગ્ર્યં મહોષ્ણીષકુલં મહત્ ॥

ઇમાં ષડ્મન્ત્રરાજાનં સંયુક્તામ્ અદ્વયોદયાં
અનુત્પાદધર્મિણીં ગાથાં ભાષતે સ્મ ગિરાં પતેઃ ॥

અ આ ઇ ઈ ઉ ઊ એ ઐ ઓ ઔ અં અઃ સ્થિતો હૃદિ
જ્ઞાનમૂર્તિર્ અહં બુદ્ધો બુદ્ધાનાં ત્ર્યધ્વવર્તિનાં ॥

ઓં વજ્રતીક્ષ્ણદુઃખચ્છેદપ્રજ્ઞાજ્ઞાનમૂર્તયે ।
જ્ઞાનકાયવાગીશ્વરઅરપચનાયે તે નમઃ ॥

તદ્યથા ભગવાં બુદ્ધઃ સંબુદ્ધો ઽકારસંભવઃ
અકારઃ સર્વવર્ણાગ્ર્યો મહાર્થઃ પરમાક્ષરઃ ॥

મહાપ્રાણો હ્ય્ અનુત્પાદો વાગુદાહારવર્જિતઃ
સર્વાભિલાપહેત્વગ્ર્યઃ સર્વવાક્સુપ્રભાસ્વરઃ ॥

મહામહમહારાગઃ સર્વસત્વરતિંકરઃ
મહામહમહાદ્વેષઃ સર્વક્લેશમહારિપુઃ ॥

મહામહમહામોહો મૂઢધીમોહસૂદનઃ
મહામહમહાક્રોધો મહાક્રોધરિપુર્ મહાન્ ॥

મહામહમહાલોભઃ સર્વલોભનિસૂદનઃ
મહાકામો મહાસૌખ્યો મહામોદો મહારતિઃ ॥

મહારૂપો મહાકાયો મહાવર્ણો મહાવપુઃ
મહાનામ મહોદારો મહાવિપુલમણ્ડલઃ ॥

મહાપ્રજ્ઞાયુધધરો મહાક્લેશાઙ્કુશો ઽગ્રણીઃ
મહાયશા મહાકીર્તિર્ મહાજ્યોતિર્ મહાદ્યુતિઃ ॥

મહામાયાધરો વિદ્વાન્ મહામાયાર્થસાધકઃ
મહામાયારતિરતો મહામાયેન્દ્રજાલિકઃ ॥

મહાદાનપતિઃ શ્રેષ્ઠો મહાશીલધરો ઽગ્રણીઃ
મહાક્ષાન્તિધરો ધીરો મહાવીર્યપરાક્રમઃ ॥

મહાધ્યાનસમાધિસ્થો મહાપ્રજ્ઞાશરીરધૃક્
મહાબલો મહોપાયઃ પ્રણિધિજ્ઞાનસાગરઃ ॥

મહામૈત્રીમયો ઽમેયો મહાકારુણિકો ઽગ્રધીઃ
મહાપ્રજ્ઞો મહાધીમાં મહોપાયો મહાકૃતિઃ ॥

મહાઋદ્ધિબલોપેતો મહાવેગો મહાજવઃ
મહર્દ્ધિકો મહેશાખ્યો મહાબલપરાક્રમઃ ॥

મહાભવાદ્રિસંભેત્તા મહાવજ્રધરો ઘનઃ
મહાક્રૂરો મહારૌદ્રો મહાભયભયંકરઃ ॥