Mañjuśrīmūlakalpa · Chapter 25

āryamañjuśriyamūlakalpādbodhisattvapiṭakāvataṃsakānmahāyānavaipulyasūtrāddvāviṃśatitama nimittajñānajyotiṣapaṭalavisaraḥ parisamāpta iti //
Atha pañcaviṃśatitamaḥ paṭalavisaraḥ /
atha bhagavān śākyamuniḥ punarapi grahanakṣatratārakajyotiṣagaṇānāmantrayate sma / + + + + śṛṇvantu bhavantaḥ sarve / anatikramaṇīyo 'yaṃ kalparājā mañjuśriyaḥ kumārabhūtasya mantratantrābhiṣekamaṇḍalavidhāna nica japahomaniyamavidyāsādhanapravṛttānāmasmiṃ kalpavare vidyādharāṇāṃ tithinakṣatracaritagaṇitāmabhijñānāṃ nakṣatra bhavadbhiḥ vighnaṃ kartavyam / pravṛttānāṃ śāsane 'smin sarvaiśca devasaṅghaiḥ tatra rakṣā kāryā / sarve ca duṣṭasattvāni niṣeddhavyāni, roddhavyāni, śāsayitavyāni, sarve sarvaṃ na ghātayitavyāni, vyavasthāsu ca sthāpayitavyāni śāsane 'smin daśabalānām //
atha bhagavāṃ śākyamuniḥ sarvatathāgatoṣṇīṣābhyunnataṃ nāma samādhiṃ samāpadyate sma sarvaduṣṭanivāraṇārtthaṃ sarvasattvānām / samanantarasamāpannasya bhagavataḥ śākyamuneḥ sarve ca te tathāgatāḥ daśadiglokadhātuvyavasthitā bhagavantaṃ śākyamuniḥ tathāgataṃ śuddhāvāsabhavanasyaṃ vyalokyopasaṅkramante / upasaṅkramya acintyabuddhasvakādhiṣṭhānena bhagavantaṃ śākyamuniṃ tathāgatamāmantrayate sma //
bhāṣa bhāṣa bho mahāvīra lokānāṃ ca hitodayam /
pravṛtte sarvamantrāṇāṃ samantratantra yathāvidhi

bhāṣitaḥ sarvabuddhaistu vidyārājā maharddhikaḥ /
ekākṣaraḥ pravaro hyagro naṣṭe kāle kalau yuge

pravaraḥ sarvamantrāṇāṃ sarvabuddhaistu bhāṣitam /
uṣṇīṣarājā mahāvīryaḥ sarvabhūtanivāraṇam

niṣeddhā grahanakṣatrāṃ mātarāṃ duṣṭacetasām /
vighnāḥ sarve tathā loke ye cānye duṣṭacetasā

anugrahārtthaṃ tu sattvānāṃ jāpināṃ ca sukhodayām /
sakale 'smin śāsane hyagraḥ cakravartirmaharddhikaḥ /
uṣṇīṣarājā mahāvīryaḥ sarvasmiṃ parameśvaraḥ